06/07/2026
التأسيس مش إن الطفل يكتب صفحة وخلاص، ولا إني أقول الكلمة وهو يكرر ورايا وبس.
التأسيس الحقيقي بيبدأ من أول ماسكة القلم، طريقة كتابة الحرف، تنظيم الكراسة، قعدة الطفل، وتركيزه وفهمه لكل خطوة.
للأسف بيجيلي أطفال من أماكن تانية كتير، حافظين أو كاتبين، لكن أساسهم ضعيف جدًا…
حروف مكتوبة غلط، اتجاهات الحروف غلط، مسكة قلم غلط، ومفيش تثبيت حقيقي للطفل.
وده بيتعب الطفل بعد كده أكتر ما يفيده، لأن أي غلط في البداية بيكمل معاه.
التأسيس مش سباق مين يخلص أسرع، التأسيس إن كل خطوة تاخد حقها، والطفل يفهم ويتثبت قبل ما ينقل للي بعدها.
وكمان شغل التأسيس ما ينفعش يبقى على حسب “نخلص إيه وما نخلصش إيه” أو ضغط إننا نجري في المنهج.
المدرس الصح بيشتغل لمصلحة الطفل الأول، ويعرف إيه اللي يناسبه وإيه اللي محتاج يتأسس فيه فعلًا.
لأن الطفل لما يتبني صح من البداية… كل حاجة بعد كده بتبقى أسهل عليه.أوقات كتير الشغل بيكون شفوي أكتر من الكتابة، لأن الهدف مش نملا صفحات وخلاص، الهدف إن الطفل يفهم ويتثبت صح.
ومش لازم كل حصة تبقى كتاب وكراسة وكتابة طول الوقت، لأن في مهارات مهمة جدًا الطفل بيكتسبها بالتدريب والتفاعل والتركيز قبل القلم أصلًا.
وكمان لما ولي الأمر يختار مدرس لطفله، لازم يبقى عنده ثقة في طريقة شغله، لأن التأسيس مينفعش يبقى كل شوية “اكتبله صفحات أكتر” أو “خلص الجزء ده بسرعة”.
كل طفل له مستوى وخطوات لازم يمشيها بالراحة علشان الأساس يبقى سليم فعلًا.
بكل بساطة… أنا أقدر أكتب للطفل وأخليه ينقل ورايا صفحات كاملة، لكن هل ده معناه إنه فهم؟ طبعًا لا.
الشغل الصح في التأسيس إن الطفل يفهم الأول، يسمع، يجاوب، يحلل، ويتفاعل بنفسه.
جزء كبير جدًا من الحصة بيكون شفوي:
بسأله، أناقشه، أخليه يفكر، أعرف هو فاهم المعلومة فعلًا ولا متعود يحفظ شكل السؤال وخلاص.
في أطفال بتعرف تحل من شكل السؤال، أو متعودة على طريقة ثابتة للحل، لكن لو غيرتلها شكل السؤال أو خليتها تقرأ لوحدها تقف، وده معناه إن الأساس نفسه لسه مش ثابت.
ومن أكبر أخطاء التأسيس كمان إن المدرس يفضل يقرأ للطفل طول الوقت، والطفل مجرد يردد وراه.
الصح إن الطفل هو اللي يحاول يقرأ، يغلط ويتصححله، يفكر وينطق بنفسه، لأن كده فعلًا بيبدأ يفهم ويتأسس.
التأسيس الحقيقي مش “املا كراسة”…
التأسيس الحقيقي إن الطفل يخرج فاهم، قادر يقرأ ويفكر ويعتمد على نفسه خطوة خطوة.
