20/09/2024
الحلاوة بقى يسيدي إنك لما تطّلع على شخص، شئ أو حتى بنيان حلو ومبهر بالنسبالك ! ميشدكش سحر إبهاره ويعميك عن عيوبه التانية اللي ممكن وجودها يصرف نظرك عن محاسنه دي أصلًا ولا تهزّك، ولا تخليك تاخدها في الاعتبار طالما أساسه مش صالح.
زي ايه يعني ؟
الهدهد في سورة النمل، لما قال لسيدنا سليمان عن بلقيس إني وجدت امرأة تملكهم، ومالها؟ وأوتيت من كل شئ، ولها عرش عظيييييم (الست عندها حاجات كتير وعندها عرش فخم، حاجة كده آخر أوبّهه)
بس هل كل البروبرؤ ده خلاه ينسى ربنا اللي في قلبه، والتوحيد وميشوفش شركهم ؟
لأ
قال وجدتها وقومها يسجدون للشمس من دون الله وزين لهم الشيطان أعمالهم فصدهم عن السبيل فهم لا يهتدون، ألا يسجدوا لله الذي يخرج الخبء في السماوات والأرض ويعلم ما تخفون وما تعلنون، الله لا إله إلا هو رب العرش العظيم ♥️
حصل جواه استنكار، مهموش العرش والممتلكات وكل الحاجات اللي بتلمع دي، معماش عينه شركهم.
