03/10/2024
هل ممكن الطفل يكسل يتكلم وهو قادر يتكلم؟
اه ممكن
هل البيئة المحيطة بالطفل ممكن تأثر علي استجابة الطفل من عدمه ؟
اه جدا جدا جدا
📍احيانا الطفل بيكون قادر علي التواصل واللغة الاستقبالية عنده ممتازة في تنفيذ الأوامر والتعليمات
بس مش عايز يتكلم !
ماما بتفهمه من عينه ، ماما بتلبيه اي طلب من قبل ميطلبه ، بنديله اللي هو عايزة بدون ما نذكر اسم الشئ
ماما بتديله الماية من قبل ميطلبها
فيتواصل ليه ؟
ده هو كده اخر رواقة 🦦
نعمل ايه ؟
لو الطفل قال الكلمة ( قبل كده )حتي لو غلط
هنا يبقي كسل ❌ لازم هنا نتقل ، نعمل من بنها ، نتجاهل احيانا
++
نردد اسم الشيئ كتيير
عايز ماية ، انت عايز ماية ، دي اسمها ماية
ملحوظة " انا لسا مدتهوش الماية ،، اتقلي شوية "
طيب لو الطفل مكتسبش الكلمة قبل كده نهائي مينفعش تتجاهليه عشان هينفر من التواصل والكلام
طب نعمل ايه ؟
١-ترددي الحاجة قدامه كتييير
هو بيشاور علي الماية وعمره ماقالها
رددي كتييير ماية
اشرب ماية ، عايز ماية ،، هات الماية
تخيلي كل ما يشرب بنقول كده 😅
٢- استخدمي طريقة الاغلاقات
عشان ننهي مسألة الكسل لازم الطفل يتفاعل معاكي لغويا
فاانتي تقولي كلمة وتفتحيها وهو يكمل
اشرب ،، ماية
اشرب .... " وتستني ثواني بس عشان يرد يقول ماية "
لو مقالش قولي انتي المهم يتعود
٣- يندمج بااطفال واشخاص غيرك وبدونك
( حضانة - تجمع عائلي - كيدز ايريا )
الطفل اللي كسل يتكلم هو اتعود ان ماما او بابا فهمه خلاص فاانتي بقيتي كارت محروق دلوقتي لازم يقابل بشخص تاني ويصطدم ان الناس مش فاهماه ومش بتتواصل معاه ،،، هنا هيضطر يخضع للتواصل بالكلام
٤- القراءة
قراءة القصص بشكل يومي وعرض الأسئلة عن القصة بيحفز الطفل انه بتفاعل ويبادر
٥- اللعب التحفيزي
تلعبي مع طفلك لعب يخليه يضطر انه لازم يقول حاجة
مثلا ( لعبة المكعبات )
كل واحد هيحط مكعب ويقول ( احط )
مثلا لعبة ( الحيوانات المجسمة) هنعمل بيت حيوانات ونحرك الحيوانات وكل واحد يقول صوت الحيوان اللي معاه ....الخ
الكسل من ارخم اسباب التأخر اللغوي اللي بتحتاج جهد من طرفين ( الام و الطفل )
دورك هنا انك ترددي وتتقلي
د/هايدي مجدى..
