https://www.facebook.com/105888769207262/

Binary Academy, Shebin al-Kom, Menoufia (2026)

06/08/2023

هى ال SQL احسن ولا ال MySQL ؟ 🤔

سؤال بيسأله كتير من المبتدئين وللاسف هو سؤال غلط تماما ومش بيجتمعوا في مقارنه واحده
فى البوست دا هنوضح مع بعض كل واحد منهم وبينتموا ل ايه بالظبط

فى الاول لازم تعرف يعنى ايه قاعده البيانات او Database وهى عباره عن بيانات بيتم تنظيمها بهيكل معين وبتتخزن على جهاز ما او Server
ولو فاكر من بوست علاقه الجبنه بال Data Analysis (ارجع اقرأه عشان هيفهمك اهميه ال Data فى حياتنا 😉 ) ولكن الفائده من وجود قاعده بيانات منظمه هى قدرتك على استخراج تقارير مفصله ومنظمه واحصائيات دقيقه عن شغلك دا غير الاستعلامات اللى تقدر تقوم بيها باستمرار على البيانات اللى بتجمعها وبالتالى هى جزء لا يمكن الاستغناء عنه فى اى برنامج او مؤسسه 👌

نيجي للجزء الاهم وهو يعنى ايه SQL او Structured Query Language
ال SQL او لغه الاستعلامات اللى بنقدر نستخدمها بداخل قواعد البيانات العلائقيه Relational Database ومن خلالها اقدر اعمل ادخال للبيانات والتعديل عليها والعرض والحذف وعمليات ال Filtration على البيانات

طب يعنى ايه Relational Database ؟
دى نوع من انواع قواعد البيانات واللى بتعتمد فى بنائها على وجود جداول وعلاقات بين الجداول وبعضها وليها مميزات كتير زى انك تقدر بسهوله تستعلم عن بيانات بينها روابط معقده وموجوده فى جداول متفرقه
وكمان الهيكل المسبق للبيانات بيقلل نسبه الوقوع فى اخطاء ودا لان ال Data هيتم تخزينها وفقا لقواعد وشروط معينه
ولكن مع قوه ال Relational DB فى استعلامها عن روابط معقده بين البيانات الا انها غير قادره على تخزين او استعلام عن بيانات غير مهيكله ودا لان الروابط والتنسيق بينهم غير معروف بالاضافه الى انها بتحتاج وقت مسبق لانشاء مخطط او هيكل قاعده البيانات (scheme) ودا عشان تقدر توفر فيما بعد استعلامات معقده عن البيانات بين الجداول وبعضها

نيجي للنص التانى من السؤال وهو يعنى ايه MySql ؟
فى الاول لازم نعرف مصطلح ال
Relational Database Management Systems (RDBMS)
او انظمه اداره قواعد البيانات العلائقيه
والانظمه دى بتختلف فى طريقه تعاملها مع البيانات من كيفيه التخزين والاسترجاع وكمان حجم البيانات اللى تقدر تخزنها فى كل واحد منهم وشكل الحمايه اللى يقدر يوفرها كل نظام

وال MySql هو احد RDBMS المنتشره بين المبرمجين ولكن فى انواع اخرى زى
SQL Server , SqLite , Oracle , PostgreSQL ....
وكل نوع بيستخدم فى انظمه معينه ترجع لمتطلبات النظام نفسه وعلى اساسها بيتم اختيار ال RDBMS المناسب

وبكدا نقدر نختصر الاجابه على السؤال فى الاتى
ال SQL : هى لغه استعلامات بنستخدمها فى قواعد البيانات القائمه على وجود علاقات وروابط بينها ومن خلالها بقدر اعمل اضافه وحذف وعرض وتعديل على كل البيانات
اما ال MySql : هو احد انظمه قواعد البيانات العلائقيه (RDBMS) واللى بيقوم بعمل تخزين للبيانات وعرضها وتأمينها بشكل معين وبنستخدم ال SQL فيه عشان نقدر نستعلم عن البيانات بشكل كامل

يا ترى هل فيه أنواع تانية القواعد البيانات غير ال relational database شاركنا في التعليقات وايه اللي تعرفه عن أي نوع تاني لو فيه..

-------------------------
لو استفدت من البوست شاركه مع غيرك علشان الاستفادة توصل للكل 💙

03/08/2023

أنت إنسان ولا آلة 🫵🏻

يا ترى هتعمل ايه لو اكتشفت أن صاحبك اللي بتتواصل معاه دايما وبتتشارك معاه أجزاء كتيرة من حياتك عبارة عن آلة مش إنسان 😳

ممكن يبان أن دا موضوع خيال علمي، لكن مع التطور السريع في الذكاء الاصطناعي بيبقا دايما فيه سؤال هل ممكن للذكاء الاصطناعي أن يستبدلنا كبشر 🤔 وهنا منقصدش أن يستبدل الوظايف والمهن، لكن نقصد يستبدل البشر نفسهم، يعني يوصلو لدرجة تفكير أو مشاعر قريبة من البشر والناس متقدرش تميز هل دا إنسان ولا آلة 🤖

عالم الرياضيات آلان تورينج (Alan Turing) اقترح إختبار سنة 1950 نقدر من خلاله نختبر لو كانت الآلة تقدر توصل لنفس درجة الذكاء البشري ولا لأ اسمه إختبار تورينج.
الاختبار عبارة غرفتين غرفة فيها إنسان وغرفة فيها آلة وبرا الغرفتين فيه ممتحن هيحاول يسأل أسألة مرتبطة بالإبداع والذكاء البشري، ويستقبل إجابة مكتوبة من كل غرفة ويشوف هل يقدر يميز أنهى غرفة فيها الآلة وأنهى فيها الإنسان. ❕

لحد دلوقتي مقدرش أي نموذج ذكاء اصطناعي أنه يجتاز إختبار تورينج بشكل مُرضي، ودا بالرغم التطور الكبير في معالجة اللغات الطبيعية (NLP) ورؤية الحاسب (Computer Vision) إلا أن الآلة بتقدر توصل لمستوى كويس داخل سيناريو معين محدد، لكن متقدرش تفهم العالم خارج السيناريو دا ودا بيرجع لصعوبة وصول الآلة للفهم العميق زي العقل البشري وفهم السياق والمنطق.👌🏻

مع التطور السريع في الذكاء الاصطناعي وظهور نماذج محادثة قوية زي ChatGPT تفتكر ممكن في المستقبل الذكاء الاصطناعي يوصل لمرحلة الذكاء البشري ؟؟ 🤔
شاركونا بآرائكم في التعليقات

----------------------------

لو شايف البوست مفيد شاركه مع غيرك علشان الاستفادة توصل للكل 💙

01/08/2023

بنسمع كتير عن مصطلح تعلم الآلة أو ال Machine Learning ؟
في البوست دا هنحاول نستكشف يعني Machine Learning وايه أشهر أنواع لتعلم الآلة ومثال على كل نوع باختصار 😋

علم الآلة يعني ازاي أقدر أخلي الآلة تتعلم زي البشر وتاخد قرارات لوحدها بناء على خبرتها السابقة والتي تتمثل فى البيانات
ويعتبر فيه أنواع وطرق مختلفة للتعلم من أهمهم تلت أنواع رئيسية وهم :

1 - التعلم بالإشراف Supervised Learning
المقصود بالتعلم بالإشراف هو تعلم الآلة وفقا لبيانات يتم تمريرها للآلة على شكل مدخلات ومخرجات وبعض العلامات التى تعبر عن النتائج المطلوبه و تسمى Labeled Data.

يعني مثلا عايزين نعمل برنامج بمجرد ما أرفع صورة حيوان معين يقدر يقولي دا حيوان ايه.
بنبدأ اننا نعلم الآلة عن طريق تدريبها على صور كتيرة مختلفة لكل نوع حيوان وإسمه او فصيلته
والطريقه بتكون على هيئه انى برفق صور كتيرة لقطط مختلفة وبعرفه إن دي كلها صور قطط

دور الآلة هنا عن طريق خوارزمية معينة انها تعرف ايه الخصائص المشتركة الموجودة في صور كل نوع حيوان معين ( يعني الصور المختلفة للقطط دي ليها خصائص مشتركة زي حجم الراس وأبعاده، شكل الفرو، حجم الجسم، وهكذا) وبالتالي لما ترفق صورة جديدة الحيوان معين وعايز تعرف هو إيه، يقدر يجاوب عليك وفقا لخصائص الصورة المرفقة.
2 - التعلم بدون إشراف Unsupervised Learning

وفي هذا النوع تكون البيانات عبارة عن مدخلات ولايوجد نواتج لها وتسمي unlabeled data بحيث تعمل على إيجاد الأنماط المشتركة لشكل وبنية المدخلات.

يعني مثلا لو معاك 100 كتاب وعايز تخلي الآلة تقسمهم ل 10 أقسام بحيث كل مجموعة كتب محتواها قريب من بعضه تكون في قسم واحد

الآلة عن طريق خوارزمية معينة هتحاول تشوف ايه الحاجات الأكثر إشتراكا بين كل مجموعة كتب وتحطهم في نفس القسم يعني مثلا كتب بتحتوي على معادلات رياضية ورسومات هندسية هتحاول تحطهم في قسم مع بعضهم وكتب تانية محتواها بيتكلم عن الكواكب والنجوم والمجرات هتحطهم في قسم واحد برضو وهكذا.

3 - لتعلم بالتعزيز Reinforcment Learning

وهو عن طريق مبدأ المكافأة والعقاب بحيث لو الآلة سلكت سلوك صحيح أحاول أطبقلها مكافأة ولو سلكت سلوك خاطئ أطبق زي مبدأ عقاب
والآلة دايما بتبحث عن المكافأة وتتجنب العقاب وبالتالي الخطوات الخاطئة السابقة بتحاول تتجنبها بعد كدا والخطوات الصحيحة بتحاول تعززها.

ومثال على دا لعبة الشطرنج الآلة ممكن تبدأ أول مرة وتقوم بحركات في اللعبة غير منطقية تؤدي أنها تخسر لكن مع التدريب الكتير والتعلم من الأخطاء وتعزيز الخطوات الرائعة بتصبح الآلة تضاهي أبطال العالم في اللعبة ...

========================================
لو شايف البوست مفيد ليك ممكن تشيره مع غيرك عشان يستفيد 🤍

30/07/2023

ايه علاقة الجبنة بال data analysis 🤔

◀️ نزلت تتسوق قبل كدا من سوبر ماركت كبير ومحدد طلباتك وميزانيتك💰 وبعدين تلاقي نفسك صرفت أكتر بكتير ما كنت مخطط له ومش عارف هتكمل الشهر ازاي🤦‍♂️

=============================
في البوست دا هنحاول نكتشف ازاي أن البيانات كنز للشركات وأصحاب الأعمال، وازاي من خلالها يقدرو يحققو أكبر مكسب ممكن
=============================

واحدة من المنتجات اللي ممكن تشتريها كتير من أي سوبر ماركت هي الجبنة، لكن دايما بتلاقي تلاجة الجِبَن في الآخر ودا بيبقا في أغلب المحلات كدا، طب دا صدفة ولا بتبقى مقصودة؟

في الحقيقة المحلات بتبقا عايزاك تشوف أكبر قدر ممكن من منتجاتها، دا بيزود إحتمالية أنك تشتري حاجة مكنتش مخطط لها قبل كدا لأي سبب:
- حاجة شوفتها جديدة قلت ما أجربها.
- معاك طفل كان نفسه في حاجة من اللي شافهم.

علشان كدا أكتر المنتجات اللي بتباع أصحاب المحلات الكبيرة بيخلوها في مكان بحيث وأنت رايحلها يضمن أنك تعدي على أغلب المنتجات التانية رايح جاي وعلشان كدا برضو الجبنة بتبقا في آخر المحل.

كمان أصحاب المحلات بيحللو بيانات المستهلكين ويعرفوا ايه هي أكتر المنتجات اللي غالبا بتباع مع بعض، وبالتالي بناء عليه يخلوهم بعاد عن بعض يعني تلاقي الجبنة في ركن في آخر المحل لكن متلاقيش العيش قريب منه مثلا.

تحليل البيانات، واتخاذ قرارات بناء عليها هي أصبحت في كل حاجة في حياتنا اليومية، الفيس بوك بيحلل ايه البوستات اللي بتقف عندها كتير وبتتفاعل معاها وايه اللي بتقلب علطول ومبتهتمش بيه وبناء عليه يقترحلك دايما بوستات مهتم بيها وبكدا ممكن تقضي وقت كبير عليه من غير ما تحس وهكذا في اليويتويب، الأسواق الأون لاين زي أمازون كل دول بيعتمدو على تحليل بياناتك وإضافة أفضل تجربة ليك.

وبكدا نكون عرفنا أهمية البيانات في حياتنا اليومية لو عايز تعرف أكتر عن ازاي نتعامل مع البيانات وطرق استغلالها وتخصصاتها أو حتى معلومات عن أنواع الجبنة في السوق تابعنا 😁

======================
لو شايف البوست مفيد شاركه مع غيرك عشان الإستفادة توصل للكل 💙

29/07/2023

جربت تطبع أكتر من ملف قبل كدا ولقيت الملفات المطبوعة تداخلت مع بعضها بشكل عشوائي ؟

مش من الطبيعي أو المنطقي أن دا يحصل بالعكس لو اديت أكتر من أمر طباعة لأكتر من ملف ورا بعض بتلاقي الورق مطبوع بنفس ترتيب الأوامر من غير مشاكل.

يا ترى ايه سر عملية إدارة الطابعة دي أو سر عملية إدارة الموارد داخل جهاز الكمبيوتر عموما ؟

أحب أعرفك ببطل القصة وهو "نظام التشغيل أو ال Operating System"
فى طبقة أنت كمستخدم بتتعامل فيها مع الكمبيوتر بتتكون من البرامج والواجهات اللى بتستخدمها وكل منها لها دور معين ونتائج مختلفة
وفى نفس الوقت أنت تقدر تشوف مكونات الكمبيوتر المادية زي المعالج والذاكرة وأجهزة الإدخال والإخراج ، نظام التشغيل بقا يعتبر طبقة وسيطة بينهم ومن مهامة الأساسية هي تعيين الموارد المادية المطلوبة لكل عملية أو برنامج ( يعني بفتح برنامج ال word ، علشان يشتغل محتاج يستخدم ال CPU ومحتاج مساحة من ال RAM علشان يخزن اللي هيتكتب، وكمان نظام التشغيل بيتأكد أن ال CPU متاح قبل ما يسمح لبرنامج ال word يستخدمه، لو مش متاح بيدي دور للبرنامج في طابور زي طابور إنتظار لحد ما المعالج يبقا متاح ويبقا البرنامج هو اللي عليه الدور)

طب دلوقتي عرفنا دور نظام التشغيل لكن فيه سؤال مهم هنا وهو مساحة نظام التشغيل ممكن توصل ل 20 جيجا أو 32 جيجا وممكن أكتر كمان في حين أن ال RAM عندك ممكن تكون 8 جيجا يعني حجمها أقل بكتير من حجم نظام التشغيل طب ازاي بيشتغل نظام التشغيل وبيتحمّل على ال RAM؟؟؟

الحل هنا في برنامج متخزن في ذاكرة للقراءة فقط ROM (read only memory) ويدعى Bootstrap Program
البرنامج دا كل دوره وقت ما تضغط على زر تشغيل الكمبيوتر يبدأ يعمل فحص كامل ويتأكد من أن كل حاجة متوصلة ومظبوطة بعد ما يتأكد أن كله تمام يروح يجيب جزء صغير من نظام التشغيل اسمه ال Kernal واللى بيتواجد فى Hard Disk ويحمّله على ال RAM وبعدين يعطيه التحكم الكامل.

وبكدا ممكن نعرف ال Kernal على أنه البرنامج اللي بيبدأ العمل دايما من أول تشغيل الكمبيوتر لحد ما نقفل الكمبيوتر وهو حجمه صغير جدا ولكن يختلف من نظام تشغيل للتاني.

وبكدا نكون وصلنا لآخر البوست قولنا في كومنت تحب تعرف ايه تانى عن ال Operating System أو إيه بالنسبالك مش مفهوم؟

-----------------------------
لو شايف البوست فيه معلومات مفيدة ممكن تشاركه مع غيرك عشان الإستفادة تعم الجميع 🤍

28/07/2023

تفتكر ازاى الكمبيوتر بيتواصل مع العالم؟

الكمبيوتر هو يعتبر آلة تحتوي على رقائق إلكترونية الرقائق دي مش بتفهم إلا النبضات الكهربية.

طيب يعني إيه نبضة كهربية؟
النبضة الكهربية هى عبارة عن مرور تيار كهربي في موصل أو عدم مرور تيار. وبالتالي عندي قيمتين للنبضات الكهربية إما مرور تيار ودا بنعبر عنه ب 1 أو عدم مرور تيار ودا بنعبر عنه ب 0
وبناء عليه لو فيه سلك واحد هيكون عندنا إحتمالين ممكنين لقيم النبضات داخل السلك دا ( 2 أس 1) إما مرور تيار "1" أو عدم مرور تيار "0".

ولو عندنا سلكين هيكون عندنا 4 احتمالات ممكنة لنبضات السلكين( 2 أس 2) وهما:
{(0,0) , (0,1) , (1,0) , (1,1)}
وبالتالي لو عايزين نحسب عدد الاحتمالات الممكنة لقيم نبضات بتمر في n من الأسلاك هتكون هي 2 أس n.

وبالشكل دا قدرت اخلق الكثير من الاحتمالات الممكنه بمجموعه اسلاك موصله ولكل احتمال قيمه مميزه ومدلول معين
وبكدا كل الحروف والارقام والرموز اللى محتاج تكتبها للكمبيوتر تقدر تعملها شفره (نبضه كهربيه) مميزه وفريده من خلال بعض الاسلاك المتصله معا

وعلى سبيل المثال لو مررنا كلمه hi هتحتاج نبضه تعبر عن كل حرف بحيث يقدر الكمبيوتر يميز كل حرف
- h : 01101000
- i : 01101001
ودا اللى يقدر يفهمه الكمبيوتر وهو ما يعرف بال Binary Code او Machine Code
وهو باختصار عباره عن شفره لنقل البيانات فى تسلسل رقمي بحيث أن كل خانة تتكون من رقمين اما 0 أو 1 وبناء عليها خلق عدد احتمالات لانهائى من القيم المميزه.

والكمبيوتر لما يظهر الحرف على الشاشة بيحول ال binary code للحرف المناظر ليه مره اخرى

طب ازاي بيعرف الحرف المناظر ليه؟
عن طريق نظام اسمه ASCII Code وهو إسناد رقم لكل حرف أو رمز وكان ال ASCII في البداية عبارة عن 7 bit أي كان إجمالي الحروف أو الرموز التي يمكن أن نتعامل معها هي 128 حرف أو رمز (2 أس 7) ثم أصبح ال ASCII عبارة عن 8 bit أي تم إضافة رموز أخرى وهكذا أصبح من الممكن تمثيل 256 حرف أو رمز ( 2 أس 8). ودا عدد احتمالات كافى جدا لاحتياجنا

وتعرف عملية تحويل الحرف او الرمز إلى binary code ب Encoding وعملية تحويل ال binary code إلى الحرف او الرمز المقابل له بعملية ال Decoding

وختاما ال binary code يعتبر اللغة الأم للكمبيوتر الذي يستخدم في معالجة وفهم المعلومات.
وهو يتكون فقط من 0 و 1 ويمثل كل شئ من حروف وأرقام و صور وصوتيات وفيديوهات.
هو الأساس ل كيف يعمل الكمبيوتر ويتواصل مع العالم.

قولنا بقى تقدر تكتب إسمك بالـ Binary Code؟ 🤔

-----------------------
لو وصلت لحد هنا يبقى استفدت معلومة فا إعمل شير خلي غيرك كمان يستفيد 💙

Binary Academy

06/08/2023

03/08/2023

01/08/2023

30/07/2023

29/07/2023

28/07/2023

Address

Website

Alerts

Shortcuts

Share

Category

Listing takedown request