18/10/2025
بعد سنيييين من ممارسة دوري كأب ، أكتشفت إن احنا أضحك علينا بنظريات التربية الإيجابية دي ، و حوارات زي صاحب أبنك و إنزل لمستواه و افتح نقاشات معاه علشان يبقى صريح معاك و مينفعش تمد ايدك عليه علشان صحته النفسية ، و مينفعش تفرض رأيك عليه، اديله حرية الاختيار و القرار علشان يبقى عنده إستقلالية، و عاملك طفلك على إنه راجل كبير علشان تبني شخصيته و و وو
الحقيقة كل ده هري ، و انا بعد كل السنين دي أكتشفت أن احسن نموذج للأبوه هو أبهاتنا أحنا
الأب على أيامنا كان نموذج للسلطة المطلقة مكنش مطالب بأي تفسير لقرارته
الأب على أيامنا مكنش عنده غير إجابة واحده لأي اعتراض من ولاده " هو كده " و كنا بنسمعها و نلتزم بيها حتى لو مش عاجبنا 🤛
استبداد أباءنا كان شامل كل حاجة بدءا من الأكل و اللبس مرورا بمكان و ميعاد الخروجات و المصيف وصولا لنوعية للدراسة و اختيار الأصدقاء ... و كلها إجابة واحده " علشان انا عارف الصح و شايف مصلحتك اكتر منك " جملة واحده كافية انها تنهي اي محاولة للاعتراض أو النقاش
وبرغم كل اللي فات ده ، الأب كان ليه هيبة .. هيبة و احترام بتمتد لكل اللي الناس اللي في مقامه (عمك ، خالك، ابو صاحبك، صاحب ابوك )... لدرجة ان لو في واحد جارك في سن ابوك كنت تخاف لا يشوفك و انت بتعمل حاجة غلط
أباءنا كان رافعين شعار اللي بيذاكر بيذاكر لنفسه ، مكنوش مكرسين حياتهم يجروا ورانا دروس و كورسات .. لكن لو بنفسك طلبت درس أو كورس حيديك و يدعمك
لو عايز تبقى انسان محترم خد بالك من دراستك ، لكن لو فاشل في الدراسة شوفلك صنعة اشتغلها
عايز تشتري حاجه فوق مستوى دخل والدك مفيش قدامك حل غير انك تشتغل علشان تشتريها
الضرب كان خيار مطروح دايما ( صحيح مكنش بيحصل كتير ) لكنه كان خيار قائم و مرعب
مكنش فيه أبهات بتتحايل على ولادهم يروحوا تمرين السباحه و الكوره و الكاراتيه... الولد اللي كان عنده شغف بحاجه كان ببجري وراها و الأب كان يدوبك بيسمحله و يبقى كتر خيره
و مع خوفنا منهم كنا بنحبهم و بنحترمهم و بنقدر مجهودهم من غير ما يوصولونا للتمرين أو الدروس أو يجيبولنا نجمه من السما
الأولاد أستغلوا الهري بتاع التربية الإيجابية علشان يبتذونا عاطفيا و ماديا و ياخدوا شغفنا بإننا نوفرلهم حياة أحسن من اللي أحنا عشناها إنهم يبقوا كسالى و متكلين و سلبيين
لو رجع بيا الزمن كنت أكيد حعمل مع ولادي نفس اللي أبويا كان بيعمله معايا
الله يرحم والدي و ووالديكم معرفناش قيمتهم و لا قد ايه كانوا بيحبونا و مقدرناش مجهودهم في انهم يربوا رجالة الا متأخر🥲🥲
واكتشفنا انهم كانو صح الصح
