31/01/2023
بسم الله الرحمن الرحيم
الكابتن هريدي يحييكم من الملعب بتاعنا احنا😁
Captain Hareedy is greeting you from our very own pitch.
واحد يسألني و يقوللي ايه pitch دي يا كابتن هريدي؟ ارد عليه و اقولله ما هو ده ملعب كرة القدم في الانجليزي مش اللي بالك فيه و صفي نيتك منك ليه🌚.
ييجي واحد تاني قوللي ايه is greeting دي يا كابتن؟ اقولله كده انت صاحبي و حبيبي و كفاءة و حد يجيب مج سحلب للراجل العسلية ده.
ده واحد من الازمنة المهمة في اللغة و اسمه المضارع المستمر Present continuous
ده بقا بنستخدمه لما نيجي نتكلم عن حاجة بتحصل دلوقتي و انا بقول الجملة و استخدامه سهل جدا هتبدأ بالفاعل اللذيذ بتاعك و تجيب بعده واحد مناسب ليه من التلاتة دول (am/is/are) و بعدين تجيب الفعل بتاعك و تروح مزودله ing و الف مبروك كده انت عملت جملة زي الفل
I am cooking some pasta for lunch.
The mechanic is fixing the car.
She is eating a sandwich.
My brothers are watching a scary movie.
We are walking in the park.
زي ما احنا شايفين كده ان لازم المعادلة نمشي عليها كويس لاني لو مستخدمتش am/is/are هيبقي غلط، لو شلت ال ing هيبقي برضه غلط فلازم نتعامل صح هنا عشان نطلع جملة مظبوطة
subject(فاعل)+(am/is/are)+(verb+ing)
يجي نفس الجدع الرخم اللي طلعلي في الاول يقوللي بس المضارع المستمر ليه استخدام تاني يا كابتن هريدي، ارد عليه و اقولله صح فعلا هو ليه استخدام كمان بس ده عايز بوست تاني ليه هو و اخواته و هنعمله ان شاء الله، و الي هنا تنتهي مباراة اليوم و الي لقاء قادم ان شاء الله.
