Reflect Writing

مهزلة "حجز الركنات".. الشارع مش ملكية خاصة يا جماعة!
يعني إيه أبقى رايح مشوار 5 دقائق أشتري حاجة أو أقضي مصلحة وأقعد نص ساعة ألف كعب داير عشان مش لاقي ركنة؟
والسبب إن كل واحد قدام بيته حاطط حديدة أو صبة أسمنت أو فردة كاوتش وكأنه اشترى الشارع بعقد مسجل!
المنظر ده بجد بقى مستفز وقذر بصرياً وأذى مباشر لعربياتنا وللناس.. تخيل تبقى ماشي بالليل وتخبط في صبة تكسرلك مقص ولا تقطم إكصدام.. ومحدش هيعوضك.
يا جماعة لازم نفرق بين "البلطجة" وبين القانون.. إحنا عندنا قانونين بيحكموا الموضوع ده
أولاً: قانون إشغال الطرق العامة (رقم 140 لسنة 1956) وده بيعتبر العوائق دي جريمة عقوبتها الحبس وغرامة بتوصل لـ 20 ألف جنيه ومصادرة الحاجات دي فوراً

ثانياً: قانون تنظيم انتظار المركبات (رقم 150 لسنة 2020) ولائحته التنفيذية.. القانون ده معمول عشان "ينظم" مش عشان يشرع العشوائية

القانون ده بيلزم أي حد واخد حق انتفاع بركنة إنه يحط لوحات إرشادية رسمية، وتكون بمواصفات "حضارية" لا تأذي عربية ولا تعطل حركة مشاة ولا تشوه منظر الشارع

إحنا مع التنظيم بس بشرط، الحجز يكون للشركات والكيانات التجارية بس وفي أماكن مصرح ليها ومرتبطة بمواعيد الشغل.. مش قفل للشارع 24 ساعة!

والأهم إن الحي نفسه لازم يفرض مواصفات فنية "صديقة للشارع والمرور" لأي ركنة بتتأجر.. مش يسيب الناس تدق حديد وتصب أسمنت في الأسفلت وتبهدل الدنيا

أخيراً.. رسالة لينا كلنا وإحنا 100 مليون مواطن.. أنا مش بقولك انزل شيل العوائق دي بإيدك عشان ما تعملش مشاكل مع حد

بس اللي بقوله إن كل واحد فينا عامل كدة وهو مش واخد باله إنه بيأذي غيره.. يا ريت يبدأ بنفسه

مافيهاش حاجة لو ركنت بعيد ناصية ولا اتنين، مش هتاخد منك وقت ولا مجهود، بس هتحس براحة إنك ما قطعتش طريق حد ولا أذيت عربية جارك

صدقوني لما كلنا نفهم إن ده غلط، أوعدكم إننا هنلاقي ركنات باستمرار.. مش هنلاقي حد مسافر وحاجز ركنة باليومين والتلاتة وهي فاضية والناس مش عارفة تقضي مصالحها

الشارع ده ملكنا كلنا.. خلينا نحافظ عليه وعلى بعض

Order here