أُنس الذات Ons El zatلايف كوتش إيناس علام

فى يوم الأم🤱
لكل أم مسؤولة، شايلة بيت وشغل و ولاد
و واجبات ما بتخلصش ،يمكن تخليكى ساعات كتير تنسي نفسك
تدي الكل و تأجلي نفسك لوقت "فاضي"،غالبا ما بيجيش
عايزة أقولك :
إنتِ تستاهلى تهتمى بنفسك ، و تطوريها
النهاردة الوقت المناسب علشان تكونى أولوية

ككوتش، بأقابل أمهات كتير بتقول :"أنا فين وسط كل ده؟
عيد الأم أكيد تقدير للي بتعمليه لغيرك،لكن كمان مهم جدا إنك 🤍 تعملي لنفسك

خدي خطوة صغيرة ليكي النهارده…وقت لنفسك، قرار جديد، أو حتى راحة بدون تأنيب ضمير

كل سنة وإنتِ أم معترفة بوجودها و استحقاقها بتوزان بين واجباتها وحقوقها 🌷

يا ترى ايه خطوتك الصغيرة شاركينى فى التعليقات 🤍

كل عام و أنتِ بخير 🌷
وجودك هنا معناه إنك بتحاولي تتطورى وتتعلمي و تتغيرى للأفضل🥰دمتى جميلة
مجرد سعيك في ميزان حسناتك

جه الوقت علشان تحتفلي مع أحبابك بالعيد سيبي المشاكل و التعب و الشغل واحى سنة الفرحة بالعيد 🎈
من غير فرحتك و من غير صحتك العيد ما يبقاش عيد ،انت العيد 🌷
عيدكم مبارك 🎉🎊💝

الخلافات الزوجية أمر طبيعى ،وبيقولوا عليها “ملح وفلفل"🧂 الجواز
بس لما تدلقي كيلو ملح وفلفل؟
🥵ده مش نكهة… ده حرق
لو الخلافات زادت زى الأمثلة اللى جاية تبقى إيذاء نفسي متعمد
:مثلا
▪️ الصمت العقابي بالشهور
(خصام كنوع من العقاب)
علشان يفقدها الأمان والسند،
▪️ الإهانة بالكلام… وأحيانًا بالإيد سواء بينهم أو قدام الناس
ده مش عصبية… ده تقليل وكسر متعمد
▪️ التهديد المستمر بالطلاق ده مش قرار
ده لوي دراع اللي عايز يطلق… بيطلق
مش يهدد كل شوية
▪️ التقصير المادي والمعنوي نوع من الإهمال المقصود للضغط والسيطرة
▪️ تحميل الزوجة كل المسؤوليات وكأنها جارية وهو السيد
علشان ينهكها و يستهلكها.
▪️ يسيب البيت بمزاجه
ويرجع وقت ما يحب ده مش زعل… ده ابتزاز

وهنا السؤال اللي بيخوف كل أسرة
أخرب البيت؟ طب والعيال؟
وأحيانًا الزوجة تقول
أكمل علشان العيال…" أضحي مش مهم أنا " بس الحقيقة المؤلمة
لما بتضحّي بنفسك في بيئة مؤذية ،
إنتِ مش بس بتتأذي ،ولادك كمان بيتأذوا.
الطفل اللي بيشوف إهانة ،بيتعلم إن ده طبيعي
الطفل اللي بيشوف أم مكسورة، بيفقد إحساسه بالأمان
ومش كل انفصال نهاية ،أحيانًا بيبقى بداية

......لكن
قبل قرار الانفصال
محتاجة استراتيجية واعية مش رد فعل من مشاعر خوف وخذلان......

لو حد في الموقف ده… الخطوات الأولى
1️⃣ تقييم واقعي للوضع
هل فيه أمل حقيقي للتغيير؟
ولا وعود بتتكرر؟
2️⃣ دعم نفسي ليكي
علشان قرارك ما يطلعش من انهيار
3️⃣ استشارة قانونية
تعرفي حقوقك كويس قبل أي خطوة
4️⃣ دعم أسري واعي
مش ضغط اجتماعي
5️⃣ خطة مادية واضحة
أهم عنصر أمان قبل أي انتقال

الاستمرار مش دايمًا قوة
والانفصال مش دايمًا ضعف
.....القوة الحقيقية
إنك تختاري وأنتِ واعية
البيت مش حيطان
البيت أمان
ولو الأمان مش موجود
لازم نسأل نفسنا
إحنا بنحافظ على إيه بالظبط؟

أنه يقترب يقترب ....
رمضان🌛
كل عام و أنتِ بخير
🥰
يا ترى هتعيشى رمضان ازاى ؟


#رمضان

كل عام وانتم بخير 🌛
رمضان كريم
اللهم سكينة وسلام داخلى
اللهم صحة البدن و راحة البال
اللهم رضاك و الجنة

بتدوري على الحب؟ حقك طبعا بس
هاقولك كلمتين ،خليهم حلقة فى ودنك
!خلي بالك… علشان ما توقعيش في الفخ 🌸
اللي يحب بجد، يلتزم… يستمر… ويصمّم ،ما يختفيش،
وما يسبكيش في حيرة ،

لو بيظهر ويختفي→ ده مش حب
لو دايمًا عنده ظروف→ ده مش حب
لو قالك: إنتِ كتير عليّ→ ده مش تواضع… ده انسحاب
طب ولو كل همساته وتصرفاته
بتقول أنه مهتم بيكى اهتمام غير عادي ،بس عمره ما قال بوضوح
إنه ملتزم وعايزك على سنة الله ورسوله→ ده مش حب
ده بيتسلى بيكى .

الحب الحقيقي
ما يعلّقش ما يحيرش ما يخوفش
ما يسيبش قلبك متعلّق في النص
الحب الحقيقي
واضح… ومُطمِن… وليه اتجاه
وانتى قلبك يستاهل
مش كل اللى يلمس قلبك يستاهل يسكنه
اللي مش جاي يدخل من الباب
🤍ما ينفعش يعيش في قلبك

الحب الحقيقي بيعيش يا حبيبي"
"بيعلمنا نسامح وينسّينا إمبارح,
بصوت الفنان محمد فؤاد

يا ترى فعلا ده الحب الحقيقي؟
الحب الحقيقي هو
الأمان، و الاحتواء، و القدرة على البدء من جديد

وده بيتفق جدًا مع نظرية عالم النفس روبرت ستيرنبرج
: الحب الكامل بيجمع بين ٣ عناصر
يا ترى ايه هم ؟
و ايه انواع الحب التانية غير الحب الكامل ؟
و انتى عايشة اى نوع منهم؟
الاجابات كلها⬇️⬇️⬇️⬇️


#عيدالحب

يا ترى إيه أول ذكرى تفتكريها عن نفسك في الطفولة🤔؟
ديه مش مجرد دردشة خفيفة…
الموضوع أعمق من كده بكتير 🧐
وبيكشف أسرار ومفاتيح عن حياتك دلوقتي😉
لايف كوتش إيناس علام

يا ترى أخبار رقبتك وكتافك إيه ؟
ممكن تشوفي الرقبة عضو يربط الراس بالجسم، والأكتاف جزء مهم من الجسم،
بس الرقبة مرتبطة بـ حمل الأمانة
الأكتاف مرتبطة بـ الحمل عامة… مش بس حمل الحاجات،
كمان حمل المسؤوليات

فكل ما قررتى تكونى قوية وتشيلى أكتر
الرقبة والكتاف تتشد
و العضلات تخزن المشاعر المكبوتة،
القلق، الضغط النفسي
ومع الوقت تحسي بالألم أو التصلب لا قدر الله
علشان كده عايزة أقول لى و أقولك انتى كمان

ما تشليش كل حاجة لوحدك 💕
و لو مضطرة تشيلى هونى على نفسك 💕
و تصالحى مع الشيلة💕

اسألىء نفسك🤔
إيه المسؤوليات والضغوط اللي أنا شايلها فوق طاقتي؟
إزاي أتخلص منها
أو أتعامل معاها بدون ضغط؟

جسمك مراية لمشاعرك
لما تهتمي بمشاعرك، رقبتك وأكتافك هيرتاحوا
و جسمك هيفك و يشكرك 🤍