Dr Hesham Wageh / د.هشام وجيه

شاب محترم باعتلي رساله انه عايز يكشف علي اخته !
= فسألته شكوتها ايه !؟
- قالي لا ابدا هي مناخيرها بتكبر وهي انسة ودا مضايقها وكل لما تروح لحد يهزر ويقَولها عادي انتي بتبالغي !
الحقيقه انا نفسي كنت هاقوله ايه الشكوي دي !! بس قولت اكمل معاه اشوف في حاجه تانيه ولا لاء
سألته طيب وزنها بيزيد ؟
- اه شوية وعندها علامات في رقبتها زي اللي حضرتك قولت عليها في مقاومة الانسولين.
= ماصدقت قولتله خلاص اعمل مقاومة انسولين وتراكمي ودهون وغدة درقية وابعتهوملي.
- اصر انه يجيلي بيها وقد كان وزارني في عيادتي في البحيرة.

= لقيت مقاومة انسولين بسيطة وبداية مرحلة ماقبل السكر والضغط بدا يعلي عن الطبيعي والباقي كويس.
انا بالفحص البنت كويسة بس فعلا هي بتقول ملامحها بتتغير عن قبل كدا هي ادري بحالها بتبقي غليظة ، فحصتها من كل اتجاه تماَم بس فعلا ملامحها غليظة coarse features.

- سالتها سؤالين هل مقاس الحذاء لا مواخذة بيضيق عليكي ؟
= اه فعلا بغير فيهم مؤخرا
- الخواتم اخبارها ايه ؟
= بلبسه مرتين او تلاتة ويدوبك مايدخلش صباعي تاني.
- خلاص احنا هنقطع الشك باليقين ونقيس هرمون النمو بعد التحفيز عشان استبعد مايسمي بضخامة الاطراف او مرض العملقه acromegaly زي اللي عنده الممثل حسين عبدالعظيم ( أشرف في مسلسل الكبير اوي )
كتبت تحليلين وكنت شاكك المعمل يعرف الاول فكتبت التاني الادق والاغلي:
Growth hormone suppression test
بتقيس هرمون نمو صايم وبعد ماتدي المريض جلوكوز 75 جرام في 250 ملي ماء زي تحليل تحميل الجلوكوز بتاع الحوامل وبنسحب كل نص ساعة عينة علي مدي ساعتين والطبيعي ان مستوي هرمون النمو ينخفض عن 1 بعد التحفيز.

وزي ماتوقعت المعمل نفضلي وعمل التاني IGF1 وهو اهم مستقبلات هرمون النمو الذي لا يتاثر بالافراز النبضي للهرمون الغير دقيق وفعلا طلع 3 اضعاف الطبيعي.

مباشرة طلبت باقي هرمونات الغده النخامية برولاكتين و ACTH وكورتيزون و رنين مغناطيسي علي النخامية اتعمل بالصبغة
- التحاليل سليمه، لكن للاسف الاشعة طلعت ورم للاسف حجمه كبير في الغدة النخامية 2.5 سم تقريبا macroadenoma.

اخر حاجة طلبتلها مجال ابصار وفحص قاع عين ووجهتها بكل الورق لجراح مخ واعصاب بمعرفتها.
ربنا يعافيها ويشفيها

علي قد ما انا زعلان علي التشخيص بس راضي عن نفسي اني في خلال اسبوع كنت وصلت لتشخيص الحمد لله ممكن يبقي مدخل لانقاذها وطبعا مش عاوز اقولكم تعاون اخو المريضة اللي لما فهمته شكوكي تفاهم ونفذ كله بااسرع مايمكن.

الدرس الكبير ان ممكن شكوي بسيطة اوي ماتكونش بسيطة ولا حاجة👌.

# Dr Amr Omar

النهارده وانا بنقل من شقة لشقة تانية، والمصاريف زادت وخرمت ،كنت مشغول بتركيب الشاشة مع الفني، وبعد ما خلصنا رحت أوصله المحل وانا فاكر كويس إن معايا المحفظة عشان معندوش فيزا .. وبعد ساعه من الفصال علي المصنعية بطلع المحفظة من جيبي ..ملقتهاش.

ادور يمين شمال مفيش فايدة واضطريت أحوله المبلغ علي حسابه.

المهم، دورت فالشقة الجديدة مفيش حاجة، فالقديمة مفيش حاجة..العربية قلبتها مفيش اي اثر للمحفظة.

لما المحفظة بتضيع بتبقي كارثة مش عشان الفلوس اللي فيها، انا بطبعي مش بشيل مبالغ كبيره بس طبعا البطاقة والرخصة والفيزا .. الحاجات دي بتاخد وقت ومجهود عشان تعمل بدل فاقد منها.

قلت اتصل بصاحب محل الدش تاني كلمته قالي مفيش حاجة نسيتها هنا، قفلت معاه، شويه واتصل بيا قالي تعالي فيه واحد لقي محفظة فالشارع وانا شاكك انها بتاعتك.

روحت للراجل اتصل ع الشاب اللي معاه المحفظة وجالنا، الشاب اللي لقي المحفظة ادهاني وقالي اتاكد ان فلوسك تمام بصيت اهم حاجة ع البطاقة ولاقيته كله مظبوط قلت تمام.. قالي اتاكد من فلوسك ، فأنا عارف اني سايب مبلغ بسيط وهو فعلا موجود .. قولتله تمام تاني .. قالي يا باشا اتاكد من فلوسك .. ففتحت المحفظة قدامه قولتله ايوه المبلغ اللي فيها مظبوط .. قالي انت شايل فيها مبلغ بعملة اجنبية اتاكد انه موجود.. قولتله نعم!

اتضح ان في جيب سري فالمحفظة بسوستة قبًل ما اسافر الحج كنت غيرت عملة وشيلته فالجيب ده واقسم بالله نسيته تماماً وفتحت المحفظة مليون مره بعدها ولا جه في بالي الجيب السري ده.

انا وقتها مبقتش عارف اشكر الشاب الأمين ده ازاي، طلعت مبلغ معايا وقولتله دي حاجة بسيطة علي امانتك وده حقك في الفلوس اللي لاقيتها والورق بتاعي وده الاهم عندي..الراجل رفض تماما وزعل مني لما اصرت وقالي لا والله ما اقبل اخد حاجة انا راضي بدعوة منك بس❤️

سلمت علي الشاب الامين ده جامد وشكرته ،ولما ركبت العربية عرفت المحفظة ضاعت ليه.

المحفظة دي ضاعت عشان ربنا سبحانه وتعالي اراد يفكرني بالمبلغ ده .. وساعتها الواحد بيدرك إن وراء كل ابتلاء حكمة، ووراء كل ضيق فرجًا، وأن لطف الله قد يأتيك من حيث لا تحتسب، وعلى يد شخص لا تعرفه.

ل ا.د/كريم الرمادى🩵

شالت الطحال وديل البنكرياس بالورم اللي فيه والقولون الايسر😮

مريضة ٦٠ سنة عندها ضغط وسكر وجات بتشتكي فقط من الم بمنتصف البطن حول السرة

الوجع ده بقاله اكتر من سنة
بيروح ويجي ومش بيستمر اكتر من يومين تلاته وبتاخدله مسكن يروح ومش بيزيد ب اى نوع اكل معين لكن الوجع ده بيسمع لضهرها

🛑 يالا نفحصها ونفحص بطنها
فعلا الم بمنتصف البطن لكن محسوس كلكيعة كبيرة بمنتصف البطن

🛑 طيب بداتى تخسى ؟
ايوه خسيت ١٠ كيلو اخر سنة

🛑 طيب شهيتك للاكل اخبارها اية؟
لا معمديش نفس للاكل خالص يادكتور

🛑 في اسهال او امساك؟
عندى امساك مزمن وبعمل حمام كل خمس ايام وده بردوا بقاله سنة

طيب ياست الكل هنحتاج نعمل اشعة مقطعية علي البطن والحوض بالصبغة الوريدية بعد مانعمل شوية تحاليل كدة ونتاكد من وظايف الكلي كويس علشان الصبغة

تظهر الاشعة فعلا ورم في ديل البنكرياس وقريب من الاوردة والشرايين المغدية للطحال

نحضر الحالة لدخول العمليات وفعلا تدخل العمليات ويطلع اللي قدامكم في الصورة دى:

- الطحال
- جزء من البنكرياس بالورم
- القولون الايسر

عملت العملية وخرجت المريضة من العمليات علي خير ودعواتكم ليها بتمام الشفاء

اطفال اطفال … كل يوم هتصور مع قمر كدة🩵🩵
وهفضل اقولها:

لاتسالني عن سر عشقي للاطفال🩵

ففي ضحكاتهم براءةٌ تُحيي القلوب،
وفي عيونهم عالمٌ من النقاء لا يعرف الزيف.
هم أجمل ما في الحياة،
ووجودهم نعمة تُزهر بها الأيام وتطيب بها الأرواح.

ربنا يحفظ جميع اطفالنا يااارب🩵🩵