20/08/2026
عيان جالي عنده ورم في الحنجره من الدرجه الرابعه ,,,ودي بتعني ان الورم خرج من غضاريف الحنجره وتغلغل في الانسجه اللي حواليه وفي غدد ليمفويه في الرقبه محسوسه
العيان ده علاجه عمليه استئصال جزري للحنجره والغدد اللليمفويه اللي في الرقبه وياخد كمان بعدها علاج كيماوي واشعاعي
العيان رافض تماما العمليه اللي حتضيع قدرته علي الكلام للابد
وجايلي بعد ما راح لاكتر من دكتور واجمعوا علي نفس قرار العلاج
عرضت عليه اني ابعت اوراقه الي جروب خبراء الاورام العالميين واتنافش معاهم فيها ,,بس كان شرطي ان اللي حنتفق عليه ,,حينفذه العيان
بعتت الورق وقعدت اتناقش مع كل خبير يقول علي بروتوكول للعلاج
فيه اللي اصر علي العمليه
فيه اللي قال ندي علاج اشعاعي مع كيماوي ونشوف وناجل العمليه شويه علي حسب الاستجابه
انا كان ليا راي تاني غريب شويه ,,قلتلهم احنا حنعمل علي عينه الورم تحليل يوصف لنا اذا كان ممكن ياخد علاج مناعي او لا
وقلت لهم انا عارف ان العلاج المناعي مش ده مكانه وهوا بيتاخد في الارتجاع بس ايه المانع اننا نديه في الحالات المتقدمه دي طالما ان تحليل الPDL1 نسبته عاليه
فقلت لهم انا حادي علاج مناعي مع نوع واحد من العلاج الكيماوي مع علاج اشعاعي بتقنيه حديثه جدا عالحنجره
طبعا الخبراء الاوربيين كانوا كالعاده متحفظين ومش موافقين اوي,,,بينما الامريكان كانوا مرحبين بالفكره
جبت العيان وشرحتله كل اللي اتقال ,,وكل الاراء ,,وقلتله انا بافضل ايه ,,مع العلم ان لو فكرتي لم تنجح حنضطر للاستئصال بس عالاقل حنكون حاولنا
وعرفته ان الموضوع حيبقي غالي ومكلف
الراجل توكل علي الله ووضع تقته فيا بعد ربنا سبحانه وتعالي وابتدينا العلاج لان التحليل طلع بالفعل عالي جدا وده بيقول ان الاستجابه للعلاج المناعي حتكون كويسه
الراجل بعد 3 كورسات وانتهاء العلاج المناعي الكيماوي الورم قل حوالي 70 في الميه,,والاهم انه اصبح فقط جوه الحنجره ومفيش حاجه براها والغدد الليمفويه اختفت الحمد لله
كملنا كمان ,,الورم اتكوم في جزء من الحنجره علي احد الاحبال الشوكيه
قررت اني اعمله عمليه تحفظيه ,,تشيل الجزء اللي فاضل من الحنجره حاجه كده زي نص او تلت الحنجره
وعملناها والراجل اصبح صوته مبحوح شويه لكن بيتكلم ,,,,ولقيت التحليل ان فيه خلايا للورم تقدر ب10 في الميه من كل الكتله اللي اتشالت والباقي متليف تماما
العيان خف بحمد الله وانقذنا صوته الي حد ما دون المساس بحياته
نسجد لله شكرا ونحمده علي فضله علينا
حدث بالفعل
دكتور_عمرو_لطفي
