10/07/2026
سؤال أصاب الجميع بالزعر والرعب🚨 دكتور الحقني ابني هيضيع؟!
دي كانت أول رسالة وصلتلي بعد إعلان ضوابط وزارة التربية والتعليم الخاصة بالتحويل إلى المدارس الدولية
وبصراحة مكنتش رسالة واحدة
خلال ساعات وصلتني عشرات الرسائل وكلها فيها نفس القلق
سمعنا إن التحويلات اتلغت
يعني خلاص مفيش American Diploma
هل لازم أغير خطة ابني
هل القرار هيأثر على ابني ولا لأ
للأسف في كل مرة بيصدر فيها قرار جديد بتنتشر العناوين المثيرة أسرع من الحقيقة وبيتحول القلق لإشاعات والإشاعات لمعلومات ناس كتير بتصدقها
لكن في التعليم عنوان واحد غير دقيق ممكن يغير مستقبل طالب بالكامل
علشان كده لازم نفهم القرار كويس قبل ما نقلق
هل تم إلغاء الـ American Diploma؟
الإجابة ببساطة لا
ولم يتم إلغاء الـ IG أو أي نظام دولي معتمد
القرار لا يتحدث عن إلغاء الأنظمة الدولية ولكنه ينظم التحويل إليها خلال المرحلة الثانوية ودي نقطة مهمة جدًا
إيه اللي اتغير؟
✅ لن يُسمح بتحويل طلاب الصف الثالث الثانوي إلى المدارس الدولية بداية من العام الدراسي 2026/2027
✅ العام الدراسي 2026/2027 هو آخر عام يُسمح فيه بتحويل طلاب الصف الثاني الثانوي وفقًا للضوابط المعلنة
✅ بداية من العام الدراسي 2027/2028 سيكون الالتحاق بالمرحلة الثانوية في المدارس الدولية من الصف الأول الثانوي فقط
ليه الوزارة أصدرت القرار ده؟
لأن الأنظمة الدولية مختلفة عن نظام الثانوية العامة
الطالب في الـ American Diploma أو الـ IG بيدرس وفق خطة أكاديمية متكاملة على مدار سنوات المرحلة الثانوية وبيختار مواد ويستوفي متطلبات معينة تؤهله للتخرج والتقديم للجامعة
ولما الطالب يدخل النظام في الصف الثاني أو الثالث ممكن يواجه صعوبة في استكمال المتطلبات الأكاديمية بالشكل الصحيح
وعلشان كده الوزارة اتجهت لتنظيم التحويل بحيث يبدأ الطالب رحلته داخل النظام من البداية
مين اللي لازم يهتم بالقرار؟
لو كنت بتخطط تحول ابنك لمدرسة دولية خلال المرحلة الثانوية فلازم تراجع خطتك في ضوء الضوابط الجديدة
أما لو ابنك بيدرس بالفعل داخل نظام دولي فلا تتسرع في القلق ولا تعتمد على أي منشور قبل معرفة موقفه الحقيقي
رسالتي لكل ولي أمر
متخليش منشور على فيسبوك يحدد مستقبل ابنك
ومتخليش عنوان مثير يخليك تاخد قرار ممكن تندم عليه
التعليم قرار عمر ومحتاج معلومات صحيحة وفهم كامل لكل التفاصيل
وخلال الأيام الجاية هشرح كل جزئية في القرار بطريقة بسيطة وهجاوب على أكثر الأسئلة اللي وصلتني من أولياء الأمور
💬 اكتب في التعليقات ابنك في أي صف وإيه أكتر سؤال شاغلك بعد القرار وأنا هجاوب عليه في المنشورات القادمة
هذا الشرح مبني على ما أعلنته وزارة التربية والتعليم حتى تاريخ نشر المنشور وأي توضيحات رسمية جديدة سيتم تناولها فور صدورها.
#التحويلات #الثانوية #
