Contact information, map and directions, contact form, opening hours, services, ratings, photos, videos and announcements from Salma El Deeb - سلمى الديب, Education, Online and Offline Workshops, Cairo.
Certified Positive Discipline Parent Educator from the American Positive Discipline Association
,Former Montessori Teacher
,Helping parents raise confident, emotionally resilient children
,Warm/Interactive parenting and children’s workshops
27/05/2026
كل سنه وانتوا طيبين وعيد أضحى سعيد 🐑✨
وعشان العيد أحلى… جبنالكم خصم العيد 🎉💜
لو اشتركتوا جروب من ٤ أطفال أو أكتر
هتاخدوا خصم مميز جدًا 🤩🎁
مستنيين أطفالكم في ورش مليانة لعب وتعلم وثقة ومتعة 🌟🧒👧
الأماكن محدودة ⏳
للحجز واتس اب 01282362391
25/05/2026
“إزاى نعلّم ولادنا يتعاملوا مع العيدية؟”
العيدية مش بس فلوس…
دي فرصة حقيقية نعلّم أطفالنا المسؤولية واتخاذ القرار بدون محاضرات طويلة.
بدل:
“متصرفهاش كلها”
أو
“هاتهم وأنا أشيلهم”
جرّبي تساعديه يقسمهم:
* جزء يصرفه على حاجة بيحبها
* جزء يحوشه لهدف نفسه فيه
* وجزء يطلعه لله أو لعمل خير يساعد بيه حد محتاج
بالتدريج بيتعلم إن الفلوس مش بس للشراء…
لكن كمان فيها بركة وعطاء ومشاركة.
وده بيكون تمهيد بسيط وجميل لفكرة الزكاة والصدقة لما يكبر.
المهم مش المبلغ…
المهم إنه يتعلم:
* الانتظار
* الاختيار
* وتحمل نتيجة قراراته
* وإن في جزء من رزقنا بنشارك بيه غيرنا
ولو صرفها كلها مرة واحدة؟
مش لازم نوبخه فورًا.
أحيانًا التجربة نفسها أفضل معلم.
التربية الإيجابية مش إننا نتحكم في كل قرار…
لكن ندي مساحة آمنة للتجربة مع guidance مناسب للعمر.🤍
23/05/2026
العيد مش بس بيجيب فرحه وزيارات…
أوقات كمان بيجيب ضغط نفسي للأمهات والأطفال.
مقارانات…
تعليقات على التربيه…
نقد لشكل الطفل أو شخصيته…
ولخبطه نوم وسكر وحماس زيادة عن الطبيعى.
وفجأة نحس إن البيت كله خارج عن السيطره.
بس الحقيقة؟
ده طبيعى جدًا فى أيام العيد.
الأطفال بيبقوا متحمسين…
نايمين متأخر…
بياكلوا حلويات أكتر…
وبيتعاملوا مع ناس ودوشه وتحفيز طول اليوم، فطبيعى
أعصابهم تبقى أضعف وروتينهم يتلخبط.
وعادى جدًا يبقى فى استثناءات وقت العيد.
مش لازم كل حاجة تمشى بالمثالية المعتادة.
• لو النوم اتأخر كام يوم
هنرجع الروتين بالتدريج بعد العيد.
• لو أكلوا سكر أكتر من المعتاد
مش نهاية العالم.
التوازن بييجى على المدى الطويل.
• مش كل تعليق من القرايب محتاج رد أو تبرير
لكن لو التعليقات زادت عن حدها أو بدأت تأذى الطفل…
مهم نحط حدود بذوق وهدوء.
علشان أطفالنا يحسوا إننا سند وأمان ليهم.
• بعد الزيارات
نطمن أطفالنا بالكلام والحضن
خصوصًا لو حد انتقدهم أو قارنهم بغيرهم.
• والأهم:
إحنا مش بس “بنعدى العيد”…
إحنا بنصنع ذكريات لأولادنا.
فممكن البيت يتبهدل شوية…
والنوم يبوظ شوية…
والروتين يقع كام يوم…
بس فى المقابل
فى ضحك، ولمّة، وذكريات هتفضل معاهم عمرهم كله🤍
22/05/2026
كبرنا وإحنا بنسمع:
“عيب”
“بطل عياط”
“متغلطش”
“خليك شاطر وبس”
بس يمكن أكتر حاجات كنا محتاجين نسمعها كانت:
* أنا بحبك حتى وإنت غلطان
* عادي تغلط وتتعلم
* مش لازم تبقى كامل علشان تتحب
* مشاعرك مهمة
* أنا سامعك
* وجودك مريح ومش عبء
* حاول تاني… أنا واثق فيك
ومع الوقت بنكتشف إن كلمات كتير وجعتنا…
اتقالت لأهلنا قبلنا، فاتقالتلنا إحنا كمان.
بس يمكن دورنا الحقيقي مش نكرر نفس الدايره…
دورنا نوقفها.
إنهاء صدمات الأجيال… بيبدأ بينا وإحنا اللي هنوقفها. 🤍
يمكن تحدّي جيلنا الحقيقي
إننا بنعالج نفسنا… وإحنا بنربي ولادنا في نفس الوقت.
بنحاول نفهم مشاعرنا علشان نعرف نحتوي مشاعرهم.
بنحاول نطبطب على الطفل اللي جوانا… علشان منوجعش الطفل اللي قدامنا.
مش لازم نبقى أهل كاملين،
بس نحاول نبقى الجيل اللي وعى، وفهم، وقرر يصلّح بدل ما يكرر الغلط.
قولولي…
إيه أكتر جمله كنتوا محتاجين تسمعوها وإنتوا صغيرين؟!
18/05/2026
من أكتر الحاجات اللي لاحظتها مع ولادي… ومع أطفال
كتير حواليا، إن الطفل لو مخدش اهتمام كفاية بشكل
إيجابي، بيبدأ يطلبه بأي طريقة تانية حتى لو سلبية.
الطفل مش بيصحى الصبح ناوي يبقى “رخم” أو “يعاند”…
هو غالبًا بيكون محتاج يشعر إنه متشاف، مسموع، ومهم.
ولاحظت إن أكتر وقت بيزيد فيه العند أو الزن أو المشاكل…
لما نكون مشغولين طول اليوم، أو كلامنا معاهم يبقى كله أوامر وتصحيح وملاحظات.
ومع الوقت فهمت إن شوية اهتمام حقيقي بيفرقوا جدًا.
مش لازم خروجات ولا وقت طويل…
لكن فرق معايا جدًا حاجات بسيطة زي:
•١٠ دقايق لعب أو كلام بتركيز كامل
• حضن وكلام هادي من غير استعجال
• مدح على تصرف حلو حتى لو صغير
• وقت خاص لكل طفل لوحده
• إني أسمعهم للنهاية قبل ما أدي نصيحة أو حكم
• إشراكهم في تفاصيل صغيرة تخليهم حاسين إن ليهم قيمة
ولاحظت إن لما “خزان الاهتمام” عند الطفل يتملي…
طلبه للاهتمام بشكل سلبي بيقل جدًا.
أوقات كتير الطفل مش محتاج أكتر من إنه يحس إن ماما شايفاه فعلًا… مش بس موجوده جمبه 🤍
14/05/2026
هنكمل كلامنا عن أطفال فرط الحساسية (Highly Sensitive Children)، والمرة دي عن موضوع مهم جدًا التشخيص الخاطئ ليهم:
فيه أطفال كتير بيتقال عليهم بسرعة إن عندهم
تشخيصات مختلفة، بينما في الحقيقة جزء كبير منهم
بيكونوا أطفال فرط الحساسية، وده مش اضطراب، لكنه
اختلاف طبيعي في طريقة استقبال الإحساس والتفاعل مع
العالم، وبيُعتبر أقرب إلى character traits (سمات
شخصية) مش disorder (اضطراب).
الطفل الحساس مش بيبالغ… هو بس بيحس بكل حاجة بعمق أعلى من غيره.
بيتوتر من الصوت العالي
بيتأثر بسرعة من الزحمة أو التغيير
ممكن يرفض خامات معينة في الملابس أو الأكل
وبيبان عليه تشتت أو انسحاب… لكن في الحقيقة هو
مُرهَق حسّيًا أو عاطفيًا.
وكثير من أطفال فرط الحساسية بيكون عندهم كمان anxiety (قلق)، لأنهم بيتأثروا بالأحداث والكلام والمواقف بشكل أعمق من غيرهم، فممكن يقلقوا بسرعة أو يخافوا من التغيير والمواقف الجديدة
وممكن الصورة الخارجية تتشابه مع كذا تشخيص مختلف،
لأن السلوك الظاهر ممكن يكون متقارب، لكن الأسباب
الداخلية مختلفة تمامًا.
واللي بيخلّي الموضوع يتلخبط أكتر إن نفس الطفل
ممكن في المدرسة يبقى هادي، ملتزم، وكأنه “متحكم في نفسه”
لكن في البيت ينهار أو يبان عليه العصبية والتعب.
وده لأن الطفل الحساس بيستنزف طاقته طول اليوم عشان
يواكب العالم حواليه، ولما يرجع البيت بيكون محتاج يفرّغ
الضغط ده في المكان الآمن.
أما في ADHD، فالطفل غالبًا بيكون عنده صعوبة حقيقية
في التحكم في الانتباه أو الحركة في أكتر من مكان، سواء
في البيت أو المدرسة، وده من الفروق المهمة اللي
بتساعدنا نفهم الصورة بشكل أدق.
عشان كده مهم جدًا ما نستعجلش نحط label على الطفل من أول انطباع.
نسأل:
إيه اللي بيتعبه؟
إمتى بيهدى وإمتى بيتوتر؟
هل ده نمط ثابت في كل الأماكن ولا مرتبط بضغط معين؟
وفي النهاية… التشخيص مش خطوة سريعة، ولا قرار
بيتاخد من ملاحظة واحدة، وكمان ماينفعش نستعجل في
إعطاء أدوية إلا بعد تقييم دقيق ومتأنّي من مختصين، لأن
فهم الطفل صح هو البداية لأي مساعده حقيقية 🤍
14/05/2026
٤ اخطاء بنعملها تخلى طفلى يكره وقت المذاكره…
* العصبية والتركيز على الغلط بس
لما وقت المذاكرة يبقى كله توتر، الطفل بيربط الدراسة بالخوف مش بالتعلم.
* المقارنة بغيره
زي: “شوف صاحبك” أو “ابن خالتك أشطر منك”
حتى لو بنقولها بنية التشجيع، فهي بتقلل ثقة الطفل بنفسه.
* المذاكرة لفترات طويلة بدون راحة
الأفضل نخلي وقت المذاكرة من ٣٠ لـ٤٠ دقيقة، وبعدها ١٠ دقايق راحة، علشان الطفل يقدر يكمل بتركيز من غير ضغط.
* نسيان الوقت الحلو مع الطفل
مهم جدًا يبقى آخر اليوم فيه وقت خاص مع أولادنا، لعب أو كلام أو حضن قبل النوم.
وفي الآخر إحنا كلنا بنغلط وبنتوتر، خصوصًا مع ضغط المذاكرة والمسؤوليات…
بس أوقات الطفل بيكون محتاج يحس إننا في صفه مش ضده.
ولما يفتكر أيام المذاكرة، يا رب يفتكر إننا كنا سند لى وأمان 🤍
13/05/2026
كنت دايمًا بستغرب… ليه ابني بيتصرف كويس بره البيت، لكن معايا عصبي ومش بيسمع الكلام؟
بس فهمت بعد كده إن البيت هو المكان اللي بيحس فيه بالأمان الحقيقي، فبيطلع فيه كل مشاعره وتعبه وضغطه. وده مش معناه إني أم ضعيفة، بالعكس… غالبًا هو واثق إني هحتويه حتى وهو متعصب.
فبقيت أحاول:
* أسيبه يهدى بعد اليوم الطويل
* أخصص وقت لينا من غير أوامر أو نقد
* أحط حدود بهدوء وثبات
* مصححش وقت العصبية
* وأمدح أي تصرف حلو حتى لو بسيط
ومع الوقت فهمت إن الطفل مش محتاج بيت مثالي… هو محتاج حد يفهمه، يحتويه، ويعلمه يتعامل مع مشاعره بأمان.
10/05/2026
بناءً على طلبكم 💛
ورش بناء الشخصية للأطفال رجعت في إجازة الصيف بشكل حضوري وممتع مليان ألعاب وأنشطة وتفاعل 🤩
السن: من ٧ إلى ١٤ سنة
⏰ مدة كل ورشة: ساعتين
جدول ورش شهر يوليو:
✨ الأحد 5 يوليو
ورشة مين أنا والثقة بالنفس
بنساعد الطفل يعرف نفسه أكتر، يكتشف نقاط قوته، ويعبر عن رأيه بثقة.
✨ الخميس 9 يوليو
ورشة حل المشكلات
الطفل يتعلم يفكر بهدوء ويلاقي حلول للمواقف المختلفة بطريقة عملية.
✨ الأحد 12 يوليو
ورشة تحمل المسؤولية
بنشتغل على الاعتماد على النفس، الالتزام، وتحمل نتائج الاختيارات.
✨ الخميس 16 يوليو
ورشة إدارة الغضب
الطفل يتعلم يهدأ ويعبر عن غضبه بطريقة صح بدون أذى لنفسه أو لغيره.
✨ الأحد 19 يوليو
ورشة بناء القيم
أنشطة تساعد الأطفال يتعلموا الصدق، الاحترام، التعاون، وتحمل المسؤولية.
✨ الخميس 23 يوليو
ورشة العادات الناجحة
بنساعد الطفل يبني عادات يومية صح للمذاكرة، النوم، وتنظيم الوقت.
✨ الأحد 26 يوليو
ورشة القيادة والعمل الجماعي
من خلال الألعاب الجماعية الطفل يتعلم التعاون، الثقة، وتحمل دور القائد.
✨ الخميس 30 يوليو
ورشة اختيار الصديق
بنساعد الأطفال يفرقوا بين الصاحب الصالح والصاحب المؤذي ويحطوا حدود صح.
🎁 يوجد خصم خاص للأخوات
🎁 وخصم عند حجز جميع الورش معًا
الورش مناسبة للأطفال والمراهقين الصغيرين وهدفها تنمية الشخصية بشكل عملي بعيد عن التلقين 🤍
📲 للحجز والاستفسار واتس اب 01282362391
10/05/2026
وقت الامتحانات مش أهم حاجة فيه ان الطفل يذاكر ساعات طويلة، لكن المهم انه يذاكر بطريقة منظمة وفعالة
كتير من الأطفال بيقعدوا وقت طويل على المذاكرة وفي النهاية بيكون التركيز ضعيف والمعلومة مش ثابتة، وده بيحصل غالبا بسبب غياب التنظيم مش بسبب قلة المجهود
ازاي نساعد أولادنا ينظموا وقت المذاكرة
1 تقسيم الوقت
خلي المذاكرة على فترات قصيرة 25 الى 45 دقيقة وبين كل فترة وفترة راحة قصيرة 5 الى 10 دقايق
2 البدء بالمادة الاصعب
ابدئي مع ابنك بالمادة اللي محتاجة تركيز أعلى وهو لسه نشيط
3 تقليل المشتتات
الموبايل والتلفزيون لازم يكونوا بعيد وقت المذاكرة عشان التركيز ما يتشتتش
4 الفهم قبل الحفظ
شجعي ابنك يسأل نفسه هل انا فاهم ولا بحفظ وخلاص
5 استخدام طرق مذاكرة ذكية
زي الفلاش كاردز و الخرائط الذهنية (Brain Map)
الفلاش كاردز بتساعد الطفل يراجع بسرعة ويسترجع المعلومات بدل الحفظ التقليدي
والخرائط الذهنية بتخلي المعلومة متقسمة ومنظمة في دماغه بشكل بصري يسهل تذكره
6 المراجعة اليومية
مراجعة بسيطة كل يوم افضل بكتير من التراكم قبل الامتحان
7 النوم الكافي
النوم مهم جدا لتثبيت المعلومات وزيادة التركيز
8 الاكل الصحي
التركيز والمذاكرة بيتأثروا جدا بالأكل
خلي وجبات الطفل فيها فواكه وخضار وبروتين زي البيض والدجاج والزبادي والمكسرات
وقللي من السكريات والوجبات السريعة لأنها بتزود التشتت وبتقلل التركيز
9 المكافأة والوقت الخاص
بعد يوم مذاكرة منظم مهم جدا يكون في وقت خاص للطفل
ممكن لعبة بيحبها، خروجة بسيطة، مشاهدة حاجة مفضلة، أو وقت هادي مع الأم
المكافأة مش رشوة لكنها طريقة لتعزيز الالتزام وتحفيز الطفل
في النهاية تنظيم وقت المذاكرة مش ضغط على الطفل لكنه وسيلة تخليه يتعلم بطريقة أسهل وأهدى وأكثر ثبات
القليل المنظم دائما افضل من الكثير العشوائى 🤍