Mohamed Wagdy - محَمَّـــــد وَجدي

مساء النور يعمنا, تعال اما ابهرك شوية
تعرف إن الأسماء الأعجمية في القرآن زي أسماء الأنبياء والأعلام، القرآن ساعات بيشرحلك معناها الأصلي جوا الآية نفسها؟

هبسطهالك، أسماء الأنبياء أصلها مش عربي، لكن القرآن عربها عشان تناسب لغة العرب والناس اللي نزل عليهم، مع إن أصلها جاي من لغات تانية قديمة زي المصرية القديمة، والعبرية، ولغات سامية تانية.
الباحث رؤوف أبو سعدة في كتابه "العلم الأعجمي في القرآن مفسرًا بالقرآن" لاحظ حاجة عبقرية: الأسماء الأعجمية في القرآن غالبًا معناها الأصلي بيظهر في نفس الآية أو في سياق القصة، وكأن القرآن بيترجم الاسم من لغته الأصلية للعربي.

تعال ناخد امثلة
🔴فرعون
الاسم ده معناه الاصلي في المصرية القديمة «پِرْ-عَاع» (Per-aa) وده معناه "البيت العالي" أو "الصرح العالي".
نبص في القران بقا
﴿وَقَالَ فِرْعَوْنُ يَا هَامَانُ ابْنِ لِي صَرْحًا﴾ (غافر: 36)
هنلاقي ان الاسم جه في القرآن ومعناه الأصلي ("الصرح العالي") جم سوا ف نفس الاية

🔴 موسى
اسم علم مذكر فرعوني،
ومعناه: الولد. وهو بالعبرية: المُنْقَذ، المنتَشَل. والاسم متركب من "مو: الماء" و "شا: الشجر" بالفرعوني. واتسمى كدة لأن الطفل اتوجد في الماء بين الشجر فأُنقذ.
في سورة القصص ربنا بيقول
(فَأَلۡقِيهِ فِي ٱلۡيَمِّ وَلَا تَخَافِي وَلَا تَحۡزَنِيٓۖ إِنَّا رَآدُّوهُ إِلَيۡكِ وَجَاعِلُوهُ مِنَ ٱلۡمُرۡسَلِينَ (7) فَٱلۡتَقَطَهُۥٓ ءَالُ فِرۡعَوۡنَ لِيَكُونَ لَهُمۡ عَدُوّٗا وَحَزَنًاۗ)

🔴 خد بقا المثال ده هيبهرك اكتر واكتر, اية واحدة اتذكر فيها اسمين ومعناهم

﴿وَامْرَأَتُهُ قَائِمَةٌ فَضَحِكَتْ فَبَشَّرْنَاهَا بِإِسْحَاقَ وَمِن وَرَاءِ إِسْحَاقَ يَعْقُوبَ﴾ (71)

اسحاق معناه في العبرية יִצְחָק (Yitzḥaq) = "يضحك" وده لإن السيدة سارة ضحكت لما الملايكة بشرتها بالمولود
وطب ويعقوب ؟ يعقوب "Ya'aqov" في العبرية معناه "الذي يعقب أو يأتي خلفًا لغيره."
وده لانه جه في البشارة بعد إسحاق عشان كدة الاية جات كدة
﴿وَمِن وَرَاء إِسْحَاقَ يَعْقُوبَ﴾ (هود: 71).


🔴 تعال فمثال تاني, انت عارف يعمنا ان سيدنا نوح قعد كتير كتير يدعي قومه وفضل معاهم 950 سنة يدعوهم إلى الإسلام
اسم "نوح" جاي من لغة قديمة سبق العبرية (ساميّة أقدم)، تحديدًا من جذري:
الإناخة = النزول والاستقرار الطويل في مكان.

النوخة = الإقامة الطويلة واللبث.

وده بيتناسب مع شخصية نوح جدًا،
﴿وَلَقَدْ أَرْسَلْنَا نُوحًا إِلَىٰ قَوْمِهِ فَلَبِثَ فِيهِمْ أَلْفَ سَنَةٍ إِلَّا خَمْسِينَ عَامًا﴾
(العنكبوت: 14)

الأسماء في القرآن مش مجرد اسماء لا دي وراها معاني بتتشرح جوه القصة، وسبحان الله كل نبي اسمه بيكون مرتبط بقصته

متنساش تدعي ربنا يهون على اخواتنا ف غزة ويرحم كل شهدائهم
وانت كمان كدة يعمنا ربنا يهون عليك ويربط على قلبك ويبعد عنك كل حزن يارب ❤️

مساء النوررر يعمنا, ليك وحشة والله

بما انك قاعد زهقان في الحر ومش طايق نفسك تعال اخدك من ايدك افرجك على شوية حاجات من الجنة وازاي نترجمها لعل وعسى ربنا يجعلنا من أهلها 💗

بس قبل ما نخش في الجنة , ازاي اصلا نترجم كلمة جنة ؟
كلمة "الجنة" في اللغة العربية هي كلمة مأخوذة من الجذر: "ج ن ن"
واللي معناه الستر والتغطية والخفاء. وده هنلاقيه ف كلمات كتير مكناش واخدين بالنا من معناها

جَنَّ الليل: أي غطّى بظلمته.
جُنّة: أي درع (تستُر الجسم).
مجنون: لأن عقله كأنه غُطّي أو استُتر.
جِنّ: لأنهم مخلوقات مستترة لا تُرى.
جِنين: لأنه مستور في بطن أمه

تخيل بقا يعمنا إن مش كل جنة مش معناها زي ما بنتخيل
ربنا قال في سورة الكهف، آية 39:

﴿وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ﴾

هنا كلمة "جنتك" معناها: بستانك أو مزرعتك في الدنيا او بمعنى تاني المكان اللي محاط ومتغطي بزرع واشجار، مش "الجنة" الأخروية.
ودا دليل إن "الجنة" في أصلها اللغوي بتدل على أي مكان كثير النبات مستور، مش بالضرورة جنة الآخرة.

طب جنة الاخرة - ربنا يكتبهالنا يارب - نترجمها ايه ؟
1. Paradise
ودي اكتر كلمة مستخدمة ومعناها مكان النعيم الأبدي للمؤمنين، وده الاقرب لمعنى "الجنة" كما وردت في القرآن.
مثال:

"وَبَشِّرِ ٱلَّذِينَ آمَنُوا۟ وَعَمِلُوا۟ ٱلصَّـٰلِحَـٰتِ أَنَّ لَهُمْ جَنَّـٰتٍۢ تَجْرِى مِن تَحْتِهَا ٱلْأَنْهَـٰرُ"
: "Gardens (of) Paradise beneath which rivers flow..."

2. Heaven
ممكك نستخدمها بس هي معناها فعليا السماء وممكن تيجي بمعنى الجنة في المفهوم المسيحي اكتر
عشان كدة كتير من المترجمين بيتفادونها في الترجمات الإسلامية

3. Garden(s)
زي ما قولنا فوق ان كلمة "جنة" في اللغة أصلها "بستان/حديقة" = Garden
وفيه فعلا مترجمين كتير بيستخدموها لترجمة جنة زي مثلا دكتور محمد محمود غالي وده مترجم مصري
هي غالبا مش بتكفي وحدها عشان توضح مفهوم الجنة الكامل لان الجنة اكتر من مجرد Gardens.

عشان كدة برجح Paradise تكون اقرب حاجة
طيب يعمنا تعالى ناخد بصة سريعة على لمحات من نعيم الجنة

🟡 " وَفِيهَا مَا تَشْتَهِيهِ الْأَنفُسُ وَتَلَذُّ الْأَعْيُنُ ۖ"

الآية دي من سورة الزخرف جمعت كل الملذات والمطايب والمحبوبات في لفظين، ربنا بيقول إن الجنة فيها كل اللي نفسك تتمنّاه، مش بس كده، كمان كل حاجة تفرّح عينك.

"تشتهيه الأنفس" مش معناها الحاجات السطحية اللي بتخطر على بالك، لا دي بتوصل لأعمق الرغبات اللي حتى إنت ممكن متكونش مدركها.
"تلذ الأعين": مش أي منظر، ده منظر يطمن ويخليك مش عايز ترمش وهنا ربنا أسند اللذة إلى العين، وهي في الحقيقة مسندة لصاحب العين

“Therein is whatever the souls desire and what delights the eyes.”

🟡في سورة الواقعة ربنا بيقول
" وَفَاكِهَةٍ كَثِيرَةٍ (32) لَّا مَقْطُوعَةٍ وَلَا مَمْنُوعَةٍ "

في الدنيا، لما تيجي تاكل فاكهة، ممكن تكون خلصت من السوق، أو مش في الموسم، أو ممنوع تشتريها عشان غالية أو لسبب صحي.
لكن في الجنة مفيش الكلام ده.

"لا مقطوعة": يعني مفيش حاجة موسمية النعيم دايم.
"ولا ممنوعة": مفيش حرمان، ولا اي ممنوعات، كله مباح بكرم الله.

“Therein is fruit, abundant and never-ending, never forbidden.”

كلنا وشبعنا خلاص نشرب حاجة بقا
🟡 في سورة الصافات
"يُطَافُ عَلَيْهِم بِكَأْسٍ مِّن مَّعِينٍ (45) بَيْضَاءَ لَذَّةٍ لِّلشَّارِبِينَ (46) لَا فِيهَا غَوْلٌ وَلَا هُمْ عَنْهَا يُنزَفُونَ"

الخمر في الدنيا معروف إنها بتغيّب العقل، وبتتسبب في مشاكل، لكن في الجنة عكس كدة خالص سبحان الله

"معين": يعني مش مخزّنة، وماشية بتجري قدامك دايما فريش و متاحة و صافية.
"بيضاء": لونها أبيض، مش عكر.
"لذّة للشاربين": فيها طعم ممتع، مش مجرّد شراب.
"لا فيها غولٌ ولا هم عنها يُنزفون": مفيش وجع راس او ترنّح او ضياع عقل زي الخمرة الدنيوية.

“They will be circulated among them a cup [of wine] from a flowing spring, white and delicious to the drinkers. No bad effect is there in it, nor from it will they be intoxicated.”

🟡نكمل كلام عن خمر الجنة في سورة المطففين
"يُسقَونَ مِن رحيقٍ مختوم"

كلمة "رحيق" ده أعلى درجات الخمر في الجنة أنقى ما يمكن حاجة كدة مفيهاش شائبة.
"مختوم": يعني عليه ختم محدش فتحه قبلك كأن ربنا بيقولك:
النعيم دا معمول مخصوص ليك، مش حاجة عامة دي خصوصية وتقدير.
"ختامه مسك"
يعني حتى آخر نقطة منه ريحتها طيّبة… مش زي أي شراب يفضل طيب في أوله وبعدين يتغير.

“They will be given to drink [pure] wine [which was] sealed.”

🟡تعال نتكلم بقا عن لبس اهل الجنة زي ما ربنا ذكر في سورة الانسان
" عَالِيَهُمْ ثِيَابُ سُندُسٍ خُضْرٌ وَإِسْتَبْرَقٌ ۖ وَحُلُّوا أَسَاوِرَ مِن فِضَّةٍ "

"سندس": ده حرير ناعم وخفيف "استبرق": حرير ثقيل لامع.
يعني حتى في اللبس فيه تنوّع

“Upon them will be garments of fine green silk and heavy brocade, and they will be adorned with silver bracelets.”

وفي الآخر، بنرجع للآية اللي بتختصر كل ده:

"لِمِثْلِ هَٰذَا فَلْيَعْمَلِ الْعَامِلُونَ"
(الصافات 61)

يعني كل ده مش خيال ده هدف واللي عايزه يشتغل عليه.
كنت عايز اكتب امثلة اكتر بس عشان البوست ميطولش مننا

المهم يعمنا قوم صليلك ركعتين قيام ليل دلوقتي وادعي ربنا يرزقنا واياكم جنة النعيم, لانها فعلا تستاهل بعيداً عن كل تعب الدنيا وحزنها
ومتنسوش تدعوا لأموات المسلمين جميعا واهل غزة خاصة ❤️

مساء العناب يعمنا ❤️
عارف لما تيجي تقرا سورة البقرة وتلاقي نفسك عمال تخش ف موضوع ورا موضوع ورا موضوع من اول قصص الامم وتغيير القبلة و الصيام و القتال والوصية والحج وكل ده ومع ذلك تحس ان الكلام ماشي بسلاسة

ده يعمنا اسمه ف البلاغة "حسن التخلص" وهو باختصار الانتقال السلس من موضوع إلى آخر، بحيث السامع أو القارئ ميحسش بانفصال او نشوز في المعنى أو الأسلوب.

تعال ناخد امثلة من سورة البقرة نفسها بعدين ناخد لفة على باقي السورة ونشوف ممكن نترجم ازاي

⚫️ربنا سبحانه وتعالى في أوائل سورة البقرة بيحكي بالتفصيل عن بني إسرائيل: عن نعم ربنا عليهم، عن عنادهم، عن كفرهم بعد ما شافوا الآيات، وعن جرايمهم اللي متعلموش منها
في الوقت اللي القرآن بينزل فيه المسلمين كانوا بيصلّوا للقبلة اللي كانت متجهة للقدس، زي ما كان اليهود بيعملوا. لكن لما نزل الأمر بتغيير القبلة للكعبة، اليهود اعترضوا وسخروا

وهنا بنشوف انتقال عبقري كأن السياق بيكمّل نفسه
تِلْكَ أُمَّةٌ قَدْ خَلَتْ ۖ لَهَا مَا كَسَبَتْ وَلَكُم مَّا كَسَبْتُمْ ۖ وَلَا تُسْأَلُونَ عَمَّا كَانُوا يَعْمَلُونَ (141)
بعدها على طول تيجي
سَيَقُولُ السُّفَهَاءُ مِنَ النَّاسِ مَا وَلَّاهُمْ عَن قِبْلَتِهِمُ الَّتِي كَانُوا عَلَيْهَا ۚ قُل لِّلَّهِ الْمَشْرِقُ وَالْمَغْرِبُ ۚ يَهْدِي مَن يَشَاءُ إِلَىٰ صِرَاطٍ مُّسْتَقِيمٍ (142)

"السفهاء من الناس" = اليهود اللي كنا لسه بنتكلم عنهم! بس المرادي ربنا بيرد عليهم و بيبدأ بيخاطب الرسول والصحابة وبيكمل ف باقي الايات الجاية تشريعات المسلمين
لو كان الكلام عن تغيير القبلة جي فجأة من غير مقدمة عن بني إسرائيل، كانت تبان الآية وكأنها دخيلة على السياق.
لكن لما تحطها بعد سلسلة اعتراضات بني إسرائيل… تلاقي الآية في مكانها المثالي

تعال ناخد مثال تاني من نفس السورة
⚫️وانت بتقرا في ايات الصيام (يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ)
فجأة بتيجي قدامك
"وَإِذَا سَأَلَكَ عِبَادِي عَنِّي فَإِنِّي قَرِيبٌ" [البقرة: 186]
إحنا كنا بنتكلم عن الصيام إزاي فجأة بقينا بنتكلم عن الدعاء ؟
هنا بيجي دور حسن التخلص
لان عادة لما بنكون صايمين او ف رمضان عموما بنكون اقرب لربنا وبنحب ندعي كدة فالقرآن كأنه بيقولك:
"وإنت صايم… افتكر تدعي لأن ربنا قريب وهيسمعك." ❤️
بعدين بنرجع نكمل ايات الصيام تاني بكل سلاسة
(أُحِلَّ لَكُمْ لَيْلَةَ الصِّيَامِ الرَّفَثُ إِلَىٰ نِسَائِكُمْ)

نطلع من سورة البقرة نخش على سورة المؤمنون
⚫️ربنا بيبدء يذكر نعم كتير زي خلق الانسان و الماء والثمرات والانعام وبيختم بنعمة الفلك
وَإِنَّ لَكُمْ فِي الْأَنْعَامِ لَعِبْرَةً ۖ نُّسْقِيكُم مِّمَّا فِي بُطُونِهَا وَلَكُمْ فِيهَا مَنَافِعُ كَثِيرَةٌ وَمِنْهَا تَأْكُلُونَ (21) وَعَلَيْهَا وَعَلَى الْفُلْكِ تُحْمَلُونَ (22)
“And upon them and upon the ships you are carried.”

اشمعنا ربنا ختم سلسلة النعم دي بالفلك ؟ كان يقدر يختم بالانعام مثلا
الفكرة ف الاية اللي وراها

﴿وَلَقَدْ أَرْسَلْنَا نُوحًا إِلَىٰ قَوْمِهِ﴾
“And We certainly sent Noah to his people…”

ربنا ختم النعم بالفلك لإن تلقائي عقلنا بيربط الفلك بسيدنا نوح
فبسلاسة اتنقلت من موضوع لموضوع تاني من غير ما تحس

نروح لسورة يوسف وناخد برضو مثال جميل كدة (بهريك امثلة انا عارف هه)

⚫️ في مشهد السجن الفتيان قالوا ليوسف على رؤياهم
(قَالَ أَحَدُهُمَا إِنِّي أَرَانِي أَعْصِرُ خَمْرًا ۖ وَقَالَ الْآخَرُ إِنِّي أَرَانِي أَحْمِلُ فَوْقَ رَأْسِي خُبْزًا تَأْكُلُ الطَّيْرُ مِنْه)

هنا الطبيعي إن سيدنا يوسف يبدأ يشرح الأحلام، بس هو عمل حاجة عبقرية
بدل ما يبدأ بتفسير الأحلام، راح قالهم:
"لا يأتيكما طعام ترزقانه إلا نبأتكما بتأويله قبل أن يأتيكما"

يعني أنا عارف تفسير رؤياكم، وأقدر كمان أقولكم نوع الأكل اللي هيجيكم قبل ما يوصلكم ف هو هنا بيمهدلهم عشان يسمعوله
بعدين راح سيب موضوع الحلم تمامًا، وبدأ يكلمهم عن العقيدة:

ذَٰلِكُمَا مِمَّا عَلَّمَنِي رَبِّي ۚ إِنِّي تَرَكْتُ مِلَّةَ قَوْمٍ لَّا يُؤْمِنُونَ بِاللَّهِ وَهُم بِالْآخِرَةِ هُمْ كَافِرُونَ (37)

برضو انتقال من موضوع لموضوع بسلاسة رهيبة

كفاية كدة امثلة عشان منطولش😂😂
المهم يعني سبحان الله يعمنا يعني انك تلاقي الآية بتبدأ في حتة، وفجأة تلاقيها دخلتك في موضوع تاني بس من غير ما تحس إن فيه فاصل أو فجوة، وكأن كل حاجة مترتبة ومربوطة بخيط واحد. دي حاجة مستحيل بشر يعملها فعلا

مساءووو يعمنااا ❤️
اكيد قبل كدة فتحت المصحف ووقفت قدامك -"كهيعص" أو"طسم" واكيد برضو مفهمتش معناهم 😂
الحقيقة ان محدش عارف معناهم غير ربنا عز وجل وده بيعمل مشكلة كبيرة للمترجم انه قدام كلمة هو اصلا مش عارف معناها ومحدش في العالم متفق على معناها!
خلينا بس قبل م نتقمص دور المترجمين نحاول نفهمهم زي اي حد بيقرا القرآن عادي

مبدئيا الحروف المقطعة هي حروف منفصلة موجودة في أوائل 29 سورة من سور القرآن وده نفس عدد حروف اللغة العربية لو هنحسب الهمزة كحرف

تعال بقا ناخد اراء العلماء ف الحوار دههه

الرائ الشائع وده اللي قاله الطبري في تفسيره لسورة البقرة انها "حروف استأثر الله بعلمها، ولا يعلم تأويلها إلا هو.”

رأئ تاني وبرضو منتشر انها أسماء أو رموز لأسماء الله أو صفاته
قال ابن عباس: "(ألم) اسم من أسماء الله الأعظم."

الرأئ الارجح بقا من وجهة نظري -وهو مبيتعارض مع الرأي الاول- انها إشارات إلى إعجاز القرآن وأنه مركب من نفس حروف اللغة
لأن القرآن نزل وقتها على اساطيل اللغة العربية اعلى ناس بلاغة ف اللغة حرفيا ف كأن ربنا بيتحداهم ويقولهم القرآن مكون من الحروف دي اللي انتوا عارفينها كويس ... فأتوا بمثله لو استطعتم.
وده رأي ابن عاشور في التحرير والتنوير.

برضو كنت سمعت الشعراوي بيقول انها مفاتيح للسور

بس برضو ايه الحاجة المشتركة ف ال29 مرة اللي اتذكروا فيهم ؟
هقولك يعمنا...المشترك ما بينهم ان بعد الحروف المقطعة على طول بيجي ذكر لمعجزة
تقريبا 26 مرة من اللي اتذكرت فيهم الحروف المقطعة اتذكر بعدهم على طول القرآن او تمت الاشارة اليه وطبعا القرآن أكبر معجزة

الم (1) ذَٰلِكَ الْكِتَابُ لَا رَيْبَ ۛ فِيهِ ۛ هُدًى لِّلْمُتَّقِينَ (2)
طسم (1) تِلْكَ آيَاتُ الْكِتَابِ الْمُبِينِ (2)
قٓۚ وَٱلۡقُرۡءَانِ ٱلۡمَجِيدِ (1)
يسٓ (1) وَٱلۡقُرۡءَانِ ٱلۡحَكِيمِ (2)

لو لاحظت كلهم بيجي بعدهم اشارة للقرآن
كدة 26 مرة اتذكر بعدهم معجزة القرآن طب وباقي ال 3 مرات اللي فاضلين ؟
برضو اتذكر معجزات تعال نبص عليهم كدة

سورة مريم:
(كهيعص (1) ذِكْرُ رَحْمَتِ رَبِّكَ عَبْدَهُ زَكَرِيَّا (2))
مفيش كلام عن القرآن بعدها بس فيه معجزة واللي هي معجزة سيدنا زكريا وولادته ليحيي مع ان أمراته عاقر لا تحمل

سورة الروم:
(الٓمٓ (1) غُلِبَتِ ٱلرُّومُ (2) فِيٓ أَدۡنَى ٱلۡأَرۡضِ وَهُم مِّنۢ بَعۡدِ غَلَبِهِمۡ سَيَغۡلِبُونَ (3) فِي بِضۡعِ سِنِينَۗ)

هنا المعجزة في التنبؤ بانتصار الروم على الفرس وكمان محدد الوقت (في بضع سنين) يعني من ثلاث إلى تسع سنوات

وده كان امر مستحيل حد يتوقعه وقتها
حاجة عاملة كدة زي انك بتقول الاتحاد السوفيتي هيقوم من تاني ويوقع أمريكا ف خلال كام سنة

سورة العنكبوت:
الٓمٓ (1) أَحَسِبَ ٱلنَّاسُ أَن يُتۡرَكُوٓاْ أَن يَقُولُوٓاْ ءَامَنَّا وَهُمۡ لَا يُفۡتَنُونَ (2) وَلَقَدۡ فَتَنَّا ٱلَّذِينَ مِن قَبۡلِهِمۡۖ فَلَيَعۡلَمَنَّ ٱللَّهُ ٱلَّذِينَ صَدَقُواْ وَلَيَعۡلَمَنَّ ٱلۡكَٰذِبِينَ (3)

لو جينا فكرنا شوية هنلاقي ان المعجزة هنا هي قدرة الله ف اختبار كل انسان حرفيا من اول ادم لاخر انسان سواء كان صادق او كاذب ده برضو شئ خارق

طيب فالحروف المقطعة مرتبطة بالمعجزات وقدرة الله عز وجل
خلصنا تدبر ؟ نرجع بقا تاني نشوف المترجمين ترجموهم ايه

استراتيجيات المترجمين في التعامل مع الحروف المقطعة:

🟣1. الإبقاء عليها كما هي (نقل حرفي):
أشهر ترجمة مشيت عالنهج ده ترجمة Abdullah Yusuf Ali:
"Alif. Lam. Mim."
بعدين يُضيف في الحاشية تعليق :
"These are mysterious letters; their meaning is known only to Allah."

وده بيحافظ على الغموض القرآني ومش بيفرض تفسير معين.
بس القارئ غير المسلم ممكن يشوفها بلا معنى أو رموز غامضة.

🟣2. النقل الحرفي مع تفسير ضمن النص:
زي ترجمة Pickthall
مثلاً:

"Alif. Lam. Mim. (These are letters, the meaning of which is known to Allah alone.)"

وده بيخلي المعنى أقرب للفهم من غير تحريف بس مش صح انك تضيف تفسير جوا النص

🟣3. تجاهلها أو دمجها في النص دون فصل:
نادرة جدًا، بس موجودة في ترجمات غير مشهورة

ف الاخر يعمنا الحروف المقطعة دي مش مجرد رموز دي أسرار ربانية، ربنا بس اللي عارف معناها الحقيقي بس ده ميمنعش اننا نحاول نتفكر ونتدبر فيها زي ما ربنا قال
(كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ ) ❤️

مساء النوررر يعمنا ❤️
عمرك سألت نفسك ليه ربنا قال:
"نَحْنُ نَقُصُّ عَلَيْكَ أَحْسَنَ الْقَصَصِ..."
ليه بالذات قصة سيدنا يوسف؟ وليه القرآن اعتبرها "أحسن"؟
تعرف بقا يعمنا ان السورة فيها حرفيا كل عناصر الأدب والelements والtechniques اللي عمالين نهري فيها ف الجامعة في مادة النوفل والدراما ومن اكتر من 1400 سنة ؟

في كتاب (The Hero with a Thousand Faces)، الكاتب جوزيف كامبل قال ان فيه نمط معين بتمشي عليه عليه كل القصص العظيمة (Hero's Journey) في الافلام والمسلسلات
انا بقا جاي اثبتلك إن النمط ده موجود في سورة يوسف ومش بس موجود هو كمان اتفوق على اي عمل ادبي اتعمل في التاريخ
تعال هقولك ازاي

تعال ناخد ال(Plot) ونحلل السورة بالتكنيكس واحنا بنمشي ف احداثها 🫵
خدنا ف الكلية ان البلوت بتتكون من Exposition – Conflict - Rising Action – Climax – Falling Action - Resolution

1️⃣ Exposition – التمهيد وبناء الخلفية
﴿إِذْ قَالَ يُوسُفُ لِأَبِيهِ يَا أَبَتِ إِنِّي رَأَيْتُ أَحَدَ عَشَرَ كَوْكَبًا...﴾
هنا بتبدء السورة ب يوسف الصغير وهو يحكي لأبوه رؤياه
كأنك داخل على أول مشهد في فيلم مشوّق وبنعرف في الاخر ان الرؤيا فعلا بتتحقق ف اخر مشهد ف احداث القصة وده مثال على ال Foreshadowing

2️⃣ Conflict - تكوين الصراعات
بنخش على طول في اول صراع في احداث القصة لما سيدنا يعقوب بيحذر يوسف انه يحكي لاخواته على الرؤيا
(يا بُنَيَّ لا تَقْصُصْ رؤياك عَلَىٰ إِخْوَتِكَ فيكيدوا لَكَ كَيْدًا)
في آيتين بس قدمت القصة معظم الشخصيات الأساسية: يوسف، والده يعقوب، وإخوته

﴿اقْتُلُوا يُوسُفَ أَوِ اطْرَحُوهُ أَرْضًا...﴾
هنا بنشوف صراع تاني وبنشوف غيرة الإخوة اللي سيدنا يعقوب حذر يوسف منها وبتتحول الرؤية اللي كانت بتلمّح ل قدر عظيم لخيانة وده theme متكرر في القصة وهنشوفه مع امرأة العزيز بعدين.

سيدنا يعقوب بيقولهم ( إِنِّي لَيَحْزُنُنِي أَن تَذْهَبُوا بِهِ وَأَخَافُ أَن يَأْكُلَهُ الذِّئْبُ وَأَنتُمْ عَنْهُ غَافِلُونَ)

بس ف الأخر اخوة يوسف بياخدوه معاهم وبيرموه ف البير
(فَلَمَّا ذَهَبُوا بِهِ وَأَجْمَعُوا أَن يَجْعَلُوهُ فِي غَيَابَتِ الْجُبِّ ۚ وَأَوْحَيْنَا إِلَيْهِ لَتُنَبِّئَنَّهُم بِأَمْرِهِمْ هَٰذَا وَهُمْ لَا يَشْعُرُونَ)
وده برضو Foreshadowing واضح ان بعدين سيدنا يوسف هيقول لاخواته عالحاجات اللي عملوها معاه وهما مش هيبقوا عارفين انه هو نفسه يوسف
المهم اخواته بيرجعوا ليعقوب يقولوله ان الذئب اكله! وهنا بنشوف اول irony بإن الحاجة اللي سيدنا يعقوب حذرهم منها هي نفسها اللي استخدموها كحجة عشان يداروا على عملتهم مع إنهم كانوا يقدروا يقولوا أي حجة مختلفة
اخواته بيرجعوا وف ايديهم قميص عليه دم والحقيقة ان القميص مستخدم ف القصة ك motif هيظهر تاني كذا مرة خلال القصة وهيحرك الاحداث وهنا هو بيرمز الكذب

2️⃣ Rising Action – تصاعد الأحداث

بيجوا مجموعة تجار ويلاقوا يوسف مرمي في البير وبيقوموا بايعينه
هنا ربنا بيحكي الموقف عن طريق الThird Person Omniscient Narration او الراوي العليم اللي عارف كل تفاصيل القصة والشخصيات، وبيتدخل في الأحداث ويقدم تعليقات (وَاللَّهُ عَلِيمٌ بِمَا يَعْمَلُونَ) وهنشوف تعليقات ربنا على احداث القصة كتير واحنا ماشيين

في طبيعة القصص البطل بيقابل شخص يرشده أو يساعده.

يوسف مقابلش معلّم بالمعنى التقليدي، لكن نقدر نعتبر الابتلاءات نفسها كانت المعلم ومعية الله اللي كانت معاه من إلقائه في البئر وبيعه كعبد، مراودة امرأة العزيز له، دخوله السجن ظلم، وتأويله لرؤى الملك.
كل خطوة بتزيد التوتر... زي أي حبكة سينمائية محكمة.

في مشهد مراودة امراة العزيز ربنا بيحدد مكان الحدث او الsetting (فِى بَيْتِهَا ) واللي هو قصر العزيز وبيقول (وَغَلَّقَتِ ٱلْأَبْوَٰبَ) وده وصف رهيب imagery لامراة العزيز وهي عمالة تقفل باب ورا التاني
ودي طبعا بيئة مثالية لحدوث اي فتنة، بس كمان بتبني اكتر شخصية سيدنا يوسف indirect characterization وبنشوفه بيكسب صراعه الداخلي بين الغريزة البشرية والالتزام الأخلاقي (وَهَمَّ بِهَا لَوْلَا أَنْ رَأَى بُرْهَانَ رَبِّهِ).
القميص بيظهر ك motif مرة تانية بس هنا بيرمز للعفة ودليل يوسف ضد امراة العزيز

ربنا بيسخدم imagery تانية : "فَلَمَّا رَأَيْنَهُ أَكْبَرْنَهُ وَقَطَّعْنَ أَيْدِيَهُنَّ..." والمرادي برضو indirect characterization عشان يبين شدة جمال سيدنا يوسف.

في القصص المشهورة البطل يبصل للحظة يأس أو سقوط. ودي اللي وصلها سيدنا يوسف لما دخل السجن
﴿وَدَخَلَ مَعَهُ السِّجْنَ فَتَيَانِ...﴾
بداية مشهد جديد بشخصيات جديدة، وهنا بنشوف تكنيك مشهور وهو ال In Medias Res وهو ان المشهد مبدئش بوصف السجن بالعكس بيبدأ على طول بالفتيين وهما بيحكوا ليوسف على رؤياهم.

بعدين بنلاقي ان الملك كمان بيجيله رؤيا وبيحتاج حد يفسرهاله
(وَقَالَ الْمَلِكُ إِنِّي أَرَىٰ سَبْعَ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعَ سُنبُلَاتٍ خُضْرٍ ) هنا البقرات symbolism للسنوات
وبالفعل يوسف بيفسرها بطريقة في منتهى البلاغة وبيطلع من السجن بعد سبع سنين اتسجن فيه بالظلم
بنشوف هنا بقا direct characterization ويوسف بيوصف نفسه (قَالَ اجْعَلْنِي عَلَىٰ خَزَائِنِ الْأَرْضِ ۖ إِنِّي حَفِيظٌ عَلِيمٌ)
يوسف دخل السجن ظلم، لكنه خرج منه عشان يبقى عزيز مصر.
ده أقوى نوع situational irony في السورة.

4️⃣ Extended Climax – ذروة القصة مع رجوع اخوة يوسف في الاحداث

"وَجَاءَ إِخْوَةُ يُوسُفَ فَدَخَلُوا عَلَيْهِ فَعَرَفَهُمْ وَهُمْ لَهُ مُنكِرُونَ"
هنا بنشوف Dramatic Irony وهي اننا عارفين معلومة الشخصيات ف القصة متعرفهاش
احنا عارفين ان يوسف هو عزيز مصر بس اخواته وسيدنا يعقوب لا وده بيعمل مفارقة ممتعة في الاحداث

سيدنا يعقوب بيبعت بنيامين مع باقي اخواته لقصر العزيز وهنا بتحصل plot twist لطيفة
( وَلَمَّا دَخَلُوا عَلَىٰ يُوسُفَ آوَىٰ إِلَيْهِ أَخَاهُ قَالَ إِنِّي أَنَا أَخُوكَ فَلَا تَبْتَئِسْ بِمَا كَانُوا يَعْمَلُونَ)
يوسف بيكشف عن هويته لبنيامين بس وبيفضل مخبي عن باقي اخواته
وينفذ خطة ذكية بتكون نقطة التحول الكبرى (Turning Point) في القصة.
وهي انه بيأمر بوضع كأس الملك في رحل أخيه بنيامين، بعدين يعلن عن فقدان الكأس ويوجه تهمة السرقة لإخواته

بنعرف ان دي خطة من وحي ربنا ليوسف عن طريق الThird Person Omniscient Narration
(مَا كَانَ لِيَأْخُذَ أَخَاهُ فِي دِينِ الْمَلِكِ إِلَّا أَن يَشَاءَ اللَّهُ ۚ نَرْفَعُ دَرَجَاتٍ مَّن نَّشَاءُ ۗ وَفَوْقَ كُلِّ ذِي عِلْمٍ عَلِيمٌ)

لما بيعرف سيدنا يعقوب اللي حصل بيبكي على ولاده لحد ما عينه بتتعمي ف imagery في منتهى الجمال والحزن ف نفس الوقت ﴿وَابْيَضَّتْ عَيْنَاهُ مِنَ الْحُزْنِ﴾

بيرجع اخوات يوسف يطلبوا منه تجارة بس يوسف بينبئهم للي عملوه ليه من حوالي 40 سنة
﴿قَالَ أَنَا يُوسُفُ وَهَٰذَا أَخِي...﴾
لحظة إعلان يوسف لهويته أمام إخوته بعد سنوات من الفراق والخيانة
وكأي بطل ملحمي بينتقم في الاخر فاا redemption يوسف هنا كان في العفو مش الانتقام
﴿لَا تَثْرِيبَ عَلَيْكُمُ الْيَوْمَ﴾
وده يالمناسبة نفس اللي عمله سيدنا محمد في فتح مكة بعد عشر سنين من نزول سورة يوسف عليه ❤️

5️⃣ Falling Action – هدوء الأحداث بعد الذروة
يوسف بيبعت قميصه مع اخواته عشان يعالج سيدنا يعقوب وهنا القميص ظهر للمرة التالتة والمرادي بيرمز للشفاء ولم الشمل - عكس معناه في بداية القصة -

6️⃣ Resolution
لما بيدخل عيلة يوسف لقصره ويسجدوله سجود التشريف بنعرف ان الكواكب كانت symbolism لاخواته ووالديه

يوسف بيتعجب وبيقول لابوه
(يَـٰٓأَبَتِ هَـٰذَا تَأْوِيلُ رُءْيَـٰىٰىَ مِن قَبْلُ قَدْ جَعَلَهَا رَبِّى حَقًّۭا)
وبيسرد flashbacks لاحداث قصته اللي وصلته لكدة
(وَقَدْ أَحْسَنَ بِي إِذْ أَخْرَجَنِي مِنَ السِّجْنِ وَجَاءَ بِكُم مِّنَ الْبَدْوِ مِن بَعْدِ أَن نَّزَغَ الشَّيْطَانُ بَيْنِي وَبَيْنَ إِخْوَتِي)

بنشوف Monologue لسيدنا يوسف في اخر مشهد من الحكاية وهو بيدعي ربنا يتوفاه وهو على الإسلام "رَبِّ قَدْ آتَيْتَنِي مِنَ الْمُلْكِ..."

بتنتهي القصة بنهاية دائرية (Circular Closure)
بتبدأ برؤيا، وتنتهي بتحقيق الرؤيا.

مشهد السجود مش بس نهاية قصة، هو تتويج لمسار بطل
يوسف عليه السلام مر بجميع مراحل "رحلة البطل" زي ما وصفها Joseph Campbell:
النداء، الرحيل، المحنة، التحول، وف الاخر العودة وهو منتصر.

سورة يوسف فيها جمال لغوي، وبناء درامي، وصور بلاغية، وتكنيكات أدبية وسردية مش موجودة حتى في أعظم روايات الأدب الغربي.

عشان كدة ربنا مقالش عليها (أحسن القصص) من فراغ ❤️

مساء الفل يعمنا ❤️
كلنا بنحب سورة الانبياء ودعاء سيدنا يونس وهو في بطن الحوت
﴿ وَذَا ٱلنُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ فَنَادَىٰ فِى ٱلظُّلُمَاتِ أَن لَّآ إِلَـٰهَ إِلَّآ أَنتَ سُبْحَـٰنَكَ إِنِّى كُنتُ مِنَ ٱلظَّـٰلِمِينَ ﴾

بس تعرف ان فيه تراجم مشهورة كتير بيترجموا الأية دي غلط لدرجة إنهم ممكن يشوهوا صورة نبي زي سيدنا يونس من غير قصد ؟
تعال ناخد ترجمة صحيح إنترناشونال (من ترجمة أمة الله وأمينة اسامي وماري كينيدي) للاية دي ونحللها سوااا 🫵

"And [mention] the man of the fish when he went off in anger and thought that We would not decree [anything] upon him. And he called out within the darknesses, 'There is no deity except You; exalted are You. Indeed, I have been of the wrongdoers.'"

🟦مبدئيا ليه المترجمات التلاتة ترجموا ذا النون بthe man of the fish مع انه حوت مش سمكة ؟
عشان ف ترجمات الكتاب المقدس القديمة (زي King James Bible) مثلا اتذكر انه great fish
"Jonah was swallowed by a great fish."
وبما إن المترجمات نفسهم مكانوش مسلمين واعتنقوا الإسلام بعدين،
فكان فيه تأثر واضح بالتقاليد الدينية المسيحية في الترجمة
وعشان كده استخدموا fish بدل whale.

نخش ف المشاكل اللي بجد بقا 😂
🟦 لما ترجموا (فَظَنَّ أَن لَّن نَّقْدِرَ عَلَيْهِ) ترجموا الفعل نقدر ب decree وده معنى مش صح خالص هقولكك ليههه
يقدر ف القرآن مش جاية من (القدرة والاستطاعة) يعمنا
يقدر معناها (يضيق) تخيللل
يعني سيدنا يونس هنا كان فاكر ان ربنا مش هيعاقبه بالتضييق عليه
تعالى نشوفها ف ايات تاني
في سورة الرعد ربنا بيقول ( اللَّهُ يَبْسُطُ الرِّزْقَ لِمَن يَشَاءُ مِنْ عِبَادِهِ وَيَقْدِرُ لَهُ )
يعني ربنا بيرزق ناس ويضيق على ناس
وفي سورة الفجر ربنا بيقول ( وَأَمَّا إِذَا مَا ابْتَلاهُ فَقَدَرَ عَلَيْهِ رِزْقَهُ )
برضو معناها ان ربنا بيبتلي الانسان بتضييق الرزق عليه
ف (يقدر) عكس (يبسط) انما ملهاش علاقة ب decree او ability القدرة
فالترجمة الصح هتكون زي ما دكتور عبدالحليم مترجمها ب restrict واللي معناها التضييق

طب تعال ناخد مشكلة تانية
🟦 المترجمات ترجموا مغاضباً ب (in anger) ودي ترجمة صح مش غلط بس المشكلة هنا انهم سايبين المعنى بدون توضيح هو غضبان من مين بالظبط
ف ممكن تتفهم انه غضبان من ربنا وده هيطلع سيدنا يونس بصورة مش كويسة للقارئ الغربي والحقيقة إن سيدنا يونس كان غضبان من قومه
فممكن نترجمها upset with his people عشان نزيل اي لبس

اخر مشكلة خلاص والله 😂😂
🟦 المترجمات ترجموا "فِي الظُّلُمَاتِ" ب "within the darknesses" واصلا مفيش الجمع ده في الانجلش (احلى مسا لحبايبنا بتوع المورفولوجي واللينجو )
طب نعمل ايههه ف المشكلة ديييي
نيجي نفهمها بالعربي الاول يعمنااا
ربنا لما قال نادى في الظلمات فهنا ربنا جمعها لان سيدنا يونس كانت محاط بظلمات جوا ظلمات حرفيا (ظلمة البحر + ظلمة بطن الحوت + ظلمة الليل.) فكلهم على بعض بقوا ظلمات
فممكن نترجمها
the depths of darkness
أو
from the layers of darkness

وبس كده يعمناااا ❤️
لو عندك افكاررر نكتب عنهااا قول عادي عشان افكاري بتنتهي خلاص هه

مساء الخير يعمنا
تعرف ان فيه كلمة واحدة ف القران ليها ست معاني واكتر كمان ؟
اه والله زي ما بقولك كدة كلمة "أمة" اتذكرت في القرآن حوالي 47 مرة ب ست معان مختلفة
فالطبيعي يعمنا ان مش كل "أمة" هنترجمها nation
طب ايه هما الست معاني ؟
🟨 1. أُمَّة = مجموعة من الناس (Nation/Community) وده الاستعمال الغالب ف القرآن
مثال:
قوله تعالى: {تلك أمة قد خلت لها} (البقرة:141)
"That is a nation which has passed on"
هنا المقصود "الجماعة من الناس".
🟨2. أُمَّة = "دين أو شريعة" اه تخيل يعمنا اننا هنترجمها هنا ب (Religion)
مثال:
"بل قالوا إنا وجدنا آباءنا على أمة وإنا على آثارهم مهتدون" (الزخرف: 22)
"Indeed, we found our fathers upon a religion"
هنا معناها "دين" أو "مذهب فكري".
🟨 3. أُمَّة = ممكن تيجي بمعنى فترة زمنية محددة (Period of time)
مثال:
"ولئن أخرنا عنهم العذاب إلى أمة معدودة" (هود: "And if We hold back from them the punishment for a limited time"
ركز بقا يعمنا ف المعنى ده
🟨4. أُمَّة = ممكن تيجي بمعنى شخص واحد بس الشخص ده يكون قدوة مقتدى به في كل شئ من الاخر شخص زي سيدنا ابراهيم جامع لكل الخير (An exemplary person- leader - model)
مثال:
"إن إبراهيم كان أمةً قانتًا لله" (النحل: 120)
Abraham was indeed a model
يعني سيدنا إبراهيم لوحده كان جامع لصفات أمة كاملة.
🟨5. أُمَّة = الخلق عموماً، من إنسان وغيره. (genera - communities- creations)
{وما من دابة في الأرض ولا طائر يطير بجناحيه إلا أمم أمثالكم}
🟨6. أُمَّة = أمة محمد صلى الله عليه وسلم وأهل الإسلام خاصة. (Ummah)
{كنتم خير أمة أخرجت للناس}
You are the best ‘Ummah ever raised for mankind
نستنتج يعمنا ان لما كلمة واحدة في القرآن يكون ليها 6 معاني، يبقى الترجمة محتاجة فهم وتفسير قبل أي محاولة للنقل.
وعلشان كده، مش كل أمة هتبقى Nation ☝️

يعني إيه كلمة "وحي"؟ هل معناها revelation ولا inspiration؟

بص يعمنا لما تيجي تبص في تراجم القرآن هتلاقي إن كلمة "وحي" ساعات بتُترجم Revelation وساعات تانية Inspiration، طب ايه الفرق ؟
خلينا نشرحها ببساطة خالص

الوحي في اللغة زي ما بيقول معجم لسان العرب:
هو إشارة أو رسالة أو إلهام أو كلام خفي، يعني أي طريقة بتوصّل بيها معلومة أو أمر لشخص تاني بشكل سري أو خاص

وفي القرآن، الوحي له نوعين:
1️⃣ المعنى الخاص: وده لما ربنا يبعت جبريل عليه السلام للأنبياء عشان يبلغهم بالشريعة والأحكام، زي القرآن أو الأحاديث. وده اسمه (Revelation) لأنه وحي تشريعي خاص بالأنبياء بس.
2️⃣ المعنى العام: وده اللي بنسميه إلهام، وممكن يجي للأنبياء أو لناس عاديين أو حتى لمخلوقات تانية، زي النحل. وده مش وحي تشريعي، ده مجرد توجيه أو إرشاد من ربنا، وعشان كده بنترجمه (Inspiration).
أمثلة من القرآن:

"وَكَذَٰلِكَ أَوْحَيْنَا إِلَيْكَ رُوحًا مِنْ أَمْرِنَا" — هنا المقصود بالوحي تنزيل القرآن على الرسول فتترجم We have revealed to you a revelation by Our command.

"وأوحينا إلى أم موسى أن أرضعيه" — هنا أم موسى مش نبية، فالوحي هنا إلهام فطري للإنسان مش تشريع، فترجمتها تبقى
And We inspired to the mother of Moses, "Suckle him;

"وأوحى ربك إلى النحل أن اتخذي من الجبال بيوتاً" — نفس الكلام، ده إلهام غريزي للحيوان مش تشريع، فبنترجمها
And your Lord inspired the bees.

نستنتج بقا كام معلومة لطيفة كدة يعمنا
لو الوحي فيه شريعة: Revelation (ف الاغلب لو مقصود بيه القرآن نفسه)
لو الوحي مجرد إلهام أو توجيه: Inspiration
لو الوحي جي بمعنى الاشارة تبقى signal
زي ما في سورة مريم : (فَأَوْحَىٰ إِلَيْهِمْ أَنْ سَبِّحُوا بُكْرَةً وَعَشِيًّا)
هنترجمها
He told them by signs to celebrate Allah's praises in the morning and in the evening.

هل اسماء الأنبياء بتترجم ؟ الحقيقة اه بس مش دايما...يعني ايه برضو

بص يباشا يعني فيه مترجمين بيفضلوا يترجموها عن طريق الية ترجمة اسمها الNaturalization (التطبيع في الترجمة) واللي معناها نقل الاسم العربي إلى المقابل المعروف في ثقافة ولغة الجمهور المستهدف (زي اسماء الانبياء في الكتاب المقدس)
زي مثلا سيدنا ايوب معروف في الكتاب المقدس ب اسم "Job" فخلاص هنترجمى اسمه زي مهو معروف ف الكتاب المقدس

وفيه مترجمين بيفضلوا يترجموها عن طريق النقل الصوتي (Transliteration) وده عبارة عن نقل الاسم من العربية إلى اللغة الأخرى بحروف قريبة من النطق العربي، دون تغيير الشكل أو المعنى. زي مثلا لو ترجمنا اسم سيدنا ايوب ف هنترجمه Ayoub زي العربي عادي جدا

🔍ليه الNaturalization أفضل في حالة الأنبياء؟
لأن أغلب أسماء الأنبياء مشتركة بين الإسلام والمسيحية واليهودية.
وكمان بيربط القارئ الغربي بالشخصية المعروفة في الكتاب المقدس عنده، وده بيساعده يفهم القصة والسياق. هو هيستوعب ان Moses هو نفسه سيدنا موسى بسهولة حتى لو فيه اختلافات في القصة

انما الTransliteration بيخلي الاسم غريب عن ذهن القارئ، ويفصل الشخصية عن سياقها الديني والتاريخي وممكن يفتكره شخص مختلف
طب تعالى ناخد مثال عالسريع

(وَإِلَى مَدْيَنَ أَخَاهُمْ شُعَيْبًا)
لو هنيجي نترجم الاية دي من سورة الأعراف وهود بالطريقتين

بالـ Transliteration:
"And to the people of Midian We sent their brother Shu’aib."

بالـ Naturalization:
"And to the people of Midian We sent their brother Jethro."

⛔ القارئ الإنجليزي غالبًا مش هيعرف مين Shu’aib، بس هيعرف Jethro من خلفيته الدينية من التوراة او الكتاب المقدس

ودول اسماء الرسل والانبياء بين القرآن والكتاب المقدس
آدم Adam
إدريس Enoch
نوح Noah
هود Eber
صالح Salih (سيدنا صالح نبي عربي ومش مذكور في الكتاب المقدس فهنترجم اسمه زي ماهو)
لوط Lot
إبراهيم Abraham
إسماعيل Ishmael
إسحاق Isaac
يعقوب Jacob
يوسف Joseph
شعيب Jethro
أيوب Job
ذو الكفل Ezekiel
موسى Moses
هارون Aaron
داود David
سليمان Solomon
إلياس Elijah
اليسع Elisha
يونس Jonah
زكريا Zechariah
يحيى John the Baptist
عيسى Jesus
محمد Muhammad

إيه الفرق بين أشهر ترجمات القرآن بالإنجليزي؟ وليه فيه اختلاف؟

مبدئيا يشباب القرآن لا يُترجم لانه نزل عربي ونزل عشان يفضل باللغة العربية دايما زي ما ربنا عز وجل قال (إِنَّا أَنزَلْنَاهُ قُرْآنًا عَرَبِيًّا) [يوسف:2]
فاللي بيُترجم هو "المعنى"، وده بنسميه: "تفسير معاني القرآن بلغات أخرى" عشان كدة بنشوف اختلافات في ترجمات القرآن على حسب تفسير كل مترجم للنص لقرآني
والحقيقة إن مفيش ترجمة واحدة صح والباقي غلط، لكن كل ترجمة ليها أسلوبها وخلفية المترجم بتأثر بشكل كبير على طريقته في نقل المعنى.

🛑 قبل الترجمات الإسلامية:
قبل ما تظهر الترجمات الإسلامية، الترجمات الأولى للقرآن في أوروبا كانت من إنتاج مستشرقين أو رجال دين هدفهم تشويه صورة الإسلام.
زي ترجمة Robert of Ketton اللي سماها قانون محمد الكاذب (Lex Mahumet pseudoprophete)، وترجمة الفرنسي Du Ryer اللي سماها بقرآن محمد (L'Alcoran de Mahomet ) واللي كانوا مليانين اقتباسات محرفة، وهدفهم الأساسي كان الطعن في الإسلام لحد ما ظهر مترجمين مسلمين وبدأوا يترجموا القرآن بنفسهم

ودول أشهر التراجم الإسلامية للقرآن

🔹 Abdullah Yusuf Ali 1937
من أوائل وأشهر الترجمات الإسلامية لدرجة إن ترجمته كانت محفوظة ضمن المجموعة الملكية البريطانية الخاصة بالملكة إليزابيث الثانية.
أسلوبه أدبي وكلاسيكي راقي. فمثلا ترجمته ل ﴿اللَّهُ نُورُ السَّمَاوَاتِ وَالْأَرْضِ﴾ ترجمها ب اسلوب بلاغي يحسسك انك بتقرا شعر أو نثر إنجليزي كلاسيكي، مش مجرد ترجمة معاني جافة.
كانت الترجمة الأشهر في العالم الإسلامي لفترة طويلة، رغم إن لغته الإنجليزية صعبة شوية على القارئ الحالي.

🔹 The Koran Interpreted - Arthur John Arberry 1955
مستشرق إنجليزي غير مسلم، لكنه قضى حياته يدرس العربية.
في مقدمة ترجمته قال بوضوح:
"لفهم القرآن حقًا، لازم تتعلم عربي."
ترجمته لفظية جدًا، كان بيحاول يحط لكل كلمة عربية مقابل إنجليزي، وده خلى بعض المعاني تضيع في الترجمة, لان نفس الكلمة في القرآن بيختلف معناها باختلاف سياق الايات
كمان استخدم لغة إنجليزية قديمة (Archaic Language) مش متداولة دلوقتي.
مناسب للباحثين الأكاديميين، مش القراء العاديين.

🔹 Sahih International 1997
ترجمة حديثة لمجموعة من النساء المسلمات الأمريكيات.
فيها لغة واضحة ومعاصرة وسهلة لأي شخص وترجمة دقيقة للمعنى بدون إضافات تفسيرية كتير ولا لغة ادبية زي ترجمة Abdullah Yusuf Ali من الاخر ترجمة بتلعب ف ال safe side عشان كدة تلاقيها منتشرة جدًا في المواقع والتطبيقات الإسلامية.
مناسبة للي عايز يقرأ ترجمة قريبة من المعنى بدون تعقيد.

🔹 Oxford Quran - Muhammad Abdel Haleem 2004 (ودي النسخة اللي برشحها)
عالم مسلم مصري الأصل، وأستاذ دراسات إسلامية في بريطانيا.
ترجمته حديثة وسهلة، وبتوضح المعاني من غير تعقيد ولا محاولة لتقليد اسلوب النص القرآني بالعكس اسخدم structure سهل وموجودة ف الانجلش الحالي
بيشرح المصطلحات الإسلامية اللي ملهاش مقابل في الإنجليزي زي (الحج، التيمم) في حواشي (Footnotes).
مناسب جدًا للطلاب والشباب اللي بيتعلموا انجلش

🔹 The Sublime Quran - Laleh Bakhtiar 2007
مترجمة أمريكية إيرانية، ومن أكتر الترجمات المثيرة للجدل.
مدرستش العربي غير كلغة ثانية وكانت من أكبر داعمي حركة النسوية (Feminism)، وده انعكس على ترجمتها:
آية "فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ ۖ " في سورة النساء ترجمتها بـ "go away" بدل المعنى الأصلي.
كلمة "كافر" اللي معناها "Unbeliever" ترجمتها بـ "Ungrateful"، وده تحريف واضح للمعنى.
حاولت تبسط القرآن زيادة عن اللزوم عشان تناسب الثقافة الغربية وتناسب عقليتها النسوية، لكن ده أضعف المعنى في مواضع كتير.

🔹 The Clear Quran – Mustafa Khattab 2014
مصطفى هو مصري كندي اتخرج من جامعة الازهر وبدء ترجمة القرآن في 2013 وانهاها في عام كامل
من أحدث الترجمات وأوضحها وبشوفها بشكل كبير ترجمة متكاملة لانها اتفادت كل اخطاء التراجم اللي قبلها وجمعت بين الاسلوب السهل مع الاسلوب الادبي فكان بيترجم الاستعارات والتشبيهات على قدر الامكان
فمثلا ترجمة "وتركنا بعضهم يومئذ يموج في بعض" ترجمها We will let them surge ˹like waves˺ over one another.
مناسبة للمسلمين وغير المسلمين اللي بيقروا القرآن لأول مرة.

المهم يكبير بعد كل ده انك لو عايز تفهم القرآن صح لازم تتعلم عربي زي ما عمك Arberry نفسه قال ❤️

Sources:

كتاب فن الترجمة - دكتور محمد عناني
Quran Translation - Dr Asmaa Alduhim
Wikipedia

Interviews of Dr Mustafa Khattab and Dr Abdulhalim
#القرآن