مصطفى عبد الرحمن، استشاري تربوي، بتكلم هنا عن تربية الأطفال بشكل عملي من خلال الواقع اللي بنعيشه تعليم
صفات ومهارات أساسية لازم تكون عندك كمُربي
سلسة تربوية من 6 فيديوهات .. وديه تاني حاجة فيها
2من6 متفهم لطبيعتهم ولشخصياتهم وللفروق الفردية بينهم
صفات ومهارات أساسية لازم تكون عندك كمُربي
سلسة تربوية من 6 فيديوهات .. وده أول حاجة فيها
1من6 مقاومة الإندفاع
الأدب وحسن الخلق وأهميتهم في التربية ❤️
التربية هي سياسة النفس الطويل
خليكم رزق ولادكم الجميل ❤️
عايزين ولادكم يكونوا أسوياء؟ - الجزء الثاني
ازاي نتعامل مع أخطاء ولادنا
عايزين ولادكم يكونوا أسوياء؟
علموهم ازاي يتعاملو مع أخطائهم بطريقة سليمة
08/01/2024
استشارات تربوية - مصطفى عبد الرحمن
كلنا عايزين ولادنا يكونو أحسن حد في الدنيا، ونفسنا حياتنا تمشي كويس .. لكن مع الحياة ومتغيراتها ومنغصاتها الموضوع بيبقى صعب، وأوقات كتير بنقف عاجزين مش عارفين نعمل ايه .. يمكن عشان الضغوط مش مخليانا نفكر كويس أو يمكن عشان لما الموضوع بيمسنا بشكل مباشر تفكيرنا بيتشوش أو يمكن احنا مش عارفين فعلا
عشان كده مهم دايمًا يكون فيه حد نستشيره .. عنده علم وخبرة ويقدر يفهمنا ويوجهنا بشكل سليم
أنواع الاستشارات اللي بيقدمها ا. مصطفى عبد الرحمن هي:
1. استشارات للآباء أو الأمهات
2. استشارات للأطفال أو المراهقين
3. استشارات اللايف كوتشنج
4. استشارات "فض الاشتباك"
الحجز والاستعلام من خلال شركة مغامرات على رقم 01122688268
مثلث التربية (الحب - الاحترام - الحزم)
اتعامل مع ولادك بمثلث نقاطه الرئيسية هي الحب والاحترام والحزم
الـ 3 حاجات دول لازم يكونو موجودين في علاقتنا بولادنا
- نبدأ بـ "الحب"
أنا بحب ولادي وعايزهم يكونو أحسن ناس في الدنيا .. فلازم حبي ليهم ده يكون ظاهر بغض النظر عن مدى كونهم كويسين أو لأ .. لازم يفهم إني بحبه في المطلق ولو عمل حاجة وحشة فأنا مش بحب فعله الوحش لكن بحبه هو
طيب ده حطبقه ازاي؟
لما يحصل أي موقف أو مشكلة بجيبه وبحضنه وبطبطب عليه ببوسه وافهمه إني عايز مصلحته وعايزله الخير وإني حبي ليه مش بيتأثر
"الحب ده من الحاجات اللي محتاجة تكون ظاهرة في أفعالنا وأقوالنا مش بس جوانا ولا باينة علينا ولا معروفة ضمنيًا"
- النقطة التانية "الاحترام"
احترامه ليك لازم يكون خط أحمر مينفعش يعديها ولو فرضًا حصل منه تجاوز توقف أي حاجة بتعملها وتصلح التجاوز ده .. وديه من أهم الحاجات اللي بتحافظ بيها على علاقتكم كويسة
- اخر نقطة "الحزم"
وده حاجة مهمة جدًا جدًا في العلاقة التربوية .. لازم تكون حازم ولما تقول حاجة يبقى حتتعمل .. بس قبل ما تقول حاجة أصلا اتأكد إن اللي انت قولته ده فعلا كويس وفعلا قابل للتطبيق .. مناسبة يبقى خلاص تقول واللي قولته يتعمل .. بغض النظر عن عدم اعجاب ولادك او رفضهم .. اسمع منهم ونفذ اللي قولته (مع شرط زي ما قولنا إن ده يكون الأفضل وانت فكرت فيه)
ربنا يهديهم ويصلح حالهم ويجعلنا آباء صالحين مصلحين
06/06/2021
دورك ك مُربي 👌
25/03/2021
10 حاجات يعملهم اللي عايز يربي ولاده كويس 👌
تربية ولادك تربية سوية أصعب حاجة ممكن تعملها دلوقتي على الإطلاق !
عشان كده انت محتاج تاخد بالك من الكام نقطة دول :
1. اتعلم كتير جدا ، وأهم من إنك تتعلم وبس إنك تطبق اللي بتتعلمه .. وخلينا فاكرين دايما إن العلوم التربوية مش كل حاجة فيها صح تماما .. لازم يبقى عندك دليل -Mentor- ومع الوقت يبقى ليك تجاربك الخاصة
2. لازم يكون الاتصال مفتوح بينك وبين ولادك رايح جي .. كلام واستماع .. مهما كان عندك مشاغل ومشاكل (لو حتتكلم وتوجه بس فده غلط جدا .. ولو حتسمع بس يبقى فين التصليح)
3. الاتصال الجسدي مهم جدا جدا مهما العيال كبرو .. كل واحد في الدنيا بيحتاج "لدفء" المشاعر في تعاملاته مع اللي بيحبهم (لو صغير قعده على رجلك لو كبير قعده جنبك أو قدامك ورجلك في رجله .. لو أكبر حط ايدك على كتفه .. وعلى الأقل من وقت للتاني حضن دافئ يحس فيه بحبك)
4. لازم يحس بحبك جدا في كلامك قبل أفعالك .. متقولش دول ولادي وأكيد بحبهم .. هما محتاجين يسمعو ده منك ويشوفوه في تصرفاتك ❤️
5. الحزم والحزم والحزم .. خليك حازم في كلامك وتصرفاتك .. بس خلى بالك من الأول إنك لازم تختار مواقفك اللي حتكون حازم فيها صح ، عشان لما "تعصلج" معاهم في حاجة يبقى معاك حق مش العكس
6. كلامك مسئول بيطلع بحساب .. متقولش اي كلمة مش حقيقية .. متقولش اي كلمة مش واثق فيها .. متقولش عقاب انت مش حتنفذه .. الكلمة مسئولية
7. لو حتعاقب يبقى لازم تتعلم ان العقاب الهدف منه إصلاح ابنك مش تنفيث غضبك .. متعاقبش وانت غضبان .. متعاقبش عقاب كبير على حاجة صغيرة أو العكس
8. مفيش أهم من ولادك في الدنيا .. دايما فضيلهم وقت تكون معاهم .. العب معاهم الألعاب اللي يحبوها .. انزل لمستواهم .. قرب منهم ذهنيًا قبل جسديًا .. احتويهم
9. خليك دايما قدوة صالحة ليهم .. وعرفهم ان كل الناس بتغلط حتى انت .. لو اخطئوا فديه مش نهاية العالم المهم يتعلموا يتعاملوا مع اخطائهم بشكل سليم
10. التربية هي سياسة النفس الطويل .. واللي نفسه أطول ومعاه أدواته وماشي صح اكيد حيوصل في يوم من الأيام إن شاء الله .. ولو فرضًا موصلتش فديه من عند ربنا ومأجور بنيتك وعملك السليم .. المهم انك تعمل اللي عليك مظبوط وكثف دعائك واخلاصك لله
لما ولادك يكونوا عايزين يعملوا حاجة ، والحاجة ديه مش هي الأفضل أو غلط ، وانت عايز تمنعهم بطبيعة الحال .. فـ هنا بيحصل صراع بشكل أو بآخر
عشان تدير الصراع ده بشكل كويس وفعال ومفيد .. راجع نفسك انت بتعمل كده ليه ؟ وهل الموضوع يستحق الخناقة ديه ولا لأ ؟
لو الإجابة بعمل كده عشان مصلحتهم و آه الموضوع يستحق .. يبقى انتقل للسؤال التاني ..
ايه اللي حيحصل لو عملوا كده ؟ أو ايه اللي حيترتب على كده ؟
لو كان الضرر الحاصل -إن وُجد- بسيط وغير مؤثر ويمكن تداركه لاحقًا .. يبقى سيبه يعمله ويغلط وساعده يتعلم .. إنما لو كان الضرر المتوقع حصوله كبير أو مؤثر أو لا يمكن تداركه فاجتهد إنك توضحله وجهة نظرك ، مع الحزم في إن ده مش حيحصل
مثال: الدنيا بتمطر وابنك مصمم يقلع الجاكيت الووتر بروف وينزل يلعب في المطرة .. ده ممكن يخليه يتعب ويمرض فانت حتمنعه ، وده تصرف سليم .. وممكن تعيد توجيهه إنه ممكن ينزل يلعب في المطرة بس يلبس الجاكيت.
مثال عكسي: الدنيا بتمطر وابنك عايز ينزل يلعب في المطر وهو لابس الجاكيت الووتر بروف .. مفيش ضرر جامد ممكن يحصل إلا إتساخ الملابس وديه حاجة سهل تداركها لاحقًا فسيبه يعمل كده حتى لو انت شايف إن الأحسن يقعد في البيت