Ihab Maged Academy

"كفاية نكد.. ازاي تتعامل مع الشكاي المحترف؟"

فيه نوعية ناس لو دخلت مسابقة الشكوى، هيكسبوا المركز الأول من غير منافسة! علشان تحافظ على طاقتك، تعالوا جربوا دول:

1. حط حدود – اسمع بحدود، مش كل مرة لازم تبقي كتف للبكاء.

2. اقطع دايرة النكد – اسأل الشخص : "طب إيه الحل؟"، هتلاقيه اتفاجئ وسكت شوية.

3. خفف الجرعة – لو الشكوى زادت، غير الموضوع بهزار أو افتكر فجأة إنك "لسه فاكر إن عندي حاجة مهمة".

4. متنزليش الملعب معاه – لو فضلت تتعاطف وتواسي، هيفضل يشتكي للأبد.

5. وجّهه للطريق الصح – لو مشاكله متكررة وباين إنها مش مجرد تذمر، اقترح عليه يتكلم مع مختص

باختصار، حافظ على أعصابك، لأن النكد عدو الطاقة

كاميليا عمران
أخصائي نفسي وإرشاد أسري

شكر واجب لفريق عمل مسلسل "لام شمسية"👏
بقالي سنين طويلة مش بتابع الدراما، وده لسببين: الأول إني من أكتر من 15 سنة قررت أستثمر وقتي في حاجات تكون ليها قيمة حقيقية وهي رسالتي في توعية الأباء والامهات بدورهم في الصحة النفسية لأطفالهم والتاني إن مستوى الدراما بقى متدني، مليان ألفاظ وإيحاءات وأفكار مشوهة تدمر المجتمع .
لكن بعد إلحاح من صديق عزيز، قررت أدي "لام شمسية" فرصة... وبصراحة، فخور جدًا بالعمل ده بكل تفاصيله! من الموسيقى للإضاءة للديكورات، للتمثيل وطبعًا القصة والإخراج.
حقيقي، شكرًا لكل حد اشتغل على المسلسل، لأنكم قدرتوا تحققوا المعادلة الصعبة: توصلوا الواقع بكل قسوته، لكن بطريقة احترافية ومحترمة، من غير ألفاظ خارجة أو مشاهد مبتذلة.
نجحتوا في طرح قضية مسكوت عنها رغم إنها منتشرة حوالينا، ووصلتوا رسائل قوية بصدق وإحساس عالي.
بجد، شكرًا ليكم على عمل يستحق المشاهدة والاحترام. 👏
وخلال الأيام الجاية هناقش معاكم كام فكرة تم عرضها في المسلسل لكن مش بطريقة مباشرة