لحن الحياة

لسه عارفة من شوية لما ربنا عز وجل قال لسيدنا موسى:
{قَدْ أُوتِيتَ سُؤْلَكَ يَا مُوسَىٰ} كان سيدنا موسى ليه "سبع" طلبات وربنا اداهومله!

📌تعالوا نعرف إيه الـ 7 طلبات، ونتدبر فيهم، وتدعوا لي طبعًا👀

🌻 {رَبِّ اشْرَحْ لِي صَدْرِي}
بدأ بأهم حاجة بيعوزها الإنسان "راحة البال والقلب" لأنك لو صدرك منشرح ومطمئن، هتعرف تواجه أي حاجة صعبة في حياتك، وهتقدر تواجه أكبر الطغاة (زي فرعون) مثلًا وإنت ثابت ومش خايف.

🌻 {وَيَسِّرْ لِي أَمْرِي}
طلب "الـ التيسير" في كل خطوة، عشان من غير توفيق ربنا، أسهل حاجة في الدنيا بتقف وتتعقد؛ فـ لو ربنا يسر لك طريقك، الصعب هيبقى سهل والبيبان المقفولة بتتفتح لوحدها.

🌻 {وَاحْلُلْ عُقْدَةً مِّن لِّسَانِي}
سيدنا موسى كان عنده زي ما بنقولوا "لدغة" أو صعوبة في الكلام من ساعة الجمرة اللي كلها، فطلب إن العقدة دي تتفك. وده بيعلمنا إيه؟ إننا ما نتكسفش من عيوبنا أو نقط ضعفنا، بالعكس، نروح بيها لربنا وهو هيصلحها لنا.

🌻 {يَفْقَهُوا قَوْلِي}
​الفكرة مش بس إنه يتكلم، الهدف إن كلامه يوصل وقلوب الناس تفهمه وتستوعبه، يعني طلب "البلاغة والقبول" في الدعوة.

🌻 {وَاجْعَل لِّي وَزِيرًا مِّنْ أَهْلِي}
طلب الـ "support" والسند.. ما حبش يمشي الطريق الصعب ده لوحده، وطلب إن السند ده يكون حد من أهله.

🌻 {هَارُونَ أَخِي}
حدد بالاسم "أخويا هارون" ودي بتوريك عظمة الأخوة الحقيقية، وإزاي الأخ الصالح بيبقى أفضل نعمة ممكن تُرزق بيها.

🌻 {اشْدُدْ بِهِ أَزْرِي (31) وَأَشْرِكْهُ فِي أَمْرِي }
يعني تقوّي بيه ضهري، ويبقى شريكي في الخطوات والمسؤولية الكبيرة دي.

💡 السر واللقطة الجميلة هنا فين بقى؟
عارفين سيدنا موسى طلب كل ده ليه؟
كملوا الآيات هتلاقوه بيقول: {كَيْ نُسَبِّحَكَ كَثِيرًا * وَنَذْكُرَكَ كَثِيرًا}.
يعني كل الطلبات دي والدعوات دي ما كانتش لأهداف دنياوية أو وجاهة.. دي كانت عشان "يعبدوا ربنا أكتر ويذكروه أكتر"!

🌼عشان كده، ربنا الكريم، المعطي ما ردوش، وبكلمة واحدة قاله: {قَدْ أُوتِيتَ سُؤْلَكَ يَا مُوسَىٰ}
يعني كل اللي في خيالك وبالك اتنفذ خلاص!

🍒 الخلاصة اللي نطلع بيها لينا إحنا:
لما تيجوا تدعوا ربنا بأي حاجة دنياوية (شغل، جواز، نجاح، فلوس)، خلوا نيتكم فيها: "يا رب اكرمني بده عشان يقويني على طاعتك ويقربني منك"
وشوفوا بقى كرم ربنا هيكون إزاي!

‏" قُلْ للذينَ فوضُوا أمورهُم للَّه
أنَّ اللَّه لنْ يخذلُهم أبداً 🖤."...

غريبة أوي السِت أُم كلثوم دي وانا صغير ماكُنتش بطيقها وكُنت بشوف أغانيها رخمة ومُملة لَكِن بعد ما كبرت لقيت مُعبرة جدًا ..

وأنا صغير لما كُنت بشغل الراديو وأول ما صوتها يطلع أجري أغير المحطة واقول :

«إيه الملل ده ؟! ليه الأغنية نُص ساعة ؟! ما تغني وتخلصي !».. بس لما كبرت ولما القلب داق فهمت ، فهمت إن أغاني السِت مش بتتسمع وخلاص دي بتتعاش ..

«الأطلال».. مش أُغنية دي جنازة حُب مات
«إِنتَ عُمّري».. مش غزل ده إعتراف متأخر ٢٠ سنة
«فات الميعاد».. مش عتاب دي كرامة بتتكلم
«بعيد عنك».. مش شوق دي روح بتتسحب مِنك ..

أُم كلثوم مبتقولش الكلمة هي بتفصّلها على مقاس وجعك
بتعيد الجملة ١٠ مرات مش عشان ناقصة كلام عشان إحساسك لسه موصلهوش ، واللي كُنا بنسميه «مط».. طلع صبر على قلبنا لحد ما يستوعب ، واللي كُنا بنشوفه «رخامة».. طلع فن نادر ، فن إنك تخلي الزمن يقف عشان تسمع دمعة ..

الخُلاصة : السِت أُم كلثوم مش لكُل الناس .. أُم كلثوم للي كبروا واللي حبوا واللي إتوجعوا وعرفوا يسكتوا ورحلوا في هدوء 🖤