ترند التعليم - أحمد حافظ

رسميًا.. وزارة التربية والتعليم تبدأ تسليم أرقام جلوس طلاب الثانوية العامة في المدارس ٢ يونيو.. وتتضمن (رقم الجلوس – مقر اللجنة الامتحانية).

إحالة مدير مدرسة ووكيل مدرسة ومسئول أمن المدرسة في القليوبية للتحقيق بعد تنظيم سباق بالموتوسيكلات داخل المدرسة.. وفصل الطلاب المتورطين وإبلاغ مباحث المرور عن الموتوسكيلات.. ضيعوا نفسهم وسط الامتحانات.. اتعبوا شوية في تربية ولادكم قبل ما تتعاقبوا بيهم لما يكبروا.

قبل ظهور النتيجة.. بلاش تقارن نتيجة ابنك بغيره.. حقك يبقى الأفضل لكن ربنا خلق البشر مستويات.. ده متفوق دراسيا ده شاطر في حتة مهارية مختلفة عن غيره.. ابنك مش فاشل.. ابنك شاطر ومتفوق ومهاري في حتة تخصه..فبلاش توزنه بميزان الدرجات طالما الامتحانات آخرها رصد درجات مش كشف مهارات.

قضي الأمر: ضاع آخر أمل في امتحانات بدون سماعات

للأسف، وبكل أسف، خرج علينا النهاردة رئيس جهاز تنظيم الاتصالات في وزارة الاتصالات، بكلام "مؤسف".. لما قال في اجتماع لجنة الاتصالات بمجلس النواب: لن يتم قطع الإنترنت والاتصالات في امتحانات الثانوية العامة.. اللي هو يعني: إيه اللي بتقولوه ده.. مفيش حاجة من دي هتحصل.

والمؤسف أكتر: لما قالك الحلول الأكثر فاعلية لمواجهة الغش في امتحانات الثانوية العامة إن يكون فيه تشديد للرقابة داخل اللجان (يعني دي تبع وزارة التعليم) وتطوير وسائل التفتيش (ودي برضو تبع وزارة التعليم) واستخدام تقنيات حديثة للكشف عن السماعات والغش الإلكتروني (ودي تبع وزارة التعليم)... وده معناه: أنا كوزارة الاتصالات مش في إيدي حاجة.. روحوا شوفوا وزارة التعليم.

لو شايف نفسك ملكش دعوة تعالى رد عليا في الكلام ده:

= ليه كوزارة اتصالات على مدار 10 سنين ولحد النهاردة، مقفلتيش صفحات وجروبات الغش الإلكتروني الموجودة على فيسبوك، اللي فيها أعداد مهولة من الطلبة وبيتنشر عليها أسئلة وإجابات الامتحانات.. ده اتصالات ولا تربية وتعليم!.

= ليه كوزارة اتصالات على مدار 10 سنين ولحد النهاردة، مقفلتيش قنوات الغش على تطبيق تليجرام اللي الطلبة بتشترك فيها علشان تفتحها جوة اللجنة أو يتنشر عليها أسئلة وإجابات الامتحان.. ده اتصالات ولا تربية وتعليم!.

= ليه كوزارة اتصالات سايبة شوية لصوص ونصابين يستخدموا خطوط شركات الاتصالات في النصب وفتح جروبات غش على فيسبوك وتليجرام وواتس آب وبيتربحوا من وراها مبالغ مهولة بأسماء وهمية وخطوط رسمية.. ده اتصالات ولا تربية وتعليم!.

= ليه كوزارة اتصالات بتسمحي ببيع وتداول وسائل اتصال بشرائح خفية محظور تداولها إلا لأغراض معينة.. وأصبحت مغرقة السوق علشان تُستخدم في الغش الإلكتروني بطرق يستحيل الوصول إليها داخل اللجنة.. ده اتصالات ولا تربية وتعليم!

= ليه وزارة الاتصالات مش قادرة تقتنع: إن سماعات الأذن المستخدمة في الغش هي في الأصل اتصالات.. وشريحة الاتصال اللي الطالب بيخبيها في ملابسه الداخلية وفي الحذاء وكاب الرأس وتحت الطرحة وداخل توكة الحزام وغيره وغيره.. هي في الأصل اتصالات.. والقلم اللي فيه كاميرا بشريحة اتصال والساعة اللي فيها كاميرا بشريحة اتصال.. هي في الأصل اتصالات!!.

= حضرتك جاي تقول لي: طوروا وسائل التفتيش واستخدموا تقنيات حديثة للكشف عن السماعات وشددوا الرقابة!!!! طب انت دورك إيه، ومسئوليتك إيه، وأفكارك إيه، وصلاحياتك فين، لما كل ده التربية والتعليم مسئولة عنه، انت فين دورك كمسئول عن الاتصالات في البلد.. واتصالات يعني غش إلكتروني.. بتتهرب ليه!

فكرة إن وزارة التعليم تشيل الجمل بما حمل في امتحانات الثانوية العامة القومية وأنا برة الليلة في نقطة الغش الإلكتروني.. ده في حد ذاته خطأ فادح.. إنك تسيب وزارة التعليم اللي لا عندها إمكانيات خاصة بالاتصالات ولا وسائل الغش الحديثة جدا، ولا مراقبين مدربين يقوموا بدور مش دورهم، ولا أفراد أمن إداري يعرفوا الطالب مخبّي العفريت فين.. انت بتشيل إيدك من المسئولية.

للمرة العاشرة، ملف الغش الإلكتروني في الثانوية العامة مش بتاع وزارة التعليم، ولا كان، ولا هيكون، لا في عهد الوزير ده ولا اللي قابله، ولا اللي قابله، وطول ما الحكومة – ووزارة الاتصالات تحديدا- سايبين وزارة التعليم تشيل الشيلة مع أجهزة الأمن لوحدهم، هتفضل الأزمة.. أزمة هروب من المواجهة، وأزمة هروب من المسئولية، وأزمة تقديم هدية للغشاش على طبق من دهب.

كان كفاية هروب.. كان كفاية قهر للطالب المجتهد وأهله، كان كفاية هدايا للغشاش وأصحاب المصالح الرخيصة.. كان عندكم الحل، ورفضتوا الحل، وبديل الحل، ومقترحات الحل، والمساهمة في الحل.. التاريخ لن يرحم كل من تخاذل ورمى المسئولية على غيره.

أملنا الأخير في الرئيس السيسي.. طالما الكل بيتهرب.

#شير في الخير

رسميًا.. إجازة عيد الأضحى ٦ أيام.. من الثلاثاء 26 مايو حتى الأحد 31 مايو بقرار من رئيس مجلس الوزراء.. ويسري القرار على العاملين في الوزارات والمصالح الحكومية والهيئات العامة والإدارة المحلية والقطاع العام وقطاع الأعمال مع استمرار امتحانات الطلاب خلال فترة الإجازة.. إن وُجدت.

عن شكل امتحانات نظام البكالوريا:

= النهاردة وزير التعليم كان مشارك مؤتمر التعليم الدولي في بريطانيا وبيتكلم عن تجربة مصر.. وقال كلمة في المؤتمر كان أهم جملة اتقالت فيها بالنسبالي: في شهادة البكالوريا المصرية.. نريد طلابًا يستطيعون شرح إجاباتهم، لا مجرد اختيارها، وطلابًا قادرين على الدفاع عن آرائهم، لا مجرد تكرار فقرة محفوظة، وطلابًا قادرين على ربط المعرفة بالحياة الواقعية، لا مجرد تخزينها من أجل الامتحان.. وتحقيق ذلك يحتاج إلى شجاعة استثنائية، لكن هذا لابد أن يحدث.

= كصحفي تعليم بيهمني قراءة اللي بين السطور: كلام وزير التعليم ده معناه حاجة واحدة ملهاش تاني: مفيش امتحانات بنظام البابل شيت في نظام البكالوريا السنة الجاية.. مفيش امتحانات تاني بنظام الاختيار من متعدد زي اللي بيحصل في الثانوية العامة.. لما يقول: هنعمل امتحانات الطالب هيشرح فيها الإجابة مش يختار إجابة.. يبقى السنادي آخر سنة في نظام البابل شيت المعتمد بشكل أساسي إن الطالب يختار الإجابة مش يشرح إجابة.. ومش عايز أقول إن ٩٠٪؜ من أسباب الغش والسماعات في الثانوية العامة مصدرها الأول والأخير: نظام البابل شيت اللي الطالب بيتملى فيه إجابات الامتحان كاملا في ربع ساعة.

لما مُعلم فاضل يقف الوقفة دي بملامح الوجه دي.. بالنظرة دي.. قدام طالب مترباش ولا عنده اللي يربيه.. بيمد إيده عليه.. يبقى احنا قدام جيل عايز يتربى من جديد.. جيل يتحط له أقصى عقوبة ممكنة علشان يوم ما يفكر لمجرد التفكير يرفع عينه في عين مُعلم.. يبقى عارف إن هيعيش فترة أشبه بالتربية العسكرية من أول وجديد.. النوعية دي من الطلبة مينفعش معاها فصل ورسوب لأنهم مش بتوع تعليم.. دول يتاخدوا كدة يتربوا التربية اللي يستحقوها ويرجعوا يمشوا زي الألف.. المعلم لما يقف الوقفة دي وتبقى ملامحه كدة وسط اعتداءات وترهيب هيكمل ازاي مهنته.. ويعيش ازاي وسط أسرته.. انتوا عارفين يعني إيه معلم يوصل للمرحلة دي!! عارفين يعني إيه معلم ورسول علم يبقى ده حاله!! انتوا عارفين يعني إيه وضع العينة اللي متربتش يوصل بيها الحال لكدة!! انت مش بس لازم تحمي المعلم.. انت بتحمي المحترم من إنه يكره إنه محترم ويفكر يبقى بلطجـ ي طالما شايف البلطجـ ي هو اللي بيتعمل له ألف حساب.

ارفع راسك يا رسول العِلم.

ارفع راسك لأنك وكل زمايلك تستحقوا تبقوا فوق الراس.. حقك على مصر كلها لحد مصر ما تجيب لك حقك وزيادة🙏

اتعرفتوا وهتتجابوا.. وهتتربوا 👌

الطالب الحقـ ير اللي مشافش بربع جنيه تربية ده.. اللي بيمد إيده على المعلم الفاضل ده.. اتعرف خلاص.. وزارة التعليم عرفت مكانه من شوية.. وطلع في مدرسة فندقية.. وللأسف المعلم معملش محضر ولا شكوى.. ولا المدرسة أخدت إجراء ولا كأن حاجة حصلت.. والواقعة طلعت من شهر ونص.. والترم خلص.. لكن بعد الفيديو ما انتشر وزارة التعليم قدرت توصل في وقت متأخر من الليلة لمكان المدرسة والإدارة.. والحقيـ ر ده هيتعمل فيه اللي يستحقه هو واللي معاه.. اللي قفل باب الفصل على المعلم.. واللي بيعتـ دي على المعلم.. الموضوع اتصعد لمستوى عالي جدا.. وخلال ساعات هيكون فيه عقوبة محترمة ده غير الموقف المحترم - المتوقع- اللي يستحقه البلطـ جية دول من رجال الأمن لأن الفيديو محزن ومؤسف ويحـ رق دم أي بني آدم عنده دم.. هتتربوا التربية اللي تستحقوها انتوا واللي المفروض كان تعب نفسه في تربيتكم.. تستاهلوا.

لائحة الانضباط المدرسي لازم تتنسف
تبلطـ ج تتحبس تتربى طالما معندكش حد يربيك 👌

وصلني ومعرفش توقيته ومصدره لكنه متداول على نطاق واسع.. يتقبض عليه هو واللي معاه ويتحبسوا ويتفصلوا وميشوفوش الشارع تاني لا هو ولا اللي معاه غير لما يقضوا فترة سجن أحداث.. الفيديو محزن ومخزي جدا.. ٢ طلبوا حبسوا المعلم وواحد بيعتدي عليه والتاني بيقفل الباب والتالت بيصور.. متأكد إن وزارة التعليم هتجيبهم (لو الفيديو حديث وفي مصر) ومتأكد إن وزارة الداخلية مش هتخليهم يباتوا في بيوتهم وهيتصورا متكلبشين بنفس هدومهم.. بكتب من حرقة دمي رغم إني مش متأكد من توقيت الواقعة واسم المدرسة.. أنا متأكد إن العقاب هيكون من جنس العمل.. لكن المشاهد دي مش هتنتهي في المدارس إلا زي ما قلت قبل كدة كذا مرة ونفسي كلامنا يتسمع: قضية وحبس وتربية عسكرية مش مجرد فصل ورسوب.. علشان اللي محتاج يتربى.. الدولة تربيه هو وأهله اللي فشلوا إنهم يربوه.

كلام جديد من المتحدث باسم وزارة التعليم: احنا مش هنطبق مناهج يابانية.. احنا هنتعاون معاهم كخبراء في العلوم والرياضيات وناخد منهم مخرجات تعلم متقدمة تناسبنا في العلوم والرياضة.. مش هناخد منهم المنهج الياباني بالنص في أي مادة ونيجي نطبقه عندنا.. مش هيحصل.