Dr.Marwa Sharawy. "Second Chance"

الكذب الواثق ، "للأسف "بيوصل أسرع من الصدق الفوضوى !

📌اتعلمى ترتبى كلامك صح عشان يبان صدقه ..
📌اتحكمى فى انفعالاتك عشان متضيعيش حقك ..

الكلام مهارة ، مالهاش علاقة بالحقيقة من عدمها ،
فلو معاكى الحقيقة
اتعلمى إزاى تتكلمى عنها !!

فى حاجات فالحياة ،
إجاباتها ، "هى كده " 🤷🏼‍♀️!!
وعلى أد ما هتقبلى الإجابه دى اسرع 🤔على اد ما حياتك هتتحسن !!

"هى كده" بتقفل ابواب كتير مفتوحة
لإسئلة مالهاش اجابات ، ومش هنلاقى لها اجابات ، وكمان مش هى دى الأسئلة المهمة ولا البحث عن اجاباتها وظيفتنا !!

أسئلة زى :
🔺هما آذونى ليه ؟
🔺ليه الدنيا صعبة كده ؟
🔺ازاى فيه ناس وحشه اوى كده ؟

المشكلة الحقيقة :
إننا بنوقف حياتنا على الإجابات دى
وبنقنع نفسنا ، إن إجابات الإسئلة دى ، هى الحاجة الوحيدة اللى مانعانا اننا نكون كويسين !!

كل الأسئلة دى .. إجابتها " هى كده " ؟
اقبلى الإجابه دى وتجاوزى "ليه" ودورى على "إزاى "؟

عقلك أصلاً مخلوق عشان يحل المشاكل و يدورلك على حلول🧐.
بس انتى اللى معطلاه وعمالة بتسأليه ، السؤال الغلط !

اقبلى " هى كده " واسألي عقلك السؤال الصح ، السؤال المهم عشان ترتاحى ❤️!!

بتخلصى طاقتك دايماً ، عشان تقنعى اللى أدامك بحاجة تبان صح ومنطقية جداً ، بس هو مش مقتنع تماماً ،
وده طبعاً بيضايقك جداً ،
عاوزة اقولك إن هو صح 🫣🤷🏼‍♀️!!

🔺عقلنا عنده حاجة اسمها تحيز معرفى ( cognitive bias)
العقل بيربط شوية احداث بشوية معلومات ، ويحتفظ بيها مع بعض ، عشان يقدر يحكم على نفس الموقف لما يتكرر بدون تفكير كتير ،عقلنا بيعمل كده عشان يريح نفسه ، وميعدش يحلل الأحداث كل ما الموقف يتكرر !!
ببساطة كل واحد فينا متحيز لأفكاره ، وبيتجاهل اى دليل على عكسها ، وبيدور على اى معلومة تثبت صحتها ، عقلنا بيشتغل كده !!

زى أما حد يتأخر فالرد على رسالتك مثلاً ، فأول حاجة هتيجى فى بالك انه تجاهلك وده هيضايقك لإنك حسيتى بالإهمال ، مع ان ممكن الشخص ده يكون مشغول مثلاً، بس عقلك مش بيدرس الموضوع كده ، هو بيركب شوية احداث مع بعض ويحطلها معنى خاص بيه هو ، حتى لو مش منطقى لناس تانية !!

🔺والمعنى ده بيكون له علاقة بخبراتنا والأحداث اللى مرت علينا ، والبيئه والأهل اللى اتربينا معاهم ، وكمان درجة الوعى والنضج النفسى ، ومش محتاجة اقولك ان كل واحد فينا بيفسر الواقع بشكل يتناسب مع التحيز المعرفى بتاعه ،
احنا مش شبه بعض !!

🔺وعشان نقدر نغير ده ، لازم احنا اللى نلاحظ ان المعنى ده مش منطقى ومسبب مشاكل ، فنجبر عقلنا انه يفتح الملف تانى ويراجعه ، ويحاول يغيره ، دى الطريقة الوحيدة لتغيير فكرة عندنا !!

🔺يعنى ببساطة ، مهما حاولتى تقنعى حد بحاجة مش فالبرنامج المحفوظ فى عقله ، مش هيقتنع ، ومهما حاولتى توريه انها صح ومنطقية ، هو مش هيقدر يستوعب الا لو هو قرر ، يشك ويبقى عنده فضول ويفتح ملفات افكاره ويعيد ترتيبها عشان تتغير !!

🔺ماعدا ناس قليله جداً ، اللى عندها وعى ونضج عالى ، وبتشغل عقلها المنطقى وبتبقى منفتحة ، لتغيير أفكارها ببساطة ، دى ناس فاهمة ومريحة ، لو فى حياتك منهم هتلاقى النقاش معاهم هادف ومريح ، وانتوا الاتنين بتستفيدوا !!

🔺اما لو لقيتى الشخص اللى ادامك بيرفض وبيقاوم بشده ، وانتى طاقتك بتخلص وبتتفرهدى 😅، اعرفى انك مش هتقدرى تقنعيه ، لإن اللى انتى بتشرحيه مش فالبرنامج المحفوظ فى عقله ، ومالوش علاقة بإن كلامك مظبوط او لا ، هو بالنسبة له مش مفهوم ، فوفرى طاقتك ، وابتسمى 😇، واشربى حاجة تروق دمك ، بس بلاش تحاولى تقنعى السمكة انها ممكن تطير 🤷🏼‍♀️!!