Asma Shehab Relationship Coach

قارئ الافكار !😵‍💫

صفه لذيذه اوي لو كل واحد فينا عرف يقرأ افكار التاني ، بس للاسف احنا معندهاش القدره دي 🤷‍♀️

وعامه لو الصفه دي موجوده في العلاقات غالبا هتبوظها ! 🥴
بس الغريب بقي ان ناس كتير اوي بتعملها وهي متعرفش ! ازاي بقي ؟ ببساطه هم بيشوفوا تصرف من الطرف التاني مش عاجبهم مثلا وبناءا عليه بيفترضوا انهم فاهمين هو بيفكر في ايه وعمل كده ليه ويصدقوا الافتراض ويأخدوا action علي أساس افتراضهم ده انه صح والموضوع يفضل يكبر اكتر وكل واحد مش فاهم ليه التاني بيعمل كده

فمثلا لو طرف شكله متضايق او متعصب والطرف التاني افترض انه متضايق منه فبدا يتجاهله وميتكملش معاه ، والموضوع قعد يكبر وكل واحد مش بيكلم التاني عشان هو مقتنع انه فاهم ايه هو بيعمل كده والحقيقة ان ممكن سبب الضيق ده يكون حاجه تانيه خالص 😳

ساعات كتير مجرد اني اسال لو في تصرف غريب او مش عادي ممكن جدا تكون اجابه غير اللي أنا افترضتها تماما وبناءا عليه تصرفاتي هتتغير خالص🤔

عشان كده اسهل طريق قبل ما افترض حاجه مش حلوه اني اسال وبعد ما اعرف الاجابه اختار اتصرف ازاي بعد كده😉

‼️علاقات تقيله علي القلب !🔥🔥
في علاقات في حياتنا بيبقي تقيله علينا ومش عارفين السبب !!
ممكن تبقي ناس بتحبها بس مش بتقدر تقعد معاهم وقت طويل😥😥😥
غالبا الناس دي بتنصحك كتير او بتقعد تقولك تعمل ايه ومتعلمش ايه وده بالنسبه بعد فتره بيشكل ضغط لان بعد شويه هتكون بتتجنب تقعد مع الناس دي لانك مش عايز تسمع الكلام ده 🙉🙉 او مش عارف تعمله او تطبقه ومش عارف تبرر ده لطرف التاني

فبتحاول متقابلوش كتير عشان تتفادي فقره النصايح لانك عندي أصلا ضغوط كتير في حاجات تانيه فانت مش ناقص
العلاقات السهله السلسه المريحه دي الحاجه الكل بيدور عليها عشان يرتاح

النصيحه حاجه حلوه بس ….لما تطلبها !

اكتر حد مش لازم يكون صاحبك هو الشخص اللي بيحكم عليك

انت كده كده بتتقفل من الشخص ده ، اللي بيقعد يحكم عليك طول الوقت
، عشان كده في ناس معينه بترتاح لما تتكلم معاها وتقول كل اللي نفسك فيه واي حاجه عملتها غلط وعارف ان الشخص ده مش هيحكم عليك بالعكس هيسمعك وكأنك بتتكلم مع نفسك

الشخص ده ناس كتير بتدور عليه ، في ناس عندها الشخص ده في حياتها وفي ناس لسه بتدور عليه ، بس الكل بيجمع ان ده اكتر شخص مريح واكتر حد بتحب تتكلم معاه

اما الشخص اللي بيحكم عليك وبيقولك كلام في اتهام ليك ده اكتر شخص انت بتحاول تتجنبه حتي لو كان كلامه صح بالنسبه لك لان كلامه بيضايقك وبيجي علي الوجع اللي عندك

تخيل بقي الشخص ده لو قاعد معاك كل يوم ومش بيسيبك لحظه ، حياتك هتكون شكلها عامل ايه!

ده بالظبط اللي انت بتعمله مع نفسك!
بتحكم علي نفسك طول الوقت وقاعد تقول لنفسك كلام سلبي وتأنيب اعتقاداً منك كده ان بتعمل حاجه صح عشان تكون احسن!

زي ما بتتقفل من صاحبك اياه ده ، انت بتتقفل من الكلام مع نفسك! وبيبقي نفسك تسكت الصوت اللي جواك باي طريقه
عشان كده مش بتحب تقعد لوحدك كتير لان الصوت ده بيفضل يتكلم بكل الكلام اللي بيضايقك واللي بتكون مش عايز تسمعه فبتحاول تشغل نفسك باي طريقه بس المهم ما تقعدش مع نفسك لوحدك

ساعات نيتك بتكون كويسه انك تساعد نفسك بس الطريقه مش احسن حاجه ويمكن تجيب كمان نتيجه عكسيه

فابراحه شويه علي نفسك واعتبرها يا سيدي علي الاقل واحد صاحبك!

سايق بلا هدف!

تخيل تفضل سايق العربيه كل يوم ومش عارف رايح فين ، مركز بس مع كل الناس في الطريق وكل المطبات وكل الحاجات اللي بتغلس عليك وانت سايق

وانت عارف ان كل يوم المفروض تسوق ٨ ساعات وترجع ترتاح

طيب بقي لو العكس انت سايق بس عارف رايح فين ، فبتختار الطريق المختصر والأسهل ومركز اوي انك توصل للمكان اللي انت عايزه فا مش فارق معاك مين بيكسر عليك او مين بيضايقك في الطريق

ده الفرق لما يكون عندك هدف بتحاول توصله وبين انك بس بتقضي الايام عشان تسدد مسئولياتك ، لو هدفك كل يوم ان بس تشتغل عشان تسدد الالتزامات اللي عليك ، هتلاقي كل حاجه صعبه وتقيله وكلها مشاكل

انما لو عندك هدف واضح لحاجه معينه عايزه توصلها ، هتلاقي انك مركز اكتر مع الحاجات اللي هتساعدك اكتر من الحاجات اللي بتعطلك
ده غير متعه انك تحقق خطوه في هدفك الكبير وتشوفه كل يوم بيقرب اكتر

حط هدف حتي لو صغير في اي مجال في حياتك وشوف محتاج تعمل ايه عشان توصله وابدا خطوه خطوه وشوف الفرق في حياتك عامل ازاي

الغضب حماقه يا حوريه !

كلنا اتربينا علي اننا مينفعش نغضب وان الغضب ده حاجه غلط والمفروض نتجنبه وان الشخص العصبي اللي بيعبر عن غضبه ده لازم نبعد عنه

فبقينا بنكتم الغضب جوانا ونحاول ما نعبرش عنه والنتيجه اننا بقينا يا اما بننفجر في الاخر والغضب يبقا مضاعف ياما بنكتم جوانا ويجلنا امراض نفسيه وجسديه

الفكره اننا شخصنا الموضوع غلط
المشكله في شعور الغضب ، لانه زيه زي اي شعور حاجه طبيعيه وبنحسها وهنفضل نحسها ، لان جاي يقولنا في حاجه غلط حصّلت والمفروض تتصلح

فالصح مش اننا نرفضه ، المشكله الحقيقيه بتكون في طريقه التعبير عنه
لو طريقه التعبير فيها غلط في الشخص اللي قدامك دي بتكون المشكله لان الموضوع بيكبر والمشكله بتزيد وبدل المشكله ما تكون اني غضبان من موقف معين او شخص معين لأ ده بقي أنا كمان غلطت في الشخص ده وبقي هو كمان غضبان وحقي راح وبقيت لازم اعتذر عن تصرفاتي ، ده غير الفجوه اللي بتحصل بينك وبين الشخص ده

طرق التعبير الكويسه كتير بس محتاجه تدريب ، اشتغل علي انك تتدرب عليها مش انك تكتم الغضب

جرب تقول لا للفرص الكويسة وشوف حياتك هتتحسن ازاي!

المفروض الواحد يقول لا لاي حاجه بتعطله او مش مفيده بالنسبه له او بتضره زي اكل مش كويس او عاده سيئه او علاقه بتستنزفه ، ده اللي احنا عارفينه

بس الأهم من ده اننا نقول لا لفرصه كويسه ممكن تيجي بس هتعطلنا او تاخد من وقتنا المهم اللي بنعمل فيه حاجات اهم

الفكره هنا اننا اوقات كتير محتاجين نرفض فرص كويسه عشان حاجه احسن ، يعني مثلا ممكن تجي فرص لشغل اكتر بس ده هياخد من وقت اسرتك او راحتك او وقت انت بتشتغل فيه علي نفسك او وقت شغلك الاساسي وتركيزك فيه فالطبيعي انك تحس بالضغط و التقصير بدل ما تستمع بالفرصة الجديده

ممكن كمان نقول لا لعلاقه بتشدنا لوراء وبتاثر علينا تاثير سلبي، رغم اننا ممكن جدا نكون متعلقين بالشخص ده ومش قادرين نبعد عنه وفاكرين انه بيدينا احساس إيجابي وده ممكن يكون فعلا جزء من العلاقه بس هو في الحقيقة هو كمان بيستنزف طاقتك ومشاعرك ، فلو اخدنا الخطوه اللي ممكن تكون صعبه في الاول اننا نمشي من العلاقه دي ، هتخلينا نرتاح اكتر بعد كده

عشان كده الفكره اننا نكون عارفين اننا لما بنقول لا مش شرط تكون بس حاجه مؤذيه ، ساعات كتير تكون حاجه حابينها بس مش وقتها

لانك لو قلت اه لكل علاقه او لكل فرصه هتيجي ممكن ده يكون علي حساب حاجات أساسيه في حياتك

قول لا لحاجه كويسه عشان حاجه تانيه احسن

ليك في التمثيل ؟

التمثيل اللي احنا عارفينه حلو وكلنا بنحبه بس في نوع تاني من التمثيل ممكن جدا تكون بتعمله وانت مش حاسس

زي انك تمثل علي نفسك انك بتعمل فعلا اللي انت عايزه لكن في الحقيقة انت طول الوقت بتحاول ترضي الناس اللي حواليك عشان يقولوا عليك ناجح من وجهه نظرهم

ممكن جدا تكون بتمثل والجمهور هو الناس اللي حواليك اللي رأيهم فيك مهم بالنسبه لك ، ودي حاجه ممكن تكون بتضغط عليك وانت مش حاسس وممكن كمان تكون مش فاهم انك بتعمل وتكون فاكر ان فعلا انت بتعمل اللي انت عايزه

راجع نفسك كده في شغلك في حياتك في علاقاتك هل فعلا بتعمل اللي انت عايزه ولا اللي الناس عايزاه؟

هل في حياتك انت بتلعب دور الممثل؟

كله رايح !

في ناس بتفضل تتكلم ان دايما مفيش فايده وان الظروف الوحشه هتفضل مكمله وان الدنيا بايظه وهتفضل بايظه وفي نظره تشاؤميه كده شويه

غالبا معظم القاعدات بتكون كلها كلام زي كده ، واكيد الكل عارف ان الكلام ده مش مظبوط اننا نكون متشائمين كده والأحسن اننا نتفائل وكده

كل الكلام ده حلو واغلبنا عارفينه ، بس في نقطه مهمه ، الكلام اللي بيتقال ده في حاجه واحده صح

هو فعلا مفيش حاجه هتتغير في الظروف ولا فينا وان كل حاجه هتفضل زي ما هي لان فعلا مفيش حاجه بتتغير لوحدها

مفيش حاجه هتتغير طول ما انت زي ما انت ما حاولتش تغير من نفسك ولا من افكارك

لو بتعمل كل حاجه كل يوم زي التاني وانت مش مبسوط يبقي لازم تغير حاجه في افكارك وبالتالي تصرفاتك هتتغير ومشاعرك كمان تجاه اللي حواليك سواء ظروف او أشخاص هتتغير كمان

الدنيا دايما هيكون في عقبات في طريقنا لان دي حاجه طبيعيه والناس اللي حوالينا منقدرش نتحكم فيهم عشان يعملوا اللي احنا عايزينه

عشان كده لو عايز تغيير اشتغل بس علي نفسك .

أنا محبط

من اوحش المشاعر اللي ممكن نحسها لاننا بيكون عندنا توقعات معينه مش بنلاقيها سواء من أشخاص حوالينا او ظروف في الحياه بتحصلنا

بس اوحش احباط بنحسه هو اللي بنحسه من نفسنا ، لما تحبط من نفسك عشان كنت فاكر انك تقدر تعمل حاجه معينه وما عملتهاش

دايما بنعلي سقف توقعتنا عن نفسنا حتي لو مش بنقول ده ، ونقعد نحط لنفسنا tasks كتير وفاكرين اننا نقدر نعمل كل ده وفي الاخر منعملش!

ساعتها بندخل في مرحله اللوم والعتاب وجلد الذات اللي بتخلص باننا علاقتنا بنفسنا اوحش علاقه ده غير الlabels اللي بنحطها لنفسنا زي أنا مش شاطر او كسلان او بطيء او بستعبط وهكذا

بس الحقيقه انت عمرك ما عرفت قدارتك الحقيقه وغالبا بترفض تحط لنفسك اهداف بسيطه لانها بالنسبه لك مش هتجيب نتيجه عشان كده مش بتحطها اصلا

وبتحط اهداف كبيره لحاجات ممكن تكون اول مره تعملها او مش بنعملها كتير
زي مثلا تحط هدف الرياضه كل يوم وانت اصلا مش بتعلب رياضه خالص وتتوقع انك هتمشي علي الخطه دي مجرد بس انك حاطتها لانك شايف انها سهله

لكن لو فهمت انك بني ادم طبيعي واي حاجه بنعملها جديده او مش بتعملها اصلا لازم تبدا واحده واحده زي البيبي عشان مخك ياخد علي العاده الجديده او الشغل الجديد ، هتبطل تحبط من نفسك وتبدا تحط تقوقعات لنفسك واقعيه اكتر
تعرف فعلا تحققها .

يلا نعمل دايت!

مش حاجه جديده ان كلنا عارفين اننا محتاجين نعمل دايت عشان صحتنا وشكلنا وجسمنا ما ندخلوش اي حاجه تضره عشان دي حاجه بندفع تمنها بعدين من صحتنا

ده احنا كلنا عارفينه سواء بنعمله او لا

انما اللي كمان مهم اوي ومش بنعمله رغم انه هيفرق في حياتنا كتير جدا هو دايت صحتنا النفسيه !

يعني زي ما بنحافظ علي جسمنا وعارفين ان في أكلات بتضره علي المدي القريب والبعيد ، في برضه افكار بتضر صحتنا النفسيه علي المدي القريب والبعيد !

لو طول الوقت سايب نفسك تسمع كلام سلبي من اللي حواليك ومن الأغاني اللي بتسمعها ومن الsocial media واصحابك و شغلك طبيعي هتتكون عندك افكار ومعتقدات سلبيه وهتحس نفسك متضايق من غير سبب وتقعد تدور علي اسباب ليه انت متضايق

الأفكار دي ضررها كبير اكبر ما انت متخيل وتاثيرها عليك وعلي قرارات مهمه في حياتك بيكون كبير جدا ، عشان كده حاول تقلل من انك تسمع الأفكار دي

ولو كل اللي حواليك كده حاول تسمع افكار ايجابيه اكتر من برامج او you tube من ناس بتتكلم في افكار ايجابيه عشان تعمل balance في الافكار اللي بتدخلك كل يوم

كمان حاول انت يكون عندك filter تسمع ايه وما تسمعش ايه ، لو في قاعده كلها افكار مضره امشي منها ، اختار الناس اللي تقضي معاهم وقت طويل واختار المواضيع اللي تشارك فيها

واهم حاجه تعرفها ان كل حد بيتكلم ده بيعبر عن نفسه ورايه وتجربته الخاصه به هوه بس وان الكلام ده ملوش علاقه بأفكارك وتجاربك ورأيك انت .

الروتين حلو!

كلمه الروتين ارتبطت معانا دايما بالزهق والملل والحاجه اللي ملهاش معني ، زي التطويل الزايد في طلب الأوراق الحكوميه

دلوقتي بقي في معني تاني للروتين زي الskin care routine او الhealthy life style routine المعني اتغيير وبقي انه جدول بتستمر عليه في عادات صحيه عشان تهتم بالبشره او صحتك او رياضه في العموم

وبقي غريب اوي ان حد ميكونش عنده روتين يومي للاهتمام بنفسه او شغله

وزي ما في روتين لعادات كويسه في برضه روتين لعادات سلبيه زي ان كل يوم تقعد فترات طويله علي الsocial media او مواظبه علي اكل مش مفيد او تدخين

الفكره ان كلمه روتين لوحدها مش وحشه ، لو عندك روتين كويس بتمشي عليه مش بس هيفيدك ده هو ده طريقك الوحيد عشان توصل لاي هدف عندك
فاوعي تفتكر اني بعمل حاجات مكرره هبله مش بتجيب نتيجه وبعد شويه تزهق وتوقفها

افتكر دايما ان أصلا مفيش طريق غير ده عشان توصل لاي نتيجه انت عايزاها

خليك في حالك!

كلمه تبان دمها تقيل بس هي الحقيقه هتفرق في حياتك جدا

اكتر حاجه تشتت انتباهك وتاخد طاقتك وتجيبلك افكار سلبيه وتعطلك هي مراقبه الناس ومقارنتهم بنفسك

مين عنده ايه مش عندك ومين وصل لايه وانت لسه ومين اشتري ايه مش عندك

كل الأفكار دي بتحبطك وتحسسك انك بعيد اوي وان مفيش فايده مش هتوصل للي انت عاوزه

وغالبا انت بتكون مش شايف الصوره كامله وفي حاجات كتير انت متعرفاش ، بس بتحكم من الصوره اللي انت شايفها وبس

عشان كده خليك في حالك ، ركز انت ازاي توصل لهدفك بغض النظر الناس بتعمل ايه

اولا هتحس بسعاده اكبر وانت مركز مع نفسك ومش فارق معاك حد
وثانيا هتوصل فعلا لهدفك اسرع لانك فعلا بتشتغل عليه بجد مش بالكلام وبس