دليل حضانات المعادي - Maadi Nurseries Guide

ولادكم أمانة..أمانة في الحضانة اللي بتستقبلهم ٨ ساعات وأكتر فى اليوم،

ياريت كل أم تبقى فاهمة مدى المسئولية اللي على المكان والضغط العصبي اللي هما فيه عشان يحافظوا على ابنها .. وفي نفس الوقت والأهم مليون مرة هو إن ضروري كل إنسانة بتشتغل في حضانة تعرف إنها أمنية على الطفل ده
إنتي أمينة عليه تعلميه باللين مش العنف لأنك مش أمه علشان تعنفيه
تعلميه الذوق و آداب الطعام بالهدوء والصبر مش بالتعنيف لأن إنتي مش أمه علشان تعنفيه
تتعاملي مع الطفل العنيف والعنيد بالصبر والرحمة وطول البال مش بالعنف لأن انتي مش أمه عشان تعنفيه
الطفل بيفهم لمسة الحنية من لمسة الشدة، الطفل بيفهم شدة الذراع اللي غرضها إنك تلحقيه من حاجة هتأذيه مش تشديه عافية عشان تمنعيه يعمل حاجة غلط..والغلط مش ضروري يكون اللي بيضره إنما السلوك اللي انتي شايفاه غلط.
الطفل كائن وصل الدنيا وهو مش فاهم هو هنا ليه..هو ليه بعيد عن حضن ماما..ليه ده ممنوع..ليه ده غلط..ليه ده وحش وده حلو
اللي ماعندوش رحمة بالطفل يفتح محل ورد ويسيب أحباب الله في حالهم
اللي ماعندوش صبر عالطفل يفتح محل ورد ويسيب أحباب الله في حالهم
واللي فاكرين برضه إن العناية بالطفل هي الزن والسؤال على الكبيرة والصغيرة حتى لو هما كأهل مش عاملين اللي عليهم يفتحوا محل ورد وبلاش يخلفوا
العنف مش من حق الأم عشان هي مامته لكن مش هتقبله من اللي بتربيه في الحضانة وهي مامته
ولادكم أمانة، صدقوهم بدون حدود، واعطفوا عليهم بدون شروط وربوهم باللين والصبر مش بالعنف الله يخليكم 🙏🏻🙏🏻🙏🏻