Tamer ElGindi تامر الجندي

:كلماتٌ تبقى.. وأثرٌ لا ينقطع 🕊️

تمر الأيام، وتبقى الكلمات الطيبة خير شاهد وأبقى أثر. ندعوكم لزيارة موقع (رحمه الله)، لتشاركونا رحلة بين خواطره التي كتبها بقلبه قبل عينه، باللغتين العربية والإنجليزية.
هي ليست مجرد كلمات، بل تجارب ورؤى نأمل أن تجدوا فيها المنفعة والاستفادة. اجعلوا لنفسكم ورداً من القراءة، ليكون الأجر لكم وله بإذن الله، وتكون هذه الخواطر صدقة جارية تضيء مرقده.

نسألكم في ختام قراءتكم أن تذكروه بدعوة صادقة بالرحمة والمغفرة، وأن يجمعنا الله به وبكل من سبقونا في الفردوس الأعلى من الجنة.

الموقع:
www.tamerelgindi.com

(إِنَّا جَعَلْنَاهُ قُرْآنًا عَرَبِيًّا لَّعَلَّكُمْ تَعْقِلُونَ)

#خواطر قرآنية

‏ناس كتير بتتسائل أشمعني القرآن نزل بالعربي ؟ وهو في حد ذاته سؤال منطقي لغير الناطقين باللغة العربية أو حتى للناطقين بها كمان. بس ‏سبحان الله أي حد يتعمق في اللغة دي ويعرف أسرارها و حلاوتها لازم يتثبت! و خلوني أديكم مثال من القرآن و أزاي ربنا بيوظف أصل الكلمة الواحدة بطرق مختلفة… يعني ايه الكلام ده؟

‏غالبا معظمنا عارف أن اغلب الكلمات اللي أصلها عربي بيتكون أصلها من ثلاثة حروف ، زي مثلاً حرف ش - ك - ر و بعدين ممكن نّكون منها كلمات زي "شكر" و "شاكر" و "مشكور" و هلما جرة.. حلوه هلما جرة دي 😁

‏طب تعالوا نشوف إزاي ربنا بيوظف الموضوع ده من خلال قصة سيدنا موسى عليه السلام وبني إسرائيل. ربنا اتكلم عن سيدنا موسى وقال: 1️⃣ "وَإِذْ آتَيْنَا مُوسَى الْكِتَابَ وَالْفُرْقَانَ لَعَلَّكُمْ تَهْتَدُونَ" ربنا اتكلم على بني إسرائيل وقال عنهم: 2️⃣ "وَإِذْ فَرَقْنَا بِكُمُ الْبَحْرَ فَأَنجَيْنَاكُمْ وَأَغْرَقْنَا آلَ فِرْعَوْنَ وَأَنتُمْ تَنظُرُونَ"… سيدنا موسى أطلب من ربنا وقال له 3️⃣ "قَالَ رَبِّ إِنِّي لَا أَمْلِكُ إِلَّا نَفْسِي وَأَخِي ۖ فَافْرُقْ بَيْنَنَا وَبَيْنَ الْقَوْمِ الْفَاسِقِينَ" سيدنا هارون قال لسيدنا موسى 4️⃣ "قَالَ يَا ابْنَ أُمَّ لَا تَأْخُذْ بِلِحْيَتِي وَلَا بِرَأْسِي ۖ إِنِّي خَشِيتُ أَن تَقُولَ فَرَّقْتَ بَيْنَ بَنِي إِسْرَائِيلَ وَلَمْ تَرْقُبْ قَوْلِي" ربنا قال عن سيدنا موسى وهارون. 5️⃣ "وَلَقَدْ آتَيْنَا مُوسَىٰ وَهَارُونَ الْفُرْقَانَ وَضِيَاءً وَذِكْرًا لِّلْمُتَّقِينَ". ربنا قال على بني إسرائيل في قصة البحر 6️⃣ "فَأَوْحَيْنَا إِلَىٰ مُوسَىٰ أَنِ اضْرِب بِّعَصَاكَ الْبَحْرَ ۖ فَانفَلَقَ فَكَانَ كُلُّ فِرْقٍ كَالطَّوْدِ الْعَظِيمِ"

شفتوا ازاي ربنا استخدم أصل الكلمة "ف" "ر" "ق" في كل السياقات المختلفة دي و التثبيت في نظري إن كلهم ليهم علاقة بقصة سيدنا موسي عليه السلام.

تامر الجندي

ملحوظة: أغلب الكلام ده كنت سمعته من خلال تفسير القرآن للأستاذ نعمان علي خان

الربط بين الرسل 😊

في ألفاظ معينة في القرآن بتيجي في سياقات مختلفة و لكنها بتتكرر و كأنها بتربط المعاني ببعض.

فمثلاً رعاية ربنا و حرصه على رسله من خلال "العين" ورد مع سيدنا نوح، موسى، و محمد عليهم الصلاه و السلام.

فربنا قال لسيدنا نوح (وَٱصْنَعِ ٱلْفُلْكَ بِأَعْيُنِنَا وَوَحْيِنَا وَلَا تُخَٰطِبْنِى فِى ٱلَّذِينَ ظَلَمُوٓا۟ ۚ إِنَّهُم مُّغْرَقُونَ)

و ربنا قال لسيدنا موسى (أَنِ ٱقْذِفِيهِ فِى ٱلتَّابُوتِ فَٱقْذِفِيهِ فِى ٱلْيَمِّ فَلْيُلْقِهِ ٱلْيَمُّ بِٱلسَّاحِلِ يَأْخُذْهُ عَدُوٌّۭ لِّى وَعَدُوٌّۭ لَّهُۥ ۚ وَأَلْقَيْتُ عَلَيْكَ مَحَبَّةًۭ مِّنِّى وَلِتُصْنَعَ عَلَىٰ عَيْنِىٓ)

و القصتين انتهوا بغرق الكافرين في المياه.

و بعدين في سورة الطور اللي بتبدأ ب "و الطور"، و هو الجبل اللي ربنا كلم سيدنا موسى عليه السلام عنده، ربنا جه في اواخر الصورة و قال لسيدنا محمد صلى الله عليه و سلم (وَٱصْبِرْ لِحُكْمِ رَبِّكَ فَإِنَّكَ بِأَعْيُنِنَا ۖ وَسَبِّحْ بِحَمْدِ رَبِّكَ حِينَ تَقُومُ).

الظريف بقى إن ربنا تحدى الكفار و قال (أَمْ لَهُمْ سُلَّمٌۭ يَسْتَمِعُونَ فِيهِ ۖ فَلْيَأْتِ مُسْتَمِعُهُم بِسُلْطَٰنٍۢ مُّبِينٍ). و و فرعون من جبروته هو اللي قال لهامان (وَقَالَ فِرْعَوْنُ يَٰهَٰمَٰنُ ٱبْنِ لِى صَرْحًۭا لَّعَلِّىٓ أَبْلُغُ ٱلْأَسْبَٰبَ أَسْبَٰبَ ٱلسَّمَٰوَٰتِ فَأَطَّلِعَ إِلَىٰٓ إِلَٰهِ مُوسَىٰ وَإِنِّى لَأَظُنُّهُۥ كَٰذِبًۭا ۚ وَكَذَٰلِكَ زُيِّنَ لِفِرْعَوْنَ سُوٓءُ عَمَلِهِۦ وَصُدَّ عَنِ ٱلسَّبِيلِ ۚ وَمَا كَيْدُ فِرْعَوْنَ إِلَّا فِى تَبَابٍۢ)، من الآخر كدة إبنيلي سلم طويل شوية عشان أكلم إله موسى :)

و زي ما ربنا تحدى مشركي مكة انهم يطلعوا فوق في السما عشان يسمعوا في سورة الطور، في سورة النجم اللي بعدها النبي طلع فعلاً في السما عشان يسمع كلام ربنا 😊

😊

(رحمه الله)

انهارده ذكري ميلاد حبيبنا د # تامر_الجندي رحمه الله عليه، اللهم اجعله ممن ينعمون في جنه الفردوس الأعلى مع حبيبك و خير خلقك سيدنا محمد صلى الله عليه وسلم، اللهم اجعل مرضه كفارة لجميع ذنوبه و اجعل صبره علي مرضة في ميزان حسناته، و اجعل هذه الصفحة صدقة جارية الي يوم الدين و اجمعنا معه في الفردوس الأعلى دون سابقة عذاب و لا عقاب، اللهم امين 🤲🏻

وحشتنا اوي اوي اوي

دعواتكم له و لاهله

تخيلوا معايا نهر، و المياه فيه ماشية بسرعة و بالتالي بتشيل من قدامها أي حاجة و بتحركها من مكانها. السمك، الأعشاب، الطحالب، المراكب، الناس، كل حاجة! و في وسط النهر شجرة كبيرة فيها فروع و أوراق كتيرة مفيش أي حاجة بتحركها.

طيب، تعالوا نشوف مع بعض الصورة دي.

النهر دة عبارة عن فتن و ابتلاءات الدنيا من شبهات و شهوات، و أنواع الناس المختلفة هي الكائنات الكتيرة اللي موجودة في النهر، اللي عماله تتشال و تتحط، و الشجرة هي القرآن و الفروع و الاوراق هما أهل القرآن.

سورة الكهف أغلبنا عارف انها بتتكلم عن فتن مختلفة بتقابل كل واحد فينا و في أحاديث وردت انها بتعصم من المسيح الدجال.

شوفوا أول آية (بِسْمِ ٱللَّهِ ٱلرَّحْمَٰنِ ٱلرَّحِيمِ ٱلْحَمْدُ لِلَّهِ ٱلَّذِىٓ أَنزَلَ عَلَىٰ عَبْدِهِ ٱلْكِتَٰبَ وَلَمْ يَجْعَل لَّهُۥ عِوَجَا ۜ)

أهو مربط الفرس في "عوجاً"

لما تلاقي الدنيا كلها بتتشقلب حواليكي، و القيم و المعايير بتتقلب، و كل واحد ماشي بمزاجه، و محدش بقى عارف الصح من الغلط، و الفتن كترت، افتكر و إفتكروا دايماً إن الحل الوحيد في الرجوع و التمسك و تدبر القرآن 😊 لأن ربنا خلى فيه قيم صالحة لكل زمان و مكان.

عشان كدة جميل إن الواحد يستشعر نعمة القرآن و اللي ربنا بدأ بيها السورة بقوله " الحمدلله"

الحمدلله على نعمة القرآن 😊

😊

(رحمه الله)

من اكثر ال #خواطر المُحببه ل (رحمه الله)

إزاي عصفوري علمني الأمل لو فاقدين الأمل يبقي الفيديو ده ليكم. واحده من أحب الخواطر الي قلبي و الي فعلاً بتخليني دائماً عندي أمل. #أمل #اليقين #الله #الأمل

عمرك فكرتي شكل الملائكة عامل ازاي؟

غالباً معظمنا اللي بييجي في باله هو الشكل الملائكي الابيض اللي بيتصور في الأفلام أو الكرتون عن كائنات لطيفة خفيفة!

بس الواقع مختلف خالص 😊

كنت أول مرة اركز في معنى الآية (وَقَالُوا۟ لَوْلَآ أُنزِلَ عَلَيْهِ مَلَكٌۭ ۖ وَلَوْ أَنزَلْنَا مَلَكًۭا لَّقُضِىَ ٱلْأَمْرُ ثُمَّ لَا يُنظَرُونَ)، و ليه ربنا مستجبش لطلب المشركين؟!

يقول الإمام إبن عاشور عليه رحمة الله إن طبيعة الملائكة بإستثناء الملائكة اللي ربنا وكلهم أعمال محددة على الأرض زي الحفظة أو ملك الموت إن فيها صلابة و ليس فيها هوادة! ألم تقرأ قولهم لسيدنا ابراهيم ( يَٰٓإِبْرَٰهِيمُ أَعْرِضْ عَنْ هَٰذَآ ۖ إِنَّهُۥ قَدْ جَآءَ أَمْرُ رَبِّكَ ۖ وَإِنَّهُمْ ءَاتِيهِمْ عَذَابٌ غَيْرُ مَرْدُودٍۢ) و قولهم لسيدنا لوط (فَأَسْرِ بِأَهْلِكَ بِقِطْعٍۢ مِّنَ ٱلَّيْلِ وَٱتَّبِعْ أَدْبَٰرَهُمْ وَلَا يَلْتَفِتْ مِنكُمْ أَحَدٌۭ وَٱمْضُوا۟ حَيْثُ تُؤْمَرُونَ)، و هم لا ينزلون إلا بعذاب الله (وَمَا نَتَنَزَّلُ إِلَّا بِأَمْرِ رَبِّكَ ۖ لَهُۥ مَا بَيْنَ أَيْدِينَا وَمَا خَلْفَنَا وَمَا بَيْنَ ذَٰلِكَ ۚ وَمَا كَانَ رَبُّكَ نَسِيًّۭا).

و بالتالي لا يصلح في التعامل معاهم إلا رسل ربنا اللي شابهت أخلاقهم و صفاتهم الطاهرة صفات الملائكة! فمن رحمة ربنا إنه حجب الملائكة عن البشر لأنهم لو تواجدوا على الأرض لن يتركوا أهل الباطل في حالهم لأن فطرتهم تأبي ذلك!

و الله تعالى أعلى و أعلم!

😊

(رحمه الله)

كلمتين و بس! لا هي كلمة واحدة 😊

أنا بحب سورة النحل جداً (سورة النعم الكبرى) لأنها أكتر سورة في القرآن فيها ذكر لنعم ربنا على الناس، و فعلاً جميل إن الواحد يحس بنعم ربنا عليه.

و غير النعم من أرض و سماء و مياه و حيوانات و شجر و فاكهة و لبن و عسل و ليل و نهار و نجوم و مراكب و سمك، في كمان نعمة هذا الدين 😊 عشان كدة من أجمل الآيات اللي بحبها:

(وَقِيلَ لِلَّذِينَ اتَّقَوْا مَاذَا أَنزَلَ رَبُّكُمْ ۚ قَالُوا خَيْرًا ۗ لِّلَّذِينَ أَحْسَنُوا فِي هَٰذِهِ الدُّنْيَا حَسَنَةٌ ۚ وَلَدَارُ الْآخِرَةِ خَيْرٌ ۚ وَلَنِعْمَ دَارُ الْمُتَّقِينَ )

لما المتقين إتسألوا عن دين ربنا قالوا كلمة واحدة "خيراً"، مفيش فذلكة 😊

القرآن خير، الصلاه خير، الحجاب خير، غض البصر خير، الصدقات خير، الحج خير، رمضان خير، الحدود خير... كل حاجة ربنا نزلها لازم تبقى خير.

نعرف نكون كدة؟!

عشان ربنا وعد بعديها ببشرى جميلة عند الموت:

الَّذِينَ تَتَوَفَّاهُمُ الْمَلَائِكَةُ طَيِّبِينَ ۙ يَقُولُونَ سَلَامٌ عَلَيْكُمُ ادْخُلُوا الْجَنَّةَ بِمَا كُنتُمْ تَعْمَلُونَ

يا سلام على "طيبين" دي 🫠



(رحمه الله) اللهم اجعله من "الطيبين" 🤲🏻

عن رحلة العمر 😊

سبحان الله بنيجي الدنيا دي مش عارفين أي حاجة و لو ربنا طول في عمرنا إلى أرذل العمر هنسبها وحنا بردو مش عارفين حاجات كتير!

يقول تعالى في سورة النحل (وَٱللَّهُ أَخْرَجَكُم مِّنۢ بُطُونِ أُمَّهَٰتِكُمْ لَا تَعْلَمُونَ شَيْـًۭٔا وَجَعَلَ لَكُمُ ٱلسَّمْعَ وَٱلْأَبْصَٰرَ وَٱلْأَفْـِٔدَةَ ۙ لَعَلَّكُمْ تَشْكُرُونَ)، فربنا وضح ازاي بنيجي الحياه (لَا تَعْلَمُونَ شَيْـًۭٔا) و بعدين من رحمته جعل لينا وسائل إدراك مختلفة عشان نعرف نتعلم و نفهم (وَجَعَلَ لَكُمُ ٱلسَّمْعَ وَٱلْأَبْصَٰرَ وَٱلْأَفْـِٔدَةَ).

تلاقي الطفل و هو صغير نايم أغلب الوقت على ضهره و باصص لفوق كأنه بيبص للمستقبل اللي قدامه لسة، و في المقابل...

لما الواحد بيكبر أوي بيرجع زي الطفل تاني! محتاج اللي يساعده و ياخد بإيده و يأكله و...... و بيبدأ كمان علمه يتلاشى، قال تعالى (وَٱللَّهُ خَلَقَكُمْ ثُمَّ يَتَوَفَّىٰكُمْ ۚ وَمِنكُم مَّن يُرَدُّ إِلَىٰٓ أَرْذَلِ ٱلْعُمُرِ لِكَىْ لَا يَعْلَمَ بَعْدَ عِلْمٍۢ شَيْـًٔا ۚ إِنَّ ٱللَّهَ عَلِيمٌۭ قَدِيرٌۭ)

و زي ما كان الطفل باصص لفوق لمستقبله، لما الواحد فينا بيعجز بيبدأ ضهره ينحني و يبص لتحت - للأرض - و كأن ربنا بيفكرنا بالمكان اللي احنا رايحينه! قال تعالى (وَمَن نُّعَمِّرْهُ نُنَكِّسْهُ فِى ٱلْخَلْقِ ۖ أَفَلَا يَعْقِلُونَ)

😊

(رحمه الله)

إيه اللي بييجي في مخك لما تسمع إسم سيدنا نوح عليه السلام؟

غالباً أكثرنا بييجي في باله الطوفان، سفينة نوح، و دعوته اللي استمرت 950 سنة و صبره الرهيب على أذي قومه!

اللي كنت دايماً بستغربه وصف ربنا ليه في سورة الإسراء (ذُرِّيَّةَ مَنْ حَمَلْنَا مَعَ نُوحٍ ۚ إِنَّهُۥ كَانَ عَبْدًۭا شَكُورًۭا).... اشمعنى شكور؟!

في حاجتين، حاجة أنا إستنجتها و حاجة كنت قريتها في تفسير القرطبي.

فأول حاجة إن الشكر هو أعلى مراتب الصبر، و منزلة عالية أوي عشان كدة ربنا لما اتكلم على غزوة أحد و ذكر أكبر مصيبة ممكن تيجي للأمة و هي موت النبي صلى الله عليه و سلم قام ربطها بالشكر، فقال تعالى (وَمَا مُحَمَّدٌ إِلَّا رَسُولٌۭ قَدْ خَلَتْ مِن قَبْلِهِ ٱلرُّسُلُ ۚ أَفَإِي۟ن مَّاتَ أَوْ قُتِلَ ٱنقَلَبْتُمْ عَلَىٰٓ أَعْقَٰبِكُمْ ۚ وَمَن يَنقَلِبْ عَلَىٰ عَقِبَيْهِ فَلَن يَضُرَّ ٱللَّهَ شَيْـًۭٔا ۗ وَسَيَجْزِى ٱللَّهُ ٱلشَّٰكِرِينَ)

تاني حاجة الإمام القرطبي ذكر "وقال عمران بن سليم : إنما سمى نوحا عبدا شكورا لأنه كان إذا أكل قال : الحمد لله الذي أطعمني ولو شاء لأجاعني ، وإذا شرب قال : الحمد لله الذي سقاني ولو شاء لأظمأني ، وإذا اكتسى قال : الحمد لله الذي كساني ولو شاء لأعراني ، وإذا احتذى قال : الحمد لله الذي حذاني ولو شاء لأحفاني ، وإذا قضى حاجته قال : الحمد لله الذي أخرج عني الأذى ولو شاء لحبسه في"

الصراحة عجبتني أوي الجزئية اللي بعد الحمد "ولو شاء لأجاعني"، "ولو شاء لأظمأني"،"ولو شاء لأعراني"،"ولو شاء لحبسه في"!

و بما اني شخص بيجيلي إمساك رهيب بسب مرضي، فبقيت بقدر فعلاً جملة "ولو شاء لحبسه في" 🙂

و الله تعالى أعلى و أعلم!

😊

(رحمه الله)

لما كل حاجة هتتشقلب 🔄 !!!

لو الواحد نظرته للحياه كلها قايمة على الدنيا و من غير الآخرة، هتبقى نظرته و فهمه للحياه مش بس محدود، لا دة كمان هيكون متشقلب. ازاي الكلام دة؟

ربنا خلق الدنيا كلها وفق مقادير ربانية، قال تعالى (وَٱلسَّمَآءَ رَفَعَهَا وَوَضَعَ ٱلْمِيزَانَ أَلَّا تَطْغَوْا۟ فِى ٱلْمِيزَانِ)، و قال تعالى (إِنَّا كُلَّ شَىْءٍ خَلَقْنَٰهُ بِقَدَرٍۢ)، فكل حاجة في الكون وفق حساب عادل دقيق لا يطغي شيء على شيء إلا الإنس و الجن، رغم إن ربنا أمرنا بالقسط (وَأَقِيمُوا۟ ٱلْوَزْنَ بِٱلْقِسْطِ وَلَا تُخْسِرُوا۟ ٱلْمِيزَانَ) إلا اننا بنظلم نفسنا و بعضنا! يبقى ربنا خالق كل حاجة بنظام عشان يخدمنا زي الأرض و الشمس و القمر و النجوم و كله ماشي في فلكه لحد ما كل حاجة... حتتشقلب و المعايير اللي في الدنيا بتنفعنا، مش هتنفع في الآخرة.

- اللي مش هيؤمن في الدنيا، مش هينفعه إيمان في الآخرة (هَلْ يَنظُرُونَ إِلَّآ أَن تَأْتِيَهُمُ ٱلْمَلَٰٓئِكَةُ أَوْ يَأْتِىَ رَبُّكَ أَوْ يَأْتِىَ بَعْضُ ءَايَٰتِ رَبِّكَ ۗ يَوْمَ يَأْتِى بَعْضُ ءَايَٰتِ رَبِّكَ لَا يَنفَعُ نَفْسًا إِيمَٰنُهَا لَمْ تَكُنْ ءَامَنَتْ مِن قَبْلُ أَوْ كَسَبَتْ فِىٓ إِيمَٰنِهَا خَيْرًۭا ۗ قُلِ ٱنتَظِرُوٓا۟ إِنَّا مُنتَظِرُونَ)

- اللي كان بيتريق و مش مؤمن بالنار في الدنيا، هايتقله في الآخرة (هَٰذِهِ ٱلنَّارُ ٱلَّتِى كُنتُم بِهَا تُكَذِّبُونَ)

- الصبر اللي كان ثوابه عظيم في الدنيا، مش هيفرق في الآخرة (ٱصْلَوْهَا فَٱصْبِرُوٓا۟ أَوْ لَا تَصْبِرُوا۟ سَوَآءٌ عَلَيْكُمْ ۖ إِنَّمَا تُجْزَوْنَ مَا كُنتُمْ تَعْمَلُونَ)

- السماء اللي ربنا قال انها مفيهاش فروج، قال عنها (يَوْمَ تَمُورُ ٱلسَّمَآءُ مَوْرًۭا)

- الجبال اللي ربنا سماها رواسي، قال عنها (وَتَسِيرُ ٱلْجِبَالُ سَيْرًۭا)

- الإنسان اللي بيحب يعيش وسط ناس في الدنيا، ربنا قال عنه (يَوْمَ يَفِرُّ ٱلْمَرْءُ مِنْ أَخِيهِ)

- حتى الحيوانات المفترسة اللي لا يمكن تعيش جمب بعض في الدنيا، ربنا قال عنها ( وَإِذَا ٱلْوُحُوشُ حُشِرَتْ)

من الآخر كل الشقلبة الكونية دي... عشان يحكم الله بالعدل و القسط، قال تعالى (وَنَضَعُ ٱلْمَوَٰزِينَ ٱلْقِسْطَ لِيَوْمِ ٱلْقِيَٰمَةِ فَلَا تُظْلَمُ نَفْسٌۭ شَيْـًۭٔا ۖ وَإِن كَانَ مِثْقَالَ حَبَّةٍۢ مِّنْ خَرْدَلٍ أَتَيْنَا بِهَا ۗ وَكَفَىٰ بِنَا حَٰسِبِينَ)

😊

(رحمه الله)