19/04/2026
من الاستشارات المتكرره جدا اكتر من اي موضوع 🥹
(بيت العيله) وابني مش عارفه اسيطر عليه ف الطلوع والنزول وكمان اهل زوجي بيزعلوا لو مانزلتوش
طيب 🤌 دلوقتي لما طفلك بينزل ويطلع ف اي وقت هو عاوزه
هيعمل ايه لما يبقي في حضانه او مدرسه وامتحانات وحفظ ونظام هو محتاجه ف حياته ؟؟!
لما طفل ينزل في أي وقت ‘ و يطّلع في أي وقت و كل حد حواليه ليه رأي وكل اللي حواليه ليه اسلوب وطريقه
وإنتِ بين ده كله… بتحاولي تمسكي الخيط… وبيفلت منك!
📌 النتيجة؟
طفل مش فاهم يعني إيه مواعيد
ولا حدود
ولا إن في حد مسئول عنه بشكل أساسي
ومع الوقت…
تلاقي المذاكرة بتضيع
النوم بيتلخبط
وكلمتك بتبقى “اختيار” مش “أساس”
💡 الحل مش في المنع أكيد .. الحل في التنظيم الواضح
✨ حطي روتين ثابت:
وقت نزول – وقت رجوع – وقت هدوء – وقت نوم
الطفل لما يعرف النظام… بيرتاح وبيريحك قبل ما يلتزم بيه
✨ اتكلمي مع اللي حواليك بهدوء:
“أنا محتاجة أنظم يومه عشان يذاكر وينام كويس”
من غير صدام… لكن بثقة
✨ خليكِ واضحة مع طفلك:
“هننزل ساعة… وبعدها هنطلع”
وقبل ما ينزل يبقى فاهم الاتفاق
✨ الأهم… الثبات:
مش كل مرة نقول حاجة ونرجع فيها
عشان كده الطفل بيتلخبط… ومش بيحترم القواعد
⚠️ خلي بالك:
كل ما الطفل بيكبر… مسؤولياته بتزيد
ولو متعلمش النظام من بدري… هتكون السيطرة أصعب بكتير بعد
كده 🤌🤌
❤️ التربية مش إننا نرضي كل الناس 🙂↔️
التربية إننا نبني طفل متوازن… فاهم يعني إيه نظام وحدود
وصدقيني…
الحزم الهادي دلوقتي
بيريحك ويريّح ابنك بعدين بسنين
