Harmonic Relationships-By Noha Abo Seif

رأي عميله بعد ٨ جلسات
الحمد لله

Attendance Inspire Summit by True identity

شكرا علي اليوم الجميل
ممتنه لمعرفه الناس الجميله الي بيجمعهم حب التعلم والانسانيه والعطاء اللي من القلب
شكرا لكل حد قال كلمه اثرت فيا وشكرا لاساتذتي في الكوتشنج ومثلي الاعلي ❤❤
كوتش حسام الغروري
كوتش مروان نصار
كوتش نهي زهره
كوتش تامر زناتي
دمتم معطائين ❤❤❤

اللهم استخدمني ولا تستبدلني


Proud to be uplifter

الحب حلو بس انتوا الي بتختاروا غلط🙃😔

كلنا محتاجين نحس اننا مرغوب فينا نحب ونتحب ونعيش مع بني ادم صح❤️❤️

بس الاختيار بعقل واعي هو الي بيفرق

العلاقات القايمة علي المشاعر جميلة وبننبسط اوي فيها بس للاسف المشاعر علي قد ما هي جميلة بس في الاخر ليها وقت ودورة وتنتهي....😓

الحب حاجة جميلة اوي كله مشاعر وسعادة ونشوة وكيمياء ملهاش حل 😍

بس بتستمر قد ايه ٦شهور،سنه،سنة ونص وبعدين الانبهار بيقل و بالتدريج تبتدي تبان الصورة الحقيقية للشريك.🙄

الصورة الي بجد مش الانا كنت حطهاله علشان شفت جزء بسيط وكملت من دماغي وانا مبسوطة،

علشان كده المودة والرحمة هما الي بيكملوا...

(وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ)

المودة الرحمة الاحترام التعاطف أساس لاي علاقة وده الي بيدوم.....
الانسان الي جواه نضيف الي بيراعي ربنا
الانسان الخلوق المتزن
جوه كل واحدة فينا احساس عمره ما خيب متكدبيش نفسك لو حسيتي أن الشخص ده مش مناسب
محدش بيتغير ومحدش عمره قدر يغير حد😓

اختاري اللي يحترمك
اختاري الي في الخناق عارف حدوده
اختاري الي تلاقيه واقف معاكي في المواقف
اختاري ابو عيالك

وبعدها المشاعر هتيجي والكيميا هتحصل بس ساعتها هتبقي طلعت للبني ادم الي يستاهلها ويقدرها🥰
وهتبقي مشاعر دايمة ومستقرة كلها امان واستقرار وطمأنينة🥰🥰

#وتخيروا

#مفيش #حصان #ابيض #هتقعي #علي #جدور #رقبتك

تقدير الذات 😍😍
كلمة ليها معني كبير اوي
كتير مننا اتربي علي أنه تقديره لذاته وقيمته مرتبطة برأي الناس عنه
مينفعش يغلط علشان بتحب ويتقدر
مينفعش يزعل حد ولازم يجي علي نفسه علشان يبقي حلو ومرضي عنه
مينفعش يطلب احتياجاته علشان ميبقاش تقيل علي حد أو يضايق حد
مينفعش يطلع مبيفهمش أو يقول معرفش لحسن يتقال عليه قليل
والأهم طبعا من وهو طفل مينفعش يقول لا أو ميسمعش كلام الكبار

والنتيجة أننا محطوطين في ساقية وكلنا بندور فيها وكل واحد فينا بيغمي عينيه ويدخل يلف في الدور الي مفروض عليه من غير حتي ما يفكر هو محتاج ده او عاوز ده طيب ده التوقيت المناسب ليه
ولو حد بس فكر يقف لحظة ويجادل أو يفكر بيتقال عليه أنه متعب وهيضيع نفسه والدنيا تتقلب عليه

والأدوار مبتنتهيش ،،😓

ندخل المدرسة وندرس في حاجات نصها ملوش لازمة وبعدين الجامعه الي حسب التنسيق وبعدين الشغل الزي ما يجي والجواز الي بنقول عليه قسمة ونصيب وبعدين نخلف كلنا نسخ متكررة بهتانة ملهاش طعم
والكل خايف يتأخر في دور من دول لا يتقال عليه مش نافع أو يتشاور عليه أنه قليل أو عنده نقص وكأن الأدوار دي هي الي بتكملنا
وكأن جوانا نقص ولازم نكمله
مع أن احنا سبحان الله متقدرين وكاملين من غير اي دور في دول....

بمجرد ما اتخلقنا و ربنا نفخ فينا من روحه وكرمنا علي باقي مخلوقاته....
لينا قيمة ونستحق نتقبل ونتحب حب غير مشروط ونفكر ونقرر ونجرب ونفشل ونغلط ونقع ونقوم

والقران كله دعوة للتفكر والتدبر واستخدام العقل الي ربنا ميزنا بيه...

انتي تستاهلي كل حاجة حلوة من غير ما تضطري ترضي حد أو تيجي علي نفسك علشان يقبلوكي أو يحبوكي❤️❤️
قدري نفسك وحبيها الاول من جواكي صدقي انك تستاهلي ساعتها حاجات كتير هتتغير❤️❤️
انتي مش مضطرة خالص تلبسي ماسك علشان الناس تقبلك
مش مضطرة تتنازلي عن حقوقك أو تقبلي تعيشي متهانة علشان شكلك الاجتماعي ومنظرك ادام الناس

مش مضطرة تشتري براندات علشان قيمتك تبقي اعلي وشكلك يبقي واو

مش مضطرة تقولي اه وانتي جواكي الف لأ علشان متزعليش حد

والأهم من ده كله اقبلي ضعفك ووجعك وقلة حيلتك لان ده جزء من إنسانيتنا وفطرتنا وان وجوده عمره ما يقلل من تقديرك لنفسك او ينتقص من قيمتك...

في كورسات كتير اخدتها غيرت فيا وفي طريقة تفكيري لكن الكورس ده كان رحلة كاملة غيرتني وفتحتلي ابواب كتير اوي من المعرفة شهور بتعلم واحاول واعافر......

رحلة استمتعت بيها بكل لحظة واتعرفت علي نفسي من اول وجديد
وعلمتني بطريقة عملية وواقعية ازاي افهم و اتقبل الناس بكل اختلافاتهم
وفهمت يعني ايه كلمة راجل ويعني ايه كلمة ست ويعني ايه تواصل ويعني ايه علاقة❤️❤️

🥰🥰
شكرا كوتش حسام الغروري..
المعلم والإنسان والقدوة ربنا ينفع بيك ويفتحلك كل أبواب الخير ممتنة ليك

وشكرا لكل الكوتشز الجمال اوي بجد شركاء الرحلة الناس اللي معرفتها زي الدهب وقلوبهم بجد تخليني دايما مطمنة أن بكرة هيبقي احسن ❤️❤️❤️

Finally I am a certified Relationship coach☺️☺️

كتير بنفتكر اننا نقدر نغير الحوالينا وان احنا نقدر نتحكم في تصرفاتهم وأفعالهم واننا لازم نتدخل علشان احنا فاهمين عنهم وعلشان ده دورنا ومسؤوليتنا تجاهم
وده بنعمله مع اقرب الناس لينا وكل ما الشخص ده يهمني كل ما بلعب الدور ده من غير ما اخد بالي
جوزي لازم ميعملش كده ميتصرفش كده لازم يتغير ....
ابني غلط ده معناه اني أثرت في تربيته
بنتي نقصت في درجاتها معناها اني ام فاشلة
وهكذا ....،وده طبعا بيحطنا في ضغط عصبي رهيب وبيأثر علي علاقتنا بالناس البنحبهم
بس الحقيقة غير كده خالص انتي مش مسؤولة عن تصرفات الحواليكي ولا عمرك هتقدري تغيري حد كل علاقة حواليكي ليكي دور فيها مجرد ما تعمليه خلاص النتيجة دي مش بتاعتك دي بتاعت ،زي مثلا
انا شايفة أن جوزي بيتصرف غلط وأنه مينفعش يعمل كده دوري أقوله رايي واشاركه بس هو يقرر ايه ويتصرف ازاي دي مسؤوليته هو مش انا خالص
ولادي انا دوري ابقي قدوة اعرفهم الصح من الغلط الحلال من الحرام لكن تصرفاتهم وأفعالهم دي مسؤوليتهم هما ولازم يتحملوها ويتحملوا تباعيات الغلط الصدر منهم
بلاش تحملي نفسك فوق طاقتها بمنتهي البساطة اعملي الي عليكي وتوكلي علي الله ودايما افتكري في اي موقف بيحطك تحت ضغط انا ايه الفي أيدي اعمله في الموقف ده واقدر اتحكم فيه زي كلمة تتقال أو موقف تاخديه أو دعا ادعيه من قلبي اعمليه وخلاص النتيجة مش بتاعتك

Just let it go

What you resist persists

اليوم البنقول فيه انا انهارده مش هاكل هو اكتر يوم بناكل فيه..
والحاجةالبنفضل نقول انا مش هعملها يعني مش هعملها بتتعمل..
والكلام البفضل امسك نفسي امسك نفسي علشان مش عاوزه اطلعه بيطلع في عصبية وافورة وخناق غصب عني..
وابني البقعد أقله أقله خس خس بطل عصبية بيتخن اكتر وبيتعصب اكتر ...
مقاومة اي شيء عمره ما كان الحل
مقاومة أفكارنا مشاعرنا أحاسيسنا عمره ما كان الحل لان ببساطة الحاجة الهتقوميها هتلاقي مخك مصر يعملها وتثبت جواكي وهيبقي صعب تتخلصي منها😔

طيب ايه الحل؟؟؟؟!!!!!

ببساطة الحل هو القبول الacceptance💞💞

انا قابلة اني تخنت شوية وقابلة شكلي وقابلة جسمي الشايلني كل ده وهخليه احلي..
انا قابلة اني عندي مشاعر غضب لان الموقف صعب ومن حقي اني اغضب وازعل لاني بشر..
انا قابلة نفسي وشخصيتي وتصرفاتي وبحبني وفي مهارة هتعلمها علشان ابقي اجمل واجمل
قابلة ابني بشخصيته المش زيي, بطبعه المختلف عني وبحبه زي ما هو ..
قابله جوزي بدماغه المش علي مزاجي وتصرفاته المش احسن حاجة بالنسبالي بس انا متقبلاه ومتقبله اختلافنا لان دي سنة الحياة..
التقبل سر جمال اي علاقة جميلة في حياتنا سر الرضا والسلام الداخلي⁦❤️⁩⁦❤️⁩
والتقبل كمان هو سر التغير الحقيقي لاي شيء نفسنا يبقي احسن ..🥰

اسوأ حاجة ممكن تعملها في اي علاقة هي النقد.....
محدش بيتغير بالنقد ،
محدش بيبقي احسن بالنقد،
بالعكس النقد والكلام السلبي أثره صعب يتنسي ده سم في اي علاقة وممكن يدمرها
ارحموا نفسكم و ارحموا الناس البتحبوهم

القيمة التالتة الأحب اكلمكم عنها انهارده هي قيمة الاستمتاع...⁦☺️⁩⁦☺️⁩
بحب استمتع بكل حاجة بعملها وطالاما هي قيمة عندي ده بيخليني اعيشها باستمرار بس الحابة اشارككم بيه انهارده مفهومي عن الاستمتاع😊
زمان كنت بحب استمتع اكتر حاجة بطعم الاكل وكنت بتفنن اعمله بطرق مش صحية وأكل سكر كتير وملح كتير واشرب بيبسي وكان ده بالنسبالي قمة الاستمتاع بس للاسف كنت بعدها بحس بالذنب وباني بضر نفسي وصحتي وشكلي وكنت فكرة أن لما ابطل ده هتحرم من أعلي قيمة عندي....
بس الاكتشفته أننا ممكن نستمتع بحاجات تانية غير البتضرنا وبتبهدل صحتنا...
بقيت استمتع بحبة تأمل اوقف الدنيا لحظة انا المتحكمة فيها،بقيت بستمتع وانا باكل اكل صحي طعمه حلو وعارفة أنه هيفيدني ،بقيت بستمتع وانا عايشة وحاضرة كل لحظة حلوة بتعدي عليا مع عيلتي،بستمتع وانا واخدة بالي من صحتي ،وانا بذاكر خمس ست ساعات من غير ماخد بالي لان دي الحاجة البحبها وده شغفي 😍.....
القيمة هي هي بس انا الأتغيرت......

استمتعوا بكل لحظة مع عيلتكم وصحابكم وحبايبكم زي ما في التزامات وواجبات ملزمين بيها طول الوقت بتحطنا في ضغط وتوتر برده لازم يكون في وقت نستمتع وننبسط فيه 🥳🥳🥳🥳🥳

#فكيهاشويةيافوزية
#والنبيماحدواخدمنهاحاجة

السلام الداخلي
من أهم القيم عندي هي السلام الداخلي إن الإنسان يحس بالسلام مع نفسه ووسط الضغوط الحوالينا طول الوقت بيبقي صعب نعيشه علي طول، بنحتاج مجهود ومثابرة علشان نقدر نعيشه ونستمتع بيه⁦❤️⁩⁦❤️⁩
انهارده كان يوم مليان أحداث كلها توتر وسترس وضغط رهيب بالنسبالي،بس انا اتعلمت اني ابقي مسؤلة عن يومي وعن انفعالاتي ومسبش الأحداث هي التأثر فيا وقررت اعيش القيمة دي انهارده💪💪
مسكت الالوان ورسمة المانديلا الجميلة وقعدت ألون واركز في كل التفاصيل بتاعت الرسمة وانا بعمل تمرين التنفس وبصراحة مكنتش واثقة اوي في النتيجة لأن الموضوع جديد عليا بس قلت اجرب واعمل العليا ..
والمفاجأة اني هديت شويتين تلاتة وحسيت أن التوتر خرج بصورة صحية وحمدت ربنا كتير اني ما قعدتش ازعق واتعصب علي الولاد وارجع اندم كالعادةوألوم نفسي😔 أو ما دخلتش علي التلاجة آكل علشان اطلع التوتر والمفجأه اني مكلتش شيكولاتة 🙈😂😂

#المانديلارحمتالعيال
#شكلهافيهاأمل