عيال زنانة و أهالى زهقانة _ أسماء أحمد

بعد فترة غياب بعتذر لكم عنها جدا ...

حابة أشارككم حاجة لاحظتها على الأمهات على مدار شغلي مع الأطفال والأسر، اكتشفت حاجة مهمة جدًا...

معظم الأمهات اللي قابلتهم كانوا شايفين أخطائهم أكتر بكتير من كل الحاجات الحلوة و المجهود الكبير اللي بيعملوه كل يوم مع أولادهم

زي مثلا الأم اللي بتقلق علشان زعقت مرة، أو قصرت في موقف، أو معرفتش تتصرف بالطريقة اللي كانت تتمنى تتصرف بها... بتكون هي نفس الأم اللي بتحاول كل يوم تتعلم وتفهم وتبذل مجهود كبير عشان أولادها.

🟥علشان كده جاية اقولك حاجة مهم تسمعيها انهارده:
⬅️أنتِ مش مطالبة تكوني أم مثالية أو مبتغلطش خالص.
⬅️أنتِ مطالبة بس إنك تكملي المحاولة بحب ووعي ، وعي يخلينا لو قصرنا نرجع و نصلح لكن منستمرش في الخطأ

وصدقيني من قلب معلمة لقلب كل أم المحاولة الصادقة الواعية ، المستمرة بتفرق أكتر مما تتخيلي.👌😉

يوم جميل لكل أم بتحاول. 🌷

لو عندك جرح في إيدك و الجرح ده ألمه شديد أوي .. لدرجة أنك مش طايق عليه نسمة هواء ..

تلقائيا أول حاجة هتفكر تعملها أنك تخبي الجرح ده علشان محدش يخبطك فيه و هو معدي

ده بالضبط اللي أغلبنا بيعمله مع صدماته أو مشاعره لما يمر بموقف فوق طاقة استيعابه و تحمُله

بس للأسف الناس هتنسى انك كنت مجروح و من غير قصد أو بقصد وارد يخبطوك تاني في جرحك القديم اللي اكتفيت بتغطيته و معالجتهوش صح ساعتها

و زي أي شخص طبيعي عنده نقطة ضعف لو اضغط عليها مرة او اتنين ، هيطلع اسوء رد فعل منه .. للأسف رد الفعل ده بنسبة كبيرة هيأذي المحيطين به

علشان كده لما بنوعي الأهالي بكسر الدايرة و ضرورة الوعي بالسلوكيات و العادات السليمة في تربية أولادنا و العقاب يكون منظم و له تدرج ميكونش بقسوة او عنف يزيد الوضع سوء .. بيكون لمصلحة الأهل قبل الأبناء

لأن وعيك بطرق التربية السليمة و تطبيقها صح هيحسسك مع الوقت أن العقاب الصح جزء من علاج الموقف و ده افضل من العنف اللي بيزيد الطين بَلة

بقدر الإمكان أكسر الدايرة .. أكسرها لصحتك النفسية و صحة أولادك

صدقوني البني آدم المتألم ميقدرش يربي غير أولاد بآلام كبيرة و عميقة .. علشان كده ضمدوا جروح الطفولة بتاعتكم علشان تحمو جهازكم العصبي من الضغط و تحمي أولادك من تكرار ألمك

خلاص متخبيش التعويرة تاني .. اكشفها و عالجها صح😉

بحبكم 🥰

#التربية #الاطفال

ابني بقى يكذبني ويصدق أي حد غيري… هو أنا خسرت ثقتي عنده؟!

الحقيقة اللي بتوجع…إن المراهق مش بيكذبك لأنه شايفك غلط…لكن لأنه في مرحلة بيحاول فيها يفهم:
هو مين؟ ويمشي ورا مين؟
في دماغه صراع حقيقي:

بين كلامك ،وكلام أصحابه
وبين إحساسه اللي بيقوله لازم تعتمد على نفسه

👈 فبيعمل إيه؟
يبدأ يشك… حتى في أقرب الناس ليه.

🟥في المراهقة العقل العاطفي بيكون أسرع وأقوى من العقل المنطقي،يعني هو بيحس قبل ما يفكر…
وعشان كده ممكن يرفض كلامك حتى لو مقتنع بيه من جواه.

✴الجزء اللي أغلبنا كأهالي بيغفله :
أحيانًا المشكلة مش فيه هو لكن في التجربة اللي عاشها معانا كأهل:
⬅️كل مرة اتكلم واتقابل بنقد فبطل يحكي مع أسرته
⬅️كل مرة اتحكم عليه من غير ما يتسمع .. فمبقاش عايز ياخد نصيحة من حد مبيسمعهوش
⬅️كل مرة شاف تناقض بين كلامنا وأفعالنا و حس أننا ككبار عادي نعمل عكس كلامنا لكن هو علشان الاصغر فبنتحكم فيه

✖كل ده بيعمل مسافة ومع الوقت، المسافة دي بتتحول لعدم تصديق.

✅بدل ما تقولي: "ليه مش مصدقني؟"
قولي "هل هو حاسس إنه مسموع مني؟"

✅بدل ما تضغطي عليه يسمعك…خليه يحب يسمعك و ده في خطوات بسيطة👇
اسمعيه للآخر
احترمي فكرة عدم اقتناع ببعض أرائك من غير ما تأنبي ضميره
كوني قدوة مش واعظة أو شخص بيحطه تحت الميكرسكوب و بيراقبه زي الردار لأن ده بيوترهم و بيخليهم ميفكروش في تصرفاتهم
وافتكري دايمًا: الثقة بتتبني… مش بتتفرض

🟥و أخيرا من قلب معلمة لقلب كل أم ابنك مش بيبعد عنك… هو بس بيدوّر على نفسه، وكل ما لقاكي قريبة من غير ضغط… هيرجع لك لوحده."

#الأطفال #ابنك #المراهق #التربية

أحنا بنشجع أولادنا و لا بنمدحهم .. طب هل أحنا عارفين ايه الفرق بينهم ؟؟؟

🟥المدح بيكون تعليقات عامة على الطفل نفسه زي:
⬅️أنت شاطر جدًا،أنت أذكى واحد ،برافو عليك أنت مميز

✖طب ايه مشكلة المدح؟
أن الشكل ده من المدح بيربط قيمة الطفل برأي الآخرين وقتها الطفل بيحس أن قيمته بتعتمد على التقدير الخارجي .

✴ أثره على الطفل :
تدريجيا ممكن الطفل يخاف يغلط عشان يحافظ على الصورة دي، و أثناء نمو ابنائنا هيزيد عندهم الحاجة إلى المثالية المستمرة فيكبر الابن و معه عقدة المثالية و نضيف لها التفكير المفرط و جلد الذات اللي مش هيسيبه لو غلط حتى لو حاجة بسيطة

🟥التشجيع بيركز على المجهود والسلوك مش على الطفل نفسه:
⬅️عجبني إنك حاولت تحل المسألة ديه و استخدمت اكتر من طريقة لحد ما نجحت
⬅️تلوينك في الرسمة جميل واضح أنك بتعرف تنسق الألوان و تظهر التفاصيل بشكل حلو أوي
⬅️أنا شايفك بتحاول تكمل البازل و مش عارف ايه رأيك نجرب طريقة تانية أسهل

✴ مميزات التشجيع:
✅بيبني عند الطفل شعور أن دافعه للتعلم داخلي مش مبني على نظرة خارجية
✅بيخليه يتقبل الغلط كجزء من التعلم مش هيترجمه كفشل أو انتكاسة يا عالم هيقوم منها امتى
✅بيعزز ثقته بنفسه و بيكون وقتها الابن على دراية حقيقية بإمكانياته .. بيتكون عند ابنائنا صورة ذاتية عن نفسهم بشكل صحي مش غرور

✴الأثر على الطفل:
⬅️جرأة في التجربة ،مرونة نفسية
⬅️حب التعلم مش بس النتيجة

طيب هل كلامي معناه أننا نلغي المدح تمامًا؟؟
طبغا لأ لأن أولادنا محتاجينه لكن نقلل المدح المبالغ فيه ونركز أكتر على التشجيع الذكي اللي يسبب الاستمرارية عند أولادنا

#الطفل #التشجيع #الاسرة

مش هتقدر تكمل بصحة نفسية فى مرحلة الشباب الا اذا عالجت الصدمات النفسية اللى حصلت للطفل الصغير اللى جواك.

جمعة مباركة 🥰

مرة من ٩ سنين كان عندي فى الروضة ولد محبش يلعب بالبازل لان لقى صاحبه مش عايز يعملها ، فسألته قالى علشان مش هعرف ألعبها زى (أحمد )

قولتله مينفعش تقول لا على البازل و إنت لسه مجربتهاش ، أحمد صاحبك مش بيحب البازل ، لكن انت لعبتها قبل كده يبقى ينفع نعمل زى أحمد من غير ما نجرب هنعرف نعملها و لا لا ؟؟؟

خلينا نقول إن جزء كبير من جيلنا أغلب قرارته اتأثرت بإنطباعات الآخرين ، علشان كده دائما أقول إن أفضل شىء إننا كأشخاص نجرب و نقول إنطباعنا بنفسنا عن الشىء ، لان كل إنسان له معيار بيقيس عليه التجربة و بالتالى بيقول إنطباعه .
و علشان المعايير ديه مش واحدة عندنا كلنا يبقى مش دائما انطباعات الاخرين صحيحة يبقى افضل شىء هو التجربة .

أفضل شىء ممكن نعلمه لأولادنا إنهم يتعلموا يجربوا علشان ممكن تفوتهم تجربة جميلة بسبب إنطباعات الآخرين.

دمتم بخير 🥰

#الاطفال #التربية #طفلك

لو إبنك بيعانى من حساسية طعام ، أو ممنوع عن طعام معين لسبب طبى آخر، يبقى الأفضل إننا لو هنتجمع مع عائلتنا فى أحد البيوت نوضح ده لأصحابها علشان ياخدوا بالهم من طعام الضيافة اللى هيقدموه .

لإن الطفل لما بيزور عائلته و يقدموا طعام ممنوع عنه و أهله يقولوا لا بلاش ( شهاب ) اصل عنده حساسية من الاكل ده ،بيشعر وقتها بقلق و توتر و إن فيه حاجة ناقصة بتمنعه إنه يعيش طبيعى زى الآخرين.

كمان الموقف بيكون مش لطيف لو فى اطفال غيره و بدئوا يسألوا أمام الولد ...هو ليه يا ماما مش بيأكل معنا ،هو عيان ؟؟

علشان ده ميحصلش متتحرجش توضح الأمر لأصحاب البيت ، للحفاظ على نفسية أولادنا من الشعور بالنقص .

بتمتى لكم نهاية اسبوع سعيدة🥰

#التربية #الطفولة #ابنك

زمان كده كان فى شعار للكشافة بيقول:
🟥لابد أن تعرف كل شىء عن الشىء ، و ان تعرف شىء عن كل شىء .

ساعات مثلا بنتعلم حاجة ملهاش علاقة بتخصص دراستنا ، و ده بيخلينا نسمع كلمة ( هتتعلمها ليه ؟؟ ) ملهاش علاقة بدراستك ، يابنى ركز فى تخصصك علشان هو ده اللى هتكمل به.

خلينا نقول إننا ضرورى نغرس فى اولادنا إتقانهم للشىء اللى بيتعلموه و ناويين يكملوا فيه سواء كانت
(رياضة ، دراسة ، فن ،عبادة ) لأن ده مهم جدا فعلا

بس لازم يكون عندهم لو معلومات سطحية عن اى شىء آخر ... يعنى مش أفضل حاجة إن يكون اولادنا عندهم جهل كامل بالشىء.

لابد ان تعرف كل شىء عن الشىء ، و ان تعرف شىء عن كل شىء 👌👌

بحبكم🥰

#التربية #الاطفال

سلوك بيستنزفك طول اليوم… الزن المستمر 😤🤍
“ماما عايزة كذا”
“ماما طب لو سمحتي”
“ماما طيب بس مرة”
(ويتكرر نفس الطلب 20 مرة 😩)
لو ده بيحصل عندك… فإنتي مش لوحدك
بس خليني أقولك الحقيقة:
الزن مش قلة أدب…الزن سلوك الطفل اتعلمه علشان يشد انتباهك زيادة عن اللازم
📌 طب هو اصلا ليه الطفل بيزن؟
لأنه جرّب قبل كده ولقى إن “الإلحاح بيجيب نتيجة”
حتى لو وافقتي مرة واحدة بس بعد 10 محاولات…
المخ عنده سجّل: لو كملت زن هتاخد اللي إنت عايزه

✴وده اسمه علميًا:
تعزيز متقطع (وده أقوى نوع بيخلي السلوك يتكرر)

🟥ننزل لأرض الواقع:
طفلك طلب موبايل قولتي: لأ
فضل يزن وفي الآخر وافقتي علشان تسكتيه
⬅️هو كده اتعلم: الزن = نجاح

🟥 نتصرف إزاي بشكل عملي؟
1. قرار واضح من الأول
يا “أه” يا “لأ”
مش هنقول طب دلوقتي… بعدين… كمان شوية”
لأن التردد بيزود الزن

2. ثبات في الرد لو قولتي “لأ” يبقى تفضلي “لأ”
حتى لو زن 10 مرات
أول كام مرة هيزيد الزن (وده طبيعي جدًا)
اسمه: “انفجار السلوك قبل ما يختفي”

3. تجاهل مدروس : مش كل زن محتاج رد
ردي مرة…وبعدها تجاهلي التكرار

4. تعزيز السلوك الصح
أول ما يطلب بهدوء أو يقبل الرفض:
✅ امدحيه فورًا
“حلو إنك طلبت بهدوء”

📌 أهم نقطة:
إنتي مش بتوقفي الزن في يوم…
إنتي بتعيدي تعليم سلوك

الخلاصة:
الطفل مش بيزن علشان يجنّنك…
هو بيزن علشان اتعلم إن دي الطريقة اللي بتنفع
لما الثبات يزيد…الزن هيقل تدريجيًا

مش لازم تبقي أم مثالية… كفاية تبقي أم بتبدأ 🫂💚

من شدة كلامنا أمام أطفالنا عن الشكل و اللون و الشعر
بقى الاولاد الصغار اللى عمرهم ٤ سنين مركزين مع بعض بشكل مبالغ فيه

تخيل ٤ سنين ده المفروض يلعب مع صاحبه ... يشاركه فى لعبة سوا زى الصلصال أو البازل

لكن ده مركز على شكله و بيعلق عليه
الظاهرة ديه مش طفل و لا اتنين ده كل الاولاد اللى اشتغلت معهم من يوم ما اتخرجت بس مكنتش زيادة كده

فى مرة كنت بقدم ديمو فى مدرسة فيها دمج و الفصل اللى دخلته كان فيه طفل متلازمة داون

لما الاولاد تفاعلوا معايا و عملوا دوشة شوية فى بنت منهم قالت صاحبنا بيخاف من الصوت العالى
(قصدها زميلهم الدمج)

و بدئوا يتكلموا تانى براحة لأن الولد فعلا كان بدأ يتوتر

الموقف خطف قلبى بشكل 💜 أد ايه صغاااااار لكن لما بتغرس فيهم صح و تأكد معهم على الصح و تمارسه معهم بتلاقيهم ألتزموا به

لدرجة أن ولد كان بيعمل صوت خروشة كده بالاقلام بتاعته صاحبه قاله براحه علشان صاحبنا ميضايقش

و عرفت بعدين أن الاولاد بيلعبوا معه كرة عادي
يعنى مش مكبوت حريتهم ... بس من غير الاصوات اللى ممكن تستثير جهازه العصبى

لعبوا ... تفاعلوا ... بقى فيه مراعاة للغير لانهم وعيين بوجوده و احتياجاته بدون كبت احتياجاتهم

هى ديه التربية الحقيقية ... تربية بالممارسة مش بالكلام الشفوي و و انتظار تنفيذه بدون الصبر على التعثر فى التنفيذ
من قلب الحدث
#التربية