Life & beyond by Mona Khoudairy

المتحف المصري وافتتاحه
في علم النفس الايجابي في حاجة اسمها نقاط القوة
وهي اني ادور جوة نفسي في ايه الحاجات اللي بعملها بكل سهولة وبتسهل عليا مهام حياتي الاساسية
زي نقطة قوة حس الفكاهة sense of humour
بتساعد صاحبها انه يمارس مهام حياته بدون توتر وبتخلق جو من المرح ليه وللمحيطين بيه يمكنهم من انجاز المهام دي باستمتاع وفاعلية اكتر فينتج عنه نجاح وانجاز كبير وعلاقات اقوى واعمق
قيس على المثال دة كل نقاط القوة التانية
الفكرة ان احنا مبنكنش عارفين ان دي نقطة قوة وبنفتكر ان دي حاجة من سمات شخصيتي بس مش مؤثرة في حياتي ولا ليها لازمة في نجاحي
لكن لما بنعرف بنقدر نستخدمها بذكاء ونفكر ازاي نقدر نخليها تساعدنا ننجح اكتر
دة بالظبط اللي بيحصل حاليا في افتتاح المتحف المصري
الاحتفال والترويج دة مش بس علشان نعرف الناس اننا عندنا متحف جديد والكلام دة
لكن دة استخدام لاكبر نقطة قوة بتتميز بيها مصر وهي حضارتها القديمة واثارها و تاريخها في خلق صورة عظيمة عنها دلوقتي و عن قوتها زمان ودلوقتي و خلق فرص استثمار ضخمة وفرص عمل اضخم
لفت انظار العالم كله بمثابة دعاية ضخمة عن مصر كلها و عن قوتها من كل النواحي تاريخيا و اقتصاديا و ثقافيا و سياسيا
الحقيقة ان دي اذكى طريقة واقصر طريق اني ادور في انا معروف بإيه و شاطر فيه و استخدمه لنجاحي .
دة مش مجرد متحف دة فكر مدروس مبني على علم
وان شاء الله هيعود علينا كلنا بالخير و النجاح🤍🤍

الواحد بيسمع كل يوم عن قساوة غريبة في قلوب بعض الناس و تصرفات من اقرب ناس لبعضهم تخلي الكلام يقف في زورك من الخضة
ناس بتعذب حيوانات من اجل التسلية
وناس بتقتل بعض من اجل المال
وآبااااااء كتييير متخليين عن اولادهم ولا بيصرفوا ولا بيسألوا لانهم على خلاف مع والدتهم .....قساوة ملهاش تفسير
قبح وسوء ربنا يصرفوا عن قلوبنا وقلوبكم
بس دة ميخليناش نفقد املنا في ان في خير كتير موجود في اماكن وقلوب تانية كتير ،في عوض من ربنا وفي حب ومصادر كتير تانية نقدر ناخد منها الامان والحب
كل يوم خد قرار بأنك تكون الحاجة الحلوة اللي في طريق حد
وكون لمسة طبطبة في وسط الالم
او نسمة خفيفة لا اذت و وهتوجع حد وتطيب خاطر موجوع
🤍زود الخير من ناحيتك وتعالوا نحاول نعدل الكفة

ان لم تستخدم اي لحظة خلال يومك المشغول تشحن بيها طاقتك مش هتقدر تكمل ،هتفضل طول الوقت مستني يوم الاجازة ، فا تفضل كاره شغلك على واجباتك على كل اللي وراك وتفضل تلف في الساقية الى مالانهاية
اشحن نفسك بافكار تساعدك زي الامتنان انك عندك شغل من الاساس ،زي انك من غير الواجبات و المسئوليات دي الحياة مش هيكون ليها طعم
كلها نعم محتاجين نبص لها بعين الرضا مش بعين الزهق والتعب
اشحن نفسك بالعشر دقايق اللي شربت فيهم قهوتك او ضحكت ضحكتين مع زمايلك او ولادك او صلاتك اللي خطفتها في نص اليوم واشكر فيها ربك واحمده .
الحياة سريعة اه ومرهقة بس لو سبت نفسك للافكار دي مش هتعرف تكمل سليم
عيشها بحب وبرضا🤍

Insecurities
الشعور بالوحدة والشعور بالانعزال والغربة في مكان جديد
او الشعور بالانعزال عند الدخول في مجتمعات جديدة او ناس جديدة
هم اكثر الاوقات اللي بيصحوا جوانا مناطق عدم الامان، ال insecurities
المشاعر اللي بنحسها في الوقت دة هي في اغلب الاحيان ملهاش علاقة بالواقع ولكن ليها علاقة بينا احنا
يعني حاسس وسط ناس ان محدش مركز معاك او مهتم لفترة طويلة
خلاك تفكر ان اكيد شكلي مش حلو زيهم
اكيد دمي تقيل
اكيد مش شايفني اصلا
وووو ....
كل دي مش حقائق دي مناطق عدم الثقة الداخلية جواك
المطلوب منك انك لما تحس بالمشاعر دي انك تبدأ تدور على المعتقد اللي ورا كل فكرة وشعور من اللي حسيتهم وتبدأ تحله واحدة واحدة
المشاعر دي جاية تقولك ان في عندك مشكلة هنا ومحتاجة تتحل من عندك
مش من عند اي اي اي حد تاني
سيدنا يونس لما كان في بطن الحوت ادرك انه عنده هو مشكلة وفي ساعتها قال " لا اله الا انت سبحانك اني كنت من الظالمين"
ومن هنا ابتدى حل مشكلته
اوعى تستنى الحل ييجي من برة
اللي هو الناس تركز معايا او الظرف يبقى احسن من كدة او الناس اللي في حياتي تهتم بيا اكتر من كدة
كل دي شماعات هتعلق عليها مشكلتك بس للاسف كل ما اتعلقت عليها كل ما كبرت مشكلتك
دور ورا الشعور وعالجه وصدقني بعد علاجه هتحس بحرية و انطلاق وكأنك كنت محبوس جوة نفسك
بس ابدأ من نفسك مش من برة💪💪

الحكمة والخبرة بناخدها من تجارب اكثر الناس مروا بتجارب صعبة وفاشلة (حسب تسميتهم) زي مدمن متعافي
زواج فاشل ،ادمان لعادات سيئة
دول اللي بنلجا لهم وبنسمع قصص نجاحهم ونسقف لهم
ودة يدينا اكبر درس لازم نتعلمه
الفشل والوقوع في داخله عمره ماكان فشل
دة اهم واكبر محطة هتقف عندها علشان هيتبني عليه كل اللي جاي
اوعى تاخد اي تجربة في حياتك على انها فشل شخصي و وصمة عار عليك وعلى شخصيتك
التجربة دي انت كنت محتاجها علشان تنمو ووعيك يختلف وتطور من نفسك
عمرك ماكنت هتبقى في اي مكان انت فيه دلوقتي قبل ما تعدي على التجربة اللي علمتك بجد

بلاش نعمم دور واحد من ادوارنا على كل ادوار حياتنا
اوقات بيستحوذ دورنا كأم او اب على باقي ادوارنا في الحياة
نلاقي نفسنا بنتعامل مع كل الناس بامومة ونعامل الزوج والاصحاب والعمل بنفس الدور دة
فا تتحول شخصيتك من كيان منفصل لكيان الام فقط
وكمان تلاقي نفسك بتتحمل مسىؤوليات في المطلق و كمان بتتوتر على اي سبب ميخصكش زي شعور الام على اولادها
وبالتالي بتعيشي استنزاف مشاعر من غير سبب
او تعيش بدورك في الشغل مع باقي ادوار حياتك فا تلاقي انك بتعامل اللي حواليك انهم مش فاهمين حاجة ولازم طول الوقت تديهم من خبرتك وتنصحهم و ربما اوامر على حسب مرتبتك في الشغل ايه
الموضوع دة مزعج ليك وللاخرين لانهم مش عايشين معاك هما عايشين مع الدور اللي انت بتأديه دة
وانت مش مرتاح انت محشور في كيان لا يمثلك٪ ١٠٠
انت روح وكيان منفصل عن ادوارك في الحياة
اتعامل مع كل واحد بروحك بالطبيعة الحلوة اللي جواك
متسمعش حد باحكام مسبقة و متسمعش بودن الخبير
لكن اسمع واتعامل بروح اللي ادامك و احتياجه لانهي دور تقدر تقدمهوله
اسأل كتير اكتر ما تدي حلول ونصايح
تعمق في المعاني والشعور مش في دورك ايه وخبرتك ايه
انت مش دور انت كل الادوار
انت كل الحياة

كل ما هو متبادل مستمر
لو ركزت شوية في العلاقات اللي حواليك
هتلاقي ان اللي مستمرين ومكملين من زمان او لو لسة جداد حتى
هما اللي فيهم اهتمام متبادل
في حاجة رايحة جاية
محدش بيفضل يدي اهتمام وكلام حلو ومدح والتاني عمال يستقبل وينبسط بس وتستمر العلاقة
يا هتنتهي يا هتكون علاقة غير حقيقية و غير مريحة
بتدي اهتمام وحب يبقى لازم يكون في مقابل باي شكل
والا انت اللي هتحس بعدم ارتياح وهتشعر بنقص وعدم استحقاق
اوعى احتياجك للحب والامان يخليك باي شكل تقبل بما لا تستحق
طالما بتدي لازم تستقبل انت تستحق🤍

سمعت جملة من الدكتور مصطفى محمود اثارت جوايا معنى جديد اول مرة افكر فيه
قال عن الموت انه استدعاء من ملك الملوك
الجملة دي اثارت جوايا احساس بأن الموت تكريم
ترقية من الملك للالتقاء في مكان تاني من ملكوته
واني انهيت اختباري في المكان دة و حسسني بانتباه الله عز وجل لكل عبد من عباده
ويوم استدعاءه دة شرف ومحبة منه
مش فاضل غير اننا دايما نستعد للاستدعاء دة علشان يكون لقاء يليق بمكانته و بعظمته وبكرمه
عارفة ان الكلام دة مش هيبرد قلب اي حد فقد حد بيحبه
بس يمكن قلبك يتطمن ان حبايبك عند ملك الملوك وعند الكريم الرحيم وبيلبي استدعاءه في مكان تاني
واللقاء في الاخر اكيد

You can now contact me through WhatsApp for an easier communication

رحلة الكوتشينج بتقوم على تلات محاور رئيسية
من غير واحد منهم مش هتبقى جلسة كوتشينج
1️⃣ المحور الاول هو العميل (client): اني ككوتش اكون بسمعه بصفته الخبير في قصة حياته و الخبير بنفسه ودة اهم مبدأ بيقوم عليه الكوتشينج
👉Client is the expert
العميل هو الخبير
مش العكس
2️⃣ المحور التاني هو الكوتش(coach): وهو ان انا ككوتش اسمع بدون اي احكام ويوصل دة للعميل
👉Judgment free area
3️⃣ المحور التالت وهو التغيير (change) : ان يكون العميل على دراية تامة انه هو المسئول الاول والأخير عن التغيير اللي عاوزه يحصل
💡اما انا دوري في التغيير دة اني اكون عامل من عوامل اثارة الوعي (catalyst)
منشط للافكار ومحرك ومثير للوعي
الكلام دة مهم ليك كعميل مع اي كوتش علشان تكون عارف ايه المطلوب منك في الرحلة دي وايه المطلوب من الكوتش بتاعك ولو مش متحقق تكون عارف ان نجاح عملية الكوتشينج مش مضمون ١٠٠٪