Life & beyond by Mona Khoudairy

25/07/2026

محدش بياخد اكتر ولا اقل من نصيبه
نيتك الطيبة و سعيك للخير لو محدش شافه ربنا شايفه
لو محدش شافه يكفي انك راضي عن نفسك
انتظار التقدير من برة دة بيخلق احساس بالنقص واوتوماتيك هييجي معاه ضعف ثقة بالنفس
ودة بينعكس على طريقتك و تعاملك مع اللي حواليك وردود افعالك لكل كلمة وفعل يتعمل
في التعاملات اليومية محتاجين اوي نجدد نيتنا دايما ب:
١- انا في المكان دة ربنا عاوز مني ايه فيه .
٢- لو مشيت النهاردة من هنا احب سيرتي تكون ايه
٣- اربط اللي بتعمله دايما بقيمة عليا زي الامانة،الاخلاص،اعمار الارض،تسهيل حياة ناس،انفاق على اسرة او اي قيمة عليا تحسسك بالاشباع
التعاملات اليومية المختلفة ممكن تقلل شعورنا بقيمتنا وتدخلنا في تفاصيل تبعدنا عن هدفنا الاساسي في الحياة وبالتالي يقلل سلامنا النفسي لو مفكرناش نفسنا دايما بقيمنا واهدافنا في حياتنا.

08/06/2026

وسط تجمع عائلي الكل مبسوط وانت حاسس بغربة ...للاسف المشكلة عندك
وسط لمة صحاب والكل مندمج و مبسوط وانت حاسس بانعزال...بردو المشكلة عندك
وسط اجتماعات عمل وحاسس بتهميش ...ايوة المشكلة عندك🙈
مش جاية القي اتهامات وانفي شعورك ولكن جاية اقولك ان احنا مبنقدرش نقيم نفسنا واحنا في عزلة لوحدنا
بنقدر نعرف مشاكلنا الداخلية ونقيم نفسنا لما بنتعامل مع ناس ويتكرر شعور معين زي الامثلة اللي فاتت
هنا مينفعش اقول كل اللي في حياتي وحشين
لكن لازم اقول انا عندي مشكلة حتى لو مش قادر احددها بس الاعتراف بيها هينفي الذنب عن اللي حواليك فا هتقدر تتعامل معاهم بدون ما تكون محملهم ذنب او شايل منهم بأي شكل
ودة ميخليش تقديرك لنفسك يقل او تحس انك معيوب باي شيء بالعكس دي فطرة ربنا اللي خلقنا عليها
طيب اعمل ايه لما احس ان عندي مشكلة
١. دَوّر على نقاط قوتك : مش شرط افضل اقوي في حتة ضعيفة عندي لكن العكس، ممكن اشوف نقطة قوتي واستغلها .
زي مثلا : انا مش شاطر في الاجتماعيات بس شاطر في الخدمات ،استغلها في العلاقات اللي حواليا ،مش لازم بقى افضل اضغط على نقطة ان انا مش بعرف اعمل علاقات قوية بسهولة لكن ممكن اقدم خدمات لنفس الناس تساعدهم فا تقرب المسافات بطريقة بعرف اعملها .
٢. حدد نوع مشكلتك: هل هي سلوكية ( سلوك معين بتعمله بيدي عنك انطباع مش صح فا بيخلي الناس تدي نفس ردود الافعال )
ولا شعورية فقط: انت اللي بتحس بكدة نتيجة افكارك الخاصة ( محدش حاسس بيا، كله مهتم ببعض الا بيا، انا لو مشيت دلوقتي مش هتفرق مع حد....)
٣.في الحالتين جرب تبطل السلوك وجرب تتعامل بدون ما تحط في دماغك الافكار دي وشوف الفرق في الشعور وفي الاداء.
٤.ادخل المكان اللي انت بتحس فيه المشاعر دي وانت حاسس بقيمة نفسك وانت متاكد انك فيك من نقاط القوة والقيم الجميلة اللي تخلي اي حد يحب يتعامل معاك وشوف الفرق بردو في الشعور وفي الاداء.
دايما خليك فاكر ومتاااااكد انت مش ضحية لحد بس ممكن تبقى ضحية نفسك وكسلك انك تتغير .

27/05/2026

14/04/2026

واقعة بسنت الله يرحمها هي القشة التي قسمت ظهر البعير
احنا بقالنا فترة طويلة جدا بنسمع عن اشباه الرجال اللي مبيصرفوش و بيعذبوا في طليقاتهم واولادهم
واظن مش بنسمع بس، احنا بنشوف حوالينا في كل مكان السيناريو دة
بقى متكرر بشكل ملفت وخلاني عايزة افهم ايه اللي حصل في المجتمع اللي خلى جيل كامل الا من رحم ربي يخرج بالشكل الغير رجولي دة!
اكيد في عوامل مؤثرة عملت خلل بجد في القيم والمفاهيم !!
وعلشان نوصل للعوامل دي محتاجين نفهم عقل البني ادم بيتكون من ايه ؟!
👈🏻العقل او ما يسمى بالوعي العقلي هو باختصار زي الوعاء اللي بيحتوي على افكارك ،قناعاتك، وجهات نظرك، هويتك، مفاهيمك عن نفسك والحياة والناس من حولك .
⬅️بيترتب عليهم سلوكياتك وردود افعالك لمختلف أنواع المواقف في الحياة .
👈🏻اذا اللي اتغرس في العقل لجيل كامل من افكار ومعتقدات ووجهات نظر كان بعيد كل البعد عن الدين و عن القيم الرجولية والقوامة. حتى النساء ،اللي اتغرس في مخهم بردو مفاهيم مغلوطةعن دورها في الحياة،عن الحرية،وعن قيمتها العالية،وبردو بعيدة عن الدين كل البعد .
👈🏻العوامل دي من كذا اتجاه
مش هتكلم قصروا في ايه لكن هقول محتاجين كل اتجاه يعمل ايه يمكن نلحق اللي جاي
1️⃣ اولا واهمهم التربية: محتاجين نركز اولادنا بيكبروا على ايه في عقولهم ، هل علمتهم عن دينهم حاجة ، محتاجين نكلمهم عن احترام الاخر ونربطه بامثلة من عند الانبياء ،نتكلم عن مواقف النبي صلى الله عليه وسلم مع زوجاته ، نفهمهم معاني القوامة ،نفهمهم معنى التقوى ومراقبة الله في كل وقت
ومش بتكلم عن دروس القرآن انهم يحفظوا والسلام وابقى عملت اللي عليا ،اه مهم انه يحفظهم و يربطهم بكتاب ربنا
بس انا هنا بتكلم عن دورك كمربي ناقشت عقل ابنك في الافكار اللي بتتغرس فيه وغرست بايدي قيم وتقوى ولا لأ؟!
2️⃣ ثانيا الإعلام: غصب عننا الاعلام بيغرس في عقولنا افكار ومعتقدات واعتقد بقالنا حقبة كبيرة من الزمن كل الافكار ملوثة ومشبوهة وبتحمل معاني عقلنا بيفهمها و يخلق منها معتقد وبيتفاعل على اساسه
ودة جزء اساسي منه احنا كأهل محتاجين نعرف اولادنا بيشوفوا ايه ونناقشهم فيه اول بأول
ومن ناحية تانية اتمنى من كل صانع عمل ان يتقي الله في اللي بيعرضوا على اي شاشة لانك مش بتعمل ترفيه والسلام انت بتبني عقول مجتمع💔
3️⃣ ثالثا المنظومة الدينية: فضلنا سنين ويمكن الجيل اللي فات هو اللي اتربى على الترهيب و الخوف بدل من الفهم و الحب
فطلع جيل بعيد عن الدين ومش بيحاول يقرب ويفهم لان المعتقد بقى مشوه ولكن حاليا في كل انواع الشرح والتحبيب في تنفيذ اوامر الله عن فهم وحب، فبلاش نتكاسل وكل واحد يثقف نفسه بنفسه واولاده وغيره
4️⃣ رابعا القوانين: لما الدولة تكون قوانينها واقفة في صف الظالم هيفهم انه على حق ويكمل!
اتمنى التحرك نحو القوانين اللي حاصل اليومين دول يكمل و يكون في قوانين منصفة حقيقي لكل الاطراف
"كلكم راع وكلكم مسؤول عن رعيته"
📌كل واحد مننا في مكانه يقدر يعمل حاجة
👈🏻لو انت طالب/طالبة ابتدي بنفسك و شوف افكارك تجاه نفسك والاخرين عاملة ازاي وابدأ صلح فيها واتعلم عن دينك وطبق وعلم اصحابك واللي حواليك.
👈🏻لو انت معلم فا تحت ايدك طلاب ،اغرس كل يوم فيهم ولو معلومة واحدة تعلمهم عن دينهم وعن حياتهم وركز اوي في اللي بتحطه في دماغهم من تصرفاتك وكلامك.
👈🏻لو انت موظف في اي مهنة حواليك زمايل حاول تكون قدوة حسنة ،متتهاونش في اراءك لما تسمع حاجة حرام وناخدها بضحك وانصح بالحسنى
اسفة على الاطالة ولكن اتمنى كل واحد مننا يعمل اللي في ايده يمكن الدنيا تنصلح ولو عند اي حد افكار نقدر نصلح بيها اكتر ياريت تشاركونا 🤍

11/04/2026

انت عندك كام سنة ؟
ياااا دة انت لسة صغنن
اصل انت معيشتش ايامنا
هو انت gen z هاهاها
ياعم اكبر منك بيوم اعلم منك بسنة ( مش عارفة هي كدة صح ولا لأ بس دة المعنى😂)
كم من التعليقات على اللي اصغر مننا تفقد اي حد شعوره بقيمته و احساسه بالانتماء
كم من المسميات اللي تحسس اي حد انه مهما عمل مش هيعجبك ولا هتقدره او يحس انه بينتمي لجماعة لمجرد انه اصغر !
مسميات زي الجيل الذهبي
و gen z ووراها ضحك غير مبرر
يفضل البني ادم اللي محاط بمجموعة او اي حد اكبر منه بشوية سنين بيعافر طول عمره علشان يثبت لك انه شبهك وانه مسئول و شاطر و انه فاهم اللي انت بتتكلم فيه ويفضل طول الوقت عايز يكبر علشان يوصل للسن اللي هيتشاف فيه بقى زي ما انت عايز تشوفه وللاسف مهما كبر بيفضل الاحساس دة معاه 💔
ويمارسه هو على الاصغر منه ويعلمه ليهم ( الا الواعي منهم اللي هيدرك انه بيجري ورا وهم ويكسر الدايرة دي )
و يبدأ يحاول ينتمي لمجموعة تانية حتى لو مش شبهه ومش شبه مبادئه لكنه محتاج يحس بالانتماء لجماعة ويحس بالقبول، وبالتدريج هيبعد عن العالم بتاعك؛ ودة سبب كبير لبعد المراهقين عن اهاليهم لانه محسش دة معاهم .
خلينا نتعلم نقدر كل بني ادم زي ما هو، مهما كبر سنه او صغر .
انت مختارتش تتولد امتى ولا تعيش انهي فترة في الحياة ولا هو اختار .
احنا ممكن نتعلم من الاصغر مننا اللي عمرك ما اتعلمته في حياتك كلها واظن دة حاصل اساسا!
الموضوع دة على اد ماهو متاخد بسخرية لكنه في باطنه بيوصل رسايل مزعجة جدا وفيها تقليل وتهميش ومش كل واحد هيستقبل الهزار زي التاني ،في اللي هيعديه ويهزر لانه واثق كفاية في نفسه ومقدر نفسه وفي اللي هتهزه وهيفضل بيعافر زي ما قلت💔
لو عايزين نحافظ على العلاقات بجد باولادنا او اي حد قريب او حتى طلاب عندك او زمايل عمل اصغر ،بلاش نستخدم الكلام دة لانه حقيقي نوع من انواع سوس العلاقات🤍

18/03/2026

من اكتر شكاوينا كأهل من الاولاد في سن المراهقة وبداياته
هي الشكوى من طريقتهم وتمردهم على معظم الحاجات اللي كانت مسلمات بالنسبالهم
المرحلة دي هتكون سهلة على الاهل اللي كانوا قريبين روحيا ونفسيا من اولادهم من الاول وكمان عندهم مرونة و قدرة على التعلم والتغير
ليه ؟!
👈🏻لان كل ما كنت قريب من ابني او بنتي كل ما هكون حاضر في كل لحظة حصل فيها تغير فيهم ،حاضر بقلبي و عقلي مش شرط اكون حاضر بنفسي بجد، حاضر وفاهم بيحبوا ايه وبينفروا من ايه
ايه الطباع و الصفات المنفرة بالنسبالهم وايه اللي بيفضلوه في الطريقة
كل ما هو منفر و مش على هواهم في الفترة دي هيتمردوا عليه بكل اريحية لانهم في الوقت دة حاسين بوجودهم وبقدرتهم وعايزين يثبتوه بكل الطرق.
فا بالتالي لو انا كمربي فيا طبع او طريقة مش بيحبوها فا رد الفعل هو التمرد على اي حاجة بقولها او بطلبها حتى لو هو عارف انها في مصلحته!
👈🏻طيب وليه محتاج اكون مرن و قابل للتغيير؟!
لان المرونة دي هي اللي هتخليني عارف افهم دماغهم وتفكيرهم وقادر اقرب واقبل اللي بيحبوه مش انتقد طول الوقت و افضل اقولهم داحنا كنا زمان بنعمل و نخلي ونسوي
👈🏻والقدرة على التعلم محتاجها لان لازم اكون مطلع كل مرحلة عمرية ايه متطلباتها و تحدياتها بالنسبة لاولادي
مقدرش ادخل امتحان من غير ما اكون جاهزله
نفس الفكرة متدخلش على منعطف مهم في حياة اولادك و انت مش مدرك اي حاجة عن متطلبات المرحلة و تحدياتها ولا اي حلول واقعية للتعامل .
لو فضلت بتتعامل بطريقة التعنيف والتقليل و التهميش هتلاقي المقابل من عندهم تمرد وتقليل احترام وصعوبة وفي الاخر فجوة بينكم .
📌في كل المراحل العمرية اظهارك للحب مهم بكل الطرق
اولادنا محتاجين يوميا اننا ناكد على دة بالكلام والفعل
📌في كل المراحل محتاجين نهزر معاهم و يكون في مرح بينا مش لازم لعب و شقلبة بس اكون روحي خفيفة معاهم كدة
📌خليك مطلع على اللي بيحبوه والناس اللي بيحبوهم وافهم بيحبوهم ليه مش نفضل نتريق عليهم ونقارنهم باللي بنحبهم وبذوقنا وخلاص دايما افترض ان عندهم وجهة نظر تحترم ومش شرط اقبل اللي بيحبوه لكن مقللش منه .
ربنا يهدينا ويهدي اولادنا ويرضينا ويراضيهم دائما وابدا 🤍


#التربية
#مراهقة

19/02/2026

رمضان كريم عليكم و علينا
رمضان كريم مش بس كلمة دي سمة من سمات ايام رمضان
كل حاجة في رمضان اسهل وفيها بركة
يلا نستغل فرصة الايام الكريمة دي و نحط نية ونغير اي عادة سلبية مش عاجبانا
او نبدا عادة جديدة
نتخلص من ذنب
او من تعلق مرضي بيشدنا دايما لورا و نبدله بتعلقنا بالله
رمضان مش عبادات من غير هدف
دة اكتر وقت بنتعلم فيه نستغنى عن اي حاجة ملهاش لازمة
ونستبدلها بكل ما هو ذات قيمة
كل عام وانتم بخير

31/12/2025

ها كتبنا ليست الانجازات
وحطينا ليست الأهداف بتاعت كل سنة
غالبا هي هي كل سنة بس بنغير الصيغة علشان شكلنا ادام نفسنا 🤣
بجد ضحك علينا اللي فهمنا ان لازم نبقى ماشيين بقائمة أهدافنا ولو مدخلناش السنة الجديدة بيها الناس هتاكل وشنا😂
هو في حد فينا مش عارف هو محتاج ايه
وتقريبا كلنا اقصى طموحاتنا نعيش في سلام نفسي
واللي مننا بيفكر ابعد بيكون عايز يكون ليه اثر طيب
فا اياً كانت الحاجات اللي هتسبب لنا السلام النفسي يبقى هي دي اهدافنا ، ومش شرط ان السلام دة ييجي بالحاجات اللي نفسي فيها و مش عارف احققها لانها مش تحت سيطرتي انا .
👈🏻السلام هييجي بالرضا باللي عندي دلوقتي بجد وامتن ليه واستمتع بيه كمان
👈🏻هييجي لما اسلم لله تمام التسليم بأن كل اقداره خير حتى اصعبهم عليا لكن ايماني بان دة قدر ربنا وانه هو ارحم حد بيا واعلم حد بيا وبمقدرتي هيطمني
👈🏻هييجي لما اعمل اللي عليا في المكان اللي ربناحطني فيه
"اتق الله حيثما كنت"
احط ادام عيني في اي حاجة بعملها ايه الاثر الطيب اللي هيعود على غيري وعليا اكيد
👈🏻هييجي لما مقارنش نفسي بحد وبانجازاته وقدراته
ولا اقيم نفسي من خلال حد ورؤيته ليا ،كل واحد يخليه في حاله الله يباركلك😂
👈🏻 السلام هييجي بجد لما ابطل احط اهداف انا مش عارف بحطها ليه وعلشان اثبت ايه لمين
كل المطلوب مني اشوف السلام دة هييجي منين واسيب اثر طيب في كل تعامل ومكان انا فيه
واي تفاصيل تانية المفروض متشغلنيش ولا تاخد حيز من تفكيري 🤍
كل سنة واحنا طيبين بجد مش كلام
يارب السنة دي تكون كلها سلام وامان واحلام تبسطكم بجد مش تخليكم تجروا حوالين نفسكم🤍🤍🤍

01/11/2025

المتحف المصري وافتتاحه
في علم النفس الايجابي في حاجة اسمها نقاط القوة
وهي اني ادور جوة نفسي في ايه الحاجات اللي بعملها بكل سهولة وبتسهل عليا مهام حياتي الاساسية
زي نقطة قوة حس الفكاهة sense of humour
بتساعد صاحبها انه يمارس مهام حياته بدون توتر وبتخلق جو من المرح ليه وللمحيطين بيه يمكنهم من انجاز المهام دي باستمتاع وفاعلية اكتر فينتج عنه نجاح وانجاز كبير وعلاقات اقوى واعمق
قيس على المثال دة كل نقاط القوة التانية
الفكرة ان احنا مبنكنش عارفين ان دي نقطة قوة وبنفتكر ان دي حاجة من سمات شخصيتي بس مش مؤثرة في حياتي ولا ليها لازمة في نجاحي
لكن لما بنعرف بنقدر نستخدمها بذكاء ونفكر ازاي نقدر نخليها تساعدنا ننجح اكتر
دة بالظبط اللي بيحصل حاليا في افتتاح المتحف المصري
الاحتفال والترويج دة مش بس علشان نعرف الناس اننا عندنا متحف جديد والكلام دة
لكن دة استخدام لاكبر نقطة قوة بتتميز بيها مصر وهي حضارتها القديمة واثارها و تاريخها في خلق صورة عظيمة عنها دلوقتي و عن قوتها زمان ودلوقتي و خلق فرص استثمار ضخمة وفرص عمل اضخم
لفت انظار العالم كله بمثابة دعاية ضخمة عن مصر كلها و عن قوتها من كل النواحي تاريخيا و اقتصاديا و ثقافيا و سياسيا
الحقيقة ان دي اذكى طريقة واقصر طريق اني ادور في انا معروف بإيه و شاطر فيه و استخدمه لنجاحي .
دة مش مجرد متحف دة فكر مدروس مبني على علم
وان شاء الله هيعود علينا كلنا بالخير و النجاح🤍🤍