27/12/2021
" الرحلة من ال problem لل solving"
دايمًا بنقابل مهارة ال problem solving ف التقديم ع أي وظيفة بتكون مهارة مهمة و مطلوبة،
كمان لما بنروح أي انترفيو بنتسأل "احكيلنا ايه أكبر مشكلة قابلتك ف الشغل و عملت ايه عشان تحلها؟ "
الأول خلينا ناخد مثال يوضح اكتر،
محمد شخص مجتهد جدًا بيدور ع شغل وقدم على وظايف كتير.. بيروح الانترفيو بس بيترفض كل مرة ،
هنا وقف مع نفسه وبدأ يسأل فين (المشكلة) عشان يحلها، وقرر إنه الانترفيو الجاي لازم ياخد فيد باك من الاتش ار.
بعد ما خد الفيدباك محمد اكتشف إن ف مهارات كتير مطلوبة ف الوظايف اللي بيقدم عليها و هي مش عنده،
بدأ يبحث ويعرف اكتر و يطور ف نفسه و ف مهاراته بالتالي هو زود فرصة قبوله ف الوظيفة اللي بيقدم عليها.
تعالى نشوف خطوات حل المشكلة كانت ايه
🛑 تحديد المشكلة :
بدأ يركز على المشكلة الرئيسية للرفض وليه هو شخص مش مؤهل.
بس عشان نحدد المشكلة لازم نفرق بين المشكلة الرئيسية " السبب" وبين "الأعراض" اللى ممكن تظهر كنتيجة للمشكلة.
يعني ايه ؟
لو قولنا إن شركتك بتعانى من ضعف ف الاداء،
و انت شايف إن السبب اداء الموظفين نفسهم ضعيف،
ولكن مش هي دي المشكلة دا مجرد عرض او نتيجة للمشكلة الأساسية.
لما سألنا شخص متمرس ف حل المشاكل قال ان السبب "المشكلة الأساسية" هو عدم توافر تدريب جيد للموظفين،
أو إن الموظف بيتحمل شغل فوق طاقته الطبيعية ف مش بيقدر يطلع احسن حاجة عنده بالتالي في ضعف في الاداء.
تمام كدا؟
نروح للنقطة التانية..
🛑 ايجاد الحلول:
نبدأ مرحلة من العصف الذهني بنفكر ف حلول و حلول بديلة،
لأن كل ما كان عندي افكار بنقلل مخاطر فشل تنفيذ الفكرة،
عشان بيكون عندنا بدايل.
وبنبتدي نحدد ايه افضل حل وبيدينا أعلى كفاءة .
🛑 تنفيذ الخطة :
بعد تقييم الحلول وايجاد احسن حل، تبدأ التنفيذ ومتابعة الخطة وخطواتها مع فريق العمل وضمان تنفيذها بفاعلية ودقة.
ف النهاية ركز دايما مع تحديد المشكلة وحاول تاخد خطوة إيجابية عشان تحلها بطريقة صحيحة.
