10/10/2023
5
بقلم : د. كريمان السبع
اخصائي الجودة و الاعتماد
احد خريجي الدفعة الذهبية من دبلوم من جامعة بدر
ايه بأة موضوع #المعايير ده ؟
يعني ايه معيار ؟
و ايه أهميته ؟
و بنطبقه ازاي ؟
اتكلمنا البوستات اللي فاتت عن الاعتماد و عن التسجيل و قلنا أنهم وسيلة المستشفيات بتقدر من خلالها تنضم لمنظومة التأمين الصحي الشامل و فهمنا النظام ماشي ازاي ..
طيب يلا بينا نطبق النظام ...و يلا نفهم المعايير ...
#المعيار مبدأيا هو أحد متطلبات القيام بعملية ما بطريقة ما بحيث تحقق هدف ما ..
فهمتوا حاجة ؟ 😅
نقولها بطريقة تانية ..
انا عندي معينة بأقوم بيها في شغلي .. ال دي علشان تحقق هدف أو نتيجة معينة محتاجة يوضع لها متطلبات معينة على الأقل علشان تحصل بشكل صحيح من اول مرة و كل مرة ...
التعريف ده سمعناه فين قبل كدة ... بالظبط ده تعريف الجودة ..
** ان تفعل الشيء الصحيح من اول مرة و كل مرة **
يبقى المعيار هنا minimum requirement لل process بتاعتي داخل المستشفى هاجتهد و اعمله علشان أوحد الشغل على مستوى كل الاقسام و اضمن اني اقدر احقق المطلوب بالشكل الصحيح و كمان اقدر اقيسه بشكل سهل و امنع حدوث أي خطأ لا قدر الله أثناء القيام بيه
** مثال ... المريض اللي دخل المستشفى و انا خايف عليه من مشاكل قرح الفراش .. المعيار قال لي اني لازم أقيم حالة جلده وقت دخوله المستشفى و أعيد تقييم جلده تاني أثناء إقامته في المستشفى علشان اتأكد أنه مش معرض لقرح الفراش و كمان لو لقيت أنه في خطر الإصابة بيها هأقوم بعمل احتياطات ضرورية تساهم في منع قرح الفراش و هادرب فريقي الطبي على طرق التقييم و الوقاية و كمان هاعلم المريض و أهله معلومات عن طرق الوقاية دي و اشركهم معايا في العناية بالمريض ... يبقى المعيار هنا طلب ايه ؟ تقييم .. احتياطات .. و تدريب و تثقيف للمريض ... دي هيا ال minimum requirements
المعيار ما قالش طريقة معينة للتقييم ولا حدد الاحتياطات ولا قال لنا طريقة تثقيف المريض .. لكن طلب مننا نتبع ال guidelines اللي تتناسب مع امكانياتنا و تتبناها المستشفى
يبقى المعيار بيرسم لنا الخطوط العريضة و يسيب لنا التفاصيل نكملها..
في معايير جهار كان تصميم المعايير متميز بشكل كبير لأنه مش بس ذكر أدلة تطابق المعيار اللي بنلتزم بيها لكن كمان عرفنا بشكل كبير مع كل معيار سبب اهتمامنا بالمعيار ده و الغرض منه و أعطى في بعض المعايير تفاصيل عن طريقة التطبيق .. خلينا نتكلم اكتر عن المعايير و طريقة كتابتها المرة الجاية
أتمنى اني اكون أضفت معلومة مفيدة
