حضانة أحباب الله

هو عادي ابني يعيط في الحضانه

لازم تفهمي الطفل حاسس بإيه:
١_ البيئة المحيطة بيه كلها فجأة اتغيرت ( الوان واشكال ومعلمين وقواعد ونظام وروائح وأطفال وأصوات )
كل مدركاته الحسية في بيته اللي متعود عليها مش موجودة.

٢_ مصدر أمانه بابا وماما مش موجودين.

٣_ الذهاب للحضانة والفصل عن الأم والأب تعتبر ثاني صدمة في حياة الطفل من بعد الفطام وحرمان أمه ليه من غذاءه المفضل .

بناء على ذلك الطفل يبكي اولى الأيام وممكن الأسابيع الأولى والأطفال نفسهم طويل جدا وممكن يكون عنيد وعايز ينفذ اللي في دماغه ومصمم ميروحش ويطول في نوبات البكاء والغضب

وممكن أما يرجع البيت تلاقيه يعمل سلوكيات تعبر عن غضبه يضربك أو يكسر العاب مثلا.

طب والحل :

١_ قبل ما تسلميه تحضنيه جامد وتبوسيه

٢_ ممكن تبعتي معاه لعبته المفضلة ، أو دبدوب ، أو مخدة صغيره حاجة تتطمنه وتعمله ربط بين البيئة اللي متعود عليها والبيئة الجديدة.

٣_ المفروض إنه هناك حيشتغل في أنشطة كثيرة وتنمية مهارات ولعب ده حيساعده على الاندماج.

٤_ حتستلميه بأحضان وتقدميله حلويات وهدايا وتعرفيه إن الميس قالتلك إنه شطور وجميل ومش بيعيط كتير .
وفي البيت قدام بابا تقولي الميس النهاردة يا بابا قالت كذا وكذا ونشجعه.

٥_ اللانش بوكس حطي في اكلاته المفضلة وياريت نبعد عن المقليات والسكريات الكتير عشان ده بعد مرور ساعة من تناوله بيسبب هبوط وشعور بحزن واحنا محتاجين نشاط وصحة وتركيز.

٦_ انصحك متقعديهوش من الحضانة لأنها حتعلمه مهارات كتير مش حتقدميهاله في البيت تنمية إدراكه البصري والحسي وتحسين مهارات التواصل
#الحضانة

ياريت تقولنا يا دكتور سن ثلاث سنوات ونصف يبدأ يمسك قلم دا سن كى جى ونبدء معاه ازاى ولو بيشخبط مش بيكتب

🎯 أولًا: هل سن ٣ سنوات ونصف مناسب لمسك القلم 🤔

نعم ✅، الطفل في سن ٣.٥ سنوات بيكون في مرحلة:
▪️تحسين مهارات اليد الدقيقة (fine motor skills)
▪️تطوير التحكم في العضلات الصغيرة لليد والأصابع
لكن:
▪️لا نتوقع منه إنه "يكتب حروف" صح في السن ده، بل نبدأ بـ التمهيد للكتابة.

🧠 المرحلة المناسبة دي اسمها: مرحلة ما قبل الكتابة (Pre-writing stage)
وهي الأساس قبل ما ندخل على الحروف والكتابة الفعلية في كي جي 1

✋ طيب إمتى نبدأ نعلمه يمسك القلم صح 🤔

في سن ٣.٥ سنوات:
الطفل المفروض يقدر يمسك القلم بمسكه ثلاثية (Tripod grasp) أو يكون في الطريق ليها.
ولو لسه بيشخبط 👈 ده طبيعي، بس محتاج تدريب بالتدريج.

✏️ إزاي أبدأ معاه؟ (خطة مبسطة):

✅ 1. نمسك القلم بطريقة ممتعة:
▪️استخدمي أقلام شمع سميكة أو أقلام مثلثة الشكل، لأنها أسهل في المسكة.
▪️خليه يختار لونه المفضل.

✅ 2. خليه يبدأ بـ:

▪️التوصيل بين نقطتين أو خطين
▪️تتبع خط مستقيم، وبعدين مائل، وبعدين منحني
▪️تلوين داخل أشكال بسيطة (دائرة – مربع – تفاحة)

🎨 كل ده يعتبر تدريب عضلي لليد!

✅ 3. ألعاب تقوي عضلات اليد قبل الكتابة:

▪️اللعب بـ المعجون (Play dough)
▪️غلق وفتح المشابك أو السستة
▪️استخدام المقص الآمن للأطفال
▪️التقاط خرز بالأصابع أو الملقاط
▪️فتح وغلق الأغطية

✅ 4. ارسمي له "أنشطة ما قبل الكتابة":

▪️خطوط رأسية
▪️خطوط أفقية
▪️خطوط مائلة
▪️دوائر
▪️تكرار أشكال بسيطة

✍️ ارسميها على ورق كبير بالألوان وخليه يقلدك.

⚠️ لو الطفل بيشخبط بس ويرفض يكتب:
▪️ما تعنفيهوش ولا تضغطي عليه
▪️حوّليها لعبة مرحة: (هنعمل سباق مين يوصل للنقطة – نلون مع بعض – نطفي النار بالمية "اللون الأزرق"...)
▪️شجعيه بكلمات إيجابية: "شاطر قوي.. ده شبه الشمس برافو عليك!"

🧒 إزاي نعرف إنه جاهز يدخل كي جي 1 🤔
يكون الطفل قادر على:
▪️يمسك القلم بمسكه شبه صحيحة
▪️يقلد خطوط بسيطة (خط، دائرة، خط مائل)
▪️يلون داخل الشكل
▪️يجلس ٥–١٠ دقايق في نشاط بدون ملل

🔥 ملحوظة
✅ عند ٣ – ٣.٥ سنة 👈 إمساك القلم والتلوين والخطوط خطوط – تلوين – معجون
✅ ٤ سنوات 👈 تقليد أشكال الحروف – التتبع التوصيل والتكرار
✅ ٥ سنوات 👈 كتابة الحروف باليد كتابة الحروف والأرقام

📌 طب ممكن نبدأ من قبل ٣ سنين ونص 🤔

✅ نعم، ممكن نبدأ قبل ٣ سنين ونص – لكن بشروط معينة وبتدريج مناسب لعمر الطفل 👶✍️

🧠 الهدف في المرحلة من سنتين إلى ٣ سنين مش "الكتابة"
لكن:
▪️ تجهيز عضلات اليد
▪️ تعويد الطفل على الإمساك بالأدوات
▪️ تطوير التركيز والانتباه

🎯 من إمتى نبدأ بالظبط 🤔

👈 من عمر سنتين ونص ممكن تبدأي:
▪️أنشطة ما قبل الكتابة (Pre-writing activities)
▪️إمساك الألوان السميكة والتلوين والشخبطة
▪️تقوية عضلات اليد

✅ أنشطة مناسبة قبل سن ٣ سنوات:
✨ ١. اللعب بالمعجون (Play dough)
▪️يعجنه، يقطعه، يكوّره
▪️بيقوي صوابع الإيد وبيحبوه الأطفال جدًا

✨ ٢. التلوين الحر
▪️بالأصابع – أقلام شمع كبيرة – ألوان مائية
▪️يلون في مساحة كبيرة مش لازم يلتزم بشيء

✨ ٣. ملء وتفريغ الحبوب أو المكرونة
▪️بكوب أو ملعقة أو صوابع
▪️ممكن تستخدمي أطباق صغيرة للفرز حسب اللون أو الحجم

✨ ٤. اللعب بـ المشابك – السوستة – الأزرار

✨ ٥. التوصيل بين نقطتين أو بين صورة وصورتها

🖍️ أدوات يفضل استخدامها في السن الصغير:

▪️أقلام سميكة مخصصة لليد الصغيرة
▪️ألوان الأصابع
▪️أقلام مثلثة (تساعد على المسكة الصحيحة من بدري)

⚠️ ملاحظات مهمة:

▪️الطفل في المرحلة دي مش مطلوب منه يكتب أي حرف
▪️ممنوع الضغط أو المقارنة مع غيره
▪️الأنشطة تكون مرحة وقصيرة (٥ دقايق كفاية ف البداية)

معا لصحة افضل لأطفالنا

ازاى اعاقب طفل من سن سنتين الى سن ٣ سنوات 🤔

📌 من سن ٢ ل ٣ سنين 👈 السن الصعب الممتنع 👌

1️⃣ في السن ده بيبتدي الطفل يكتشف انه مش محور الكون و هيفهم ان الناس اللي حواليه متخلقوش بس عشان يلبوا ليه طلباته و رغباته و هيصطدم بإن في معوقات كتير تحول دون تنفيذ الكتير من رغباته .. باختصار هيبتدي يتعرض لأول احباطات frustrations في حياته ... وكمان نضيف على ده ان لسه حصيلته اللغوية لسه مش مساعداه انه يعبر عن المشاعر الكتير اللي بيحس بيها او انه يتفاوض للحصول على اللي عايزه
بسبب ده بيحصل حاجتين مزعجين و بيضايقوا الاهل جدا:

اولا: أطفال كتير بيدخلوا في نوبات صراخ و عصبية (tantrums) وتلاقيه بيرمي نفسه على الارض و يرفس و يصرخ و يتشحتف بهيستيريا
ثانيا: في احيان كتير بيستخدم العنف كوسيلة من وسائل التواصل مع الغير لانه زي ما قولنا يفتقد لوسائل التفاوض الاخرى زي استخدام اللغة للمنطق و الإقناع ،، فيبتدي يضرب و يعض و يشد

عشان الحاجتين دول .. كتير من الآباء و الأمهات في السن ده بيكتئبوا و يحسوا انهم مش عارفين يتعاملوا مع ولادهم و ان طريقتهم غلط .. احب اطمنهم ان السلوكيات دي لو حصلت في السن ده بنعتبرها جزء من التطور طبيعي .. اهم حاجة نعرف نتعامل معاها ازاي عشان متكملش معانا لبعد كده

دورك كأب أو أم:

أولا: ممنوع منعا باتا ان نرد الضرب بالضرب .. كده هيتعلم انها فعلا وسيلة من وسائل التواصل و التفاهم بين البشر .. مينفعش .. كل اللي هنعمله ان هنمسك ايده و نمنعه انه يضربنا

ثانيا: لو الطفل دخل في نوبات من دي و رمى نفسه على الارض .. الحل هنا هيكون التجاهل التام .. مفيش رد فعل لا بالسلب ولا بالإيجاب .. استجابتنا بأي طريقة معناها بالنسبة ليه انه نجح يضغط علينا او يلفت انتباهنا بتصرفه ده وبكده الموضوع ده هيكرره تاني و تالت .. مدام مش خايفيين ان الطفل يؤذي نفسه لازم نتجاهله خالص .. ((طبعا مش محتاجين نقول ان احنا اكيد مش هننفذ اللي هو طلبه))

2️⃣ الطفل ((عند سنتين و نص تقريبا)) هيبتدي يفهم كويس المشاعر و يكتسب حاسة التعاطف مع الآخرين.

دورك: هنستخدم ده في تقويم الطفل و توجيهه .. هنزعل منه لما يعمل غلط و هنبين ده ،، هنشجعه و نفرح بيه لما يعمل الصح

3️⃣ الطفل هيبتدي يفهم الجمل البسيطة و برضو هيفهم ان في عواقب لأفعاله .. و ان في العلاقة بين ((السبب)) و ((النتيجة)) cause & effect

دورك:
بدل ما كنا بنستخدم الكلمة الواحده او الكلمتين في التوجيه في السن الاصغر من كدا .. هنبتدي نشرح بطريقة مبسطة ليه اللي عملناه ده غلط .. و بطريقة مبسطة معناها سبب واحد و نتيجة واحده .. بمعنى (( انت رميت اللعبة .. مش هتلعب بيها تاني)) .. مينفعش احاول اشرح انك لو رميت اللعبة ممكن تتكسر ولو فضلت تكسر لعبك الفلوس هتخلص و بابا هيزعل و مش هيرضى هيجيب تاني ومش هيكون عندك لعب !! مش هيفهم ابدا المنطق المركب في السن ده !! خدوا بالكم .. keep it simple..... و برضو هنبتدي نحط قواعد و ليسته بسيطة للحاجات الممنوعة و المسموحة و اللي تستوجب العقاب او المكافئة

4️⃣ طريقة تشتيت الانتباه ما زالت مؤثرة و بتجيب نتيجة كويسة و هنفضل نستخدمها

الخلاصة: في السن ده ،، الطفل ابتدى يواجه الواقع ،، بس لسه مش راضي ولا مقتنع بيه ،، مش بيعرف يعبر عن نفسه كويس ،، هنلاقيه ممكن ابتدى يبقى عصبي و احيانا عنيف ،، مش معنى ده انكم فشلتوا في تربيته او بتربوه غلط اطلاقا !! .
فهمه هيزيد شوية فنقدر نشرح له الغلط بطريقة بسيطة ونحاول نعوده يلتزم ببعض القواعد البسيطة ،،

معا لصحة أفضل لأطفالنا

ازاي تتصرفي صح لو طفلك اضرب ف المدرسة

⛄⛄ابني بينضرب في المدرسة ،،
⛄⛄بنتي زميلتها ضربتها في التمرين .
⛲⛲🚩.ايه الرد الامثل ؟
💪💪 يا ترى اخليه يضربه ؟
👺👺يروح يقول للمدرسة؟
👣👣يسيبه و يمشي ؟

⭕اولا: قبل ما نرد على الاسئلة دي ،، لازم نعرف حاجة عن نفسية الطفل المعتدي (the bully) و ايه اللي بيدفعه يختار ابنك او بنتك بالذات دونا عن باقي الاطفال عشان يكون ضحيته (the bullies) .. الحقيقة ان الطفل المعتدي غالبا ما بيعمل كده عشان يفرغ شحنة عنف جواه غالبا اكتسبها بسبب ان هو نفسه اتعرض لعنف جسدي من آباؤه او اخواته او جيرانه ،، او عنف معنوي زي الاهانات او الاهمال الاسري . الطفل ده بيحتاج يفرغ الشحنة دي بأسهل الطرق الممكنة فدائما و ابدا بيختار الطفل المسالم اللي عارف ان هو مش هيعرف يرد عليه او يواجهه و يا سلام كمان لو هو حاسس ان الطفل ده اشطر منه او اكتر تلقيا للاهتمام و الاشاده منه سواء من المدرسة او الاباء .. ده هيكون هو ضحيته المثالية (Ideal victim)

💥💥💥⭕طيب ايه الحل ؟!
❌طبعا مش الحل ان احنا نخلي ولادنا اقل شطارة او منهتمش بيهم ..
✔✅الحل ان المعتدي ده يكون عارف ان ابنك او بنتك مش صيد سهل و ان تعديه عليه لازم يتبعه عواقب ..ساعتها ده هيردعه عن انه يفكر في كده .. هو عايز يطلع شحنه جواه مش عايز يزودها ..

💥💥💥⭕يعني قصدك اقول لابني يرد عليه و يضربه ؟! مش دي تبقى همجية ؟!!
🚥🚥🚥بصي يا ستي .. لا مش همجية ولا حاجة ،،، واصلا موضوع روح قول للميس ده اسوء حاجة ممكن تعمليها لسببين:
⭕اولا: انتي كده من وجهة نظره بترفضي مساعدته بعد ما لجأ ليكي و بتحوليه على حد تاني و مع مرور الوقت و تقدم العمر حتى المساعدة دي مش هيطلبها منك و هيروح يدور عليها عند حد تاني اللي بالتأكيد مش هيكون حريص عليه زيك
⭕ثانيا: حتى الشخص اللي وجهتيه ليه لا حول ولا قوة ليه و غالبا مش هيلاقي عنده الحل ،، لان لو كان بالقوة الكافية كان شكل رادع الطفل المعتدي من الاول و الضرب ده محصلش من اساسه..

💥💥💥⭕يعني اقول لابني روح اجري اضربه ؟ انا عايز اشوف دم ؟!!
❎لا مش كده .. الموضوع لازم يمشي بالطريقة دي و تعلمي لابنك الخطوات دي:
🔘ا) تعلمي ابنك يواجهه بكل حزم و يقوله انا مش هسمحلك تضربني او تضايقني انا بحذرك .. بصوت عالي كل اللي حواليه يسمعه .. ٥٠٪ من الحالات الاعتداء بيقف عند النقطة دي و كمان مش بيتكرر تاني ،، المعتدي بيحس ان اللي قدامه مش صيد سهل
🔘٢) المعتدي كمل ؟! يمسك ايده و يزقه بعيد و يعيد عليه نفس الجملة .. نادرا ما بيكمل المعتدي بعد كده
🔘٣) المعتدي كمل ؟! لازم ابنك او بنتك في الحالة دي يرد الضرب ،،

♿♿♿طيب انت ابني ضعيف جسمانيا و مش هيقدر عليه كده هينضرب و يتإذي جامد ؟!!!
❌❌لا ،، مش هيتإذي جامد ولا حاجة ليه ؟!!

🚩اولا: الضرب ليه تأثيرين على المضروب .. تأثير جسدي (physical) و ده مؤقت و محدود و جسم الانسان مخلوق عنده القدرة على احتماله و كمان التعافي منه.. والتاني تأثير معنوي (emotional) وده بقى اساس المشكلة و تاثيره بيطول و الطفل بيفضل فاكره حتى ولو بعد ٢٠ سنة وممكن يدمر نفسية الطفل حرفيا و يخلق كائن غير واثق في نفسه او عنيف تجاه نفسه او الاخرين ،،
لما طفلك يرد الضرب .. هيتأثر جسمانيا لبعض الوقت ممكن ،، بس هيحس بقيمة نفسه و هيحس بقدرته على الدفاع عن نفسه و التأثير المعنوي هيكون محدود جدا و الطفل هينساه ،،
((على فكره انت ممكن تضرب ابنك بهزار و يضحك و ممكن يعيط و يتألم لضربة اخف و اقل الما بكتير لو عارف انك بتضربه بجد و خصوصا لو قدام حد)).

🚩ثانيا : الطفل المعتدي هيفكر بدل المرة الف قبل ما يحاول يضايق ابنك تاني لانه عرف انه مش ضحيه سهلة و فعله ده مش هيمر بسلام

🚩ثالثا: في حاجات نعملها ممكن تساعد ولادنا في المواقف اللي زي دي .. زي لعب الرياضة مثلا ((مش لازم رياضة قتالية او عنيفة على فكرة)) الرياضة عموما بجانب انها بتبني جسم طفلك هي كمان بتبني نفسيته و بتخليه يحس بقوته و تزرع الثقة في نفسه و جسمه و تخليه مهيأ لمواجهة مواقف زي.

🔎🔎🔎و اخيرا،، باقي واجبنا اننا نتابع اطفالنا كويس ،، نحسسهم ان احنا جنبهم وفي ضهرهم ،، نشوف بيصاحبوا مين و بيلعبوا مع مين و نبقى متأكدين ان صحابهم متوافقين معاهم نفسيا و متكافئين معاهم دراسيا و مجتمعيا
نبعدهم عن الاطفال اللي نحس ان عندهم ميل للعنف او اللي ظروفهم الاجتماعية ممكن تدفعهم لكده و نقلل احتكاك ولادنا بيهم قدر الامكان ((لان برضو المعتدي في الغالب بيختار حد هو عارفه كويس و متوقع رد فعله و بيبعد عن المجهول ليه))

Cpd

معا لصحة افضل لأطفالنا