23/08/2026
مش بمزاجنا والله.
المدرس مش بمزاجه والله. بص. هافهمهالك. مطلوب منك ٥٠ عيل تاخد غيابهم ف ورقة غياب الفصل وبعدين دفتر المدرسة وبعدين دفتر الانضباط بتاعك وبعدين تكتب كلمتين ع السبورة عشان العيال لازم تكتب ف الكراسات وبعدين تصحح ٥٠ كراسة ومضطر تكتب إجابة سؤال من بتوع الكتاب عشان العيال تحله ف الكتاب وتصحح ٥٠ كتاب وبعدين تعمل تقييم انت شخصيا عارف ان العيال معاهم إجابته من ع النت وبعدين صحح ٥٠ كراسة تقييم وارصدهم ف دفتر الدرجات وارصد معاهم درجات المواظبة والشفوي والحبشتكنات والمشنخرات والمجنزرات ودا كل المطلوب منك من قبل الوزارة لأن دا ال بتتحاسب عليه وجزا ف جزا اتنقل عقابي منطقة نائية. الوزارة نفسها مش عاوزة شرح. مفيش موجه ولا وكيل وزارة بيدخل يشوفك بتشرح والا بتعمل ايه. بيمسكوا دفتر التحضير ودفتر الدرجات وكراسات العيال والتقييمات والكتب عشان يشوفك حاطط تكه حمرا وراصد درجات والا لا. قولي لو انت مكان المدرس هاتعمل ايه ؟ تاخد جزا ظلم والا تربط الحمار مطرح ما صاحبه عاوز ؟
تعالى عند المرتبات.
أما تكون الوزارة بتديك يوم ما تكون خلاص ف اخر السلم الوظيفي ٩٠٠٠ جنيه وهما عارفين كويس أن أقل بيت محتاج ١٥٠٠٠ ع الأقل عشان يكمل الشهر. هاتعيش ازاي ؟
أما تكون مرتبك الأقل ف الدولة ومع كامل احترامي لعامل الكهربا أو البترول أو فراش البنك كل دا بياخد اكتر منك تعمل ايه ؟
أما تكون بتاخد من ٢٠١٤ مرتب وحوافز على نفس الأساسي ف حين كل سنة الخصومات تتحسب على السنة الجديدة يعني بتقبض على ٢٠١٤ وبيتخصم منك على ٢٠٢٦ 😲😲😲دي سابقة يا افندم التاريخ ما جابش ولا هايجيب زيها ابدا.
الناس ال فاكرة الدروس دي حلاوة بالموز لا يا حضرات. دا بني ادم بيوقف على رجله ٦ ساعات كاملة ف المدرسة وزيهم ف دروس مبيعملش حاجه غير أنه عمال يهاتي ويخر ميه من كل حته ! بس عشان يعرف يعيش عياله ويعلمهم ويجهز بناته ! حضراتكم عارفين انكم بتوقفوا على رجليكم كطالبين الخدمة ومقدم الخدمة قاعد على مكتب ف كل مصلحة حكومية ما عدا المدارس. طالب الخدمة قاعد ومقدم الخدمة واقف.
عشان يعرف يجيب علاجه لانكم عارفين كويس التأمين عامل ازاي.
انسان بيتعامل واقف على رجله مع ٥٠ عيل ف كل فصل من ٥٠ بيئة مختلفة بلاش اقول أغلبهم عامل ازاي ومش قصدي البيئة المادية والاجتماعية.
انسان بتقوله اقف على رجلك من ٩ الصبح ل ٤ العصر راقب ف امتحانات النقل وبعدها اقعد صحح ل ١١ و ١٢ بالليل وع الحال دا كام يوم وف الاخر هتاخد ٣٤٠٠ جنيه مكافأة. !!!!
انسان بتقوله اتعرض للتهديد والبلطجة و الاهانة والبهدلة وحتى الدولة مش بتوفرلك حماية وانت رايح وراجع من امتحانات الشهادات ف أماكن بعيدة عندك واطلع من ٣ الصبح اركب مواصلات وروح بيتك بعد المغرب عشان تاخد ف نهاية الإعدادية ٤٠٠ جنيه دا بعد ما كانت السنة ال فاتت ١٣٠ جنيه ونهاية الثانوية ٨٠٠ جنيه ودا كله بعد كام شهر. !
انتوا ماسكين ف المدرسين تقطيع وانتو مش فاهمين حاجة.
المدرسين مش الباشوات ال بتشوفوهم بعربيات مصفحة وبودي جاردات ف السناتر ال بيقعد فيها ٥٠٠ و ١٠٠٠ طالب والمدرس يشتغل حصتين ويروح ب ٥٠ الف جنيه ! مش كل المدرسيين بشوات 😬
