مريم غبريال -Mariam Ghobrial

سعيدة جداً بدعوتي للمشاركة في يوم صحي مميز يجمع بين التغذية العلاجية والصحة النفسية برعاية شركة جراند إيجيبت فارم.

هكون موجودة بنعمة لتقديم تقييم نفسي واستشارات تربوية ودعم للحالات المحتاجة توجيه نفسي وأسري.
لو أنتِ أو طفلك محتاجين دعم نفسي أو صحي… الفرصة دي ليكم

يوم الاتنين 4/ 5 من 12 لـ 5 مساءاً
الحضور والخدمات مجاناً

📩 اللي مهتم يحضر يكتب مهتم وهبعتله كل التفاصيل والعنوان.

اللقاء الأقرب لقلبي ❤️ ❤️
شكراً من كل قلبي لكل أم كانت موجودة…
وجودكم بيفرح ❤️❤️❤️


#امهات

الخطية تُلوَّث وتُضيَّق وتُغيَّب العقل👌

مفيش مجهود صادق بيضيع ومفيش إنسان بيحاول بجد وبيفضل واقف مكانه.
يمكن الطريق يطول يمكن النتيجة تتأخر يمكن تتعب وتحس إن تعبك مش باين بس كل خطوة بتاخدها كل مرة قومت بعد وقعك كل محاولة عملتها وإنت مرهق بتتبني بيها نسخة أقوى منك.
الفشل الحقيقي مش إنك تقع... الفشل الحقيقي إنك تبطل سعي.
في ناس نجحت مش لأنها الأذكى لكن لأنها ما استسلمتش.
وفي ناس وصلت فقط لأنها كملت يوم زيادة بعد ما الكل وقف.
فلو حاسس إنك متأخر…كمّل.
ولو حاسس إنك تعبت…كمّل.
ولو حاسس إن مفيش نتيجة…كمّل.
أوقات أعظم الأبواب بتتفتح بعد آخر محاولة كنت ناوي تسيب بعدها.
اسعي وحارب وثق أن تعبك له وقت وهيبان.

في اخر اليوم…
يارب ريح قلوبنا من كل خوف وشيل من دماغنا كل تفكير تعبنا.
طمن قلوبنا واهدي روحنا واملأنا سلام وراحة.
هونها علينا واجبر خاطرنا.
امين🙏🙏

‏تأكّد أنه متصل قبل أن تبدأ بالكلام.

"الرَّبُّ يُقَاتِلُ عَنْكُمْ وَأَنْتُمْ تَصْمُتُونَ"
(خر 14: 14)
آية تريح القلب جداً خصوصاً لما تتظلم ولما تتجرح ولما تبقى مش عارف تشرح اللي جواك.
في مواقف كتير بنكون عايزين نتكلم نبرر ندافع عن نفسنا ونثبت إننا مش غلط لكن أوقات أقوى رد فعل هو الصمت وهنا مش صمت ضعف لكن صمت ثقة ...ثقة إن ربنا شايف وفاهم وعارف الحقيقة كاملة حتى لو الناس فهمت غلط.
في ناس تعبت من كتر ما حاولت توضح نفسها ومن كتر ما دخلت معارك بتستنزف روحها لكن الحقيقة مش كل معركة تستاهل تدخلها ومش كل إساءة تستحق رد ومش كل ظلم محتاج منك حرب في حقوق ربنا قادر يرجعها وفي كرامة ربنا قادر يرفعها

لما ربنا قال "الرَّبُّ يُقَاتِلُ عَنْكُمْ"
يعني في معارك أنت مش مطالب تخوضها.
معارك تشويه وظلم وافتراء وقلوب خبيثة دي سيبها لصاحب العدل.

"وَأَنْتُمْ تَصْمُتُونَ"
يعني ريّح قلبك وابعد عن الجدال اللي بيوجعك.
ما تستهلكش نفسك في إثبات شيء لناس قررت ما تفهمش.
في أوقات الصمت مش هزيمة الصمت احترام لنفسك وثقة في ربنا ويقين إن الحقيقة لها وقت تظهر.
فلو في وجع جواك ولو في حق ضاع ولو في حد ظلمك…اهدأ.
اللي شاف دمعتك مش هيسيب حقك.
اطمن ربنا ساعات بيشتغل في صمت لكن لما يدافع ما بيسيبش حاجة ناقصة.

أغلى حد ممكن تقابله هو الشخص الحنين.
لأن الحنية بقت نادرة والقلوب اللي تعرف تحتوي بقت قليلة.
الحنين بيطمنك من غير ما يوعدك ويخليك ترتاح له من غير ما تبذل مجهود.
وجوده هادي وكلامه مريح وقربه أمان.
الحنين بيعرف يختار كلامه وما يجرحش ما يكسرش بخاطر حد وما يستقواش على حد ضعيف.
ولو حس إنه زعل حد ما يكابرش ولا يختفي بل بالعكس بيبادر و يعتذر ويجبر الخاطر بسرعة.
الحنين بيسأل على أهله وأصحابه والناس اللي بيحبهم حتي لو مشغول حتى لو محدش سأل عليه .
لأن الاهتمام عنده طبع مش رد فعل.
الحنين بيحس وبيفهم الزعل من السكوت وبيشوف التعب من نظرة ويعرف إمتى يحتوي من غير كلام.
وحتى وقت الخلاف بيفضل محترم وبيفضل راقي وبيفضل إنسان.
ما بيهينش وما يعاقبش بالقسوة وما يستخدمش الوجع كسلاح.
الحنين مش شخص ضعيف الحنين شخص نضيف.
نضيف القلب نضيف النية ونادر الوجود.
لو ربنا رزقك بحد حنين حافظ عليه.
لأن الدنيا مليانة ناس عادية لكن قليل جدا اللي قلبه رحيم.

يا الله في هذا المساء
احفظ قلوبنا من كل خوف ومن كل قلق ومن كل توتر.
املأ قلوبنا سلام وأمان وطمأنينة واستقرار يريح النفس.
هون علينا وما في داخلنا وارزقنا ليلة هادية وقلب مطمن بيك.
امين 🙏❤️

من أجمل أسرار الحياة إن الامتنان بيولد امتنان.
كل تشكر ربنا على اللي عندك كل لما تكتشف نعم أكتر.
ولما تقدّر الناس اللي حواليك تلاقي قلوبهم بتتفتحلك وبتقدرك اكتر.
ولما تفرح بالحاجة البسيطة الحياة تبعتلك أسباب تفرح أكتر.

في ناس فاكرة إن الامتنان مجرد كلمة شكراً لكن الحقيقة إنه أسلوب حياة.
إنك تصحى شايف النعمة بدل ما تفضل مركز في الناقص.
إنك تبص للي موجود بدل ما تحرق قلبك على اللي مش موجود.
إنك تحس بقيمة الصحة والستر والأمان والناس الطيبة قبل ما يتحولوا لذكريات.
الإنسان الممتن قلبه أهدى و روحه أخف وعيونه بتشوف الجمال أسرع من غيره.

جرب النهاردة تبدأ يومك بكلمة يارب شكراً على حاجات كتير يمكن واخدها عادي وغيرك بيتمنى جزء منها.
اشكر هتلاقي نفسك أغنى من ناس معاها كتير ومش حاسة.
اشكر لأن الامتنان لما يدخل القلب بيفتح أبواب رزق وفرح وسلام.
صباح الامتنان وصباح القلوب اللي شايفة النعمة

قلبك الابيض ده عداني 🥰❤️
دودو

Send a message to learn more

اللي يعرفني كويس يعرف إن يوم الاتنين من أصعب أيام الأسبوع بالنسبالي.
يوم طويل جداً من 9 الصبح ل10 بليل شغل متواصل.
جلسات وناس وحكايات ومشاعر وتفاصيل كتير جداً…
كل حالة داخلة شايلة وجع، وكل أم داخلة شايلة هم، وكل طفل وراه قصة.
بصراحة لغايت آخر اليوم ببقى مرهقة جداً جسدياً ونفسياً وعقلياً.

لكن الغريب إن على قد ما اليوم بيكون تقيل على قد ما بخرج منه وأنا قلبي مليان لأن وسط كم التعب ده كله بشوف إيد ربنا بوضوح جداً.
بشوفه في أم جاية بعد سنين انتظار شايلة هم ابنها وتعبانة ومع ذلك لسه بتحاول بكل حب.
بشوفه في أم بسيطة جداً وامكانياتها شبه معدومة لكن قلبها كبير وجاية تتعلم علشان تنقذ ابنها.
بشوفه في أم منهارة من الضغط لكن أول ما حد يسمعها، ترجع تقوم تاني.
وبشوفه في طفل صغير داخل الجلسة متلخبط أو خايف، ويخرج بابتسامة ترد الروح.

النهاردة وأنا بين حالة وحالة حسيت قد إيه كل واحد فينا شايل حاجة محدش شايفها.
وإننا أوقات بنقابل ناس شكلهم عادي جداً لكن جواهم معارك كاملة.

فلو في حد بيقرأ الكلام ده دلوقتي وتعبان
أحب أقولك بكل أمانة اني شوفت النهاردة ناس شايلة أكتر مما تتخيل ولسه واقفة.
وشوفت قلوب مكسورة ولسه بتحاول.
وشوفت أمهات تعبانة جداً ولسه بتجري عشان ولادها.
وشوفت اولاد مضغوطين من اهاليهم ومع ذلك ثابتين ومتفهمين ومقدرين اهاليهم.
فما تستهونش بنفسك ولا باللي بتعمله كل يوم.
يمكن تعبك مش متشاف من الناس لكن ربنا شايفه كله.
ويمكن إنت حاسس إنك بتغرق لكن الحقيقة إنك لسه بتقاوم، ودي بطولة لوحدها.

النهاردة اتعلمت من كل شخص دخلي
إن الإنسان أقوى مما يظن وإن الرحمة كلمة قليلة على اللي الناس شايلاه جواها.
ربنا يهون عن كل قلب تعبان ويطبطب على كل حد بيحاول في صمت.