Use Your Mind

https://youtube.com/channel/UCkfUdvUF-rPHvkYLwWKpXhw
https://instagram.com/yallabina2021?utm_medium=copy_link
https://www.facebook.com/profile.php?id=100067364882267

كان عندك كم سنة لما عرفت إن الصورة دي تبقى لإله الهندوس كريشنا وهو صغير؟!

الصورة دي لها تاريخ، كانت متعلقة في صالون بيتكم أو بيت حد من قرايبكم، وامتد انتشارها عشان تقابلها في صالونات الحلاقة أو محلات العصير، وخصوصًا لأجيال السبعينات والتمانينات، وأغلبنا كان معتقد إنها لحد من قرايبنا مثلًا، وكمان فيه بعضنا اعتقد إنه هو اللي في الصورة بس في زمن تاني..

"كريشنا" دا يعتبر الإله الأعلى في الفيشنوية، وفي طوائف تانية هو مصدر كل الأفاتارت، وهناك قصص كتيرة مختلفة حواليه في الهندوسية، لكنها بتتفق على إنه معلم ومحارب، وبيؤمنوا إن "كريشنا" كان له 16 ألف زوجة، أيوة انت قرأت الرقم صح، هو دا الأمور اللي في الصورة، وأصابه صياد بالخطأ في قدمه ومات بسبب السهم المسمومة..

وله كذا صور تانية وهو صغير برضو غير دي، واحدة وهو قاعد على بقرة وبيعزف على ناي، وواحدة تانية لوشه بس، لكن صورته اللي في البوست دي أشهرهم عندنا كمصريين، واللي اتفتحت له كل البيوت عشان يتصدر مشهد الزينة أو الديكور فيها..

والحقيقة إن وجودة في بيوت المصريين كان أخطر شيء اتعرض له المواطن العادي، اعتمادًا على جهل معظم الناس بالحقيقة، وخاصة فئة سواقين النقل التقيل، اللي كانوا بيتباركوا حرفيًا بيها، ولازقينها على الأبواب بتاعة عربياتهم..

فتخيل الشعب المتدين بطبعه، اللي بيتجمع حوالين لقاء "الشعراوي" بعد كل جمعة، أو حتى بيسمع حديث الروح اللي قبل نشرة 9 مساء كل يوم، واندماجه مع دكتور "مصطفى محمود"، يكون معلق الصورة دي فوق التليفزيون! قمة التضاد يعني..

التأثير الهندي بدأ يقتحم حدود مصر، مع فيلم "سانجام"، اللي تم انتاجه سنة 1964م، ولعب بطولته النجم "راج كابور"، وكان هو أول فيلم يفتتح شاشات مصر أمام أفلام بوليوود..

ووصل التأثير لذروته، مع سلسلة أفلام النجم الهندي "أميتاب باتشان"، وكلنا فاكرين طقوس أيام الأعياد لما بنتجمع ونشوف، "قمر أكبر أنطوني"، و"الشيال" اللي نطق فيه الشهادة، وبعدها طلعت إشاعة إنه أسلم في الفيلم دا، ولسة الإشاعة مستمرة لحد النهارده..

وحتى لأبطال غيره زي فيلم "التوأمان" مثلًا، فقد حققت الأعمال دي انتشار جماهيري ضخم، سواء السينمات أو مع ظهور نوادي الفيديو اللي انتشرت فجأة في نهاية التمانينات ولحد نهاية التسعينات..

نجاح الثقافة الهندية دي، خلى عدد كبير من الموزعين يخصص دور عرض بالقاهرة والإسكندرية، عشان تعرض الأفلام الهندية وبس طول السنة، وفي الفترة دي بدأت تظهر صورة "كريشنا"، وتتم طباعتها وتتوزع على أكشاك الجرايد والمكتبات..

وحققت مبيعات خيالية لأصحابها، لدرجة إن فيه مطابع نزلتها على خلفيات نتايج السنة، والتقويمات، عشان الناس كانت بتجيبها لارتباطها بمشاهد من الأفلام دي، واستمرت أجيال ورا أجيال تقتني الصورة، لحد ما بقت جزء من ديكورات البيوت المصرية، وكنوع من التقليد الأعمى للهنود..

أصل طبيعي يعني، لما احنا كنا مستعدين نضيع يوم العيد كله في فيلم 4 أو 5 ساعات، التليفزيون يخبطه لينا ع القناة التانية يوم العيد بعد العصر، ويخلص الساعة 10 بالليل، وبدون إعلانات، وكنا مقتنعين بالبطل اللي ما بيموتش دا، أنا فاكر "بتشان" في مواجهته لجبار خد بتاع عشرين رصاصة ومكمل عادي..

والكارثة بقى دلوقت إننا بنكرر نفس الهبل دا، ولكن بشكل أكتر من مجرد صورة، لأ، حاليًا غزوة المسلسلات الهندية دي بقت خطيرة فعلًا، بتأثر على الأسرة وخصوصًا الولاد الصغيرين، لأنها بتعرض طقوس دينية هندوسية بالتفصيل الممل، وأغلب الحوارات اللي بتدور بتبقى على نفس الموضوع، وبقينا نلاقي ناس خلفت ومسمية عيالها بأسامي بتتنطق عندهم، وهي لآلهة وثنية أو آفاتارات تبعهم..

كان فيه مسلسل إسمه "الحب من النظرة الثانية" تقريبًا، كان بيتناول أحداث بتعالج الطقس الديني الواحد بكذا حلقة، وصادفت في زيارة لصديق إن ولاده بيتفرجوا على المسلسل، والحلقة بتظهر عبادة إلهة إسمها "دُرْغا"، وبالبحث عنها لقيت معناها "التي لا تقهر أو لا يمكن الوصول إليها"

وإسمها كمان "ما دوركا" يعني الأم "دُرْغا"، وهي الإلهة العليا في الهندوسية، وبتعتبر أم غانيش وساراسواتي ولَكْشْمِيِا لوجوه القوية المحاربة للشياطين، وبتترسم بعشرة أذرع، وبتركب الأسد أو النمر وتحمل أسلحة، وتمثل الطاقة الأنثوية الخلاقة..

الغريب بقى إن صديقي دا بينادي لبنته بإسم "درغا"، أيوة زمبقولكدا، هو لقى البنت متعلقة بالمسلسل فبدأ يدلعها بالإسم اللي بينطقوه، عشان البنت بتنبسط لما يقولها كدا، ودا بيت متعلم يعني، صديقي دكتور أسنان وزوجته صيدلانية، يعني مفيش مستوى علمي وثقافي بعد كدا، فتخيل بقى كدا لو أسقطنا الحال على القاع، المهمشين، الطبقات المطحونة، اللي نصيبهم من التعليم والثقافة يكاد يكون معدوم، هنقابل كوارث والله..

وفي قنوات كتيرة جدًا مخصصة لعرض الهبد الهندوسي دا، وفي مرة كان فيه مسلسل بيعرض طقوس عيد إسمه الديوالي، فيه بيصلوا لإله "لَكْشْمِيِ"، واللي كان بيتكرر ذكره أكثر من 30 مرة بالحلقة الواحدة، فهو اسم معزة مقدسة عندهم..

إلهة المال والحظ في الهندوسية وتبقى زوجة الإله "فيشنو"، وليها برضو أربع أذرع ولونها أبيض، وبتقف على زهرة لوتس ونتغطي بالجواهر، ولها برضو عدة أفاتارات، بيتجوزوا عادة من أفاتارات فيشنو، منهم: سيتا زوجة رامارادها العاشقة، وروكميني الملكة وزوجة كريشنا الأولى، وليلة سودة أوي سعاتك يعني..

والحقيقة دي هجمة بتستهدف الولاد الصغيرين، اللي بيكون عندهم أسئلة وجودية عن الخلق والخالق، ومع غياب رقابة الأسرة وانشغال الأهل بأمور حياتية معقدة، بقى التليفزيون هو الوسيلة المضمونة والمتاحة للإجابة، وعشان نزعزع فطرة الناشئ بأفكار هندوسية دي جريمة دينية بنرتكبها، وكلنا مسئولين عن أولادنا، وبالتأكيد ما ينفعش نسيبهم فريسة للكفر دا..

الموضوع مش مجرد صورة هتتعلق في البيت، وهتبقى مجهولة لأصحاب البيت أو لزواره، لأ، الموضوع أعمق بكتير أوي، وموجه بشكل مركز للأجيال اللي جاية، وهو أخطر من "كريشنا"، اللي برضو مع الزمن رجع بعض المرضى يلمعوه، كمثال مشبوه عشان يضربوا المعتقد المسيحي..

لأن شخصية "كريشنا" قريبة الشبه بالسيد المسيح عليه السلام، ولو أي حد كتب على جوجل إسم "كريشنا" هنلاقي مواقع مشبوهة كتيرة، بتعمل الربط دا، وبتقدم مقارنات كتيرة بين المعتقدين، وبتظهر النصوص اللي بتدمج الديانتين، وحاجة آخر قرف يعني، وتحريف وتزوير متصدر لمواجهة الديانات السماوية، سواء إسلام أو مسيحية..

طبعًا فيه اختلاف الطبقات الاجتماعية ونصيب كل واحد من الثقافة، ودا أدى لتباين التفكير، فيه ناس ممكن تبحث وتفكر وتعرف الحقيقة، وفيه ناس معدومين، الجهل مسيطر عليهم، وأدمغتهم ضيقة وما عندهمش رفاهية البحث، فيهم بسطاء ما يدركوش حاجة، دول اللي مستهدفين، بلاش تقولوا الموضوع عليكم انتم، ولو حضرتك مش مقتنع بالموضوع اللي أنا طرحته، ممكن ببساطة تتجاهل البوست، بدون جدال يعني..

ولو حضرتك اقتنعت، يا ريت تمنع القرف دا عن أولادك الصغيرين، لأنهم بيكونوا زي العجينة الطرية اللي سهل يتلعب بيها، لأنها لسة بتتشكل، بلاش تلوث فطرتهم وتشوه يقينهم بالله اللي في طور النمو جواهم، وانقذهم من الحروب النفسية دي، هما في غنى عنها، والله كلنا في غنى عنها، ربنا يثبت قلوبنا على دينه..

لو عجبك البوست يا ريت تتفاعل معاه وتعمل مشاركة
والسلام عليكم ورحمة الله وبركاته

إبنك هو نتيجتك 👌✋
فلو زرعت فيه حب من وقت ما يتولد هيكبر شخص كله خير وحب للي حواليه والعكس صحيح 🌸✋