18/02/2026
تناولنا أمس في محاضرة
"رمضان بعيداً عن توهم الكمال "
ودي أهم النقاط.... 🌻🌻
( أحيانًا بندخل رمضان وإحنا مشغولين بسؤال:
هختم كام مرة؟
هصلي قد إيه؟
هعمل قد إيه؟
لكن السؤال الأهم:
أنا داخلة رمضان أتغير… ولا أكرر نفس النسخة؟
ربنا سبحانه قال:
{لَعَلَّكُمْ تَتَّقُونَ}
يعني الصيام وسيلة… والنتيجة المطلوبة: "قلب مختلف".يعني لازم أحدد غايات الشهر ومقاصده
وتركز على (الثلاثية)
تقسم الأهداف إلى ثلاثة محاور أساسية...
1ـ مع الله، مع ال أنا ، ثم الآخرين. ✨✨
أولا : أولى الأولويات في علاقتي وغايات الشهر مع الله.
إتقان الصلاة… قبل زيادتها( تصحيح العبادات) ودي مهمة جداا.
مثلا..كتير مننا بيصلي من سنين… لكن هل يجيد فعلا صلاتي؟! هل فيها طمأنينة؟
هل أنا واقفة بين يدي الله فعلًا؟
قال الله تعالى:
{الَّذِينَ هُمْ فِي صَلَاتِهِمْ خَاشِعُونَ}
وقال الفضيل بن عياض:
"إنما يريد الله منك قلبك."
رمضان فرصة أتعلم:
أبطئ في الركوع والسجود
أعيش مع الفاتحة ، أفهم اللي بقرأه، هدفي أصلّح، ثم أزيد...
ثانيًا: القرآن… مش قراءة فقط
مش المطلوب إن المصحف يعدي على لساني…
المطلوب إن الآية تعدي على قلبي.
قال تعالى:
{أَفَلَا يَتَدَبَّرُونَ الْقُرْآنَ}
كان الحسن البصري يقول:
"نزل القرآن ليُعمل به، فاتخذ الناس تلاوته عملًا."
جربي كل يوم:
آية واحدة تعيشي بيها، تدبّريها، بجانب وردك القرآني عادي..
تسألي نفسك: الآية دي بتقولي إيه؟
أطبق منها حاجة
مش لازم أسبق حد…
المهم أسبق نفسي القديمة.
ثالثاً:
ثالثًا: الذكر… النفس اللي بيرجع القلب حي
في زحمة اليوم، القلب بينشف.
والذكر هو الميّه.💦
قال ﷺ:
«سبق المفردون»
قالوا: من هم؟
قال: «الذاكرون الله كثيرًا والذاكرات».🌻✨
الأذكار المقيدة
أذكار الصباح والمسا، أذكار بعد الصلاة
دعاء دخول البيت أو الخروج منه
أذكار النوم
التكبير في أيام العشر
دعاء الركوع والسجود
ونتعلم إن الأذكار دي مش روتين، هي عبادة وحماية
افهمي الأذكار وأنت بتقرأيها.
واجعلي لسانك دايمًا رطب بذكر الله ( الذكر المطلق).
قال الله تعالى:
{يَا أَيُّهَا الَّذِينَ آمَنُوا اذْكُرُوا اللَّهَ ذِكْرًا كَثِيرًا}
سبحان الله
الحمد لله
الله أكبر
لا إله إلا الله
ذكر في المطبخ… في الطريق… قبل النوم.
رابعًا: النوافل… طريق الحب
في الحديث القدسي:
«وما يزال عبدي يتقرب إليّ بالنوافل حتى أحبه».
تخيلي ربنا يحبك 🤍
النوافل مش عبء… دي باب.
ركعتين ضحى.
وتر.
قيام ولو قليل.
قليل دائم… أقرب للقبول.
خامسًا: تربية النفس… دي المعركة الحقيقية
الصيام مش امتناع عن الأكل بس.
ده تدريب على السيطرة.
قال عمر بن الخطاب:
"حاسبوا أنفسكم قبل أن تُحاسَبوا."
جربي في رمضان..تزكّي قلبك.
القلب يتلوّث بأمراض خفية:
الرياء، العُجب، الحسد، الحقد، حب المدح
التعلّق بالناس أكثر من الله.
حاولي تزكّي قلبك وتتخلّصي من آفاته..
حاولي دائما لسانك يكون طيب ( كلامك دائما يكون مؤدب ولطيف، لا تؤذي غيرك بكلامك!!)
قال الحسن البصري:
"داوِ قلبك، فإن حاجة الله إلى العباد صلاح قلوبهم."
كل مرة بتنتصري على نفسك… بتقربي خطوة من التقوى.
ونركز غاياتي مع الآخرين
العلاقات الاجتماعية مثلا (بر الوالدين، الإحسان للزوج/الزوجة، صلة الرحم، الإحسان عموما، كف الأذى عن الغير......)
- دربي نفسك على فقه الاختلاف، والرحمة بالآخرين، وتطهير القلب من الغل وما شابه.
✨
واهتمي ب..... 🕊️🤍
ـ جلسة خلوة يومية خمس دقائق قبل النوم:
أتكلم مع ربنا بصدق.
أراجع يومي.
أستغفر.
أجدد نيتي.
ـ ورد استغفار ثابت
قال ابن القيم:
"الاستغفار يمحو ما في القلب من صدأ."
100 مرة في اليوم على الأقل.
ـإصلاح علاقة واحدة
اختاري شخص بينك وبينه فتور.
اتصلي، بادري، سامحي.
رمضان مش عبادة فردية بس… ده إصلاح قلوب.
ـ صدقة خفية
خلي لك عمل محدش يعرفه غير ربنا.
حتى لو مبلغ بسيط، شربة ماء ، تمرة ....
السر بينك وبين الله ليه طعم تاني.
ـ نية صادقة لكل عادة
الأكل بنية التقوّي على الطاعة.
النوم بنية الاستعانة على القيام.
فتتحول العادة لعبادة.
🤲 الدعاء… لأن ده روح كل حاجة
قال ﷺ:
«الدعاء هو العبادة».
ابدئي بالثناء ، احمدي ربنا، اشكريه
ثم اسأليه"قلب سليم, ثبات بعد رمضان , تقوى حقيقية"
الخلاصة.....✨✨
رمضان مش شهر انفعال مؤقت، رمضان شهر تأسيس.
مش عايزة أبدأ بقوة وأنتهي بتعب.
عايزة أبدأ بثبات… وأنتهي بثبات أكبر.
لو خرجت من رمضان:
صلاتي أحسن،لساني أنظف، قلبي أهدى، علاقتي بربنا أقرب...يبقى ده هو الفوز الحقيقي. )✨🌻.
ال pdf
https://t.me/alemam_alshatiby
