Yazmania

شركة Infinix ولعبة "الكود البصري"

من شهر تقريبًا، ظهر تصميم لشركة Infinix للهواتف المحمولة بيقارن ما بين سُمك هاتف جديد و"صباع محشي ورق عنب"... آه والله!

الحملة بعنوان: "Thin, yet Everything".

يطلع إيه بقى الكود البصري ده؟
الكود البصري ببساطة هو إنك توضّح معنى، أو تمرّر للمتلقي أهداف ومعلومات، بأبسط طريقة ممكنة. واللي في حالة Infinix نقدر نقول: بأذكى طريقة ممكنة.

لو أخدنا التصميم ده كمثال ببساطة هتلاقيه عبارة عن :

هاتف.

صباع ورق عنب محشي.

جملة من 3 كلمات.

بس لو فسّرنا التصميم بدقة، هنلاقيه فاضي... لكن مليان تفاصيل، زي فكرتهم بالضبط.

هم بيستعرضوا سُمك جهاز جديد نازل السوق، فبيصوّروه من الجنب — لحد هنا منطقي.
إضافة صباع ورق عنب وسط المساحة الرمادية الفاضية دي، هتخليك تقف عند التصميم.
ودي أول حاجة في لعبة الأكواد البصرية:
"أنا كتصميم... مينفعش تسكروليني!"

نغوص في التصميم أكتر:
هنلاقي حتى احترام الظلال له معنى.
ظل الهاتف بيظهر أكبر من ظل صباع ورق العنب، اللي يبدو أنحف، لكن بيتفقوا في الانحناءة الدائرية و هقولك في الآخر ليه !!.

نغوص أكتر كمان:
كلمة "Thin" مكتوبة بخط Bold أصلًا!
والجملة نفسها معناها: "رفيع لكنه يحتوي كل شيء".

المعنى باختصار:
الموبايل الجديد سمكه رفيع، لكن فيه تفاصيل كتير...
زي ورقة العنب كده، ورقة بسمك نص ملي، بس بتشيل رز، وخضرة، وبصل، وطماطم، وصلصة، وزيوت، وتوابل.

حتى كلمة "نحيف" بالإنجليزية عملوها Bold عشان يأكّدوا على المعلومة:
هو نحيف، بس مليان إمكانيات.

نخلص على كده؟
لأ، لسه!

الإعلان ده جزء من حملة قوية لـ Infinix Hot 60 Pro،
اللي بيستعرضوا فيها النحافة مقابل الإمكانيات المتقدمة، والأناقة مع الاحتفاظ بـ سعر متوسط في فئته.
و طبعاُ بيخاطب جمهور شرق اوسطي بالدرجة الأولى أو تقدر تقول بيغازله بصباع المحشي اللذيذ ده و طبعاً مع #المقاطعة الصيني لازم يستغل كل حاجة.

ملاحظة أخيرة:
الهاتف ده واحد من الأجهزة اللي بتتمتع بخاصية الشاشة المنحنية من الطرفين، وده بيخليه أكثر فخامة، زي أجهزة الـ Flagship (زي مثلًا: Samsung S24 Ultra).
وده يفسّر فكرة الظل الكيرفي اللي على نفس الـ Aline لظل صباع المحشي اللي قولتلك هوضحلك معناه في الآخر.

المهم إن التصميم لذيذ و حِرش و لو حضرتك مصمم ضروري تحاول تمرّن نفسك على قواعد الكود البصري عشان تطلع بتصاميم نضيفة و شاملةبأقل مجهود و لو عاوز بعض التمارين اكتب في التعليقات #تمرين و هيوصلك.

أنا ياسمين قاسم و دا
يومكم زي الفل

الكلام النهاردة على اعلان ( مسحوق غسيل ) في ٢٠٢٢، بدأ الإعلان بشعار البراند واسم الفنانة روبي كتهيئة للمشاهد لاستقبال الرسالة. فكرة رئيسية بتدور حول مشكلة اصفرار الياقات على الملابس، مع التركيز على فئات اجتماعية مثل سائقين الأجرة والصعايدة. الإعلان كان مدته حوالي دقيقة وربع، ظهرت فيه روبي بملابس باللون البرتقالي، مع أسلوب مرح وحركي يخلق شعور بالسعادة والبهجة، تخيل روبي سنتين بتقول "يا صباح الفل" لحضرتك 90 مرة ف اليوم !

نفس البراند فـ ٢٠٢٤، طوروا الاعلان تطوّر ملحوظ جداً يستحق التعليق رغم أن روبي ظلت هي البطلة، وهو أمر منطقي لشعبيتها الكبيرة بين فئة عمرية تتراوح بين الثلاثين والأربعين. انما الإعلان في ٢٠٢٤ بقى أقصر بكثير، حوالي ٣٥ ثانية فقط، مقارنة بالسابق اللي كان حوالي دقيقة و 12 ثانية ودا يعكس كفاءة أكبر في توصيل الرسالة في وقت أقل. الاختصار في وقت الإعلان يعكس أيضًا تكلفة إعلانية أقل للمنتج، وقدرة لإيصال نفس الفكرة بوقت أقل وبالتالي تكلفة إنتاجية أقل.

بالنسبة للمحتوى، رغم استمرار التركيز على مشكلة اصفرار الياقات، إلا أن طريقة تقديم الحل كانت أكثر فخامة. في ٢٠٢٤، استخدموا اللونين الأصفر والبرتقالي بذكاء في الملابس، ظهر الأصفر في زي المهندس المعماري ليرمز للمشكلة، على عكس البرتقالي في زي آخر يمثل الحل. مع التركيز على قصة واحدة متكاملة بدلاً من تنويع الفئات الاجتماعية اللي تم ف الاعلان السابق، منح الإعلان تركيز وفعالية اكبر.

وفـ تطور آخر، استهداف طبقة اجتماعية أعلى مثل المهندسين، فكرة أضافت لمسة من الترف والفخامة للإعلان بمعنى إن الإعلان أصبح أكثر استهدافًا لفئة راقية مع تحسين الصورة العامة للمنتج.

الخلاصة: إعلان المنتج ده ٢٠٢٤ تطور بشكل كبير مقارنة بإعلان ٢٠٢٢. رغم الحفاظ على نفس فكرة مشكلة اصفرار الياقات، إلا أن الإعلان أصبح أكثر اختصارًا وتركيزًا، عكس تكلفة إعلانية أقل وأداء أفضل في توصيل الرسالة. بالإضافة إلى ذلك، تم استهداف فئة اجتماعية أعلى، كل ده سمح للإعلان انه يظهر بصورة أكثر فخامة واحترافية.

للتذكرة هذا المنتج واحد من منتجات الم.قا.طـــ.عة الداعمة للكيان لذلك لم اذكر الأسم و لكن الاعلان كان يستحق التعليق.
أنا ياسمين قاسم و دا كلام #بفلوس
شكراً..