18/11/2025
صباح الخير ❤️
مشكلة كبيرة بتواجهنا مع اطفال التوحد
هي مشكلة القلق والخوف 🤷♀️
يا تري نتعامل معاها ازااااي
خلينا نعرف ان 👇🏻
…………..
القلق والخوف من أكتر التحديات اللي ممكن يمر بيها أطفال التوحد وبيظهر عندهم بشكل واضح قدام أي موقف جديد أو غير مألوف. دورنا مش إننا نضغط عليهم أو نسرع خطواتهم، بالعكس خالص 😌… دورنا إننا نطمنهم ونمهد الطريق واحدة واحدة. أهم حاجة إن الطفل يجرب، لكن بشكل تدريجي ومن غير أي نوع من الإجبار. خطوة صغيرة محسوبة بتساوي إنجاز كبير، وبتبني عنده إحساس بالأمان والثقة.
حاولوا تستخدموا الألعاب الحسية لان دا بيساعد الطفل يتقبل المواقف الجديدة براحته، وبيهدي توتره تدريجيًا، لأنها بتربطه بتجربة ممتعة بدل ما يحس بالخوف. وخصوصا مع أي ضغط أو قلق
وكمان نقدر نساعده على الاسترخاء بطرق بسيطة جدًا زي العد لحد 10، أو نخليه يتنفس بشكل هادي ، أو حتى حضن مع ضغط خفيف، وكلها أساليب فعالة ومتجربة ف تهدئة الجهاز العصبي.
ومع كل موقف جديد بيتعلمه، لازم نعزز ونكافئ حتى أصغر خطوة حتي لو كانت بسيطة . كلمة حلوة، تشجيع او حضن، أو مكافأة بسيطة… التعزيز هو اللي بيخلي الطفل يحب التجربة ويربطها بشعور إيجابي وبيخلينا نوصل لهدفنا بسرعة
وخلينا دايما عارفين ان الطفل القلوق مش محتاج حد يشده علي ادد ما محتاج حد يمسك إيده ويطمنه. خطوة صغيرة النهارده معاه ممكن تبقا بداية كبيرة جدًا بكرة.
❤️❤️
وف النهاية
لو عندك تجربة او سؤال، أو موقف حاسس إنه محيرك مع طفلك، ما تترددش تتواصل معايا ……
ولو عندك اقتراح للموضوع الجاي اللي حابين اني اتكلم فيه اكتبه فكومنت وان شاء الله اتكلم عنه البوست اللي جاي
#اشارة
