15/08/2026
اكتشفت إن مشكلتي مش في الشغل
مشكلتي في إني مش بعرف أسوق لنفسي
في البوست اللي فات حكيت إن بعد 10 سنين شغل في السوشيال ميديا لسه مكالمة HR ممكن تلخبطني
الغريب بقى إن لما صاحب الشغل نفسه يكلمني الدنيا بتختلف
لما الكلام يبقى عن البيزنس نفسه:
إيه المشكلة؟
إيه الهدف؟
إيه اللي مش شغال؟
إزاي المحتوى ممكن يساعد؟
إيه اللي محتاج يتظبط في الصفحة؟
إزاي نخلي الناس تثق وتتفاعل وتشتري؟
هنا بلاقي نفسي بتكلم بطبيعتي وابتدي اتناقش معاه
بفهم بسرعة
بسأل أسئلة صح
بربط بين المحتوى والهدف
وبقدر أوضح أنا هعمل إيه وليه
وساعات كتير صاحب الشغل يقتنع من أول كلام ونبدأ شغل فعلا
وده خلاني أفهم حاجة مهمة عن نفسي:
أنا مش ضعيفة في شغلي
أنا ضعيفة في تسويق نفسي
وفي فرق كبير بين الاتنين
ممكن تكون شاطر جدا في التنفيذ بس مش شاطر في شرح قيمتك
ممكن تكون بتعمل نتائج بس مش عارف تحكيها
ممكن تكون عندك خبرة حقيقية بس صوتك مش عالي كفاية وسط ناس بتعرف تقدم نفسها أحسن
والحقيقة دي مش مريحة لكنها مهمة
لأن في 2026 الخبرة لوحدها مش كفاية
لازم تعرف تشتغل
ولازم تعرف تشرح شغلك
ولازم تعرف تحكي رحلتك
ولازم تعرف تقول:
أنا بقدم إيه؟
ولمين؟
وبحل مشكلة إيه؟
والنتيجة اللي بقدر أوصلها إيه؟
أنا بكتب الكلام ده مش علشان أقول إني وصلت
بالعكس علشان اقول ان اخر وظيفه لما متقبلتش علشان مكنش فيه case study واضحه لشغل انا عملته
أنا بكتب علشان أقول إني لسه بتعلم أتكلم عن نفسي زي ما بعرف أتكلم عن شغل غيري
لسه بتعلم أحول خبرتي لكلام واضح
لسه بتعلم أدخل مكالمة HR وأنا هادية وواثقة
لسه بتعلم إن تقديم نفسي مش غرور
ولسه بتعلم إن الشغل محتاج صوت شاطر يحكي عنه
بعد سنين من إني أكتب للبراندات
جه الوقت إني أتعلم أكتب وأتكلم عن البراند الشخصي بتاعي أنا كمان
لو إنت كمان شاطر في شغلك بس بتتلخبط لما تيجي تتكلم عن نفس أحب أقولك:
إنت مش لوحدك
لأن الفرص مش دايما بتروح للأشطر بس
ساعات بتروح للي بيعرف يشرح هو شاطر في إيه
شاركوني في الكومنتات:
هل بتعرفوا تقدموا نفسكم بسهولة في مكالمات الشغل؟
ولا بتحسوا إنكم أقوى في الشغل نفسه من الكلام عنه؟
ولو عندكم طريقة ساعدتكم تتكلموا عن خبرتكم بثقة اكتبوها يمكن تساعدني وتساعد ناس كتير
وتابعوني لو مهتمين بمحتوى حقيقي عن السوشيال ميديا والتجارب اللي بتحصل ورا الكواليس مش بس الكلام اللامع اللي بنشوفه كل يوم
