نسرين سمير

💥💥 المراهقة وسنينها 💥💥

ما تيجوا نفهم شويه عن المراهقة بدل ما إحنا زهقانين من تصرفاتهم الغير منطقية

المشاعر : بتسبق دايما القدرة على التفكير المنطقي والتحكم فى الردود
تأثير الأصدقاء (الاقران) : الانتماء للأصدقاء بالنسبه ليه خطوة طبيعية مهمه وبتزيد جدا علشان إثبات الهوية والاستقلالية عن الأسرة.
الحاجة للتقدير: هو محتاج يتشاف ويتقدر و الشعور بعدم الفهم يولد عنده إحباطا، والاحتواء بيترجم فوراً في عقل المراهق انه "أمان" ولذلك هتلاقيه لو ملقاش التقدير فى البيت هيدور عليه بره سواء مع اصحابه او علاقته باللى حواليه .
💥💥💥💥💥
طيب نعمل إيه بدل الصدام أو المحاضرات لانه بيكره المحاضرات

جرب (لغة الاحتواء والذكاء العاطفي)
(الانفعال والمبالغة) بدل ما تقول أنت بتكبر الموضوع او ده شيء تافه
قول أنا حاسس إن الموضوع ده مضايقك جداً ومأثر فيك، تعال نتكلم فيه.
(لما يعمل تصرف مندفع) متقولش إنت مستفز وعايز تتعبني وخلاص
قول تعالى نفهم سوا إيه اللي خلاك تتصرف كده المرة دي؟
(لما يغير رأيه فجأة) بدل ما تقول إنت مش عارف إنت عايز إيه
قول انا شايف إنك غيرت رأيك، إيه اللي خلاك تفكر بشكل مختلف دلوقتي

درست تعديل سلوك تقريبا ٣ مرات مرة فى الجامعة ومرة فى كورس خارجى ودى المرة الثالثة
بعد ما درست المرتين الاولانيين كنت مقررة انى مش هشتغل تعديل سلوك لانى مش حاسة ان الاستفادة اللى طلعت بيها تأهلنى انه اشتغله وكمان عندى قناعة ان مفيش تعديل سلوك بدون تدخل من الاهل وبشكل كبير كمان

لكن ربنا يقدر انى يطلعلي اعلان لمبادرة اتقان واقرر انى اشترك قبل اول محاضرة بربع ساعه 😁 وهما كانوا بيقنعونى انى العدد اكتملت ومعرفش ليه اصريت انهم يعملولى اكسبشن على غير عادتى اصلا
وابدأ معاهم واتأكد ان ربنا رزقنى بالكورس ده لانه فعلا مختلف عن اللى حضرته قبل كده بكتيييير
اتقان طلع اسم على مسمى فعلا
جزاهم الله خير

ودلوقتي اقدر اقول انى خلاص مش هرفض حالات تعديل السلوك تانى 😄
💥💥وفتحت باب الحجز 💥💥
كوتشينج للبالغين والمراهقين
جلسات دعم نفسى للبالغين والمراهقين
وكمان جلسات تعديل سلوك

الحجز على رقم
01000028827

كل عام وانتم بخير عيد سعيد علينا وعليكم يارب 🥰🥰

وبما ان النهاردة ٢١ مارس يوم مميز طبعا 😉😅
ثانى يوم العيد
وعيد الام
وبداية الربيع الجميل بزعابيبه 😄
وكمان يوم ميلادى 😎
فأنا حبيت اعيد عليكم واقولكم

💥💥 رجعنا عرض ال 50% تااااااااااااانى 💥💥

يلاااا كلمونا على رسايل الصفحة او على رقم الوتساب علشان تعرفوا كل التفاصيل

العروض على الجلسات النفسية وجلسات الكوتشينج والاستشارات التربوية كمااان

💥💥للحجز والاستفسار كلمونا على
01000028827

(جامعة الازهر )




اخصائى صعوبات تعلم وفرط حركة

مساء الفل
قولنا نطلع من أجواء الحرب ونحنفل بشهادة جديدة 🎉😄

وأنا بدرس الاضطرابات النفسية، دايمًا كنا نلاقي سببين أساسيين بيتكرروا: الوراثة والمعاملة الوالدية.

الوراثة مش معناها إن الطفل لازم يصاب بالاضطراب اللى عند مامته او باباه ولكن ،
هي استعداد جيني ممكن يفضل ساكن طول ما الشخص عايش في بيئة مستقرة وضغوطه معقولة،
لكن مع الضغط الشديد… الاستعداد ده ممكن يتحول لاضطراب.
زى بالظبط لو احد الوالدين عنده سكر ممكن يظهر للابن لو مهتمش باكله وممكن ما يظهرش طالما هو ماشى كويس ومحافظ على نفسه .

العامل التاني، واللي بقابله في أغلب الجلسات، هو أسلوب تعامل الأهل: هل في تسلّط؟
ولا تساهل؟
ولا لامبالاة؟
ولا حزم متوازن؟

المعاملة المتسلطة أو المهملة بتعمل ضغط نفسي كبير،
وده بيأثر على شخصية الطفل،
وأحيانًا يوصل لمشكلات نفسية حقيقية زي ضعف تقدير الذات أو التبعية
ومن الحالات اللى أثرت فيا بجد من اللى قابلتهم مراهقة عندها وسواس قهري وطبعا دور معاملة الام والاب واضح جدا فى كلامها .

علشان كده دايمًا بنقول: طريقة التعامل بتفرق… وبتفرق جدًا.

نصايح سريعة اعتقد الناس حفظتها من كتر ما بنقولها لحد لما اكتب بوست منفصل ان شاء الله

اسمع ابنك قبل ما تحكم

صحّح السلوك مش الشخصية

خلي في حدود واضحة مع حب واحتواء

بلاش مقارنة . بلاش إهانة . بلاش تهديد

افتكر ان التربية مسئولية مينفعش نهملها وكمان التربية عمرها مكانت سيطرة وصوت عالي ومد ايد ولنا فى نبينا أسوة حسنة .

سؤال لكل أب وأم:
يا ترى إنت مستخدم أنهي أسلوب من دول؟
(تسلّط – تساهل – لامبالاة – حزم)

وفي رأيك… ايه فيهم الأفضل؟ وليه؟
شاركنا رأيك 👇


#تربية

ليه بنحط أهداف ومش بنوصلها؟
مش دايمًا المشكلة إنك مش بتعمل كفاية…
أحيانًا المشكلة إنك من جواك مش جاهز للهدف.

ممكن:

تكون خايف تفشل

أو خايف تنجح

أو مش مصدّق إنك تستاهل او جاهز

فتلاقي نفسك بتأجّل، تزهق، أو توقف من غير سبب واضح.

الحل مش ضغط أكتر… الحل وعي أكتر.

حدد هدفك بدقة واتأكد ان ينفع يبقى هدف وبعدها

اسأل نفسك:

أنا حاسس بإيه تجاه الهدف ده؟

إيه الفكرة اللي بتيجي في دماغي كل ما أقرّب؟

محتاج أغيّر إيه جوايا قبل ما أغيّر في الخطة؟

لما اللي جواك يتظبط…
الخطوة اللي برا بتيجي أسهل.
جهز خطتك وتوكل على الله وربنا هيعينك وتوصل ان شاء الله.


#كوتشينج

من اكتر الحاجات اللى بحبها انى اشتغل مع مراهقين مع ان الاهل بيبقوا شايفين ان السن ده صعب وانهم مبيسمعوش الكلام لكن انا ببقى شايفة انهم مساكين حقيقى مش فاهمين التغيرات اللى بتحصلهم وشايفين اللى حواليهم فبيحاولوا يقلدوهم علشان مبيبقوش منبوذين وبالتالى محتارين وغالبا الاهل كمان مبيبقوش فاهمين وبالتالى تبتدى المشكلات
واكتر مشكلة هى تدنى تقدير الذات لانه اصلا كان بيتقارن باخواته وقرايبه او لانه مبيتشفش الحلو اللى بيعمله وبيتشاف الوحش بس او انه عايز يبقى عنده شخصيته المستقلة فده اتقابل على أنه تمرد وبالتالى اتمنع وحاجات تانيه كتير
وطبعا فيه مشكلات تانيه مفيش مجال لسردها دلوقتى

💥 لكن المهم فى الموضوع او اللى نطلع منه
الولاد عايزة تتسمع حقيقى اكتر احتياج ليهم قابلنى انهم عايزين يتسمعوا
نتكلم مع ولادنا ونسمعهم ونصاحبهم دى اول خطوه فى خطوات التعامل مع المراهق
عامله على انه انسان ليه شخصيته ورأيه واحتياجه سيبه يعبر عن رأيه وفى نفس الوقت وجهه
والتوجيه مش بالأمر التوجيه بالصداقة والكلام اللطيف
حسسه انك حاسس بيه وسيبه يعبر عن مشاعره بس عرفه الطريقة الصح اللى يعبر بيها عن مشاعر سواء كانت حزن او غضب او توتر او غيره
اقرأوا عن المراهقه وعن النمو فى المراهقه وعن الحاجات المشتركه فى السن ده اللى عادى تحصل
✍️ هى تجربه بيخضوها وبيتعلموا منها سيبوهم يخضوها بتوجيه سليم بدون إفراط ولا تفريط
احنا دلوقتى دورنا نصاحبهم ونوجهم بهدوء ونفهمهم ونقدرهم
والدعاء ثم الدعاء
ربنا يهديهم ويحفظهم ويصنعهم على عينه

كل تجربة بنمر بيها في حياتنا (سواء كانت سعادة أو ألم) مهما كانت شدتها، فهي خبرة بنطلع منها بحاجة. مع الوقت، ومع كل سنة بنكبرها، شخصيتنا بتتغيّر، ونظرتنا وتفسيرنا للحياة بينضجوا أكتر.

وصدقني…
كل وجع بيعدّي مهما كان صعب أو تقيل.
والشاطر هو اللي يعرف يعدى الألم بأقل الخسائر… ويشوف جواه الفائدة.

ربنا قال:
﴿فَإِنَّ مَعَ الْعُسْرِ يُسْرًا﴾
مش بعده… معاه.
يعني اليسر مش في آخر الطريق، اليسر في قلب العسر.
دور بس عليه…
شوف المنحة وسط المحنة.
شوف الاستفادة اللي هتطلع بيها من قلب الألم.

ومش معنى الكلام إننا نلغّي مشاعرنا…
أبدًا.
الشعور جزء أساسي من الشفاء.
لكن الخطورة في الانغماس اللي بيشلّنا ويدخلنا في دائرة مرضية.

اسمح لنفسك تحس بالألم، بالخوف، بالحزن…
بس ما تسيبش الشعور يغرقك.
عديه … وخد منه حكمة وخبرة.

فكر بإيجابية، وهتلاقي نفسك شخص تاني…
عقل أهدى، وشخصية أقوى، ونضج أكبر.

وافتكر دايمًا:
﴿فَإِنَّ مَعَ الْعُسْرِ يُسْرًا﴾

﴿لَا يُكَلِّفُ اللَّهُ نَفْسًا إِلَّا وُسْعَهَا﴾

وحديث النبي ﷺ:
"عجبًا لأمر المؤمن، إن أمره كله له خير، إن أصابته سراء شكر، وإن أصابته ضراء صبر."

صباحكم يسر وتفائل 🥰

بوست للامهات مش مترتب ولا معمول حسابه جه فجأة فقولت لازم اكتبه زى ما جه فى دماغى

همسة فى اذن كل ام 🌷 من تجربة ام 🌷

كتير حالات بتقابلنى الام جاية تشتكيلى بنتى مش راضية تلبس حجاب لو سمحتى اقنعيها او قوليلى اقنعها ازاى

وهنا عايزة اقول
بناتنا بنصاحبهم من وهما صغيرين
بنتكلم معاهم فى حاجات كتير من وهما صغيرين
مينفعش اسيب بنتى لحد البلوغ وبعدين اقولها لازم تلبسي الحجاب انتى كده مكلفه
لا حبيبتى مينفعش خالص احنا من وهما صغيرين بنقول ان شاء الله لما تكبري تتحجبى زى ماما لما تسألك عن حجابك ونعرفها ان ده امر ربنا وبيحفظنا بيه وتاخد بيه حسنات كتير كمان
بنخليها تجرب الطرح بتاعتنا
بنعرفها ان الحجاب فرض من وهى صغيرة
بنعرفها ان فيه مرحله فى حياتها هتبقى كبيرة مش طفلة
بنعرفها يعنى ايه بلوغ وعلامته وامتى ممكن يحصل وازاى بيحصل
بنعملها التغيير الكبير اللى هيحصل لها وهيحصل فى حياتها
نعرفها النظافة الشخصية وازاى تهتم بنفسها والاغتسال
هنعرفها انها كده مكلفه
نعرفها فروض ربنا واوامره وازاى نقوله سمعا وطاعة سواء عرفنا اسباب او لا
(بس بينى وبينك انا بحب ادور على اسباب واشرحها وهتلاقى على فكره فى التشريعات اسباب رائعة لكل تشريع وبرضو بعرفها سمعا وطاعة بدون اسباب )

كل ده بتعرفه قبل البلوغ بكتير مش بعده وركزي يا ماما مش بعده مش لما اتفاجئ ان بنتى مكلفه
بنبتدى كلام من والبنت يادوب ابتدت تتكلم او تفهم كلامى وكل سنه بنزود كلامنا ونخليه أدق او اكبر حسب عمرها واحتياجاتها بشكل متوازن ومناسب للعمر

بنلبسها كل اللبس اللى نفسنا فيه وهى صغير لكن مجرد ما تبقى واعيه بنخلى اللبس مش مبتذل
يعنى عادى بنلبس نص كم وبنطلون بس مبنلبسش مثلا فوق الركبه وهى فى ٣ او ٤ ابتدائى
وفى نفس الوقت مبلزمهاش بحجاب غصب عنها علشان لما تكبر هتقلعه سواء قدامنا او ورانا وياما شفنا ده
فاحنا لما البنت بتكبر شوية بنخلى اللبس عادى زى لبس صحابها بس محتشم البنطلون واسع مش ضيق

بنقول ايه رأيك نجيب طرحه ونقول و تجرب مره وهى فى المدرسة ولا وهى فى خروجة وعادى تقلعها تانى
بنخليها تختار معانا اللبس ونتناقش ده كويس ولا لا

هتلاقى البنت لوحدها هتلبسه حتى لو مش عايزة
لان انتى دخلتى جواها ان ده فرض ولازم يتنفذ فهتنفذه وواحده واحده هتتعود وهتحب انها تعمله لما تعرف اجرة

وخدى بالك بعد الحجاب بنشترى لبس وطرح جديده وندور على لفات طرحه على النت ونجرب مع بعض ونقولها ايه القمر ده وايه الجمال ده 😍
وبنجيب للبيت كل اللبس اللى نفسها فيه ومينفعش يتلبس بره كت بقى شورت اى حاجه هى عايزاها
ونجيب مكياج وتوك وكل حاجات الشعر والبشرة اللى نفسها فيها
من وهى صغيرة بنجيب مكياج ونقول ان ده بيتحط فى البيت بس
سيبيها تعمل ده جوه ودايما انتى وباباها شكروا فى جمالها وتسريحة شعرها ولبسها فى البيت
وعلى جمالها برضو بالحجاب وهى خارجة

كده هتعدى على جزء مهم فى حياة بنتك بهدوء وراحه ان شاء الله
وزى ما قولتلك الصحوبية ثم الصحوبية كل ما تصاحبيها كل ما تبقى حياتكوا افضل
وباباها دوره اهممممم كمان فى المراهقة جداااااا وده ان شاء الله نتكلم عنه فى بوست تانى بالتفصيل 😄

كام مرة كان وراكى حاجات كتير ومضغوطة وفى الاخر سيبتيها ونمتى او خرجتي ؟
ابنك او بنتك الواعى كام مرة كل ما يحاول يبدأ مذاكرة يلاقي نفسه عايز ياكل او يشرب او اى حاجه مع إنه عارف انه لازم يخلص اللى وراه؟

عارفين ده إيه؟
ده جزء من ميكانيزمات الدفاع النفسى — آلية ربنا منحها لينا جسمنا وعقلنا بيستخدموها علشان يهربوا من الضغط.
أحيانًا العقل بيفضّل “يهرب” بدل ما “يواجه” لأنه شايف الموقف أكبر من طاقته. ودى ممكن نتكلم عنها فى بوست تانى
اهم حاجة عدم الإسراف فى استخدام الميكانيزمات دى لان الإسراف فيها بيوصل لمشكلات نفسية

💡 زى إيه بقى الميكانيزمات دى ؟
زى:
حالاتنا اللى فوق دى الانسحاب او الهروب
وفيه كمان حاجات تانية زى الابدال والعدوان والتبرير والاسقاط وغيرهم

كل دى طرق لاواعية بيحاول بيها الجسم يقولك: “أنا متوتر ومحتاج أمان”.

✨ طب نعمل إيه فى حالة الهروب اللى بنعملها دى ؟

1. أول حاجة: اعترف إنك مضغوط بدل ما تهاجم نفسك.

2. جزّئ المهام الكبيرة لحاجات صغيرة وسهلة البداية واكتبها وعلم على اللى خلصته علشان تحس بالانجاز .

3. خُد فاصل بسيط (مش هروب)، يعنى 5 دقايق تمشى أو تتنفس بعمق بين كل مهمه والتانية .

4. اكتُب اللى مضايقك أو اللى مأخرك… الكتابة بتفك الزحمة اللى فى دماغك.

5. وافتكر دايمًا: إنك مش كسول، إنت محتاج طريقة أهدأ تتعامل بيها مع الضغط.

🩵 خليك واعى... لما جسمك يهرب، إسأله بيهرب من إيه؟
لأن الوعى أول خطوة للعلاج 🌿

✍️ نسرين سمير
أخصائية صحة نفسية وتربوي

🩵 ولأن فيه ناس سألتني عن عرض الـ 50% 🩵
حبيت أوضح شوية معلومات عني وعن العرض 👇

أنا نسرين سمير،
📘 حاصلة على الدبلوم الخاص في التربية وعلم النفس – تخصص الصحة النفسية من كلية التربية، جامعة الأزهر.
📘 باحث ماجستير فى قسم الصحة النفسية

🌿 دارسة ومهتمة بعدة مجالات في الدعم النفسي والتربوي منها:

العلاج المعرفي السلوكي (CBT)

العلاج الجدلي السلوكي (DBT)

العلاج الجدلى السلوكى للمراهقين (خطط الالتزام والتغيير و حل التحديات )

الميتا كوتشينج (Meta Coaching)

التربية الإيجابية

منهج المنتسوري

وغيرهم من البرامج والدورات المتخصصة في المجال النفسي والتربوي.

💬 وبقدّم جلسات متنوعة منها:
✨ جلسات كوتشينج للكبار والمراهقين
✨ جلسات دعم نفسى
✨ التدريب على خطط التقبل والالتزام للمراهقين
✨ وكمان ورش عمل توعوية وتربوية

وكل ده متاح دلوقتي بخصم 50% لفترة محدودة 💫
علشان تكون خطوة بسيطة منك بداية لتغيير كبير في حياتك 🌱

📩 للحجز أو الاستفسار ابعتيلي رسالة على الصفحة ❤️

او وتساب رقم
01000028827