الدكتور السركي والقدم السكري

للمرة التانية .. حاحاول أشرح يعني إيه قدم سكري .. قبل مانبدأ في شرح الأنواع المختلفة من المرض .. وكيفية الوقاية منه .. وطرق التشخيص والعلاج

مين اللي عنده قدم سكري ؟

.

لو مريض السكر عنده أي أعراض في القدم يبقى عنده قدم سكري
لو أي دكتور لاحظ أثناء الكشف على مريض السكر وجود حاجة غريبة في قدمه يبقى عنده قدم سكري
لو بالصدفة إكتشفنا حاجة غريبة في أي أشعة على القدم في مريض السكر يبقى عنده قدم سكري

.

من الأعراض مثلا :
ضعف أو عدم الإحساس بالقدم
الإحساسات غير الطبيعية بالقدم زي البرودة والسخونة بلا سبب
صعوبة حفظ التوازن أثناء الوقوف أو المشي
الآلآم المتكررة بالقدم بدون إصابات أو جروح
التورم والسخونة والإحمرار
تغير اللون في جزء من القدم بشكل غير طبيعي
الكاللوهات الزائدة في باطن القدم
الجروح أو خروج صديد
التشوهات الجديدة في شكل القدم

.

طب المشاكل دي ممكن تحصل في أي حد ... ليه بنحطها ضمن القدم السكري او حصلت في مريض السكر ؟ السبب إن تشخيصها وعلاجها في مريض السكر أصعب بكتير من الناس الطبيعيين ، كمان مضاعفاتها أخطر بكتير جدا وممكن تؤدي لبتر القدم في النهاية