محمد عبدالله Mohamed Abdallh

محمد عبدالله Mohamed Abdallh خادم القرآن الكريم ❤️

أمنيتى أن يكتب على قبرى
"كان يعلمُ الشباب عن الله"

للإستشارات
https://ngl.link/mohamedabdallah27/shipme

24/08/2026

فى ١ ثانوى كنت بأخد درس كيمياء مع مستر"رمسيس"
فلما كان يغير معاد الدرس ..

كان يسألنا هل في صلاة فى المعاد اه ؟!
نقوله مثلا فى صلاة العصر "كان يأخر الدرس بالنصف ساعة"

الجميل إنه كان بيعمل الموقف ده بكل صدق "مش علشان يتشهر ولا حد يتكلم عنه"
كان بيعمله علشان يفهمنا أهمية الصلاة وعلشان راحتنا كطلابه !
لما بلاقي مستر فلان الشهير المسلم زى
"وحش الكيمياء .. عملاق الفيزياء" حاطت كل مواعيد المجموعات فى قلب مواعيد الصلاة !

ولما تسأل عن الصلاة ومواعيدها يقولك معلش الجدول مليان !
بلاش نصعب عالعيال الصلاة ! والله ما بنصدق نخليهم يصلوا !

22/08/2026

كنت شغال "كاشير" فى مطعم مشهور في إسكندرية
وكان فى بعض الناس لما بتطلب أكل
مش بتأكله ..

فكان فى أطباق بتروح مكان إسمه "الصينى" علشان بقايا الأكل تترمى وممنوع أي عامل يقرب منها
والأطباق تتنظف ..

فبقول لصاحب المحل ليه حضرتك مش بنخلى العُمال الغلابة يأكلوا الأكل ده "الأطباق بحالها"
قالى لو داقوا الأكل يحبوه وممكن بعد كده يسرقوه من ورايا !!

متخيل تفكير بعض الناس !

اللهم استر عبادك يارب ولا تجعل للقاسية قلوبهم عليهم سُلطان ..

21/08/2026

من كام أسبوع ظهر فيديو لخطيب جُمعة فى تركيا بيقول للمُصلين
"لو فضلتوا ماسكين الهواتف هنهى الخُطبة وأنزل" ..

وكانت في ناس متعجبة إزاى فى ناس بتعمل كده والخُطبة شغالة !
لحد ما فكرت فى حال مساجدنا أثناء خُطبة الجمعة ..
تلاقى
"اللي فى نوم عميق ..اللي عمال يطرقع صوابعه طول الخُطبة ..
اللى داخل متأخر ومُصمم يصلى فى أول صف .. اللي فارد رجله بشكل مش طبيعى ومحدش عارف يعدى بسببه ..اللي شغال همس للى حواليه !
وفجأة أول ما يسمعوا "وأقم الصلاة"
تلاقى الكل هوووب وقف على رجله وكأنهم منتظرين الكلمة !

للاسف صلاة الجمعة بدأت تتحول عند الغالبية
" لجلسة إسترخاء بيحاول يفرد فيها جسمه ويريح أعصابه !"
وتحولت من شعيرة لها تعظيم وآداب لشئ روتينى وعادة أسبوعية فقدت هيبتها ..

20/08/2026

ربنا شرفنى بالحاج محمود ٧٤ سنة "إسم غير صحيح" وإتصل بيا علشان نحفظ مع بعض ..
الحاج غاية فى الإلتزام والإجتهاد فى تنفيذ كل حاجة بطلبها منه ..
وحتى مواعيد الحلقات عمره ما تخلف عنها ولو حصل واتلغت بيبقي السبب أنا !

بس أنا متعجب ليه مبدأش الحفظ من بدرى ؟!
قالى كل لما كنت أحب أبدا أعمل لنفسي عُذر
واقف بسببه
"مرة بسبب الشغل .. ومرة المكان بعيد .. ومرة مفيش وقت ..ومرة إنى عجزت "
لحد ما كل الأسباب اللى اجلت علشانها خلصت ومبقاش حد هينفعني غير اللي كنت بهرب منه !

بقوله يعني إيه ؟!
قالى يعنى الشغل خلص .. العيال اتجوزت ..ومبقاش غير القرآن اللي معايا !

الغريب إن الحاج مهمهوش اللي فات ولا الماضي
ولا بص إلا للوقت الحالى وبركته ❤️

وانت ياللي بتقرأ !
ألم يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ ..

19/08/2026

كنت راكب مشروع من فيكتوريا لسيدي جابر وراكب ورايا راجل وتقريباً زوجته ..
المهم بدأ صوتهم يعلى على بعض
والناس بتبص عليهم فهو قام رزعها قلم "خلاها تخبط فى الزجاج وترجع تانى" ..

الكل ساكت ومحدش نطق !
أنا بصتله وبقوله "إتق الله .. وليكم بيت إلخ
ردت عليا خليك فى حالك يا أخ !

"للأسف أنا عارف إنها ضَـحِـيَّـة
ولو بينت قدامه أى تعاطف معايا لما توصل البيت هتلاقى ألوان وأصناف من اَلْعَذَابِ .."

من كثر الإحراج نزلت في نصف السكة !

18/08/2026

واحدة من الأمهات باعتالى إن إبنها بيحفظ فى دار مُعينة وإن الأخ المُحفظ بيستخدم الـعـصــا ..

وإن الأهالى عارفة ده وراضية بيه وبتشجع عليه والدنيا تمام ..
هى عرفت ده متأخر بس "الدار قريبة والسعر بسيط فقالت تمام" !
الولد جالها النهاردة ودراعه وارم بسبب إنه اتضرب من اللي بيحفظ !!

إحنا بنعلم الناس علشان يحبوا كلام ربنا ويتعلقوا بيه !
بنعلمهم بالرفق والأسلوب اللطيف ..
فيحبوك ويحبوا المصحف .. إلخ

هتأذيه وتقسو عليه هيكرهك ويكره الحفظ ويكره كلام ربنا من الأصل !!
اتقوا الله في الأمانة ..

"الحب مقدم عالسرد .."

18/08/2026

من زمان وأنا صغير نفسى أعرف إيه سر المشكلة بين اي ولد صغير
والناس الكبيرة اللي بتقعد فى آخر المسجد !

فى صلاة الظهر دخل المسجد "ياسين" عنده ٨ سنوات دخل المسجد وعينك ما تشوف إلا النور !
عيون الكبار كلها عليه منتظرينه غلطة ..
والتعليمات بقى ممنوع "مسك المصحف .. دخول الميضا .. التحرك من مكانه"

الولد داخل وعنده طاقة وشغف ولسه بيمشي "امشي بالراحة يا ابنى !!"
فدخل وقعد وبيدور على والده في المسجد فلما لقاه قام جرى عليه بفرحة !

وفجأة تحول المسجد "ايه التهريج ده ؟! احنا فى الشارع ؟! ده بيت ربنا ليه احترامه !

واللى بعلو صوته "لما تعلم ابنك الأدب ابقى دخله المسجد !
الراجل مردش عليهم بولا كلمة واخد إبنه وخرج من المسجد !

للاسف احنا هنندم علي ياسين واللي شبه والله ..

17/08/2026

من كام يوم إتصلت بيا "ولية أمر" بتقولى إن فى عروسة يتيمة الأم والأب ..
زواجها واقف ومعندهاش أجهزة وإتأكدت من الحالة وبلغت بعض الناس ..

من لحظات ولية الأمر فضلت ترن "وأنا متخيل إنها هتقولي هل جمعت حاجة ؟!"
لقيتها بتقولى العروسة تعيش إنت ..

16/08/2026

لما كان عندى ١٩ سنة اتعزمت على كتب كتاب صحبى فى الكلية وكان فى قرية علي اطراف إسكندرية ..

صحبى كان قايلي علي واحد في القرية "بيسلف الناس بالفايظ" يعني بياخد زيادة عالمبلغ ..
وبيستغل الناس اللي بتجهز بناتها "ارامل ومطلقات" ..

فطلبت اقول "كلمة" قبل كتب الكتاب
واتكلمت علي تجهيزات الشقة وإن في تُجار بيستغلوا حاجة الناس وشرحت حديث "عن الربا"

لقيت راجل وقف يبان عليه الوقار والهيبة وقال "من امتي بنخلي ناس برانية يتكلموا .. !
سبحانك يارب اللي مهتمش بكلام ربنا وتحذيره ليه أكيد مش هيهمه كلام عيل ١٩ سنة !

16/08/2026

بنت أختى شافت برص عالحيطة قالتلي الحق يا خالي تمساح بيهاجمنى 🐊

Address

الإسكندرية
الإسكندرية

Telephone

+201278951908

Website

Alerts

Be the first to know and let us send you an email when محمد عبدالله Mohamed Abdallh posts news and promotions. Your email address will not be used for any other purpose, and you can unsubscribe at any time.

Contact The School

Send a message to محمد عبدالله Mohamed Abdallh:

Shortcuts

Share

Category