15/06/2026
" راهم ڨع يشوفوك زيد طول باش تبان تعرف تصلي، عيب يقولو فلان يصلي خفيف"
هاد الهدرة اللي تجي في بال أي واحد منا كي يصلي قدام جماعة، هو يبان في الأول بلي نصيحة وحرص على صورتك، بصح فالحقيقة هو أخطر فخاخ الشيطان!
بصح كيفاش؟! علاش الشيطان يجي في الصلاة بالذات ويقولك أطِل وطوّل؟ وش يربح؟
👈 الشيطان كي يشوفك مقبل على طاعة وماقدرش يمنعك منها لأن الله ثبتك فيها وراك محافظ عليها، مايروحش يقولك "احبس ما تصليش" لأنو عارفك ماراحش تسمعلو..
أيا يدير خطة بديلة: يقولك صلي، وطوّل، وزيّن صلاتك.. وهكذا تولي تديرها على جال الناس!
الشيطان واش يربح كي نطول صلاتي ياك عفسة مليحة؟ يربح أنو يفرّغ العبادة من الروح تعها، بدل ما تخرج من الصلاة بأجر وثواب، تخرج منها بسيئة تع رياء وتفاخر، وتولي الطاعة لي كانت راح ترفعك هي السبة لي تحبط عملك!
✅ الأصل في العبادة هي الإخلاص والسرّية بينك وبين الله عز وجل، التابعي الجليل الفضيل بن عياض قال: «ترك العمل لأجل الناس رياء، والعمل لأجل الناس شرك، والإخلاص أن يعافيك الله منهما».
❌ نصلي ونجوّد باش نحافظ على صورتي قدام الناس
✅ نصلي لله وحده، وإذا كنت وحدي في بيتي ولا قدام الناس صلاتي هي هي لأنو المعبود واحد سبحانه
يا أهل الطاعات مكانتكم غالية علابيها الابتلاء تعكم في "النية" أصعب لذلك مكاش مشكل كي يقولو الناس "صلى صلاة خفيفة" مادامها مستوفية للأركان والخشوع، وإنما المشكل لما نربطوا قلوبنا بمدح البشر لي ما يملكوا لينا لا نفع ولا ضر!
كل ما يجيك هاد الخاطر في صلاتك، استعذ بالله، انفث على يسارك ثلاثا وكمل صلاتك عادي جدا بلا ما تزيد تفتح معاه نقاش ولا تعطيله قيمة
وتفكر بلي ربي سبحانه هو الوحيد لي يعلم ما في الصدور وهو الوحيد لي يجازيك.
ربي يصلح نياتنا، ويجعل أعمالنا كاملة خالصة لوجهه الكريم، بعيدة على السمعة والرياء 🌱
