20/10/2025
السلام عليكم ورحمة الله وبركاته
مساء الأنوار وش حوالكم سافا
علابالكم بلي أغلبيتنا اليوم ميعرفوش يستعملوا الذاكرة تعهم بطريقة صحيحة وهذا بسبب الاعتماد الكلي على التكنولوجيا وزيدلها الطريقة الغالطة اللي تعلمناها فالمدرسة تع حكاية ابقى عاود وكرر وسمها بالانجليزية (rote memorization) لأنوا المخ ميخدمش كي المسجل خاطر كون تبقى تكرر فيها مليون مرة ماكش راح تشفى وش قريت حتى ولوكان تبانلك بلي شفيت رايح تكون مؤقتة برك والدليل الشيء اللي قريناه مثلا وحفظناه بهاد الطريقة راح في كال الزيت
الذاكرة تع الإنسان تعتمد على مبدأ الربط بين المعلومات مثلا كاين معلومات محال تنساهم خاطر راك ربطتهم بمعلومات خلاف
وهذا الربط مش شرط يكون بين معلومة ومعلومة بل تقدر تكون بين معلومة وشعور ولا ذكرى
المعلومات راهم أنواع مش غير تع الدراسة بل الصور والأصوات والحروف والمشاعر والعلاقات المنطقية بين المعلومات هوما ثاني معلومات
راح نزيدوا نحكيوا في هاد الموضوع بتفاصيل أكثر في منشورات خلاف تابعونا للمزيد ومتنساوش تبراطاجيو وجام والتفاعل
وكش سؤال خليوهولنا فالتعليقات
