Speak English With MeS

كون نقولكم بلي مراكمش محتاجين كلمات أكثر و قواعد باه تهدرو بالإنجليزية ....

كاين ناس عندها عدد كبير من vocabulary بصح حاسة روحها مزال مش واجدة باه تهدر و حاطين بلي لازم يعرفو الكلمات كل و القواعد كل تع الإنجليزية باه يقدرو يهدرو شوي و هي لا معندناش حتى علاقة بعدد المفردات لي تعرفوهم و لا حتى بالقواعد لانو و ببساطةتحتاج تمرين و تبنيو عادات جدد مع اللغة هاديك برك ....

بصح امريم واش علاقة التحدث في التمرين و العادات ؟ معليش نبسطلكم الفكرة انتم كي بديتو تتعلمو اللغة العربية مع الاول يعني كي كنتو صغار هل كنتو تهتمو بالقواعد ،بالماضي و الحاضر و قداه تعرفو من كلمة ؟ الجواب أكيد راح يكون لا
هيه بصح العربية حاجة و الإنجليزية حاجة أخرى ماعندهمش علاقة!! صح عندكم بصح في زوج لغات و نتعلموهم بنفس الطريقة بصح الفرق الوحيد انو كي كنتو صغار و تتعلمو في اللغة تعكم الام مكنتوش واعيين و درك راكم واعيين
هنا تجي الفكرة لي راني حابتكم تفهموها ،اللغة جامي جامي تتعلموها غير بالحفظ ، لازم عليك تبنيو عادات جدد مع اللغة لي راكم حابيين تتعلموها
كون تبقاو تبعو في الطرق القديمة جامي لاراكم راح تتطورو ، تبقاو غير تحفظو في الكلمات وحدهم ، تسمعو بطريقة عشوائية و متستعملوهمش واش الفايدة إنكم تتعلمو و متستهلكوش واش تعلمتو ؟
حنا عندنا فكرة غالطة حاطينها في راسنا انو منهدرش حتان نولي نستعمل كلمات تع C2 ، إذا انتوما كلمات تع A1 مراكمش تدربو عليهم و كيفاش حابيين توصلو ل C2
و من هنا تجي فكرة بناء عادات جديدة مع اللغة ، كي نقول عادات نقصد كيفاه تتعامل معاها باه نقدر نوصل لوين راني حابة ....

نمدلكم أهم العادات لي راح يبدلولكم طريقة تفكيركم و زيد يعاونوكم تطلعو مستواكم ....
أولا متحفظوش كلمات وحدهم ، تحفظو جمل بسيطة و لا chunks واجدين (كلمات وحدهم لالا)
ثانيا السمع ثم السمع ثم السمع (لازم كي تتعلمو أي لغة نمشيو معاها بالمنطق ،كيفاه انا منسمعش اللغة هاديكا و حابة نهدرها ؟؟ يلزم عليا نسمع لازم بصح مش أي حاجة نتفرج و لا نسمع بودكاست قد المستوى تيعي هادي أهم حاجة حابتكم تفهموها ، مش كي تروحو تسمعو بودكاست و لا فيديو فوق مستواكم يعني راح تتعلمو فيساع و توليو تهدرو كيفهم لا بالعكس اليوم الاول برك تسمعو و مبعد تكرهو خاطر مراكمش راح تفهمو 90% من واش راهم يهدرو ....)
ثالثا إذا حابين توليو تهدرو بالإنجليزية ، حطو في بالكم بلي الكلمات لي عندكم تكفي و بلي كل يوم راح تزيدو تتعلمو كلمات جدد و بلي حتى كي تغلطو عادي
لازم كل يوم تدربو أتفسكم تهدرو باه عقلكم يتعود على اللغة ....
رابعا القراءة بصوت عالي ، مثلا إنكم تسمعو نص و مبعد تحاولو تقراوه بالصوت هكا باه تسمعو أنفسكم و تشوفو وين غلطتو و تصلحو ، و القراءة بصوت راح تخليكم تولي عندكم ثقة أكثر مع اللغة ....
خامس و آخر حاجة هي انو توليو ديما في آخر اليوم تلخصو واش صرالكم في نهاركم بجمل بسيطة هكا كي شغل تدخلو اللغة في حياتكم اليومية ....

بمجرد إنو تتعلمو مع اللغة بطريقة بسيطة و صحيحة راح تولي ساهلة ، فقط عليكم تنظمو أفكاركم و ديرو كراس صغير تكتبو فيه واش لازم ديرو يوميا كيفاه نتعلم الإنجليزية هكا راح تسهلو على مخكم الخدمة و راح تطورو من مستواكم بإذن الله 🍁

و انتم قولولي واش هوما العادات لي تستعملو فيهم باه تطورو من مستواكم ؟

وفقني الله و إياكم 🌹
دمتم في رعاية الله و حفظه..
Meriem.

نقولكم علاش كي تتعلمو كلمات و لا معلومات جدد في الإنجليزية تنساوهم فيساع ؟
خاطر متعرفوش feedback loop .....

ناس ياسر حاطين في بالهم بلي باه نتعلم أكثر لازمني جهد و معلومات أكثر صح ولا لا ؟ بصح كون نقولكم بلي التعلم تاع الصح حاجة أخرى خلاص ....
اليوم بإذن الله راح نحكيلكم على feedback loop و كيفاه تعاونكم تتعلمو و متنساوش واش تتعلمو في اللغة الإنجليزية....
أول حاجة و قبل منشرح نروحو نعرفو واش معناها أصلا feedback loop
كي نشوفو المعنى تاعها في اللغة العربية نلقاو معناها التغذية الراجعة و هي عبارة على نظام مقسوم ل3 مراحل كون طبقوها في كل مرة كي تكونو تتعلمو حاجة بإذن الله متنساوهاش خلاه ....
الفكرة تع هاد النظام انو جامي جامي تتعلمو حاجة بلا متختبرو أنفسكم هل فهمتو مليح ولا لا ، الغلطة لي معظم الناس ديرها هي انو تتعلم بلا متختبر روحها و مبعد تجيكم لحظة إدراك و علاش رانا ننساو مع انو رانا فاهمين .....

العقل تعنا ساعات كي نكونو نقراو تبانلو بلي راك فاهم 10/10 بصح كون دير اختبار بسيط على واش تعلمت نلقاو ارواحنا نسينا كلش و نعاودو نرجعو نقراو من الأول ( الفكرة هادي تنطبق في الدراسة ككل مش غير في تعلم اللغات ) انا تان كان تصرالي مع الاول و كنت ديما نحوس على حل لهذا المشكل لانو راه يضيعلي في وقتي نقرا حاجة. نحس بلي فاهمتها و مبعد نلقا روحي مش فاهمتها حوست حوست و لقيت هادي feedback loop هي الحل ....

رانا فهمنا المعنى تاعها ا مريم ،بصح كيفاه نطبقها ؟
ساهلة خلاه ،أولا تحطو هدف واحد مثال الهدف تيعي اليوم راح نتعلم prepositions ( لي هوما حروف الجر in ,on ,at .....) لازم تركزو على حاجة واحدة باه مخكم يستوعب أكثر
بعد ما تكونو فهمتو المعنى تعهم و وقتاه نحطوهم و كلش و تحسو بلي صاي فهمتو مليح مليح مباشرة تروحو تختبرو أنفسكم
اما عن طريق تمارين ولا الطريقة لي نعتمدها أنا شخصيا و مفيدة جداااا لي هي نشرح واش فهمت بالصوت كي شغل راني نشرح لشخص
و انتم تشرحو راح تشوفو أنفسكم وين غلطتو ،و وين تخربطتو و هنا كي تعرفو الخلل وين راه راح تزيدو تطورو من أنفسكم و بالعكس تحسو أنفسكم صح قاعدين تتعلمو، بعدما تعرفو الاخطاء تعكم صلحوهم دقيقة هاديكا بعد مش تقولو مبعد......
و السر هنا لي تعلمتو و ديتو قاعدة في حياتي لي هو كي نكمل نتعلم أي حاجة نحاول نلخصها في جملة هكا باه نزيد نتاكد اني فهمت مليح ....
و باه تعرفو روحكم بلي صاي تعلمتو لازم تمشيو على هاد المقولة لي تعجبني ياسر

^^If you can't explain it simply, you didn't learn it .^^

معناها إذا مقدرتوش تشرحو حاجة تعلمتوها ، يعني مزال مفهمتوهاش مليح ....

و انتم قولولي هل كنتو تعرفوها من قبل أو لا ؟ و إذا تعرفو تقنيات أخرى تسهل عليكم تعلم اللغة الإنجليزية اكتبوهم في التعليقات لتعم الفائدة....

وفقني الله و إياكم 🌹
دمتم في رعاية الله و حفظه..
Meriem.

كيفاه نتعلمو اللغة الإنجليزية في شهر رمضان ؟

عبالي بلي كاين ياسر كي دخل شهر رمضان حبسو انهم يتعلمو الانجليزية ( صح ولا لا ) ، خاطر يبانلهم بلي رمضان مراهوش أفضل وقت باه الواحد يتعلم فيه .....
بصح واش كون نقلكم بلي أفضل شهر تقدرو تتعلمو اللغة الإنجليزية هو رمضان ؟..
هيه بصح كيفاه نتعلم و انا معنديش خطة ؟
اليوم بإذن الله نمدلكم خطة سهلة و بسيطة تطورو بيها مستواكم في الانجليزية و بإذن الله منا حتان ينتهي الشهر تشوفو الفرق ......

أولا و أهم شي تحطو وقت محدد كل يوم تسمعو فيه ، سواء في الصباح ،بعد العصر و لا حتى بعد الفطور المهم وقت واحد متبدلوهش هكا باه العقل تعكم يوالف و تولي مش شغل عادة و لازم كل يوم يقرا على هاديك الساعة و زيد يكون مركز فيها خلاه ...
ثانيا انو تحددو قداه وقت ساعة ، ساعة ونص او حتى نصف ساعة المهم تستمرو ( كل ما تزيدو سوايع كلما تتعلمو أكثر)
خلينا نقولو ساعة هادي الساعة راح تكون مقسمة و فيها راح تركزو على 3 حوايج السمع و لي هو أهم حاجة ، التحدث و تاني تعلم الكلمات ، و يما انو في رمضان تقدرو تسمعو بودكاست ديني و إذا تحبو مواضيع مختلفة كاين موقع اسمو
Ed.ted.com و هذا الرابط تيعو 🌱

Lessons Worth Sharing | TED-Ed https://share.google/OR8WdlhaMXg9455qG

هذا فيه فيديوهات قصيرة فيها موضيع يااااسر و منها تتعلمو مفردات مختلفة ، و الهدف من السماع مش غير نسمعو باه نسمعو لاااااا هنا الغلطة لي ديروها كامل ، كي تسمعو حاولو تركزو مع النطق ،مع الكلمات مع الجمل باه تتعلمو (كون تسمعو بلا تركيز مش راح تتعلمو)
و كيما ديما نقلكم السمع خليه يكون ثلاث مرات (المرة الأولى تفهمو الموضوع ، الثانية تبداو تتعلمو كلمات و تركزو مع النطق ،المرة الثالثة حاولو ديرو shadowing تع جمل بسيطة و ابقاو عاودو مع الفيديو هكا تبداو تدربو أنفسكم على التحدث خاصة للمبتدئين)
بعد ما تسمعو الفيديو تكون تعلمتو كلمات نقولو 5و لا 6 تديو هادوك الكلمات لشات جيبيتي اطلبو منو يديرلكم قصة بسييطة فيها الكلمات هادو و حاولو تقراو وتعاودو هديك القصة ( إذا مزلتو في البداية راح تجيكم شوي صعبة القراءة ، ننصحكم تديو القصة هاديك لتطبيق text reader هو يقرالكم القصة هاديك و انتم عاودو حتان توليو تعرفو تقراوها وحدكم ) ....
و مع الاخير إذا تحبو تقدرو ديرو دقيقة كتحدي تحاولو تهدرو واش تعلمتو مع أنفسكم باه تشوفو رواحكم هل تنطقو الكلمات بطريقة صحيحة و هادي طريقو ممتازة تساعدكم خلاه ( مش لازم الجملة يكونو صحاح كامل و مش لازم النطق يكون perfect من المرة الأولى المهم تحاولو و تعاودو و تعاودو حتان تتعلمو )

و بهذا تكونو درتو السمع + تعلم كلمات جديدة + shadowing + التحدث في ساعة قادرين ديرو هذا كامل يعني هي خير و بركة ما شاء الله ، عليكم غير تستمرو برررك

نصيحة : ديما لازم يكون عندكم كراس مخصص الانجليزية ، باه تكتبو فيه الكلمات و المعلومات لي تعلمتوهم و باه تبقاو ديما متحفزين ننصحكم ديرو في الكراس تعكم كي شغل جدول فيه يوم واحد ،يوم اثنين و كلما تطبقو ديرو تم ✓ .....
و تشوفو كيفاه يزيد الحماس تعكم

🍁 و أكيد متنساوش :
•وردكم من القرآن
•الاستغفار
•الدعاء

وفقني الله و إياكم 🌹
دمتم في رعاية الله و حفظه..
Meriem.

هي نعرف بلي تعرفو كلمات ياسر بالإنجليزية بصح هل تعرفو الكلمات الخاصة بشهر رمضان بالإنجليزية ؟!..

اليوم بإذن الله نقولكم كيفاه نقولو أهم الكلمات المتعلقة بشهر رمضان بالإنجليزية ، هوما كاينين كلمات يقعدو نفسهم بصح كاين كلمات يتبدلو .....
اول كلمة هي
• رمضان = Ramadan (تقعد رمضان متتبدلش)
•الصيام = fasting
•السحور = suhur
•شروق الشمس = sunrise
•الفجر = Dawn
•غروب الشمس = sunset أو dusk
•هلال رمضان = crescent of Ramadan
•الصلاة = prayer
•صلاة التراويح = tarawih prayer
الأذان = call to prayer
تلاوة القرآن = Recitation of Quran
•الصدقة = charity
عبادة = worship
الصبر = Patience
ليلة القدر= Laylat al Qadr ولا The Night of Power
المسجد= Mosque

هادو أهم كلمات لي نستعملوهم في رمضان ، قولولي قداه تعرفو من كلمة و هل نديرلكم سلسلة رمضانية لتعلم الانجليزية ؟
✓نصحية إذا حابين تتعلموهم حطوهم في جمل بسيطة باه متنساوهمش ....

نخليلكم كيفاه تنطقو كل كلمة في أول تعليق 🍁

وفقني الله و إياكم 🌹
دمتم في رعاية الله و حفظه..
Meriem.

4 قنوات في اليوتيوب يعاونوكم تتخلصو من تعفن الدماغ...

بما انو رانا في شهر مبارك ،و رانا صايمين وعلاش تاني منصونوش على الدوبامين الساهل و السوشل ميديا. كيما تعرفو كامل بلي رانا في زمن ولينا منقدروش نعقبو ساعة بلا منحكمو الهاتف تعنا و هذا خلانا متركزوش على الاهداف تعنا و نطورو من أنفسنا و المشكل انو نعرفو هذا المشكل بصح مشنا حابين نديرو خطوة و نحبسو لهذا اليوم بإذن الله جبتلكم 4 قنوات ما شاء الله يساعدوكم في مجالات ياسر و منهم الانجليزية أكيد .....
نبداو بأول قناة دروس أونلاين ، لي يعرف مريم و يعرف صفحتي تلقاوني ديما نحكي على هاد القناة لانو سبحان الله ساعدني في حوايج ياسر سواء في مستواي في اللغة الإنجليزية كي كنت نتعلم و لا فيديوها تحفيز و توعية يعني يشرح بواحد الطريقة بسيييطة و تخليكم تحبو تتعلمو أكثر يعني مش راح تملو خلاص...
و بما انو رانا في رمضان و عبالي متقدروش تركزو ياسر خاصة كي تكونو تتعلمو الانجليزية ،دار سلسلة اسمها English takeaway فيديوهات قصيرة بصح فيها فائدة كبيرة و الحاجة لي تعجبني انو مش غير يشرح و يزيد يمدلكم تطبيقات بسيطة و حاولو تكتبو في كراسكم مش غير تتفرجو الفيديو ( كاش نهار ان شاء الله نحطلكم الملخصات لي كتبتهم كي كنت نتعلم من هاد القناة ...) بالنسبة ليا هادي القناة كنززز
تسما ملخص القناة هادي = إنجليزية سهلة+ توعية في الدراسة و كل المجالات 🌱
ثاني قناة هي دوبامكفين ، هادي القناة متنوعة و تركز على تطوير الذات ، يحكي على طرف ياسر كيفاه تخرجو من comfort zone و هادي أهم حاجة باه ينجح الإنسان و زيد يشرحلكم الكتب خاصة للناس لي متحبش تقرا هادي القناة تعاونكم يااسر خلاه
ثالث قناة هي قناة الشيخ الشويعر ،هادي القناة موجهة للناس لي تحب تتعلم العلم الشرعي و تفهمو بطريقة جد جد بسيطة
صدقوني أبسط من شرح الشيخ الشويعر مكانش فيها كيفاه تبداو تتعلمو العلم الشرعي ، أداب الدعاء و كيف يستجاب ( انا مع الاول كنت نعرف بلي الدعاء انو أسأل الله عز وجل واش حابة و فقط ، لكن بعد مشفت فيديو يحكي على آداب الدعاء تبدلت حتى طريقتي في الدعاء .. ) نصائح وين العلم الشرعي و كيفاه نحفظوه يعني كلش مفصل .....

آخر قناة هي قناة عبد الله العلاوي هادي القناة بالذات تخليكم تبدلو طريقة النظر تعكم للحياة ،اذا تحسو أنفسكم ديما في توتر و قلق ،أفكار سلبية و حابين تخرجو من هادي الدوامة ننصحكم بالقناة هادي .....

نصيحة: خليو هذا رمضان يكون بداية جديدة لحياتكم ، ركزو على أنفسكم و إنكم تطورو منها ،حبسو من تضييع الوقت تعكم كيما راكم تشوفو الوقت يجري سبحان الله
إذا راكم ديرو في حاجة و حابين تحبسو نقلكم كملو توكلو على الله و كملو خاطر مبعد راح تندمو إنكم مستغليتوش هذا الوقت .....

نخليلكم رابط كل قناة هنا :
قناة دروس أونلاين 🍁
https://youtube.com/?si=UZlGNMhF9jnl6oWJ
قناة دوبامكفين 🍁
https://youtube.com/?si=0VStwqrWfS_YdE1q
قناة الشيخ الشويعر 🍁
https://youtube.com/?si=egGgqfeYm9OdncM-
قناة عبد الله العلاوي 🍁
https://youtube.com/?si=opVTOK6ZQecSeZUb

و انتم واش هوما القنوات لي راكم تبعوهم و حسيت بلي صح بدلولكم حياتكم ....

وفقني الله و إياكم 🌹
دمتم في رعاية الله و حفظه..
Meriem.

ها قد أقبلت أولى ليالي رمضان،
شهر الرحمة والغفران،
تُصفَّد فيه الشياطين، وتُغلَّق أبواب النيران، وتُفتَّح أبواب الجنان،
وللهِ فيه عتقاء من النار في كلِّ ليلة..

فاللهم اجعلنا من عتقائك من النار، واكتب لنا فيه القبول والمغفرة والرضوان
آمين

رمضانكم مبارك 🍁

علاش كي تقلقو من الانجليزية تحبسو ؟

هادي الحاجة و لا هذا السؤال راح يصادفكم كي تعودو تتعلمو في اللغة الإنجليزية ، تبداو مع الاول متحفزين و كلش مبعد كي تبداو تقلقو تحبسو كلش و ترجعو لنقطة الصفر....
وعلاش انا بدال منحبس خلاه ، ندي فترة راحة نجدد فيها طاقة تيعي و نكمل مين حبست ، الغلطة لي ناس ياسر يديروها هي يحبسو و يرجعو من الأول خلاه هكا راكم تضيعو في وقتكم و جهدكم . هادي هي طبيعة الانسان يمل من الحوايج لي يديرها كل يوم و خاصة كي ميشوفش النتائج من الأسبوع الاول ...
حاولو تديو يوم او يومين راحة إذا قلقتو و عاودو ارجعو كملو متحبسوش عادي و هذا مش راح يؤثر على مستواكم ..
إنكم تديو فترة و ترجعو أقوى خير من تبقاو تقراو و متستفادو والو ولا تحبسو خلاه .....
نصيحة :
شفتو في الفترة هاديك لي تخممو فيها انا منقدرش نتعلم و انا تعبت و انا نحاول و مشني قاعد نتطور ديرو break خفيف و كملو خاطر كون راح تحبسو راح تندمو مبعد جربتها أنا شخصيا ، و إذا مهما درتو و شفتو مستواكم متقدمش معناها الطريقة لي راكم تمشيو عليها مناسبتكمش مش معناها انتم متقدروش تتعلمو اللغة جربو طريقة اخرى ، اللغة الإنجليزية لغة بسيطة تحب برك الممارسة اليومية و الاستماع ياسر .....
و ديما ادعيو ربي يسرلكم و يسهل عليكم ،ممكن تقولو الدعاء معندوش علاقة هنا بصح نقلكم عندو أثر كبير و كي تدعيو ربي يرزقكم التوفيق و التيسير....

و انتم قولولي كي تقلقو تحبسو و لا تكملو ؟

وفقني الله و إياكم 🌹
دمتم في رعاية الله و حفظه..
Meriem.

زعما واش هيا أقوى طريقة نسمعو بيها البودكاست ......

كاين ناس ياسر يحسو بلي كي يسمعو البودكاست ميستفادو والو زعما المشكل في الفيديو و لا في الطريقة لي رانا نسمعو بيها البودكاست ؟
اليوم بإذن الله نحكيلكم على طريقة تخليكم تفهمو و تركزو و تهدرو تاني و زيد جبتلكم قناة بودكاست ما شاء الله...
نبداو أولا كيفاه نسمعو بطريقة صحيحة ؟
اول حاجة ديروها هي انكم تسقسيو أنفسكم وعلاش راني نسمع في بودكاست هل باش تحسن السمع تيعي ، و لا نتعلم كلمات جدد ، و لا نحسن النطق تيعي . كي تحددو الهدف راح تركزو أكثر على عكس إنكم تسمعو باه تسمعو برك .....
ثانيا و أهم خطوة لي ديما نوصي عليها انو تسمعو بودكاست على قد مستواكم مثال مستواكم A1 يعني مستوى مبتدئ تكتبو في اليوتيوب English podcast A1 level ديما خيرو على حسب مستواكم . كاين ناس ياسر يحسابو كي يسمعو فوق مستواكم راح يتعلمو فيساع و هي لا مراحش تفهمو و مش راح تركزو خاطر المفردات لي يستعملوهم صعاب على مستواكم لهذا أعيد و أكرر ( بودكاست = نفس مستواكم ) . القاعدة تقول لازم كي تسمعو تفهمو على الأقل 60% ولا 80% سينون راح تملو .و بعدها كي يتطور مستواكم طلعو ل A2 ( كل واحد و المستوى تيعو) ......
درك نروحو لأهم حاجة كي تسمعو بودكاست مش غير مرة برك و مبعد تقفلو الفيديو لا كاين مراحل هي من الافضل تسمعو 3 مرات و علاش ؟
المرة الأولى تحاولو تفهمو الفكرة العامة تع الفيديو...
المرة الثانية تحاولو تفهمو شوي بالتفصيل ، إذا كاين كلمات جدد اكتبوهم و حاولو تفهمو المعنى تع الكلمات من context قبل متشوفو الترجمة هكذا باه تقويو الذاكرة تعكم ...
و المرة الثالثة و الاخيرة هنا حاولو ديرو مش شغل shadowing يعني هنا المرحلة هادي تركزو أكثر على النطق
نبداو بكلمات تسمعو وتعاودو بعد الفيديو بعدها جمل قصيرة و هكذا ....
و كيما تعرفو السمع يمشي مع التحدت ، إذا تحبو تتطورو فيساع كي تكملو الفيديو حاولو تلخصو واش فهمتو ( هنا باه تدربو رواحكم على التحدث و يتنحالكم الخوف هذاك ) ...
و بما انو ديما تقولولي مريم اعطينا بودكاست مليح و مفيد جبتلكم قناة ممتازة اسمها the cozy English . القناة هادي يحكيو فيها على مواضيع مختلفة ،و هادي حاجة مليحة باه تتعلمو كلمات في مجالات ياسر و الحاجة لي عجبتني في هادي القناة انو كي تهبطو لصندوق الوصف تلقاو pdf على podcast كامل يعني واش حكاو فيه يساعد ياسر الناس لي تحب تسمع و تقرا باه تركز ....
انا ندير split screen كيما راكم تشوفو في الصورة هكا نسمع و نقرا و نشوف كيفاه الكلمات يتكتبو هادي طريقتي ممكن تساعدكم ......
هذا رابط القناة :
https://youtu.be/DLjaoWw3c4k?si=76d168IycRnPJ886

ان شاء الله الشرح كان واضح ، درك مكاين حتى عذر الخطوات كاملة قدامكم عليكم غير تسمعو و تتعلمو برك 🌱
نصيحة :
ديرو كراس خاص بالإنجليزية اكتبو فيه الكلمات و الجمل لي تتعلموهم (جامي تتعلمو كلمات وحدهم ديما حطوهم في جمل بسيطة باه متنساوهمش)

و انتم قولولي واش هو البودكاست لي عجبكم و راكم تستفادو منو ؟

وفقني الله و إياكم 🌹
دمتم في رعاية الله و حفظه..
Meriem.

كامل عندنا أهداف حابيين ننجزوهم بصح نتكاسلو و كل يوم نقولو غدوا و مكانش الحل لهذا المشكل ؟؟

ديما يجيوني رسائل في الخاص مريم راني حابة نتعلم الإنجليزية حفزيني باه نتعلم ....
اليوم جبتلكم كتاب تطورو بيه اللغة الإنجليزية تعكم و زيد تفهمو كيفاه تتخلصو من الكسل يعني تضربو عصفورين بحجر واحد .....
ارواحو نحكيلكم شوي على الكتاب هذا ...
الكتاب هذا اسمو do it today و اسم الكاتب تيعو هو Darius foroux , المحتوى تع الكتاب يخليكم تفهمو المشكل قبل ما يمدلكم الحل يعني يفهمكم علاش رانا نديرو في التسويف مع انو عندنا مهام لازم نديروهم و يبينلكم تاني بلي التحفيز جامي يجي قبل العمل يجي بعد متبداو يعني إذا حابين تتعملو الانجليزية متستناوش التحفيز يجي كي تبداو و هادي الفكرة الأساسية ....
و زيد يفهمكم كيفاه تقسمو المهام الكبيرة إلى معاك صغيرة و كيفاه تركزو و متبقاوش مشتتين خاصة بالهاتف و كيفاه تزيدو من الانتاجية تعكم .....
الحاجة المليحة في الكتاب هذا انو لغة تيعو بسيطة يعني تستفادو من المحتوى و زيد تتعلمو كلمات جدد في context ....

رابط الكتاب :
https://us.docworkspace.com/d/sIEzsnc1Z26OrzAY

و إذا حابين pdf تلقاوه في صفحتي على التلغرام...

و انتم قولولي كيفاه راكم تتعاملو مع مشكلة التسويف ؟

وفقني الله و إياكم 🌹
دمتم في رعاية الله و حفظه..
Meriem.

كاين ناس لحد الآن معبالهمش كيفاه shadowing تقدر تبدللهم مستواكم في اللغة الإنجليزية ؟

كنت حكيت على تقينة shadowing من قبل ، لكن ناس ياسر معرفوش كيفاه يطبقوها و في واش راح تعاونهم ،لهذا اليوم بإذن الله راح نحكيلكم عليها بالتفصيييييل......
أولا واش معناها shadowing هي بالعربية معناها ظل بصح في الحقيقة هي تقنية يستعملوها لي راهم يتعلمو في اللغات باه يحسنو النطق تعهم خاصة للناس لي حابة تتعلم accent معينة.......
بالمختصر هي إنكم تقلدو طريقة كلام تع شخص نفس tone , stress حرفيا كلش حتان تقريبا توليو تحكيو كيف هذاك الشخص ....
كيفاه نطبقوها ؟
ساهلة خلاص تخيرو فيديو ، مثال انا حابة نتقن British accent نخير فيديو يحكيو فيه يستعملو ال accent هاديك و نسمع مش مرة مش إثنين مش ثلاثة أولا نحاول نفهم السياق مبعد نروح نركز مع النطق الصحيح تع الكلمات و مبعد نركز على intonation و stress و كلش مبعد بلعقل نبدا نقلد في طريقة الكلام نبقا نعاود نعاود حتان نولي تقريبا عندي نفس النطق و accent .....
Shadowing كاين ناس ياسر حاطة بلي راهي تقنية ماعندهاش فائدة بصح لي ميستعملهاش راح يضيع عليه فرصة و يزيد في وقت باه تتعلمو...
هيه ا مريم بصح واش هي الفائدة تعها؟
تحسنلكم النطق ، تتعودو على اللهجات الحقيقية ، تعاونكم في إنكم توليو تهدرو شوي بطلاقة و تنقصو شوي من الاعتماد على العربية و متبقاوش ترجمو.....
انا صراحة استعملتها باه نتعلم British accent, و درك راني نستعمل فيها باه نتعلم الإسبانية مع الاول تجيكم شوي صعيبة بصح كي توالفو و تشوفو النتيجة تعها راح تتشوكاو و تبقاو غير ديرو فيها .....
و إذا كنت مبتدئة واش ندير ؟
ابداو شوي تعلمو الأساسيات و مبعد ابداو بفيديو قصير ابداو ب 10 ثواني و مبعد 15 ثانية و هكذا ......
نصيحة جامي جامي تديرو shadowing لفيديو فوق مستواكم ، و لازم تصبرو ياسر شوي خاطر من الأول
قتلكم شوي صعيبة انا نشفا اول فيديو قعدت فيه سمانة كاملة و انا نعاود فيه باه قدرت نحكي كيفو يعني اديو وقتكم الكامل و متزربوش رواحكم خلاه و راح تشوفو كيفاه النطق و acceny تعكم كيفاه يتحسنو بصح وش لازم استمرارية ......
ملاحظة صغيرة برك ، كي تحبو تتعلمو British accent اكتبو في اليوتيوب
British accent shadowing
و إذا حابين american accent اكتبو
American accent shadowing
و راح يخرجولكم فيديوهات ياسر و خيرو لي يعجبكم ، كيما قتلكم ابداو بفيديو قصير و مبعد زيدو كل مرة .....

و انتم قولولي هل جربتوها من قبل و لا لا ؟
و إذا تحبو نشارك معاكم تطبيق يسهل عليكم shadowing قولولي في التعليقات.....

وفقني الله و إياكم 🌹
دمتم في رعاية الله و حفظه..
Meriem.

قالو بلي التلغرام فيه ياسر قنوات مفيدة و فيه حتى دورات مجانية اعطيوني قنوات مفيدين تبعوهم
دينية ، تعليمية المهم مفيدة ......

Meriem .

نحكيلكم أسرار مستحيل بعدها متهدروش بالإنجليزية....
أولا خلينا نفهمو علاه نخافو نهدرو ، مش لانو منعرفوش ولا ،اولا لانو مش متعودين نهدرو ياسر و تاني حاجة خايفين من انو نغلطو و ناس تضحك علينا و تطيحو في موقف تحشمو حتى تزيدو تهدرو مرة أخرى ....
درك انتم كي متهدروش بالإنجليزية و متعودوش أنفسكم تهدروها كيفاه حابيين توليو تتقنوها ؟؟
انا مع الاول تاني كنت نحشم حتى مع نفسي انو نهدر بصح قلت بيني و بين نفسي مريم يا تقعدي تشوفي الناس يهدرو و أنت ساكتة و لا تكسري هذاك الحاحز يلي هو الخوف و نولي نهدر كيما يهدرو هوما ....
عبالي كي ندخلو الجامعة و لا كي تقراو في مدرسة خاصة و لا أي بلاصة راح تلقاو ناس ما شاء الله عندهم طلاقة في اللسان، حتان تسقسيو أنفسكم علاش انا مش كيفهم؟ هنا يجي نفس الجواب لي ديما تمدوه كعذر لأنفسكم باه متهدروش .....
خليني نمدلكم مثال بلاك تفهمو بلي الناس تهتم بأفكارك مش إذا لغة تيعك صحيحة او لا ( أعرف كاين ناس تتمسخر من ناس لي راهم مبتدئين خاصة كي يغلطو في حاجة صغيرة ، جماعة الخير يلزم نشجعو هذاك لي يتعلم مش نضحكو عليه خاطر حنا في فترة من الوقت كنا مبتدئين و نغلطو)
المهم قتلكم واحد النهار حضرت speaking club فيه أطباء ، و فيه معلمين ..... المهم و المستوى تعهم في الانجليزية كل واحد كيفاه يعني مش كل عندهم نفس المستوى ...
كي بداو يهدرو واحد فيهم نلقا مركز على accent و لا الاخطاء كلنا كنا مركزين على الافكار باه نتناقشو مع بعض و هذا هو المطلوب باه نتعلم الطلاقة fluency منبقاش مركزة على accuracy يلي هي القواعد خاطر كون نتبع هكا جامي مراح نهدر ....
كي تعودو تتعلمو خاصة مع الاول حطو في بالكم المهم انو الفكرة لي راني حاب نوصلها تكون مفهومة و القواعد تجي وحدها بالممارسة (القواعد نقولها للمرة الألف ميتحفظوووش) ...
كون ديرو كل يوم 10 دقائق بينكم بين أنفسكم تهدرو بالإنجليزية على موضوع حابينو مستحيل متتطوروش مستحيل ....
كي تكونو مبتدئين خلاه أكيد مش راح تبداو ب10 دقائق ،تبداو أولا ب 30 ثانية و بعدها 40 ، 50 حتان توصلو لدقيقة و هكذا كلما تطورو كلما تزيدو في الوقت ....
نصيحة :
الانجليزية لغة بسيطة إذا بسطتوها في مخكم هادي أولا لانو كلش يجي من العقل ( اللغة الإنجليزية لغة سهلة و انا نقدر نتعلمها فقط نحتاج شوي وقت . نحبكم هكا تهدرو مع أنفسكم ) ...
الممارسة تكون يومي يالوكان 5 دقائق المهم ميعديش نهار إلا و هدرتو ...
مع الاول متركزوش ياسر على المثالية إنكم ديرو جمل صحيحة 100% أبدا بشوي و كلش يجي مع الوقت و كثرو من السمع السمع السمع لانو هو الشر باه تهدرو مكاين حتى سر آخر...
لازم عقلكم يبدا يوالف اللغة باه يهدر مش انتم متسمعوش و معندكمش vocabulary و حابين تهدرو ، لا نبدا أولا بالسمع نتعلم شوي كلمات و نبدا ندير جمل بسيطة و بعدها نروح نهدر هكا كيفاه لازم تمشيو 🌻

و انتم قولولي أسرار تعلمتوهم باه تهدرو بالإنجليزية بطلاقة ...

وفقني الله و إياكم 🌹
دمتم في رعاية الله و حفظه..
Meriem.