Engr. Msheireb

Engr. Msheireb مهندس ميكانيكي 🦾⚙️ وأستاذ لمادة الميكانيكا والفيزياء لطلاب الشهادة الثانوية 👨🏻‍🏫

انتقل عمي إلى جوار ربه.. إنا لله وإنا إليه راجعون.. عمي هو من أحد الشخصيات الناجحة على الصعيد العلمي والعملي واللي كانت ...
25/07/2026

انتقل عمي إلى جوار ربه.. إنا لله وإنا إليه راجعون.. عمي هو من أحد الشخصيات الناجحة على الصعيد العلمي والعملي واللي كانت قدوة ليا في حياتي.

فضلا ادعوا له بالرحمة والمغفرة والثبات عند الجواب.
ولا تقول إلا ما يرضي ربنا!

17/07/2026

بلغني أن امتحان الرياضيات جي صعب.. بس قلت بيني وبين نفسي أكيد زي كل عام سؤالين تلاتة جو فيهم أفكار أو الوقت ما سدش فالطلبة طلعوا يعيطوا.. بس لما تشوف الأستاذ أحمد طالع في فيديوات ويتكلم (وهذا شيء عمره ماصار) عرفت أن الموضوع مش بسيط.

الأستاذ أحمد قامة علمية وكنت طالب عنده في يوم من الأيام وإنسان استفدت منه شخصيا على جميع الأصعدة وتشرفت بأني نكون أستاذ معاه لفترة سنتين.

اسألوا الدفعات القديمة أو دفعتي على الأقل على الأستاذ واللي أغلبهم ناجحين و في أماكن علمية عالية.. بغض النظر أن فيه منهم يقروا فيكم.. هذا وإن دل دل أن الأستاذ فعلا كانت ليه بصمة في بناء الأجيال على الصعيد التعليمي والشخصي معا.

15/07/2026

يا مسافرين اكفيكم خلع الليبيين..

مع الظهر تقريبا شرين التلفون من رقم ليبي على واتس اب.. خير اللهم اجعله خير..

أول ما قلت ألو... نسمع في حد يبكي ويعيط.. تخيل أنت في تلك اللحظة شن ممكن يصير فيك وشن ممكن تتخيل.. رقم مجهول وحد يعيط!!

شوية حد خدي التلفون وقالي أنت استاذ عبدالفتاح؟

أيوه أنا أنا خير اللهم اجعله خير من معاي وهل فيه حاجة سوء ولا شن صاير؟

لا سامحني بالله عليك أنا بنتي مش مجاوبة في امتحان الميكانيكا واليوم الامتحان جي صعب وهي تتابع فيك هي وقروب فصلها وتو مقعمزين يستنوا فيك تنزل نموذج الحل!

امتحان؟ ميكانيكا؟ ... أنا قعدت تقريبا نص دقيقة نستجمع في قوتي ونركز في شن تقول...

حاولت نقوللها بكل هدوء أني ليا فترة سنتين تقريبا معاش نعطي وراني مسافر.. تقولي نعرف نعرف غر نبيك تحل الامتحان وتنزله باش نتأكدوا من الحل..

قلتلها حتى لو كنت نبي نحلها في الرعشة هذه فشلت🥶..

وأنا استغربت أصلا أن فيه من دفعة 2008 من يتابع فيا..

المهم بما أنه طلع فيه ميكانيكيون يتابعوا فيا من دفعة ما تلاقيتش معاها للأسف، طمنونا عليكم شن صار معاكم؟

#ميكانيكا

امتحانات TU Berlin قاعدة أسهل 😅كان الله في عون طلاب الشهادة أنا بروحي ماعرفتش نحله السؤال هذا! 😅
05/07/2026

امتحانات TU Berlin قاعدة أسهل 😅

كان الله في عون طلاب الشهادة أنا بروحي ماعرفتش نحله السؤال هذا! 😅

بلغني بكل حزن خبر وفاة الأستاذ محمد غيث مدرس مادة الإحصاء وعضو هيئة التدريس بمركز ترانيم العلم.ولا نقول إلا ما يرضي ربنا...
24/06/2026

بلغني بكل حزن خبر وفاة الأستاذ محمد غيث مدرس مادة الإحصاء وعضو هيئة التدريس بمركز ترانيم العلم.

ولا نقول إلا ما يرضي ربنا، إنا لله وإنا إليه راجعون..

لم تجمعني به إلا لحظات مؤقتة ولكن صيته وأخلاقه العالية سبقت اسمه.. اسأل الله العلي العظيم أن يتقبله في عليين وأن يتجاوز عنه وأن يجعل قبره روضة من رياض الجنة وأن يخلفنا خيرا في هذا المصاب وأن يلهم أهله وذويه الصبر والسوان.

في وفاته رسالتان:

• الأولى: كم من مؤمّل في الدنيا والموت يطلبه!
كل واحد فينا يهيم في دنياه ولا يجري في خلده شيء من الآخرة والنفس تُمنّيه وكأنه مخلّد فيها.. ليس القصد أن نتوقف عن السعي وعن العمل، ولكن يجب أن تكون كل خطوة نخطوها بأن يكون الله جل جلاله نصب أعيننا وأن يكون كل عمل مقرون بالله عز وجل.

• الثانية: سبحان من سخر كل هؤلاء البشر للدعاء له، وهذا إن دل دل على القبول، ولا نزكي على الله أحد ولكننا شهداء الله في الأرض.. والسؤال هو لو توفاك الله وكنت في خبر كان، هل سيكون لك أثر طيب في هذه الدنيا يدرّ عليك الحسنات بعد وفاتك؟ هل فكرت في ذلك؟

أخيرا أدعوكم أن يكون هذا البوست صدقة جارية لروحه للدعاء له ولسائر موتى المسلمين!

زعما هل فعلا العلاج والطب في ليبيا أحسن من الخارج؟ خليني نجاوبك بالقصة اللي بنحكيها باختصار قبل ما تنفعل عليا:فيه شخص من...
15/06/2026

زعما هل فعلا العلاج والطب في ليبيا أحسن من الخارج؟

خليني نجاوبك بالقصة اللي بنحكيها باختصار قبل ما تنفعل عليا:

فيه شخص من العائلة كنت معاه في رحلة سياحة علاجية في دولة تونس الشقيقة، بس الفكرة أن الحالة اللي معاي طلب منها الطبيب أن تتواجد في تونس كل شهر لأخذ جرعة من العلاج لمدة خمسة أشهر.

طيب حلو وين المشكلة... المشكلة يا عزيزي أني مسافر وديما في حالة سفر والموضوع هذا مع التزاماتي وانشغالي ودراستي حيكون صعب وتحدي كبير.

لما تكون في دولة متقدمة وتشتغل وعندك التزامات ودراسة حتكون الساعة اللي حتفرّغ فيها روحك باش تكلم أهلك وتطمن عليهم مخطط ليها مسبقا، يا بال أنك بتسافر أسبوع كل شهر وبتولي!!!

طيب شن صار؟
حاولت ندير الموضوع في المرة الأولى بحيث ماحد يحس بيا بس المرة الثانية الموضوع كان صعب لدرجة أن الأمر أرّقني وسببلي مشاكل كبيرة، لدرجة أن داروا اجتماع بخصوص الموضوع هذا واستدعوني.

طيب يا مشيرب شن قصتك وشن المشاكل اللي مدايرها هذه؟
أنا حكيت القصة باختصار..
ردوا عليا طيب هل الموضوع خطير لهذه الدرجة؟

وهني #المفاجأة رديت بكل صدق والله الموضوع ممكن أصغر ممرض يديره ومش مستاهل ولا خطير ولا شيء!

الراجل لما قلتله هكي يحسابني نبصر وضحك.. ولما عرف أني بجديات قالي مادام الموضوع ساهل وبسيط ليش ما تكملوش العلاج في ليبيا حتى عليك أنت والتعب والتكاليف اللي تتحمل فيها!

قلتله علاج شن بالله عليك اللي في ليبيا؟ "قلتها بكل أسى"
قلتله تاريخ عائلتي معبي أخطاء طبية كان نقولك عليها ممكن ما تصدقش! وحكيتله شوية منها وكان مصدوم!!

وفي الأخر خدوها كانوا متفهمين الوضع جدا وبالعكس كانوا داعمين بشكل كبير ومش حنقولك التسهيلات اللي داروهالي بخصوص هالمشكلة مشكورين!

العبرة من القصة: أولا نسأل الله أن يشفي مرضانا ومرضى المسلمين.
ثانيا أن يكون في عون كل حد عنده مريض في عيلته ويعينه، وأي حد مش قادر يسافر باش يحصل فرصة علاج أفضل نسأل الله أن يفتح عليه ويرزقه من حيث لا يحتسب ويشفيه!

#ثالثا والأهم: رسالة للجيل اللي قاعد حاليا يدرس في طب، بالله عليك خود حالتي وحالة آلاف من الليبيين اللي يعانوا في المستشفيات الحكومية أو الخاصة وحاولوا تديروا حاجة في القطاع الصحي تخلي الناس تعالج في بلادها وتستفيدوا أنتم بدل البراني.

وهي دمتم سالمين.

كل عام وأنتم بخير، ينعاد عليكم بالصحة والسلامة🌿قلت خلي نعيد عليكم بصورة من الذاكرة، المشكلة الذاكرة معاش تفرز ونسيت هذه ...
27/05/2026

كل عام وأنتم بخير، ينعاد عليكم بالصحة والسلامة🌿

قلت خلي نعيد عليكم بصورة من الذاكرة، المشكلة الذاكرة معاش تفرز ونسيت هذه حفلة تخريج اي دفعة بالزبط، كان عرفتوا قولولي 😅

قبل 10 سنين بالضبط من اليوم، كنت في وسط معسكر التحضير لامتحانات الشهادة الثانوية واللي استمر 52 يوم بالتمام والكمال بمعد...
03/05/2026

قبل 10 سنين بالضبط من اليوم، كنت في وسط معسكر التحضير لامتحانات الشهادة الثانوية واللي استمر 52 يوم بالتمام والكمال بمعدل 8 ساعات يوميا بدون أي توقف...

ولا أي راحة ولا أي يوم أوف؟

ولا يوم كان معدل القراية فيه أقل من 8 ساعات! صدق أو لا تصدق!

الموضوع ما كانش ساهل والتحدي كان كبير ولا يمكن أن ننسى الضغط النفسي والجسدي، والإستنزاف العصبي والذهني خصوصا في 2016 كان الضي يهرب من8-12 ساعة يوميا..

لأن كان فيه هدف محدد وواضح، وكل ما يصيرلي ملل أو تردد أو إحباط، الهدف كان كفيل إنه يخليني نستمر ونشد روحي ونزيد نقرا... (Burning desire🔥)

واليوم وبعد هالسنوات هذه كلها والعمر اللي مشي.. في #لحظة تفكرت التعب في تلك الأيام وسألت نفسي سؤال (وهذا سبب كتابتي للبوست): هل فعلا كانت مستاهلة؟

الإجابة بدون أدنى شك: إني ممنون جدا لكل لحظة تعب وكل دقيقة زدتها في القراية وكل لحظة حرمت فيها روحي من طلعة أو زردة أو عزومة أو لحظة ترفيه في سبيل أني نوصل للي وصلتله اليوم "بفضل الله طبعا وتوفيقه وحده".

كل ما أنا عليه الآن وما سأصبح عليه بإذن الله بدايته كانت توفيق الله ليا في تلك الأيام وكان ثمرة أني قدرت نكمل 52 يوم بالزبط زي ما خططت لها.

هذه رسالة بسيطة من شخص بسيط، لكل طالب شهادة ثانوية حاس روحه أنه فاقد الشغف والأمل وأنه حاس أن محاولاته باءت بالفشل... لازم تستمر وتحر.ق روحك في سبيل أي هدف تبي توصله. وكما قيل: من عَلتْ همّته، طال همّه.

والحمدلله أولا وآخرا على كل شيء، ومازلنا في طريق الحلم إلى أن يشاء الله!

هذا كلام واحد جايكم من المستقبل 😅 والسلام عليكم ✨️

16/04/2026

من أكثر الكلمات الصادقة اللي سمعتها واللي خلت في نفسي أثر هي كلمات الدكتور الصديق سعيد وخلي نقتبس ليكم شن قال:

أكبر كذبة نخدع بها أنفسنا هي انتظار اللحظة المناسبة.

ننتظر المزاج الصافي والظروف المثالية لنبدأ، لكنها مجرد وهم أنيق نبرر به عجزنا، ونهرب به من مسؤولية المواجهة.

لا يوجد في قواميس الحياة ظروف مثالية؛ من ينتظر زوال العقبات ليخطو، أو هدوء العواصف ليبحر، ستتعفن سفينته على الشاطئ. الحياة متقلبة ولا تمنح الهدوء التام لأحد.

التأجيل ليس مجرد تأخير، بل استنزاف صامت لأعمارنا. نحن لا نخسر أحلامنا بالفشل، بل بتركها تذبل في ثلاجة الانتظار. كم من فكرة عظيمة وحياة بأكملها دفنت في مقبرة "غدا"؟

البدايات دائما مربكة وناقصة، والكمال لا يسبق العمل بل يولد من رحمه. الوضوح لا يأتيك وأنت تراقب من بعيد، بل يتجلى لك وأنت تسعى وتتعثر وتنهض.

لا تكن ضيف شرف في قصة حياتك؛ اقتحم خوفك بيد مرتجفة، وأعلن البداية الآن بكل ما فيها من نقص وتحديات.

الزمن لا يحترم المترددين، واللحظة المناسبة الوحيدة التي تملكها حقا.. هي الآن.

بالتوفيق للجميع

ليس كل ما يلمع ذهب❗️دار حوار بيني وبين شخص أكبرني سنا وأعلم مني (شخصية معروفة) وهذا الشخص بطبيعة شغله متلاقي مع ناس مؤثر...
11/04/2026

ليس كل ما يلمع ذهب❗️

دار حوار بيني وبين شخص أكبرني سنا وأعلم مني (شخصية معروفة) وهذا الشخص بطبيعة شغله متلاقي مع ناس مؤثرة من إعلاميين وكتّاب وغيره ومنهم "مشاهير السوشال ميديا" سواء الصالح منهم أو الطالح.

ف من كثر مخالطته ولقاءاته بيهم قالي: تعرف لو لاقيتك بأحد هؤلاء وفتحتلك صفحاته على المنصات قالي أكاد أجزم أنك مش حتصدق أنك لاقيت نفس الشخص❗️

غر كيف؟
قالي في الحقيقة حتشوف انسان شبهنا وزينا تماما بسيط وعادي جدا وحديثه عادي جدا (رغم يتابعه الملايين) ولكن إذا شفت كلامه وصوره وفيديواته وحياته على المنصات وكأنه عايش في عالم اخر منفصل عن هذا العالم "عايش في الجنة" هكي وصفه.

ومن هني بدت الإثارة🔥 في الحديث:

قال: مش حنقول أنه كذاب ولا أنه عايش الوهم ولا أنه عنده فصام ولا أنه مريض❗️

هاه امالا شن؟

قالي الإنسان بطبيعته ما يحبش يورّي الجانب السلبي في حياته ويحب يظهر كل شيء حلو لدوافع غريزية منها حب الإنسان أن يراه الآخرين ناجح أو عنده فلوس أو أو...

وطبعا الشعور هذا يزيد مع زيادة المتابعين، يعني كل ما يزيد عدد المتابعين "كل ما يزيد اختلاقه لظروف مثالية في حياته باش يصورها وينزلها ولو على حساب فلوسه أو صحته" وأنا نقتبس هني في الكلام ونترجم 😆

فالمهم اللي نبي نوصله ليكم أنكم عمركم ما تصدقوا حد مشهور أو عنده هلبة متابعين أن حياته واو وأنه شخص ناجح على كل الأصعدة (مثالي)❗️

حتى أنا ردوا بالكم تحسابوني حاجة واو ولا تاخدوا عليا صورة أني من كوكب آخر لأني ما نوريش فيكم إلا الحاجات الباهية 😆 طبعا الكلام هني موجّه بالتحديد للناس اللي تتابع في حساباتي الشخصية راكم ما تعرفوش حتى 5% 🤏🏻 على حياتي الخاصة حرفيا ولا تعرفوا التحديات اللي نخوض فيها كل يوم.

وهي موفقين جميعا

Address

Hackescher Markt
Tripoli
10178

Website

, , http

Alerts

Be the first to know and let us send you an email when Engr. Msheireb posts news and promotions. Your email address will not be used for any other purpose, and you can unsubscribe at any time.

Shortcuts

Share

Category