23/03/2024
Malu a kale ne Lukebu Lwimpe lwa Cisamba cya Bantu
Malu a kale a bantu, myaba idibu bafumine ne bibidilu byabu bidi bileja cidibu menemene. Bidi bibambulwisha bua kumanya kuvwabo bafumine, cidibu mene ne kudibo baya. Cisamba cidi kaciyi cimanye malu aci a kale, ntwadijilu waci ne bilele byaci, cidi anu bu muci udi kawuyi ne miji, kawuyi ne cishimikidi tshikole tshia kueyemena bwa kukola to.
Muyuki wa malu a kale a cisamba kampanda udi wakula bua ntatu ya bantu ba mu cisamba aci, bwa dicimuna dyabu dya mvita. Muyuki ewu udi ubambulwisha bwa kujingulula malu adi malengeje cisamba eci lelu ne kupeta malongesha bwa matuku acilwalwa. Bikalaku kakuyi dimanya edi, bantu badi mua kuenza bilema bia kale ne kabakwikala bakumbane bwa kutantamena ntatu ya matuku acilwalwa to.
Cisamba cidi bantu bafumine cidi kabidi ne mushinga. Cidi cileja muntu ewu kuvwaye mufume ne mudiye mushintuluke mu kupita kwa bidimu. Dimanya edi didi mua kwambulwisha bantu bwa kumanya mwaba udibu mu bulongolodi ebu ne kudya nabu malanda ne bantu bakwabu badi ne bibidilu bya mwomumwe.
Bintu bya bantu bidi bileja mwoyo wabu. Cidi kabidi cyumvwija bilele bya bantu, malu adibu bitabuja, mikenji idibu balonda ne nsombelu wabu. Dikala ne bibidilu bidi byambulwisha bantu bwa kwikala ne nsombelu mwimpe ne bwa kwikala mu malanda mimpe ne bantu bakwabu. Bikalaku kakuyi dimanya edi, bantu badi mua kujimija bumuntu bwabu ne kudyumvwa kabayi mu malanda ne bantu badi babanyunguluke.
Ndekelu wa byonso, miyuki ya bantu, myaba ivwabu bafumine ne bilele biabu bidi bileja cidibu. Cisamba cidi kaciyi cimanye malu aci a kale, ntwadijilu waci ne bilele byaci cidi anu bu muci udi kawuyi ne miji, kawuyi ne cishimikidi cikole cya kweyemena bwa kukola to. Ke bwalu kayi bidi ne mushinga bwa muntu yonso kulama dimanya edi ne kudidifila kudi ndelanganyi idi ilwa bwa dikumbane bwa kutungunuka ne kukola.
