Jennifer Musiknote

《移民四年第一場學生音樂會》

喺啱啱過去嘅星期日，Miss Jen 喺新屋studio幫幾個學生搞咗第一場小型音樂會 “Little Notes, Big Dreams” ，好開心可以順利完成！

見到每個同學都用心準備今次個演出。佢哋完成演奏之後，我亦分享咗自己喺學習路上嘅一啲失敗經驗，因為有幾個學生都係第一次參加音樂演出，係一個好重要嘅里程碑，Miss Jen 希望以身作則，言行身教，鼓勵學生喺呢條音樂路上遇到挫折時，要繼續努力唔好放棄，不要睇到自己好渺小，只要持續努力一定可以成就夢想！音樂會之後仲有 celebration time & photo moment，成個音樂會就圓滿結束啦。

上星期亦係我同禮儀師移民四周年嘅日子。記得四年前喺香港，同樣喺屋企嘅studio，同樣為學生準備小型音樂會，同樣嘅音樂夢，真心冇諗過四年後嘅今日，我可以喺地球嘅另一邊延續落去。真心好感恩天父嘅愛錫，畀我繼續做自己喜歡嘅工作，講到呢度都有啲眼濕濕。

更加要感謝禮儀師全程協助做 assistant兼cam man~~令到音樂會更加圓滿！今次係第一次喺新屋搞音樂會，期待同學仔下一次有更多唔同嘅嘗試，唱歌啊、合奏啊等等更多嘅音樂分享。呢啲都係Miss Jen 一路都好想做嘅。而家就分享一下嗰日嘅花絮啦～

黎緊會出一系列關於學音樂嘅文章，希望大家多多支持❤❤

《學音樂必需懂的事（一）- 學會溝通》

最近收到一位睇左我個Page 好耐嘅家長pm 我，話想小朋友轉黎跟我學琴，咁信任同支持miss Jen，我當然好開心。但當問到轉老師嘅原因，就促使到我寫以下呢篇文章。

好多時，家長想幫小朋友轉老師，我聽到最多嘅原因，就係「唔知點解要學呢d 野」、「唔知佢學過啲咩」、「佢都未準備好，老師就叫佢考試」、「老師淨係叫佢練呢啲野」、「老師教黎教去都係呢本書」等等，呢堆確實係多年來我聽到唔同家長想轉老師時，曾經對我講過嘅心聲。而當轉咗過黎學之後，從傾談中了解前老師嘅想法，再慢慢拆解番前老師用某啲教材嘅原因同教學模式，解釋番比家長聽，家長先恍然大悟，原來前老師嘅諗法係咁！

就以上嘅例子，大家就能明白到，一切問題都歸因於溝通。有趣嘅係，好多時分析學生前老師嘅教學，其實佢地嘅音樂知識水平同演奏能力都非常高的，初初的確有好大疑問，為何這些老師功力深厚，根底不淺，仍會受到不滿呢？到後來，當自己教學路走闊了，才深深體會到，識彈同識教真係兩碼子嘅事。記得好多年前自己一次學琴經驗，經朋友介紹跟一位喺波蘭修讀鋼琴演奏系畢業嘅老師，學費不菲，當時深感有咁叻嘅老師教自己，一定會學得好。記得第一堂，呢位老師先將 Brahms 嘅名曲Op.118 no.2 大半首作 sight-reading，然後再彈番頭幾句，隨即指示我跟佢嘅演奏方式彈（前題係沒有作任何解說）。彈咗幾次我都係唔知道點做，佢再不斷demo，然後一句回應「咁簡單你都唔識？」呢個經驗直至今日我都會記得，亦教會我一個道理，原來一個人幾叻都好，都不一定懂得教人，因為世上並非個個人都有同理心，同懂得溝通的。

講到呢度，我並非想貶低其他老師或從中抬高自己，我身邊確實有非常多熱心教學、努力增值自己嘅好老師的。呢度只係想帶出一個重點，係有時學習出現樽頸位，好可能係因為缺乏良好溝通，而缺乏溝通係好難達到教學應有嘅果效的。前一段提及其中一個轉老師嘅原因，有個有趣現象，就係老師提議學生去考試，反而令家長卻步，覺得不知所措。我並非鼓勵學生為考試而考試，但如果已裝備好自己，考試本應係一件值得期待嘅事。考試嘅好處，除咗可以讓學生展示學習成果，更標誌著學生即將前往下一階段。但抗拒原因為何？說到底就係老師同家長或學生未有好好溝通，達成一致共識，訂下目標一同向著標竿直跑，僅此而已。但若未就學生學習進程作適當討論的話，最後影響嘅，往往係學生寶貴嘅學習歲月呢。

我自己初出茅廬去教音樂，亦走過一些迂迴嘅路，以為一心教好學生就夠，家長一定會睇到的。但多年過去，慢慢先意識到，教學除咗教學生，與家長有良好溝通都非常重要。自己作為老師，想為學生訂下一啲目標，例如，學某啲歌曲、學啲咩書、幾時考試等等，我都會不厭其煩，先同家長解釋一番，學生現正處於某一個階段，未來可以有什麼計劃，再給予一些選擇及建議，讓家長同學生討論，然後再一齊決定下一步如何走，呢啲互動係必需的。同時要設定一啲短期目標，當家長知道有小／大目標在眼前，就可以知道自己應該點樣去同孩子一起同行，自然亦會對於孩子嘅學習進度更加放心。我深信4歲小孩都會懂得分辨一個好老師與否。所以就算學生只得4歲，我都會係課堂中，嘗試透過小孩懂得嘅方式解釋比佢地知，將要學習某些技巧背後嘅 rationale（真心，佢地係會明的！）。家長／學生清楚學緊咩，先會去思考自己而家處於一個咩階段，再判斷應該如何分配心力去練習，咁樣對學習係係非常重要的。

以上係從老師角度出發，可以讓家長多啲了解你地自己音樂老師嘅教學理念。而就家長方面而言，我都好鼓勵家長同老師多啲溝通。有次我有個學生家長打俾我話我知囡囡練琴練到喊，家長同我傾左一輪，我地一齊搵番囡囡喊嘅核心原因。因為我上堂有啲說話令佢唔開心而唔鐘意老師？因為歌曲太難練唔到？因為冇興趣練呢首曲目？因為對學琴缺乏左興趣？再傾談下發現原來小朋友因為同同學仔比較而唔開心，對學琴失去咗方向。到咗下次上堂我再同佢當面討論番佢嘅想法、引導再令佢釋懷，然後，佢又成長左，繼續努力面前了。所以，家長是否願意主動溝通亦係影響學生學習一個重大因素。

大部份家長其實都非常尊重老師嘅教學內容，同時亦好信任老師專業，對老師黎講當然係好，老師獲得家長信任，有充足空間俾自己發揮教學，一定會提升課堂質素，受益嘅當然係孩子。但一旦遇到喺學習上不明白嘅地方，家長並非該範疇嘅專業，絕對應該主動向老師詢問同協調學緊嘅野。例如家長未必認識音樂考試制度，咁點樣為之可以考級？而家彈緊嘅野有咩目的？點先叫練好一首歌？練基本功得黎有冇其他野可平衡興趣？用某啲書嘅原因？練習幾多先叫夠？仲有好多好多問題，都必定喺小朋友學音樂時會出現的。老師有責任向家長解釋教學背後嘅理念同時，家長都有權知道學生現況，所以回歸原點，不斷溝通就係關鍵。一旦老師係偏向追成績的，而家長係傾向想小朋友遇快學習的，就會出現莫大分歧，學生會不知所措，如不先作調適，關係就會好像不健康嘅戀人一樣，雙方估來估去，最後就真係分開收場。

說到底，音樂教學係對「人」嘅工作。而呢種工作者，需要對周圍嘅人同事物非常敏感，並且要有高度同理心，懂得洞察人嘅情感。近年AI 盛行，曾經聽過好多youtuber分析過AI 在不久將來將會取代好多工作，但涉及對人嘅工作暫時仍然比較難以取代。就係呢啲人與人之間嘅互動，先會令呢個冷漠嘅世界多點溫暖，多點愛。

最後，學音樂對於一個小朋友黎講，其實係一種三角關係，由老師－家長－學生組成，環環緊扣，缺一不可的。多年來嘅經驗所見，一個學生能否多年來堅持學同一種樂器，一步步慢慢進步升級，除左學生本身需要有無比大嘅興趣外，仲要老師因材施教，探索不同教學模式傳授知識，並且不間斷地鼓勵學生前進，言傳身教，適時提醒。而更重要的，係家長由始至終都不將自己當作局外人，並進入孩子嘅學習世界，讓佢地睇見父母與自己同行。咁樣，佢哋學音樂嘅路就不至孤單，又點會輕言離開呢。

睇到呢度嘅你，應該都對學音樂想有一定興趣或想法，首先說聲無限感謝。黎緊將會有一系列關於學音樂嘅文章發表，如果喜歡嘅朋友，歡迎留下言俾啲意見哦。❤❤❤

ig:
https://instagram.com/jennifer_musiknote?igshid=OGQ5ZDc2ODk2ZA==

Jennifer Musiknote fb:
https://m.facebook.com/jennifertsemusic/

---

《重回音樂路之第三張Cert (RCM 篇)》

https://www.facebook.com/100076131304807/posts/284193270795048/?mibextid=cr9u03

《重回音樂路之第二張成績表(RCM篇)》

https://m.facebook.com/story.php?story_fbid=199583779255998&id=100076131304807&mibextid=qC1gEa

《加拿大RCM 考試 - Lv8 theory》

https://m.facebook.com/story.php?story_fbid=189844786896564&id=100076131304807&mibextid=qC1gEa

❤❤

❤

《珍惜生命中讓自己快樂的每時每刻》

每次收到有人對自己嘅教學表示欣賞
我都會打從心底感動起來
尤其是去左新地方
過新嘅生活
重拾原有職業
繼續追夢嘅過程充滿挑戰
實在係唔容易
收到一兩句呢d訊息就係讓自己繼續行落去嘅動力
呢d 訊息提醒緊自己想做嘅事未做完
想行嘅路仲有好長

圖中嘅對話呢個學生
係我兩年前仲未移民時
禮儀師嘅打籃球波友同佢講
話說佢好鐘意唱歌
好想進步
就黎跟我學唱歌
我完全估唔到
兩年後、係兩年後嘅今天
佢都仲記得我教過佢嘅技巧
有練習去改善
真係有小小眼濕濕

我點解咁執著想行番音樂教學呢條路
因為自己深信只要你用心去教
那怕只係4歲小孩
都一定會感受到
人心就會自然自然被感染
或者我多少有點理想主義吧
沒有諗過改變世界
但總有點想用自身嘅感染力
鼓勵或影響有需要嘅人
係自己能力範圍內、擅長嘅範疇中
做他人嘅同行者

小學時寫我的志願
我好記得諗左兩個答案
一係護士
二係老師
因為兩種職業都幫到人
但自己同理心太over
見血即喊😢
最後寫左"老師"
而匆匆歲月過後到今天
初心未變
熱情不減
我諗大慨已對得住自己嘅人生吧❤
💪💪💪❤

🌟🌟暑期6折學音樂優惠🌟🌟🌈
https://m.facebook.com/story.php?story_fbid=285906693957039&id=100076131304807&mibextid=qC1gEa

ig:
https://instagram.com/jennifer_musiknote?igshid=OGQ5ZDc2ODk2ZA==

Jennifer Musiknote fb:
https://m.facebook.com/jennifertsemusic/

《學音樂嘅初心》

G 同學喺溫哥華跟我學琴接近一年
整年下來非常勤力
因為以前冇投放好多時間係Baroque 同Classical 嘅樂曲
經過半年多嘅訓練
而家4 個音樂時期嘅基礎都打得好好

雖然佢喺香港帶住高分嘅5級theory 成績過黎
理論上係可以做credit transfer 轉成呢邊8級 theory
但經過同家長傾談
解釋番學習內容上其實有好大偏差
我唔建議就咁為左張cert 而就咁做transfer
而同學仔都好願意配合
由呢邊7級syllabus 學到8級
半年黎個個星期都乖乖做功課
慢慢補充番未學過嘅內容
而家終於好好咁攞番哂要學嘅野啦
仲學識簡單作曲🎵
音樂世界又打開左d🎈
根基打好
繼續上去level 9 harmony 都會輕鬆好多🤗👍👍

雖然佢要番香港兩個月
最後我地決定唔考試
但佢都超級努力做功課
最欣賞學生學音樂
唔係為考試、為比賽
為快、為成績
而係單純咁想進入音樂世界學知識
呢種思維係急速嘅世代係難得的
初心永遠都係最緊要🥹

當然仲要多謝父母配合
冇催迫、冇急於見到孩子成材
俾空間孩子
讓孩子按自己步伐行
呢d 孩子
未必係人家口中嘅第一名
但行到最後嘅就會係佢地❤

-----------------------
🌟🌟暑期6折學音樂優惠🌟🌟🌈
https://m.facebook.com/story.php?story_fbid=285906693957039&id=100076131304807&mibextid=qC1gEa

ig:
https://instagram.com/jennifer_musiknote?igshid=OGQ5ZDc2ODk2ZA==

《慶祝Miss Jennifer回歸音樂旅程之暑期課程優惠☀️☀️》❤❤

踏入7月，正式進入盛夏啦！籌備左一輪，終於可以正式展開新旅程🎵，真係百般滋味在心頭🥹。整左一系列單張，等大家多d 認識 Miss Jennifer以前教開嘅課程，而家仲推出暑期6折/8折學音樂優惠，歡迎大家pm 查詢詳情哦，希望大家多多支持！

Btw, 今日係Canada Day，祝大家有個美好嘅節日❤❤❤

ig:
https://instagram.com/jennifer_musiknote?igshid=OGQ5ZDc2ODk2ZA==

Copyright © 2023 by Jennifer Musiknote

All right reserved.