Yevlax rayon Yuxarı Bucaq kənd ümumi orta məktəb

10/08/2026

Hörmətli valideynlər və əziz şagirdlər!

Yeni 2026–2027-ci tədris ilində şagirdlər üçün əvvəlki illərdə təsdiq edilmiş məktəbli geyim formaları qüvvədə qalacaq.
Məktəbli geyimi sadəcə geyim deyil, vahid məktəb mühitinin, nizam-intizamın və məktəb mədəniyyətinin mühüm göstəricilərindən biridir.
Vahid geyim forması şagirdlər arasında bərabərliyi və həmrəyliyi gücləndirir, onların diqqətini təhsilə və məktəb həyatına yönəldir.
Valideynlərdən xahiş edirik ki, övladlarının məktəbə müəyyən edilmiş geyim formasına uyğun, səliqəli və nizamlı şəkildə gəlməsinə diqqət yetirsinlər.
Əziz şagirdlər, məktəb qaydalarına riayət etməklə siz yalnız özünüzə deyil, həm də təmsil etdiyiniz məktəbə hörmət göstərmiş olursunuz.
Nizam-intizamlı şagird – sağlam məktəb mühitinin, uğurlu gələcəyin təməlidir!

01/08/2026

22/07/2026

📰 22 iyul Milli Mətbuat Günüdür.

“Əkinçi” qəzeti ilə əsası qoyulan Azərbaycan milli mətbuatının yaranmasından 151 il ötür.

Bu əlamətdar gün münasibətilə media nümayəndələrini təbrik edir, onlara məsuliyyətli fəaliyyətlərində uğurlar arzulayırıq.

29/06/2026

Məktəbimizin coğrafiya müəllimi Vəliyeva Elmira Ədalət qızı 24 iyun 2026-cı il tarixində Azərbaycan Respublikası Elm və Təhsil Nazirliyi tərəfindən keçirilmiş müəllimlərin sertifikatlaşdırılması prosesinin test imtahanı mərhələsində 60 mümkün baldan 57 bal toplayaraq yüksək nəticə əldə etmişdir.
Bu əlamətdar uğur münasibətilə müəllimimizi ürəkdən təbrik edir, ona gələcək pedaqoji fəaliyyətində yeni nailiyyətlər, möhkəm cansağlığı və davamlı uğurlar arzulayırıq.
Müəllimimizin qazandığı bu yüksək nəticə məktəbimizin təhsil sahəsində əldə etdiyi uğurların növbəti göstəricisidir. İnanırıq ki, o, gələcək fəaliyyətində də şagirdlərimizin təlim-tərbiyəsində mühüm nailiyyətlər qazanmağa davam edəcəkdir.

29/06/2026

Məktəbimizin tarix müəllimi Nağıyeva Elmira Rahim qızı 24 iyun 2026-cı il tarixində Azərbaycan Respublikası Elm və Təhsil Nazirliyi tərəfindən keçirilmiş müəllimlərin sertifikatlaşdırılması prosesinin test imtahanı mərhələsində 60 mümkün baldan 52 bal toplayaraq yüksək nəticə göstərmişdir.
Bu münasibətlə müəllimimizi səmimi qəlbdən təbrik edir, ona gələcək pedaqoji fəaliyyətində yeni-yeni uğurlar, möhkəm cansağlığı və peşəkar nailiyyətlər arzulayırıq.
Qazanılan bu uğurun məktəbimizin təhsil nailiyyətlərinə mühüm töhfə verəcəyinə inanırıq.

18/06/2026

Çalışmanın yaş həddinə çatması ilə əlaqədar məktəbin ibtidai sinif müəllimi Quliyeva Məlahət Cümşüd qızı ilə "Əmək Fəaliyyətinə Ehtiram" adlı tədbir keçirilmişdir. Tədbir çərçivəsində o, uzunmüddətli və səmərəli pedaqoji fəaliyyətinə görə məktəb rəhbərliyi tərəfindən “Fəxri fərman”la təltif olunmuşdur. Kollektiv tərəfindən müəllimə göstərdiyi xidmətlərə görə təşəkkür edilmiş, gələcək həyatında ona can sağlığı və uğurlar arzulanmışdır...

18/06/2026

2025/2026-cı tədris ilinin yekunları ilə əlaqədar məktəbimizdə keçirilən BSQ №2 (Böyük Summativ Qiymətləndirmə II) üzrə nəticələr elan edilmiş, qiymətləndirmə cədvəlləri valideynlərə təqdim olunmuş və nəticələrlə bağlı tanışlıq təmin edilmişdir.

13/06/2026

13 iyun 2026-cı il tarixində məktəbimizdə ənənəvi "Son Zəng" tədbiri keçirildi.
Tədbir Azərbaycan Respublikasının Dövlət Himni ilə başladı və Vətənimizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edildi.
Məktəb direktoru R.Bəkirov, eləcə də müəllimlərdən Ə.Cəfərova və A.Mustafayeva çıxış edərək bu əlamətdar gün münasibətilə məzunları təbrik etdilər, onlara həyatda və təhsildə uğurlar arzuladılar.
Tədbir məzunların və şagirdlərin hazırladığı bədii kompozisiyalar, musiqi nömrələri və rəqs çıxışları ilə davam etdi.