Yardımlı rayonu Abbasabad kənd ümumi orta ümumtəhsil məktəbi

Yardımlı rayonu Abbasabad kənd ümumi orta ümumtəhsil məktəbi Təhsil millətin gələcəyidir! (H.Əliyev)

Prezident İlham Əliyev müsahibəsində Zəngəzur dəhlizinin tarixi əhəmiyyətini belə bəyan edib: “Nəticə etibarilə 2025-ci ...
14/08/2026

Prezident İlham Əliyev müsahibəsində Zəngəzur dəhlizinin tarixi əhəmiyyətini belə bəyan edib: “Nəticə etibarilə 2025-ci il avqustun 8-də tarixi Vaşinqton Zirvə Görüşündə bu məsələ öz həllini tapdı. TRIPP adını daşıyan bu layihənin icrasına artıq start verilmişdir. Bu yaxınlarda, üç gün bundan qabaq – avqustun 8-də Prezident Trampla söhbət əsnasında bu məsələyə də toxunuldu və hər iki tərəf əminliyini vurğuladı ki, bu önəmli nəqliyyat layihəsi mütləq və tezliklə icra ediləcək”.
Muxtar respublika üçün mühüm məsələlərdən biri təhlükəsizlik və enerji müstəqilliyi idi. Dövlətimizin həyata keçirdiyi ardıcıl tədbirlər nəticəsində Naxçıvanın müdafiə potensialı ən yüksək səviyyəyə qaldırıldı və təhlükəsizlik məsələləri tam həll olundu. Eyni zamanda vaxtilə qaz və elektrik təchizatından məhrum olan Naxçıvanın enerji təhlükəsizliyi də etibarlı şəkildə təmin edildi. Bu gün isə tamamilə yeni bir mərhələ başlayır. Artıq Naxçıvan öz daxili ehtiyaclarını ödəməklə yanaşı, enerjinin ixracı ilə məşğul olacaq. Prezident İlham Əliyevin vurğuladığı kimi, Naxçıvan, o cümlədən Şərqi Zəngəzur və Qarabağ vahid konsepsiya əsasında inkişaf etməlidir. Dövlətimizin başçısı Naxçıvanın azad olunmuş ərazilərlə vahid konsepsiya əsasında inkişafını və idarəetmə modelini belə xarakterizə edib: “Bütövlükdə, bunu mən artıq həm bəyan etmişdim və həm də biz bunu artıq strukturlaşdırdıq ki, Naxçıvan, azad olunmuş ərazilər – Şərqi Zəngəzur, Qarabağ vahid konsepsiya əsasında inkişaf etməlidir... Naxçıvanda Qarabağ və Şərqi Zəngəzurdakı kimi idarəetmə üsuli-idarəsini yaratmaqla faktiki olaraq biz bu üç bölgəni inzibati nöqteyi-nəzərindən də birləşdiririk. Təbii ki, Naxçıvan Muxtar Respublikasının muxtar respublika statusu qalmaq şərti ilə, ancaq idarəetmə qaydaları təkmilləşməlidir”.
Bu bölgələrin həm nəqliyyat, həm də “yaşıl enerji” potensialı Azərbaycanın ümumi iqtisadi və ekoloji hədəflərinin ana xəttini təşkil edir. Günəş və külək elektrik stansiyalarının tikintisi, su elektrik resurslarının bərpası Naxçıvanı ölkəmizin “yaşıl enerji” zonasına və Türkiyə vasitəsilə Avropaya elektrik enerjisi ixrac edən əsas mərkəzlərdən birinə çevirir.
Naxçıvanın gələcək iqtisadi mənzərəsində ticarət, logistika, kənd təsərrüfatı və turizmin inkişafı xüsusi yer tutur. Muxtar respublikada əlverişli biznes mühitinin dəstəklənməsi, gömrük və vergi güzəştlərini nəzərdə tutan Azad İqtisadi Zonanın və ticarət habının formalaşdırılması yerli və xarici investisiyaların cəlb edilməsinə güclü təkan verir. Naxçıvanın ekoloji təmiz kənd təsərrüfatı məhsulları və “Badamlı”, “Sirab” kimi mineral suları brend olaraq xarici bazarlara çıxış imkanlarını genişləndirir. Bu böyük hədəflərə çatmaq üçün Prezident İlham Əliyevin Naxçıvan Muxtar Respublikasının 2026-2027-ci illərdə sosial-iqtisadi inkişafını sürətləndirmək məqsədilə imzaladığı yeni Sərəncam müstəsna rol oynayır. Sərəncama əsasən ümumilikdə, 258 milyon manat vəsait muxtar respublikanın həyatında keyfiyyət dəyişikliklərinə səbəb olacaq konkret layihələrə yönəldiləcək. Sənədin əsas əhəmiyyəti Naxçıvanın “yaşıl enerji” potensialını artırmaq, regionun nəqliyyat və mənzil-kommunal şəraitini təkmilləşdirmək və əhalinin sosial rifahı ilə təhsil imkanlarını müasir standartlara yüksəltməkdir. Bu genişmiqyaslı layihələrin sürətli və keyfiyyətli icrası Naxçıvanın dayanıqlı inkişafını təmin etməklə yanaşı, muxtar respublikanın iqtisadi müstəqilliyini, təhlükəsizliyini və strateji mövqeyini daha da gücləndirəcəkdir.

Bəyannamə Mərkəzi Asiya Məşvərət Görüşü formatını və Türk Dövlətləri Təşkilatının inteqrasiya proseslərini də yeni mərhə...
01/08/2026

Bəyannamə Mərkəzi Asiya Məşvərət Görüşü formatını və Türk Dövlətləri Təşkilatının inteqrasiya proseslərini də yeni mərhələyə çıxarır. Artıq söhbət yalnız ortaq tarix, mədəniyyət və dil faktorundan getmir. Bu platformalar iqtisadiyyat, enerji, nəqliyyat, logistika, təhlükəsizlik və geosiyasi koordinasiya baxımından çoxşaxəli əməkdaşlıq mexanizmlərinə çevrilir. Mərkəzi Asiya ilə Azərbaycan arasında formalaşan bu əməkdaşlıq modeli gələcəkdə Avrasiyanın siyasi və iqtisadi xəritəsinə ciddi təsir göstərəcək.
Azərbaycanın bu prosesdə rolu xüsusi əhəmiyyət daşıyır. Azərbaycan Şərq-Qərb və Şimal-Cənub beynəlxalq nəqliyyat dəhlizlərinin kəsişməsində yerləşən əsas geostrateji mərkəzlərdən biridir. Orta Dəhlizin inkişafı, Xəzər üzərindən yükdaşımaların artması, logistika və enerji layihələrinin genişlənməsi Mərkəzi Asiya ölkələri ilə əməkdaşlığı strateji zərurətə çevirib. Çolpon-Ata Bəyannaməsi bu geoiqtisadi reallığın siyasi ifadəsidir və Azərbaycanın Avrasiyanın əsas bağlantı mərkəzlərindən biri kimi rolunu daha da gücləndirir.
Sənəddə təhlükəsizlik məsələlərinin xüsusi yer tutması da təsadüfi deyil. Bugünkü geosiyasi reallıqlar göstərir ki, terrorizm, ekstremizm, transmilli cinayətkarlıq, kibertəhlükələr və xarici təsir cəhdləri artıq ayrıca dövlətlərin deyil, bütövlükdə regionun təhlükəsizliyinə yönəlmiş təhdidlərdir. Məhz buna görə də bəyannamədə təhlükəsizliyə təhdid yaradan çağırışlara qarşı koordinasiyalı fəaliyyətin və qarşılıqlı əməkdaşlığın gücləndirilməsi xüsusi vurğulanır. Region ölkələri anlayırlar ki, bir dövlətə qarşı yaranan təhlükə bütövlükdə regional sabitliyə təsir göstərir və buna qarşı kollektiv yanaşma formalaşdırılmalıdır.
Çolpon-Ata Bəyannaməsinin ən mühüm geosiyasi nəticəsi Avrasiyanın mərkəzində yeni siyasi əməkdaşlıq oxunun formalaşmasının rəsmiləşdirilməsidir.
Bu gün artıq Avrasiyanın orta xəttində Mərkəzi Asiya–Azərbaycan geosiyasi xətti yaranır. Bu platforma hansısa dövlətə və ya güc mərkəzinə qarşı yönəlməyib. Əksinə, onun məqsədi regional sabitliyi möhkəmləndirmək, iqtisadi inteqrasiyanı sürətləndirmək, nəqliyyat və enerji layihələrini inkişaf etdirmək, beynəlxalq hüquqa əsaslanan əməkdaşlığı gücləndirməkdir. Region dəyişir, dövlətlər yeni xarici siyasət modelinə keçir və Çolpon-Ata Bəyannaməsi də məhz bu yeni geosiyasi reallığın siyasi manifesti kimi qiymətləndirilməlidir.
XXI əsrdə qlobal və regional münasibətlər sistemində baş verən dinamik dəyişikliklər dövlətlər arasında çoxtərəfli əməkdaşlığın əhəmiyyətini daha da artırır. Xüsusilə ortaq tarixi, mədəni və sivilizasiya dəyərlərini bölüşən ölkələr arasında siyasi dialoqun dərinləşdirilməsi, iqtisadi inteqrasiyanın genişləndirilməsi və təhlükəsizlik sahəsində qarşılıqlı fəaliyyətin gücləndirilməsi regional sabitliyin və davamlı inkişafın əsas şərtlərindən biri kimi çıxış edir. Azərbaycan ilə Mərkəzi Asiya dövlətləri arasında son illərdə müşahidə olunan yaxınlaşma təkcə ikitərəfli münasibətlərin inkişafını deyil, həm də bütövlükdə Avrasiya məkanında yeni əməkdaşlıq platformalarının formalaşmasını şərtləndirən mühüm amillərdən hesab olunur.

Ümummilli Lider Azərbaycan dilinin adını özümüzə qaytardı. 1995-ci ildə Azərbaycan Respublikasının Konstitusiyası hazırl...
01/08/2026

Ümummilli Lider Azərbaycan dilinin adını özümüzə qaytardı. 1995-ci ildə Azərbaycan Respublikasının Konstitusiyası hazırlanarkən dövlət dilinin necə adlandırılması ilə bağlı müxtəlif təkliflər irəli sürülmüşdür. Bu təkliflərin çox böyük əksəriyyətində ana dilimizin Azərbaycan dili adlandırılması dəstəklənirdi. Geniş müzakirələrdən sonra 1995-ci ildə ümumxalq səsverməsi yolu ilə qəbul olunmuş Konstitusiyanın 21-ci maddəsində Azərbaycan Respublikasının dövlət dilinin Azərbaycan dili olması öz əksini tapmışdır.
Ulu Öndər Heydər Əliyev dövlət dilinin yeni inkişaf dönəmində yaranmış vəziyyəti nəzərə alaraq 2001-ci il iyunun 18-də “Dövlət dilinin tətbiqi işinin təkmilləşdirilməsi haqqında” Fərman imzalamışdır. İlk növbədə müstəqil Azərbaycan dövlətinin dil siyasətinin müəyyənləşməsi, formalaşması və möhkəmləndirilməsi baxımından müstəsna əhəmiyyət daşıyan bu tarixi Fərman dövlət dili ilə bağlı hərtərəfli və geniş məlumatları özündə ehtiva edir. Sözügedən Fərmanla Azərbaycan Prezidenti yanında Dövlət Dil Komissiyası yaradılmışdır. Dövlət dili sahəsində yaşanan problemlərin həllinə xidmət edən siyasət. Ulu Öndərin “Azərbaycan əlifbası və Azərbaycan dili gününün təsis edilməsi haqqında” 2001-ci il 9 avqust tarixli Fərmanına əsasən hər il avqustun 1-i ölkəmizdə Azərbaycan əlifbası və Azərbaycan dili günü kimi qeyd edilir.
“Azərbaycan Respublikasında dövlət dili haqqında” Azərbaycan Respublikasının Qanunu. Həmin Qanun 2002-ci il 30 sentyabr tarixində qəbul edilmişdir. Qanuna əsasən Azərbaycan Respublikası Azərbaycan dilinin dövlət dili olaraq işlədilməsini öz müstəqil dövlətçiliyinin başlıca əlamətlərindən biri sayır, onun tətbiqi, qorunması və inkişaf etdirilməsi qayğısına qalır, dünya azərbaycanlılarının Azərbaycan dili ilə bağlı milli-mədəni özünüifadə ehtiyaclarının ödənilməsi üçün zəmin yaradır. Həmin Qanun Azərbaycan Respublikası Konstitusiyasına uyğun olaraq Azərbaycan Respublikasında Azərbaycan dilinin dövlət dili kimi hüquqi statusunu tənzimləyir.
Bu gün Azərbaycan dilinə sahib çıxmaq-dövlətçiliyimizə, müstəqilliyimizə və gələcəyimizə sahib çıxmaq deməkdir. Çünki biz bir xalq olaraq nə qədər güclü, nə qədər müasir və inkişaf etmiş olsaq da, öz ana dilimizi yaşatmadan heç bir halda bütöv ola bilmərik. Ulu Öndər demişkən: “Biz fəxr edirik ki, müstəqil Azərbaycanın dövlət dili olan Azərbaycan dili dünya dilləri içərisində layiqli yerini tutmuşdur. Azərbaycan dilinin həm ümumxalq dili, həm də dövlət dili kimi inkişafında Ulu Öndər Heydər Əliyevin misilsiz xidmətləri olub. Ümummilli lider Heydər Əliyevin dil quruculuğu siyasəti onun milli dövlət quruculuğu siyasətinin tərkib hissəsi olaraq bütöv bir sistem təşkil edib.
Ulu Öndər Azərbaycan dilinə yalnız adi ünsiyyət vasitəsi kimi deyil, qədim tarixi, zəngin mədəniyyəti, müasir dünyada müəyyən ictimai-mədəni mövqeyi olan bir xalqın milli sərvəti kimi yanaşırdı. Kommunist ideologiyasının hakim olduğu bir dövrdə milli dil məsələsinin ortaya atılması tutduğu vəzifədən asılı olmayaraq hər bir şəxs üçün bir növ tale məsələsi ola bilərdi. Bütün bunlara baxmayaraq, ümummilli lider Heydər Əliyev Ana dilinin inkişafına qətiyyətlə çalışırdı.

Bu ildən başlayaraq Azərbaycan öz təbii qazını Almaniyaya ixrac etməyə başlamışdır. Beləliklə, bizim qazımız bu gün Avro...
23/07/2026

Bu ildən başlayaraq Azərbaycan öz təbii qazını Almaniyaya ixrac etməyə başlamışdır. Beləliklə, bizim qazımız bu gün Avropa İttifaqına üzv 10 ölkəyə çatdırılır və şübhəsiz, bu, enerji təhlükəsizliyi üçün çox böyük töhfədir. Nəzərə alsaq ki, Azərbaycan öz neftini də Almaniyaya ixrac edir və gələcəkdə yaşıl enerjisini də Avropa məkanına çatdırmaq əzmindədir, enerji sahəsində əməkdaşlıq çox genişmiqyaslı olacaqdır.
Bağlantılarla və tranzit imkanları ilə bağlı Azərbaycan-Almaniya əməkdaşlığının çox böyük əhəmiyyəti var. Çünki Almaniya şirkətləri bu istiqamətdə çox böyük uğurlar əldə edib. Azərbaycan öz nəqliyyat infrastrukturunu təkmilləşdirir. Keçən il Orta Asiya məşvərət formatına tamhüquqlu üzv olmaqla, Azərbaycan bir növ Orta Asiya ilə Avropa arasında körpü rolunu oynayır və bu rol getdikcə artacaqdır. Bir çox istiqamətlər üzrə konkret fəaliyyət planı nəzərdə tutulur. Bu gün imzalanmış Bəyannamənin icrası ilə bağlı fikir mübadiləsi əsnasında konkret təkliflər irəli sürülmüşdür. Bir neçə işçi qrup yaradılacaq ki, bu gün imzalanmış sənədlər tezliklə həyatda öz əksini tapsın.
Prezident Trampın iştirakı və imzası ilə Birgə Bəyannamənin imzalanması faktiki olaraq 30 il davam edən münaqişəyə son qoydu. Eyni zamanda, Almaniyanın Cənubi Qafqazdakı sülh prosesinə verdiyi töhfəyə görə Sizə təşəkkürümü bildirmək istəyirəm. Uzun illərdən sonra Ermənistan-Azərbaycan münasibətlərinin normallaşması və sülh sazişinin paraflanması, Vaşinqtonda, Ağ Evdə Prezident Trampın iştirakı və imzası ilə Birgə Bəyannamənin imzalanması faktiki olaraq 30 il davam edən münaqişəyə son qoydu. Azərbaycan bu razılaşmadan dərhal sonra praktiki addımlara keçdi. Bu gün Azərbaycan tərəfindən təchiz edilmiş benzin və dizel yanacağı Ermənistanın enerji təhlükəsizliyinə çox böyük töhfədir. Xüsusilə nəzərə alsaq ki, bu gün neft məhsullarının ixracı və idxalı ilə bağlı bir çox problemlər müəyyən səbəblərə görə mövcuddur və eyni zamanda, Azərbaycan ərazisindən Ermənistana tranzit yüklərin göndərilməsi də artıq geniş vüsət alıb. Bu günə qədər 40 min tondan çox tranzit yüklər Azərbaycan ərazisindən keçib.
Almaniya hökumətinin rolunu biz yüksək qiymətləndiririk. Yəni biz çox tarixi bir dövr yaşayırıq. Torpaqları uzun illər işğal altında olan Azərbaycan işğala öz gücü ilə son qoydu, ərazi bütövlüyünü bərpa etdi, suverenliyini bərpa etdi. BMT Təhlükəsizlik Şurasının dörd qətnaməsini özü icra etdi, Ermənistana sülh təklif etdi və müsbət cavab aldı. Ona görə yenə də deyirəm, Almaniya hökumətinin də bu sahədə rolunu biz yüksək qiymətləndiririk. Danışıqlar prosesində, o cümlədən Almaniyada xarici işlər nazirləri səviyyəsində görüşlər də keçirilmişdir.
Son olaraq, Avropa İttifaqı-Azərbaycan əlaqələrinə toxunmaq istəyirəm. Bu il biz həm Avropa İttifaqı Şurasının Prezidenti cənab Koştanın, həm Avropa Komissiyasının Prezidenti xanım Fon der Lyayenin Azərbaycana səfərlərinin şahidi olmuşuq. Bu səfərlərin çox böyük siyasi mənası var. Bu, Avropa İttifaqı ilə Azərbaycan arasındakı əlaqələri daha da gücləndirəcək. Almaniya Avropa İttifaqına üzv olan ölkələr arasında lider olduğu üçün burada təbii ki, həm Almaniyanın rolu çox böyükdür, eyni zamanda, gələcək əməkdaşlıq üçün də əminəm ki, Almaniya öz səylərini göstərəcəkdir.

Əlbəttə ki, mətbuatın fəaliyyəti hər bir insanı maraqlandırır. İnsanlar bütün məlumatı mətbuatdan alırlar. Ona görə, hər...
22/07/2026

Əlbəttə ki, mətbuatın fəaliyyəti hər bir insanı maraqlandırır. İnsanlar bütün məlumatı mətbuatdan alırlar. Ona görə, hər bir ölkədə, o cümlədən Azərbaycanda mətbuat qərəzsiz olmalıdır, çevik, operativ fəaliyyət göstərməlidir, insanları məlumatlarla tam şəkildə təmin etməlidir. Hesab edirəm ki, biz bunu Azərbaycanda görürük. Çünki bu gün Azərbaycan mətbuatı artıq yüksək səviyyəyə qalxıbdır. Mən həm operativlik, həm milli maraqların müdafiə edilməsi sahəsində mətbuatın fəaliyyətini yüksək qiymətləndirirəm.”
İlham Əliyev,Azərbaycan Respublikasının Prezidenti Müstəqillik dövrümüzdə ilk dəfə Azərbaycan jurnalistləri Ermənistanın 30 ilə yaxın davam edən işğalından sonra öz peşə bayramlarını ölkəmizin mədəniyyət paytaxtı, milli mətbuatımızın inkişafında xüsusi yeri olan, Qarabağın tacı Şuşa şəhərində qeyd edirlər. Milli Mətbuat Günü ilə bağlı Şuşada keçirilən ilk tədbir zəngin ənənələrə malik Azərbaycan mediasının tarixində əlamətdar hadisə olacaqdır.
Azərbaycan mətbuatı 1875-ci il iyulun 22-də görkəmli ziyalı, publisist, təbiətşünas alim Həsən bəy Zərdabi tərəfindən Azərbaycan dilində nəşr olunmağa başlamış “Əkinçi” qəzetinin bəyan etdiyi prinsipləri rəhbər tutaraq böyük inkişaf yolu keçmişdir. XlX əsrin ikinci yarısından sonrakı dövrdə işıq üzü görən çoxsaylı nəşrlər tariximizin güzgüsü olmuş, insanların maariflənməsi, milli şüurun formalaşması, xalqımızın azadlıq amallarının gerçəkləşməsi və mənəvi dəyərlərimizin qorunmasına mühüm töhfələr vermişdir. 1875-ci il iyulun 22-də görkəmli ziyalı və maarifçi-publisist Həsən bəy Zərdabi tərəfindən Azərbaycan dilində nəşr olunmağa başlamış “Əkinçi” qəzeti milli mətbuatımızın ilk nümunəsi və həmin dövr Azərbaycanın ictimai-siyasi həyatının mühüm hadisəsi kimi tarixə düşmüşdür. “Əkinçi”nin 1875-ci il iyulun 22-dən 1877-ci ilin sentyabrınadək cəmi 56 sayı işıq üzü görsə də, onun Azərbaycan milli mətbuatının təşəkkül tapmasında, inkişafında əvəzsiz rolu olub.Lakin “Əkinçi”nin ömrü uzun sürməyib. Çar Rusiyası qəzetin insanların maariflənməsində, ictimai-siyasi proseslərə daha yaxından bələd olmasındakı rolundan çəkinməyə başlayıb və sonda qəzetin nəşrini dayandırıb. Buna baxmayaraq, o dövrün görkəmli maarifçiləri “Əkinçi” qəzetinin səhifələrində öz maarifçi və demokratik ideyalarını təbliğ edərək ictimai, siyasi və bədii fikrin inkişafına böyük təsir göstərmişlər. 1875-ci ildən sonra çoxsaylı nəşrlərlə zənginləşən milli mətbuatımız Azərbaycan ədəbi dilinin və maarifçilik hərəkatının inkişafına əhəmiyyətli töhfələr vermiş, milli özünüdərk və istiqlal məfkurəsinin formalaşmasında, qabaqcıl ideyaların təbliğində böyük xidmətlər göstərmişdir.
“Ziya”, “Ziyayi-Qafqaziyyə”, “Kəşkül”, “Şərqi-Rus”, “Həyat”, “Füyuzat”, “Dəbistan”, “İrşad”, “Tazə həyat”, “Molla Nəsrəddin”, “Tərəqqi”, “Həqiqət”, “Məktəb”, “Açıq söz” kimi onlarla qəzet və jurnal ötən əsrin əvvəllərində anadilli mətbuatımızın sonrakı tarixini yaratdılar. 1896-cı ildən Həsən bəyin fəal iştirakı və kürəkəni Əlimərdan bəy Topçubaşovun redaktorluğu ilə nəşr olunan rusdilli “Kaspi” qəzeti də mövzu və məfkurə baxımından Zərdabi istəklərinin daşıyıcısına çevrildi. Azərbaycanda müasir kütləvi informasiya vasitələrinin formalaşması və inkişafı üçün geniş imkanlar yaranmışdır. 1993-cü ildən başlayaraq Ümummilli Lider Heydər Əliyevin rəhbərliyi ilə həyata keçirilən və cəmiyyət həyatının bütün sahələrini əhatə edən köklü islahatlar nəticəsində ölkədə senzura, söz və məlumat azadlığını məhdudlaşdıran digər süni maneələr aradan qaldırılmış, medianın fəaliyyətini tənzimləyən mütərəqqi qanunvericilik bazası yaradılmış, onun problemlərinin həlli, iqtisadi müstəqilliyinin gücləndirilməsi, vətəndaş cəmiyyəti quruculuğunda rolunun yüksəldilməsi məqsədilə ardıcıl tədbirlər görülmüşdür.

Prezident İlham Əliyevin IV Şuşa Qlobal Media Forumunun iştirakçıları ilə görüşü həm ölkəmizin beynəlxalq informasiya si...
15/07/2026

Prezident İlham Əliyevin IV Şuşa Qlobal Media Forumunun iştirakçıları ilə görüşü həm ölkəmizin beynəlxalq informasiya siyasətinin təqdim olunması, həm də açıq dialoq mühitinin formalaşdırılması baxımından əhəmiyyətli hadisə oldu. Bu forum bir daha göstərdi ki, Şuşa artıq təkcə tarixi və mədəni şəhər deyil, eyni zamanda beynəlxalq səviyyəli siyasi, media və fikir mübadiləsinin aparıldığı mühüm platformalardan birinə çevrilib. Bu isə Azərbaycanın beynəlxalq nüfuzunun artmasının və qlobal əməkdaşlığa verdiyi önəmin göstəricisidir.
2026-cı il iyulun 13-də Azərbaycanın mədəniyyət paytaxtı Şuşa şəhərində “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda IV Şuşa Qlobal Media Forumu keçirildi. Azərbaycan Respublikasının Prezidenti İlham Əliyevin forumun açılış mərasimində iştirakı və beynəlxalq media nümayəndələri ilə geniş görüşü tədbirə xüsusi siyasi və beynəlxalq əhəmiyyət qazandırdı. Artıq qlobal media dialoqunun mühüm platformalarından birinə çevrilmiş Şuşa Forumu bu il də informasiya təhlükəsizliyi, media məsuliyyəti, dezinformasiyaya qarşı mübarizə və ictimai etimadın möhkəmləndirilməsi kimi aktual məsələlərin müzakirə olunduğu nüfuzlu beynəlxalq tribunaya çevrildi.
Müasir beynəlxalq münasibətlər sistemində informasiya amili dövlətlərin təhlükəsizliyi, ictimai sabitlik və qlobal əməkdaşlıq baxımından strateji əhəmiyyət kəsb edir. Rəqəmsal texnologiyaların sürətli inkişafı, süni intellektin media mühitinə təsirinin artması və sosial şəbəkələrin qlobal informasiya məkanında təsir imkanlarının genişlənməsi həqiqətin müdafiəsini və etibarlı informasiya mühitinin formalaşdırılmasını daha da aktuallaşdırmışdır. Məhz bu baxımdan forumun əsas mövzusu olan “Həqiqətin bərpası və etimadın yenidən qurulması” çağırışı yalnız media ictimaiyyəti üçün deyil, bütövlükdə beynəlxalq birlik üçün xüsusi əhəmiyyət daşıyırdı.
Şuşanın bu mötəbər tədbirə ev sahibliyi etməsi təsadüfi deyil. İşğaldan azad edildikdən sonra sürətlə bərpa olunan şəhər bu gün Azərbaycanın mədəniyyət mərkəzi olmaqla yanaşı, beynəlxalq konfransların, forumların və qlobal dialoqun aparıldığı mühüm məkana çevrilmişdir. Şuşada keçirilən beynəlxalq tədbirlər Azərbaycanın regionda sülh, əməkdaşlıq və qarşılıqlı etimad mühitinin yaradılmasına verdiyi töhfələrin real təzahürüdür.
Forumun əsas hadisəsi Prezident İlham Əliyevin çıxışı və beynəlxalq media nümayəndələrinin suallarını cavablandırması oldu. Dövlət başçısının səsləndirdiyi fikirlər regional və qlobal proseslərə dair mühüm mesajlar kimi dünyanın aparıcı media qurumları tərəfindən geniş işıqlandırıldı. Prezident İlham Əliyevin çıxışı Azərbaycanın müasir xarici siyasət kursunun prioritetlərini, regional əməkdaşlığa yanaşmasını və beynəlxalq münasibətlərə baxışını əks etdirdi.

Slovakiya Prezidenti Peter Pelleqrinin Azərbaycana rəsmi səfəri zamanı səslənən fikirlər və keçirilən görüşlər iki ölkən...
15/07/2026

Slovakiya Prezidenti Peter Pelleqrinin Azərbaycana rəsmi səfəri zamanı səslənən fikirlər və keçirilən görüşlər iki ölkənin münasibətlərinin keyfiyyətcə yeni mərhələyə yüksəldiyini nümayiş etdirən mühüm siyasi mesaj kimi qiymətləndirilə bilər. Xüsusilə də, prezidentləri bəyanatlarında səsləndirilən fikirlər iki ölkə arasında siyasi dialoqun intensivləşməsini, iqtisadi əməkdaşlığın genişlənməsini və regional təhlükəsizlik məsələlərində qarşılıqlı etimadın möhkəmlənməsini əks etdirir. Görüşdə işğaldan azad edilmiş ərazilərdə, xüsusilə Qarabağ və Şərqi Zəngəzurda aparılan nəhəng bərpa-quruculuq işləri müzakirə olunub. Slovakiya şirkətlərinin bu prosesdə fəal iştirakı xüsusi olaraq diqqətə çatdırılıb. Məlum olduğu kimi, Ağdamın Qərvənd kəndinin yenidən qurulması layihəsi Slovakiya şirkətləri tərəfindən icra edilir.
Prezident İlham Əliyev bu əməkdaşlığa toxunaraq qeyd edib: “Biz Slovakiya şirkətlərinin azad edilmiş ərazilərdə, xüsusən ‘Ağıllı kənd’ konsepsiyası əsasında həyata keçirilən layihələrdə iştirakını yüksək qiymətləndiririk. Bu, təkcə iqtisadi tərəfdaşlıq deyil, həm də ölkələrimiz arasında olan səmimi dostluğun və etimadın bariz nümunəsidir.”
Prezident Peter Pelleqrini isə Şuşada gördüyü mənzərədən və aparılan tikinti bərpa işlərindən heyranlığını gizlətməyib: “Şuşada və ümumilikdə Qarabağda aparılan nəhəng bərpa işləri heyranedicidir. Slovakiya olaraq bu torpaqlara sülhün və həyatın yenidən qayıtmasına, şəhər və kəndlərin qurulmasına öz texnologiyamız və mütəxəssislərimizlə töhfə verməkdən qürur duyuruq.”
Tərəflər bəyanatlarında həmçinin müdafiə sənayesi, investisiya qoyuluşu və ticarət dövriyyəsinin artırılması istiqamətində konkret addımların atılacağını bəyan ediblər. Hər iki dövlət başçısı qeyd edib ki, siyasi dialoqun yüksək səviyyədə olması iqtisadiyyatın digər sahələrinə, o cümlədən nəqliyyat (Orta Dəhliz) və logistika sektoruna da müsbət təsir göstərir. Şuşada səslənən bəyanatlar bir daha göstərdi ki, Azərbaycan və Slovakiya regional təhlükəsizlik, enerji və iqtisadi inkişaf naminə uzunmüddətli və qarşılıqlı hörmətə əsaslanan əməkdaşlıq modelini uğurla inkişaf etdirirlər. Səfər həm də Şuşanın beynəlxalq diplomatik mərkəz kimi statusunu daha da möhkəmləndirmiş oldu.
Son illərdə qarşılıqlı yüksək səviyyəli səfərlərin intensiv xarakter alması tərəflərin strateji tərəfdaşlığa verdiyi önəmin göstəricisidir: “Prezident İlham Əliyevin ötən il Slovakiyaya rəsmi səfəri, Prezident Peter Pelleqrinin isə Azərbaycana növbəti dəfə səfər etməsi siyasi dialoqun davamlı və sistemli əsaslar üzərində qurulduğunu təsdiqləyir. Bu dinamika təkcə diplomatik münasibətlərin deyil, həm də müxtəlif sahələr üzrə praktiki əməkdaşlığın inkişafına xidmət edir”.
“Diqqət çəkən məqamlardan biri 2024-cü ildə imzalanmış Strateji Tərəfdaşlığa dair Birgə Bəyannamənin real nəticələr verməsidir. Sənədin qısa müddət ərzində konkret layihələrə çevrilməsi siyasi iradənin və qarşılıqlı etimadın yüksək səviyyədə olduğunu göstərir. Bu, Azərbaycanın Avropa İttifaqına üzv dövlətlərlə münasibətlərini balanslaşdırılmış və praqmatik xarici siyasət xətti çərçivəsində inkişaf etdirdiyini bir daha təsdiqləyir. Şuşada səsləndirilən fikirlərdə Qarabağın bərpası istiqamətində Slovakiyanın iştirakı xüsusi vurğulanır. Ağdam rayonunun Baş Qərvənd kəndində Slovakiya şirkəti tərəfindən həyata keçirilən “Ağıllı kənd” layihəsi işğaldan azad edilmiş ərazilərin yenidən qurulmasında beynəlxalq tərəfdaşlığın uğurlu nümunəsidir. Bu layihə yalnız infrastrukturun bərpası deyil, həm də müasir texnologiyaların tətbiqi, dayanıqlı inkişaf və ağıllı yaşayış konsepsiyasının reallaşdırılması baxımından strateji əhəmiyyət daşıyır.

Avropa Komissiyası ilə Azərbaycan arasında münasibətlərin çox mühüm mərhələsindəyik. Bu ilin martında biz Avropa İttifaq...
04/07/2026

Avropa Komissiyası ilə Azərbaycan arasında münasibətlərin çox mühüm mərhələsindəyik. Bu ilin martında biz Avropa İttifaqı Şurasının Prezidenti cənab Koştanı, sonra may ayında isə Avropa diplomatiyasının rəhbəri xanım Kallası qəbul etdik. Bu gün isə Avropa Komissiyasının Prezidenti bizimlədir. Prezident İlham Əliyevlə Avropa Komissiyasının Prezidenti Ursula Fon der Lyayenin keçirdiyi görüş və mətbuata verdikləri bəyanatlar Azərbaycan–Avropa İttifaqı münasibətlərində yeni siyasi mərhələnin başlandığını nümayiş etdirdi. Bu, sadəcə növbəti diplomatik görüş deyildi. Son aylarda Avropa İttifaqı rəhbərliyinin ən yüksək səviyyədə ardıcıl şəkildə Bakıya səfərləri göstərir ki, Brüssel artıq Cənubi Qafqaza əvvəlki prizmadan baxmır. Bu gün Azərbaycan Avropanın enerji təhlükəsizliyi, nəqliyyat marşrutları və regional sabitlik siyasətinin ayrılmaz hissəsinə çevrilib.
Prezident İlham Əliyevin “Avropa Komissiyası ilə Azərbaycan arasında münasibətlərin çox mühüm mərhələsindəyik” fikri son illərin geosiyasi reallığının siyasi təsbitidir. Həqiqətən də əvvəlcə Avropa İttifaqı Şurasının Prezidenti Antonio Koştanın, ardınca Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallasın, daha sonra isə Ursula Fon der Lyayenin Bakıya gəlməsi Avropa İttifaqının Azərbaycanla münasibətlərə verdiyi xüsusi önəmi açıq şəkildə ortaya qoyur. Ən diqqətçəkən məqamlardan biri enerji məsələsinin artıq təkcə iqtisadi deyil, siyasi təhlükəsizlik məsələsinə çevrilməsidir. Prezident İlham Əliyev təsadüfi olaraq bildirmədi ki, bu gün hər ölkə üçün enerji təhlükəsizliyi milli təhlükəsizliyin ən mühüm amilidir.
Son dörd ildə Azərbaycanın Avropa İttifaqına qaz ixracının təxminən 65 faiz artması, artıq Aİ-nin 10 üzv dövlətinin Azərbaycan qazı alması təsdiqləyir ki, Avropa alternativ enerji mənbələri axtararkən ən etibarlı tərəfdaşlardan birini məhz Azərbaycanda tapıb. 2022-ci ildə imzalanmış “Avropa Komissiyası tərəfindən təmsil olunan Avropa İttifaqı ilə Azərbaycan Respublikası arasında enerji sahəsində Strateji Tərəfdaşlığa dair Anlaşma Memorandumu” bu gün konkret iqtisadi nəticələr verir və Brüssel bunu açıq şəkildə etiraf edir. Lakin münasibətlər artıq yalnız qaz üzərində qurulmur. Prezident İlham Əliyevin açıqladığı rəqəmlər gələcəyin enerji xəritəsinin də Azərbaycanda formalaşdığını göstərir. Növbəti beş-altı il ərzində səkkiz giqavat Günəş və külək enerjisinin istehsalına imkan verəcək müqavilələrin imzalanması Azərbaycanın yaşıl enerji ixracatçısına çevrilmək iddiasını gücləndirir. Xəzərin küləyi və Azərbaycanın günəşi artıq Avropanın enerji balansının gələcək elementlərindən biri kimi qiymətləndirilir. Ursula Fon der Lyayenin də çıxışında Azərbaycanın təmiz enerji və elektrik bağlantıları üzrə böyük potensiala malik olduğunu vurğulaması bu baxışın Brüsseldə də bölüşüldüyünü göstərir.
Görüşün digər strateji istiqaməti nəqliyyat və logistika idi. Dünyada ticarət marşrutlarının yenidən formalaşdığı bir dövrdə Orta Dəhliz və Şimal–Cənub nəqliyyat xətləri Azərbaycanın əhəmiyyətini daha da artırır. Prezident İlham Əliyevin qeyd etdiyi kimi, Azərbaycandan keçən yüklərin həcmi bütün istiqamətlər üzrə artır və ölkə buna uyğun olaraq liman, dəmir yolu və logistika infrastrukturuna milyardlarla investisiya yatırır.

2020-ci il sentyabrın 27-də düşmən təxribatına cavab olaraq Azərbaycan Ordusunun Zəfərlə nəticələnən haqq yürüşü başladı...
25/06/2026

2020-ci il sentyabrın 27-də düşmən təxribatına cavab olaraq Azərbaycan Ordusunun Zəfərlə nəticələnən haqq yürüşü başladı. Döyüşlərdə bir addım da geri çəkilməyən Azərbaycan Ordusu düşmənə sarsıdıcı zərbə vuraraq, 44 gün ərzində 5 şəhər, 4 qəsəbə və 300-dək kəndi işğaldan azad etdi. 2023-cü ilin sentyabr ayında Azərbaycan Ordusunun həyata keçirdiyi bir günlük antiterror tədbirləri nəticəsində suverenliyimiz tam bərpa edildi, Xankəndidə, Xocalıda, Xocavənddə, Ağdərədə bayrağımız ucaldıldı.
Zəfərlərimiz Müzəffər Ali Baş Komandan İlham Əliyevin rəhbərliyi ilə gündən-günə qüdrətlənən Azərbaycan Ordusunun məğlubedilməzliyini bir daha nümayiş etdirdi: “44 günlük İkinci Qarabağ müharibəsindən keçən dövr ərzində də hərbi gücümüzün daha da artırılması istiqamətində davamlı addımlar atılır. Ordumuzun döyüş qabiliyyəti artır, texnika ilə təchizat lazımi səviyyədə təmin edilir. Vətən müharibəsi zamanı qazanılmış təcrübə çevik və sürətli manevrə malik, yüksək dağlıq və çətin şəraitdə döyüş tapşırıqlarını müvəffəqiyyətlə yerinə yetirə biləcək yeni birləşmələrin yaradılması zərurətini ortaya qoydu. Prezident İlham Əliyevin tapşırığı ilə ordumuzda yeni təyinatlı Komando hərbi hissəsi yaradıldı. Komando Qüvvələrinin yaradılması Ordunun döyüş qabiliyyətinin artırılması üçün önəmli amillərdən biridir. Azərbaycan Ordusunun Türkiyə Silahlı Qüvvələrinin standartlarına uyğunlaşdırılması istiqamətində həyata keçirilən tədbirlər çərçivəsində hərbi təhsil sahəsində idarəetmənin təkmilləşdirilməsi məqsədilə 2022-ci ildə Milli Müdafiə Universiteti yaradılıb. Prezident İlham Əliyevin Milli Ordumuzun Türkiyə ordusunun modeli əsasında yenidən qurulması təşəbbüsü çağdaş dövrün çağırışlarına və Azərbaycanın müdafiə qabiliyyətinin daha da artırılmasına hədəflənən ordu quruculuğu strategiyasıdır. Bu strategiyanın uğurla həyata keçirilməsi Azərbaycan Ordusunun hərbi-texniki göstəricilərini daha yüksək səviyyəyə qaldırılmasını təmin edir və ölkəmizin müdafiə qabiliyyətini qat-qat artırır. Türkiyə hərbi sənayesi ilə milli hərbi sənayemizin birgə əməkdaşlığı qarşıya qoyulan məqsədlərə nail olunmasına mühüm töhfələr verir.
Qısa təhlil Azərbaycan Ordusunun keçdiyi şərəfli yola bələdçilik edən 108 illik tarixin aydın mənzərəsini yaradır. 108 ildə qazanılan təcrübə, zəfərlər gələcəyə daha böyük inamla addımlamağa stimul verir. Müstəqilliyimizin, suverenliyimizin qarantı olan ordumuza diqqət və qayğı davamlıdır.
1918-ci il mayın 28-də Şərqdə ilk demokratik respublika kimi tarix səhnəsinə çıxan Azərbaycan Xalq Cümhuriyyəti yalnız siyasi müstəqilliyini bəyan etmədi, həm də bu müstəqilliyi qoruyacaq hərbi suverenliyini təmin etmək məcburiyyəti ilə üzləşdi. Həmin ilin iyun ayında Cümhuriyyət hökumətinin milli ordunun formalaşdırılması haqqında qəbul etdiyi qərar müstəqil dövlətçiliyimizin möhkəmləndirilməsi yolunda atılmış ən fundamental addım idi.
Dönəmin ağır geosiyasi şəraitini nəzərə alsaq, Cümhuriyyət qurucularının bu ordunun gələcəkdə dünyada tanınan, qüdrətli bir silahlı qüvvəyə çevriləcəyini öncəgörmək imkanları kifayət qədər məhdud idi. Lakin tarixin gedişatı onların bu qərarının nə qədər düzgün və uzaqgörən olduğunu sübut etdi. Dövlət Başçısı, Silahlı Qüvvələrin Ali Baş Komandanı İlham Əliyevin vurğuladığı kimi:
"1918-ci ildə Azərbaycan Ordusunun yaradılması haqqında qərar veriləndə, yəqin ki, Azərbaycan Xalq Cümhuriyyətinin qurucuları heç təsəvvür edə bilməzdilər ki, bu gün Azərbaycan Ordusu dünyanın ən güclü 50 ordusu sırasında olacaq. Bizim ordumuzun həm maddi-texniki təchizatı, həm də döyüş qabiliyyəti ən yüksək səviyyədədir. Biz bunu döyüş meydanında sübut edə bilmişik."

Address

Yardımlı Rayon Abbasabad Kəndi
Yardımlı

Opening Hours

Monday 09:00 - 18:00
Tuesday 09:00 - 18:00
Wednesday 09:00 - 18:00
Thursday 09:00 - 18:00
Friday 09:00 - 18:00

Website

Alerts

Be the first to know and let us send you an email when Yardımlı rayonu Abbasabad kənd ümumi orta ümumtəhsil məktəbi posts news and promotions. Your email address will not be used for any other purpose, and you can unsubscribe at any time.

Shortcuts

Share

Category