SDU THİK

02/06/2026

31/05/2026

🌈 1 İyun – Uşaqların Beynəlxalq Müdafiəsi Günü

Uşaqlıq həyatımızın ən saf, ən qayğısız və ən gözəl dövrüdür. O günlərin səmimiyyəti, saf qəlbi və təmiz duyğuları insanın ömrü boyu ən qiymətli xatirəsi olaraq qalır.

Bu əlamətdar gündə bütün uşaqları təbrik edir, onlara sağlam, xoşbəxt və uğurlu gələcək arzulayırıq. Eyni zamanda hər bir böyüyə də arzu edirik ki, uşaqlıqdan gələn o gözəl duyğular, səmimiyyət, mərhəmət və xəyallar heç vaxt itməsin.

Qoy üzünüzdən təbəssüm, qəlbinizdən ümid əskik olmasın. Çünki içimizdə yaşatdığımız uşaqlıq sevgisi bizi daha yaxşı, daha mərhəmətli və daha xoşbəxt insan edir.

💙 Uşaqlıq xatirələriniz daim yaşasın, uşaqlıq duyğularınız heç vaxt itməsin!

🎈 1 İyun – Uşaqların Beynəlxalq Müdafiəsi Günü mübarək!

31/05/2026

Hörmətli tələbələr,

01.06.2026-cı il tarixindən etibarən Sumqayıt Dövlət Universitetində yaz imtahan sessiyası başlayır.

Universitet rəhbərliyi tərəfindən imtahan sessiyasının mövcud qaydalara uyğun, şəffaf və obyektiv şəkildə təşkili, tələbələrin biliyinin ədalətli qiymətləndirilməsi istiqamətində bütün zəruri tədbirlər həyata keçirilmişdir.

İmtahan prosesi zamanı yarana biləcək müraciət və şikayətlərin operativ araşdırılması məqsədilə universitetdə İmtahan Qərargahı və Apelyasiya Komissiyası fəaliyyət göstərir.

Bununla yanaşı, imtahanlarla bağlı hər hansı çətinlik, təklif və ya müraciətiniz olduqda Sumqayıt Dövlət Universitetinin Tələbə Həmkarlar İttifaqı Komitəsinə (THİK) də müraciət edə bilərsiniz. THİK tələbələrin hüquq və mənafelərinin qorunması, onların müraciətlərinin aidiyyəti üzrə çatdırılması və həllinə dəstək göstərilməsi istiqamətində fəaliyyətini davam etdirəcəkdir.

Bütün tələbələrə yaz imtahan sessiyasında uğurlar, yüksək nəticələr və müvəffəqiyyətlər arzulayırıq!

Hörmətlə,
SDU Tələbə Həmkarlar İttifaqı Komitəsi

28/05/2026

28 May - Azərbaycanın Müstəqillik Günü

27/05/2026

Qurban bayramınız mübarək olsun!

27/05/2026

Sumqayıt Dövlət Universitetində 28 May – Müstəqillik Gününə həsr olunmuş elmi-praktik seminar keçirilib

27/05/2026

Sumqayıt Dövlət Universiteti Həmkarlar İttifaqı Komitəsi, Tələbə Həmkarlar İttifaqı Komitəsi və İdman klubunun birgə təşkilatçılığı ilə Ümummilli Lider Heydər Əliyevin anadan olmasının 103-cü ildönümünə və ölkədə elan edilmiş “Şəhərsalma və Memarlıq İli”nə həsr olunan idman yarışlarına yekun vurulub. Universitetin və Sumqayıt Dövlət Texniki Kollecinin əməkdaş və tələbələrinin iştirakı ilə təşkil olunan yarışlarda şahmat, stolüstü tennis, qılıncoynatma və minifutbol növləri üzrə mübarizə aparılıb. Yarışların əsas məqsədi gənclər arasında sağlam həyat tərzinin təşviqi, idmana marağın artırılması, komanda ruhunun gücləndirilməsi və tələbələrin asudə vaxtlarının səmərəli təşkilinə töhfə vermək olub.

Mayın 25-də keçirilən mükafatlandırma mərasimində çıxış edən SDU-nun rektoru, texnika elmləri doktoru, professor Nurəli Yusifbəyli idmanın gənclərin fiziki və mənəvi inkişafında mühüm rol oynadığını vurğulayıb. Rektor qeyd edib ki, bu cür yarışlar sağlam rəqabət mühitinin formalaşmasına, komanda işi və liderlik bacarıqlarının inkişafına, həmçinin tələbələrin sosial fəallığının artırılmasına mühüm töhfə verir. Professor Nurəli Yusifbəyli bildirib ki, Ümummilli Lider Heydər Əliyevin zəngin dövlətçilik irsinin və gənclər siyasətinin təbliği istiqamətində keçirilən tədbirlər gənc nəslin vətənpərvərlik ruhunda formalaşmasına, milli-mənəvi dəyərlərə bağlılığının möhkəmləndirilməsinə xidmət edir. O, universitetdə təhsil, elm, mədəniyyət və idman sahələrini əhatə edən təşəbbüslərin gələcəkdə də davam etdiriləcəyini diqqətə çatdırıb. Sonda yarışlarda qalib gələn komanda və iştirakçılar diplom və hədiyyələrlə mükafatlandırılıb, fərqlənən idmançılara təşəkkürnamələr təqdim olunub.

27/05/2026

Sumqayıt Dövlət Universiteti Tələbə Həmkarlar İttifaqı Komitəsi və Kitabxana İnformasiya Mərkəzində gənc yazar Aynur İsmayılın “General Kızı” romanının təqdimat mərasimi keçirilib.

Tədbiri mərkəzin direktoru Leyla Allahverdiyeva açaraq müəllif və onun yaradıcılığı haqqında iştirakçılara məlumat verib. O, qeyd edib ki, “General Kızı” romanı gənclərin vətənpərvərlik ruhunda formalaşmasına, birlik və bərabərlik dəyərlərinin aşılanmasına, həmçinin ailə bağlarının möhkəmləndirilməsinə xidmət edən dəyərli əsərlərdən biridir. Sonra müəllif Aynur İsmayıl çıxış edərək romanın türk dilində yazıldığını bildirib və əsər barədə tələbələrə geniş məlumat verib. Qeyd olunub ki, kitabda İkinci Qarabağ müharibəsi dövründə xalqın vətənə bağlılığı, qəhrəmanlıq ruhu və milli həmrəylik mövzularına xüsusi yer ayrılıb. Tədbirin sonunda tələbələri maraqlandıran suallar müəllif tərəfindən cavablandırılıb, kitablar imzalanaraq iştirakçılara təqdim olunub.

27/05/2026

TƏŞƏKKÜR EDİRİK!

Mayın 21-də Sumqayıt Dövlət Universitetində (SDU) universitet və Dövlət Məşğulluq Agentliyinin birgə təşkilatçılığı ilə keçirilən “Karyera Körpüsü: Diplomdan peşəkarlığa ilk addım” adlı Karyera Sərgisi və Əmək Yarmarkasında SDU Tələbə Həmkarlar İttifaqı Komitəsinin fəal tələbələri də iştirak ediblər. Tədbirdə iştirak edən bütün fəal tələbələrimizə təşəkkürümüzü bildiririk.

27/05/2026

Mayın 21-də Sumqayıt Dövlət Universitetində (SDU) universitet və Dövlət Məşğulluq Agentliyinin birgə təşkilatçılığı ilə “Karyera Körpüsü: Diplomdan peşəkarlığa ilk addım” adlı Karyera Sərgisi və Əmək Yarmarkası keçirilib.