Müəllim və valideynlərin birgə fəaliyyəti ilə məktəb daxilində psixososial

29/03/2025

29/03/2025

"Müəllim və valideynlərin birgə fəaliyyəti ilə məktəb daxilində psixososial mühitin yaxşılaşdırılması" layihəsi çərçivəsində hazırlanmış video icmanı təqdim edirik!

10/03/2025

“Müəllim və valideynlərin birgə fəaliyyəti ilə məktəb daxilində psixososial mühitin yaxşılaşdırılması” layihəsinin bağlanış mərasimi keçirilib.

Azərbaycan Respublikası Elm və Təhsil Nazirliyinin Təhsildə İnkişaf və İnnovasiyalar üzrə VIII qrant müsabiqəsinin qalib layihələrindən biri olan “Müəllim və valideynlərin birgə fəaliyyəti ilə məktəb daxilində psixososial mühitin yaxşılaşdırılması” uğurla başa çatıb.

Bağlanış mərasimində layihə rəhbəri Gülnarə Babayeva, Quba-Xaçmaz Regional Təhsil İdarəsinin nümayəndələri, məktəb direktorları, müəllimlər, valideynlər və şagirdlər iştirak ediblər. Çıxış edənlər layihənin həyata keçirilməsi prosesindən, əldə olunan uğurlardan və qarşıya qoyulan məqsədlərə çatmaq üçün görülən işlərdən danışıblar.

Layihə çərçivəsində üç ay ərzində təşkil olunan təlimlərdə valideynlər və müəllimlər psixososial mühitin yaxşılaşdırılması üçün vacib olan bilik və bacarıqlarla tanış olublar. Təlimlərdən sonra onlar birgə şəkildə şagirdlər üçün seminarlar təşkil etdilər. Bu seminarlar uşaqların cəmiyyətə düzgün inteqrasiyası, ünsiyyət bacarıqları və psixoloji rifahının qorunması kimi vacib mövzuları əhatə edib.

Layihənin nəticələri göstərdi ki, müəllim və valideynlərin sıx əməkdaşlığı məktəb daxilində sağlam psixososial mühitin formalaşmasına mühüm töhfə verir. Layihə çərçivəsində qazanılan bilik və təcrübənin gələcəkdə də davam etdirilməsi və digər təhsil müəssisələrində tətbiq olunması tövsiyə olundu.

Tədbirin sonunda layihənin uğurla başa çatmasına töhfə verən bütün iştirakçılara təşəkkür edilib və gələcəkdə bu kimi təşəbbüslərin davam etdirilməsinin vacibliyi vurğulanıb.

27/12/2024

“Müəllim və valideynlərin birgə fəaliyyəti ilə məktəb daxilində psixososial mühitin yaxşılaşdırılması” layihəsi çərçivəsində təlimlərə başlanmışdır.
Təlimlər 3 ay ərzində müəllimlər və valideynlər üçün müxtəlif mövzular üzrə keçiriləcək. Müəllimlər üçün “Psixoloqdan müəllimlər üçün qızıl qaydalar”, “Gəlin uşaqlara qarşı diqqətli olaq”, valideynlər üçün isə “Tərbiyələndirmək və valideynlərin köməyi”, “Uşağı necə dinləməli və səbr etməli?”, “Valideynlərin hissləri. Konfliktləri necə həll etməli?”, “Bəs uşaqların intizamı?”, “Gəl birlikdə həll edək” və “Valideyn və müəllim əməkdaş olarsa?” mövzularında 8 təlim təşkil ediləcək. Ümumilikdə 32 saatlıq təlim proqramı keçiriləcək. Təlimlərdə uşaqla ünsiyyət, düzgün yanaşma və innovasiyalar barədə məlumat veriləcəkdir.

Qeyd edək ki, layihə Təhsildə inkişaf və innovasiyalar üzrə VIII qrant müsabiqəsinin qalib layihələrindən biridir. Layihə, Gülnarə Babayevanın rəhbərliyi altında icra olunur və məqsədi valideyn və müəllimlərə düzgün yanaşma üsullarının aşılanması ilə məktəbdə psixososial mühitin yaxşılaşdırılmasına dəstək verməkdir.

15/12/2024

“Müəllim və valideynlərin birgə fəaliyyəti ilə məktəb daxilində psixososial mühitin yaxşılaşdırılması” layihəsinin açılış mərasimi keçirilib.
Açılış mərasimində layihə rəhbəri Gülnarə Babayeva, Quba-Xaçmaz Regional Təhsil İdarəsinin Quba rayonu üzrə təhsil sektorunun əməkdaşı Ramin Mahmudov, Quba rayonu Küçeyi kənd ümumi orta ümumtəhsil məktəbinin direktoru İlqar İsayev, Quba rayonu Pirvahid kənd tam orta ümumtəhsil məktəbinin direktoru Elmar Hüseynov, idarə heyəti üzvləri, müəllimlər və şagirdlər iştirak edib.
Çıxış edən layihə rəhbəri qeyd edib ki, layihənin məqsədi valideyn və müəllimlərə uşaqlara qarşı düzgün yanaşma üsullarının aşılanması və bu istiqamətdə peşəkar formada təlimatlandırılması ilə məktəbdə psixososial durumun yaxşılaşdırılmasına dəstək verməkdən ibarətdir.
Layihə çərçivəsində müəllim və valideyn ictimaiyyəti üçün təlimlər təşkil olunacaqdır. Təlimlər yekunlaşdıqdan sonra valideynlərlə müəllimlər birgə şəkildə şagirdlər üçün seminarlar təşkil edəcəklər. Bu seminarlar 5 valideynin və 5 müəllimin birgə əməkdaşlığı ilə baş tutacaqdır. Belə ki, 5 gün ərzində hər gün 1 valideyn 1 müəllim ilə birgə sərbəst seçim ilə uşaqlar üçün maarifləndirici seminarlar təşkil edəcəklər. Bu seminarların əsas mövzusu uşaqların cəmiyyətdə düzgün davranışları, qısnama, ünsiyyət qurma bacarığı və s. əhatə edəcəkdir. Daha sonra çıxış edən müəllim və şagirdlər layihənin əhəmiyyətindən söz açıblar. Onlar layihənin gedişatına uğurlar diləyiblər.
Layihə Azərbaycan Respublikası Elm və Təhsil Nazirliyinin Təhsildə inkişaf və innovasiyalar üzrə VIII qrant müsabiqəsinin qalib layihələrindən biridir.

26/09/2024

Azərbaycan Respublikası Elm və Təhsil Nazirliyi Təhsildə inkişaf və innovasiyalar üzrə VIII qrant müsabiqəsi
Layihənin adı: Müəllim və valideynlərin birgə fəaliyyəti ilə məktəb daxilində psixososial mühitin yaxşılaşdırılması
Məktəb: Quba rayon Küçeyi kənd ümumi orta məktəbi
Tarixlər: 01.10.2024 – 31.12.2024