Xırdalan 11 nömrəli tam orta məktəb

25/08/2026

Azərbaycan və Özbəkistan münasibətləri yeni inkişaf mərhələsinə qədəm qoyur

Azərbaycan Prezidenti İlham Əliyevin avqustun 23-də Özbəkistana dövlət səfəri çərçivəsində Daşkənddə Azərbaycan və Özbəkistan Ali Dövlətlərarası Şuranın 3-cü iclası keçirilib, iki ölkə arasında bir sıra mühüm sənədlər imzalanıb və yeni layihələrin təməli qoyulub. Dövlət başçısı səfərin yekunları ilə bağlı mətbuata bəyanatında Azərbaycan-Özbəkistan münasibətlərinin bütün istiqamətlər üzrə sürətlə inkişaf etdiyini vurğulayıb.
Prezident İlham Əliyev Daşkəndin və bütövlükdə Özbəkistanın sürətli inkişaf mərhələsində olduğunu qeyd edib. Dövlət başçısı bildirib ki, hər səfərində ölkədə baş verən müsbət dəyişikliklərin, böyük layihələrin və iqtisadi inkişafın şahidi olur. Onun sözlərinə görə, bu inkişaf Prezident Şavkat Mirziyoyevin ölkənin potensialının gücləndirilməsi, beynəlxalq mövqelərinin möhkəmləndirilməsi və sosial-iqtisadi məsələlərin həllinə yönəlmiş siyasətinin nəticəsidir.
Azərbaycan Prezidenti iki ölkə arasında iqtisadi əlaqələrin də yeni mərhələyə qədəm qoyduğunu diqqətə çatdırıb. O bildirib ki, Azərbaycanla Özbəkistan arasında ticarət dövriyyəsinin bir milyard dollara çatdırılması artıq uzaq hədəf kimi deyil, yaxın illərdə əldə edilə biləcək real nəticə kimi qiymətləndirilir. Dövlət başçısı qarşılıqlı investisiyaların və birgə layihələrin sayının artmasını münasibətlərin möhkəmlənməsinin mühüm göstəricisi kimi dəyərləndirib.
İlham Əliyev Azərbaycan və Mərkəzi Asiya ölkələri arasında əməkdaşlığın genişlənməsinin yeni geosiyasi və geoiqtisadi reallıqlar yaratdığını bildirib. Onun sözlərinə görə, Azərbaycan və Mərkəzi Asiya ölkələri böyük potensiala və bundan daha böyük inkişaf imkanlarına malik vahid geosiyasi və geoiqtisadi region kimi çıxış edir. Bu baxımdan Azərbaycan-Özbəkistan əməkdaşlığı regional inteqrasiyanın dərinləşdirilməsində xüsusi əhəmiyyət daşıyır.
Dövlət başçısı iki ölkə arasında əməkdaşlığın iqtisadiyyatın demək olar ki, bütün sahələrini əhatə etdiyini qeyd edib. Enerji, nəqliyyat, investisiya, turizm, dağ-mədən sənayesi, avtomobil sənayesi, kənd təsərrüfatı, emal və bankçılıq sahələrində birgə layihələr həyata keçirilir. SOCAR-ın Özbəkistan bazarında fəaliyyətinin genişləndirilməsi, Azərbaycan bankının Özbəkistan bazarına daxil olması və neft-qaz layihələri üzrə əməkdaşlığın inkişaf etdirilməsi də münasibətlərin çoxşaxəli xarakterini göstərir.
Azərbaycan və Özbəkistan arasında qarşılıqlı investisiya layihələri də genişlənir. Avqustun 23-də Daşkənddə Azərbaycan şirkətlərinin Özbəkistanda həyata keçirdiyi bir sıra layihələrin açılışı və yeni layihələrin təməlqoyma mərasimləri keçirilib. Tədbirlər çərçivəsində “Davr Bank”, gips zavodu və STEAM məktəblərinin açılışı, həmçinin SOCAR-ın yeni yanacaqdoldurma məntəqələri, “Sea Breeze Uzbekistan”, “Baku City”, gümüş tərkibli filizin emalı fabrikinin və meyvə bağlarının təməlqoyma mərasimləri keçirilib.
Prezident İlham Əliyev Azərbaycan-Özbəkistan münasibətlərinin yalnız iqtisadi maraqlara deyil, həm də möhkəm mənəvi və qardaşlıq təməlinə söykəndiyini vurğulayıb. Dövlət başçısı bu münasibətlərin iki xalqın tarixi və mədəni yaxınlığı ilə yanaşı, qarşılıqlı etimad və siyasi iradə üzərində qurulduğunu bildirib.
Azərbaycan Prezidenti Özbəkistanın Qarabağın və Şərqi Zəngəzurun bərpasında iştirakını da xüsusi qeyd edib. Füzulidə Mirzə Uluqbəy adına 960 şagird yerlik məktəbin tikilməsi və Xankəndidə tikiş fabrikinə investisiya qoyulması Özbəkistanın Azərbaycanın işğaldan azad edilmiş ərazilərinin bərpasına verdiyi töhfələr sırasında göstərilib.
Daşkənddə keçirilən görüşlər zamanı Azərbaycan və Özbəkistan arasında çoxsaylı sənədlərin imzalanması da ikitərəfli əlaqələrin genişlənməsinin göstəricisi olub. Avqustun 23-də iki ölkə prezidentlərinin iştirakı ilə sənədlərin imzalanması və mübadiləsi mərasimi keçirilib.
Səfər çərçivəsində Azərbaycan və Özbəkistan prezidentlərinin qarşılıqlı təltif edilməsi də münasibətlərin yüksək səviyyəsini nümayiş etdirib. Prezident Şavkat Mirziyoyev İlham Əliyevi ali dərəcəli “Dostluq” ordeni ilə təltif edib, Prezident İlham Əliyev isə Özbəkistan dövlət başçısını “Heydər Əliyev” ordeni ilə təltif edib.
Prezident İlham Əliyev səfərin sonunda Şavkat Mirziyoyevi Azərbaycana dövlət səfərinə dəvət edib. Dövlət başçısı əminliyini bildirib ki, iki ölkənin bundan sonra da birlikdə həyata keçirəcəyi layihələr Azərbaycan və Özbəkistanı, eləcə də iki qardaş xalqı daha da yaxınlaşdıracaq.
Daşkənddə keçirilən son görüşlər və əldə olunan razılaşmalar göstərir ki, Azərbaycan-Özbəkistan münasibətləri artıq yalnız ənənəvi dostluq və qardaşlıq əlaqələri ilə məhdudlaşmır. Bu münasibətlər iqtisadi, investisiya, enerji, nəqliyyat, sənaye, turizm və digər sahələri əhatə edən genişmiqyaslı strateji tərəfdaşlığa çevrilir.

Şahin Tağıyev
Novxanı bələdiyyəsinin sədri

24/08/2026

İşğaldan Zəfərə və Zəfərdən quruculuğa uzanan Laçın yolu

26 Avqust – Laçın şəhəri Günüdür. Bu əlamətdar tarix Azərbaycanın ərazi bütövlüyünün bərpasını, Laçının işğaldan azad edilməsini və şəhərdə aparılan genişmiqyaslı quruculuq işlərini özündə əks etdirir.
1923-cü ildə Abdallar kənd yaşayış məntəqəsinə Laçın adı verilib və şəhər statusu alıb. 1930-cu il avqustun 8-də Laçın rayonu inzibati ərazi vahidi kimi təşkil edilib. Rayon 1835 kvadratkilometr ərazini əhatə edir və zəngin təbiəti, dağları, meşələri və strateji mövqeyi ilə seçilir.
Laçın 1992-ci il mayın 18-də Ermənistan silahlı qüvvələri tərəfindən işğal olunub. İşğal nəticəsində rayonun əhalisi doğma yurdlarından didərgin salınıb, yüzlərlə insan həlak olub və itkin düşüb. Rayonun yaşayış məntəqələri, sosial və iqtisadi infrastrukturu dağıdılıb, tarixi və mədəni irs nümunələri vandalizmə məruz qalıb.
Laçının işğalı Ermənistanla Qarabağ bölgəsi arasında birbaşa quru əlaqəsinin yaranmasına imkan verdi. Rayonun itirilməsi Azərbaycanın digər ərazilərinin işğalına gedən prosesdə mühüm strateji nəticələr doğurdu və sonrakı faciəli hadisələrə zəmin yaratdı. Lakin 2020-ci ildə Vətən müharibəsində qazanılan Zəfər nəticəsində tarixi ədalətin bərpası üçün yeni mərhələ başlayıb. Üçtərəfli bəyanata əsasən, 2020-ci il dekabrın 1-də Laçın rayonu Azərbaycana qaytarılıb. 2022-ci il avqustun 26-da isə Laçın şəhəri, Zabux və Sus kəndləri Azərbaycanın nəzarətinə keçib.
Prezident İlham Əliyevin 31 iyul 2023-cü il tarixli Sərəncamı ilə 26 avqust Laçın şəhəri Günü kimi müəyyən edilib. Bu tarix hər il şəhərin azadlığının və yeni inkişaf mərhələsinin rəmzi kimi qeyd olunur.
Bu gün Laçında genişmiqyaslı bərpa və quruculuq işləri həyata keçirilir. Şəhərin 2040-cı ilədək inkişafını nəzərdə tutan Baş Plan təsdiqlənib. Yeni yaşayış məhəllələri, məktəblər, uşaq bağçaları, səhiyyə, mədəniyyət və turizm obyektləri yaradılır. Şəhərin müasir siması formalaşdırılmaqla yanaşı, onun tarixi və təbii xüsusiyyətlərinin qorunmasına xüsusi diqqət yetirilir.
Laçında Böyük Qayıdış prosesi 2023-cü il mayın 28-dən başlayıb. 2026-cı ilin iyul ayına qədər Laçın şəhərinə 614 ailənin, yəni 2264 nəfərin, Zabux kəndinə 217 ailənin, Sus kəndinə 59 ailənin, Bəylik kəndinə isə 89 ailənin daimi məskunlaşması təmin edilib. Bununla da uzun illər doğma yurd həsrəti çəkən laçınlıların öz torpaqlarına qayıdışı davam edir.
Rayonda enerji, nəqliyyat və su infrastrukturu da sürətlə inkişaf etdirilir. Laçında bir sıra su elektrik stansiyaları istifadəyə verilib və rayonun elektrik tələbatı tamamilə yaşıl enerji hesabına qarşılanır. 2026-cı il iyulun 11-də Hoçaz çayı üzərində yeni su elektrik stansiyalarının açılışı keçirilib. Həmin gün “Həkəriçay” su anbarının da təməli qoyulub.
Kəlbəcər-Laçın avtomobil yolunun və Laçın Beynəlxalq Hava Limanının istifadəyə verilməsi şəhərin nəqliyyat imkanlarını əhəmiyyətli dərəcədə genişləndirib. Hava limanının 2025-ci ildə istifadəyə verilməsi Laçının turizm və iqtisadi potensialının inkişafına yeni imkanlar yaradıb.
Laçında sənaye və turizm sahələrinin inkişafı da diqqət mərkəzindədir. Aqro-Sənaye Parkında yeni müəssisələr yaradılır, mebel, ayaqqabı və tekstil istehsalı inkişaf etdirilir. Zerti kəndində “Laçın” İstirahət Kompleksi istifadəyə verilib, Həkəri çayı ətrafında yeni istirahət və turizm məkanları yaradılır.
Bu gün Laçın Azərbaycanın Zəfərinin, Böyük Qayıdışın və quruculuq siyasətinin simvollarından biridir. Vaxtilə işğal nəticəsində xarabalığa çevrilən şəhər bu gün yenidən qurulur, sakinləri doğma yurda qayıdır və Laçında həyat öz axarına qayıdır.
26 Avqust – Laçın şəhəri Günü həm şəhidlərimizin əziz xatirəsinə ehtiram, həm də Azərbaycanın qazandığı tarixi Zəfərin qürurla qeyd edildiyi əlamətdar gündür. Laçının keçmişi qəhrəmanlıq tariximiz, bu günü Zəfərimiz, gələcəyi isə Böyük Qayıdış və quruculuqla yazılır.

Rəhman Mehtiyev
Vətən müharibəsi şəhidi Rəşad Mehdiyevin atası, Birinci Qarabağ müharibəsi qazisi

24/08/2026

Qardaşlıqdan müttəfiqliyə uzanan yol

Prezident İlham Əliyevin Özbəkistan Milli İnformasiya Agentliyinə müsahibə verib

İki qardaş ölkə arasında münasibətlərin bugünkü mənzərəsini, əldə olunan mühüm nəticələri və qarşıda duran geniş perspektivləri əhatə edən əhəmiyyətli siyasi mesajlarla zəngindir. Dövlət başçısının müsahibədə səsləndirdiyi fikirlər Azərbaycan–Özbəkistan əlaqələrinin sadəcə diplomatik münasibətlər çərçivəsində deyil, tarixi və mənəvi köklərə söykənən möhkəm qardaşlıq və strateji müttəfiqlik səviyyəsində inkişaf etdiyini bir daha göstərir.
Azərbaycan və Özbəkistanı bir-birinə bağlayan tellərin tarixi çox qədimdir. Ortaq tarix, dil, mədəniyyət, milli-mənəvi dəyərlər, adət-ənənələr və xalqlarımızın əsrlər boyu formalaşdırdığı qarşılıqlı rəğbət bu münasibətlərin möhkəm təməlini təşkil edir. Bu gün dövlətlərarası əlaqələrin yüksək səviyyəyə çatması da məhz həmin mənəvi təməlin üzərində mümkün olub. Son illərdə Azərbaycan–Özbəkistan münasibətlərinin sürətlə inkişaf edərək ən yüksək mərhələyə – müttəfiqlik səviyyəsinə yüksəlməsi bu tarixi yaxınlığın müasir siyasi reallıqlarla tamamlandığını göstərir.
Bu yüksəliş, heç şübhəsiz, Azərbaycan Prezidenti İlham Əliyev ilə Özbəkistan Prezidenti Şavkat Mirziyoyev arasında formalaşmış səmimi dostluq, qarşılıqlı hörmət və etimadın mühüm nəticəsidir. Liderlər arasındakı siyasi dialoqun ardıcıllığı, qarşılıqlı səfərlər və qəbul edilən mühüm qərarlar iki ölkənin münasibətlərinin möhkəm siyasi iradəyə söykəndiyini nümayiş etdirir.
Müsahibədə diqqət çəkən əsas məqamlardan biri Azərbaycan–Özbəkistan münasibətlərinin yalnız ikitərəfli əməkdaşlıq çərçivəsində nəzərdən keçirilməməsidir. Bu əlaqələr daha geniş mənada Türk dünyasının həmrəyliyinin və birliyinin möhkəmlənməsinə xidmət edir. Azərbaycan və Özbəkistanın artan əməkdaşlığı Türk dövlətləri arasında qarşılıqlı etimadın, iqtisadi əlaqələrin və humanitar münasibətlərin inkişafına mühüm töhfə verir.
Bu gün Türk dünyasının qarşısında duran əsas vəzifələrdən biri tarixi və mənəvi yaxınlığı müasir əməkdaşlıq imkanları ilə daha da gücləndirməkdir. Azərbaycan və Özbəkistanın münasibətləri bu baxımdan nümunəvi xarakter daşıyır. İki ölkənin bir-birinə göstərdiyi siyasi dəstək, qarşılıqlı hörmət və birgə təşəbbüslər türk dövlətləri arasında həmrəyliyin daha da möhkəmlənməsinə zəmin yaradır.
Əlaqələrin inkişafında iqtisadi əməkdaşlığın da xüsusi rolu var. Qarşılıqlı investisiyaların artırılması, birgə müəssisələrin yaradılması, ticarət dövriyyəsinin genişləndirilməsi və nəqliyyat-kommunikasiya imkanlarının inkişaf etdirilməsi iki ölkənin iqtisadi potensialının bir-birini tamamladığını göstərir. Siyasi münasibətlərdə əldə olunan yüksək səviyyənin iqtisadi əməkdaşlıqda da öz əksini tapması Azərbaycan və Özbəkistanın gələcək inkişafı üçün mühüm imkanlar yaradır.
Xüsusilə nəqliyyat və logistika sahəsində əməkdaşlıq böyük perspektiv vəd edir. Azərbaycanın Şərqlə Qərbi birləşdirən mühüm nəqliyyat qovşağına çevrilməsi Özbəkistan üçün də yeni imkanlar açır. Orta Dəhliz çərçivəsində əməkdaşlığın genişləndirilməsi Mərkəzi Asiya ilə Cənubi Qafqaz və Avropa arasında iqtisadi əlaqələrin daha da güclənməsinə xidmət edə bilər.
Azərbaycan-Özbəkistan münasibətlərinin gücü yalnız siyasət və iqtisadiyyatla ölçülmür. Bu münasibətlərin ən böyük dayaqlarından biri xalqlarımızın mənəvi yaxınlığıdır. Mədəniyyət, incəsənət, ədəbiyyat, təhsil, elm və media sahələrində həyata keçirilən layihələr iki xalqın bir-birini daha yaxından tanımasına, ortaq dəyərlərin yaşadılmasına və gələcək nəsillərə ötürülməsinə xidmət edir.
Bu baxımdan media sahəsində əməkdaşlığın da xüsusi əhəmiyyəti var. Azərbaycan və Özbəkistanın aparıcı media qurumları arasında əlaqələrin genişlənməsi ölkələrimiz haqqında həqiqətlərin xalqlara çatdırılmasına, qarşılıqlı informasiya mübadiləsinin gücləndirilməsinə imkan yaradır. Jurnalistlərin görüşləri, media forumları və birgə layihələr Azərbaycan və Özbəkistan arasında mənəvi körpülərin daha da möhkəmlənməsinə xidmət edir.
Azərbaycan-Özbəkistan qardaşlığının ən təsirli nümunələrindən biri isə işğaldan azad edilmiş Qarabağ və Şərqi Zəngəzurda həyata keçirilən bərpa-quruculuq prosesində Özbəkistanın göstərdiyi dəstəkdir.
Füzuli şəhərində Özbəkistanın təşəbbüsü ilə inşa edilən Mirzə Uluqbəy adına məktəb bu qardaşlığın parlaq rəmzlərindən biridir. Bu məktəb yalnız təhsil ocağı deyil, həm də iki xalqın dostluğunun, həmrəyliyinin və gələcəyə inamının simvoludur.
Qarabağda otuz ilə yaxın davam edən işğaldan sonra Azərbaycan öz ərazi bütövlüyünü bərpa edib. Bu torpaqlarda həyat yenidən qurulur, şəhərlər və kəndlər dirçəlir, məktəblər, xəstəxanalar, yollar və digər infrastruktur obyektləri yaradılır. Belə bir tarixi mərhələdə qardaş Özbəkistanın bu prosesə öz töhfəsini verməsi Azərbaycan xalqı tərəfindən yüksək qiymətləndirilir.
Füzulidə ucalan məktəbin mənəvi anlamı xüsusilə böyükdür. Çünki burada yalnız bir bina deyil, gələcəyə açılan bir qapı yaradılıb. Qarabağın uşaqları üçün qurulan bu məktəb Azərbaycan–Özbəkistan dostluğunun gələcək nəsillərə ünvanlanan mesajıdır. Dostluğun sözdən əmələ keçməsinin bundan daha gözəl nümunəsini təsəvvür etmək çətindir.
Azərbaycan ilə Özbəkistan arasında humanitar əlaqələrin dərinləşməsi də xüsusi əhəmiyyət daşıyır. Ortaq tariximizi, mədəniyyətimizi və ədəbiyyatımızı yaşatmaq, görkəmli şəxsiyyətlərin irsini qarşılıqlı şəkildə tanıtmaq xalqlarımızın mənəvi yaxınlığını daha da artırır. Nizami Gəncəvi, Əlişir Nəvai, Mirzə Uluqbəy kimi böyük şəxsiyyətlərin irsi Azərbaycan və Özbəkistanın ortaq mədəni yaddaşında xüsusi yer tutur.
Bu yaxınlıq yalnız keçmişə bağlılıq deyil, həm də gələcəyə yönəlmiş mənəvi körpüdür. Çünki xalqları birləşdirən ən böyük qüvvələrdən biri onların tarixini və mədəniyyətini birlikdə yaşatmasıdır.
Azərbaycan-Özbəkistan münasibətlərinin gələcəyində gənc nəslin rolu da böyükdür. Bu gün qurulan əlaqələrin sabahkı davamçıları məhz gənclər olacaq. Təhsil, elm, mədəniyyət və idman sahələrində əməkdaşlığın genişləndirilməsi iki xalqın gələcək nəsilləri arasında daha möhkəm bağların yaranmasına imkan verəcək.
Bu gün Azərbaycan və Özbəkistanın münasibətlərinə nəzər salarkən bir həqiqət aydın görünür: siyasi liderlərin iradəsi xalqların tarixdən gələn dostluq duyğuları ilə üst-üstə düşəndə əməkdaşlıq daha böyük və davamlı nəticələr verir. Prezident İlham Əliyev və Prezident Şavkat Mirziyoyev arasında mövcud olan qarşılıqlı etimad da məhz belə bir münasibətin əsasını təşkil edir.
Azərbaycan-Özbəkistan münasibətlərinin yüksək səviyyəyə çatması Türk dünyası üçün də mühüm hadisədir. Çünki güclü Azərbaycan və güclü Özbəkistan eyni zamanda daha sıx əməkdaşlıq edən, daha həmrəy və daha güclü Türk dünyası deməkdir. İki ölkənin beynəlxalq və regional məsələlərdə bir-birini dəstəkləməsi, qarşılıqlı əməkdaşlığı genişləndirməsi ümumi türk həmrəyliyinin möhkəmlənməsinə mühüm töhfə verir.
Prezident İlham Əliyevin müsahibəsi bu baxımdan yalnız Azərbaycan–Özbəkistan münasibətlərinin bugünkü vəziyyətinə dair fikir mübadiləsi deyil. Bu, həm də gələcəyə baxışdır. Burada keçmişin ortaq dəyərləri, bu günün möhkəm tərəfdaşlığı və gələcəyin daha böyük əməkdaşlıq imkanları bir-birini tamamlayır.
Azərbaycan və Özbəkistanın münasibətləri artıq sadəcə dostluq münasibətləri ilə məhdudlaşmır. Bu münasibətlər strateji müttəfiqlik səviyyəsinə yüksəlib və qarşılıqlı etimadla möhkəmlənib. İki dövlət arasında əldə olunan razılaşmalar, həyata keçirilən layihələr və xalqlarımızın bir-birinə göstərdiyi səmimi münasibət bu müttəfiqliyin möhkəm əsaslara söykəndiyini göstərir.
Bu gün Bakıda Özbəkistanın, Daşkənddə isə Azərbaycanın səsini eşitmək artıq adi mənzərəyə çevrilib. Mədəni tədbirlər, qarşılıqlı səfərlər, iqtisadi layihələr, media əməkdaşlığı və humanitar əlaqələr iki ölkənin bir-birinə nə qədər yaxın olduğunu göstərir.
Əminliklə demək olar ki, Azərbaycan–Özbəkistan dostluğu yalnız bu günün deyil, gələcəyin də böyük sərvətidir. Bu dostluq iki xalqın ortaq yaddaşından güc alır, iki dövlətin siyasi iradəsi ilə möhkəmlənir və Türk dünyasının böyük gələcəyinə doğru uzanır.
Prezident İlham Əliyevin Özbəkistan Milli İnformasiya Agentliyinə verdiyi müsahibə də məhz bu reallığı bir daha təsdiqləyir: Azərbaycan və Özbəkistan arasında münasibətlər artıq sadəcə diplomatik əlaqələr deyil, ortaq tarixə, milli-mənəvi dəyərlərə, qarşılıqlı etimada və strateji maraqlara söykənən möhkəm müttəfiqlikdir.
Bu müttəfiqliyin daha da dərinləşməsi isə yalnız Azərbaycan və Özbəkistanın deyil, bütün Türk dünyasının gücünü artıracaq. Çünki tarixdən gələn qardaşlığın siyasi iradə ilə möhkəmləndiyi, dostluğun konkret əməllərlə təsdiqləndiyi yerdə gələcəyə inam da daha böyük olur.
Azərbaycan və Özbəkistanın birgə yolu məhz belə bir yoldur - ortaq tarixdən gələcəyə, qardaşlıqdan müttəfiqliyə uzanan yol.

Şəhla Ağbulud
Azərbaycan Yazıçılar Birliyi Abşeron bölməsinin sədri

19/08/2026

18/08/2026

18/08/2026

📢 Şagirdlərin elektron yerdəyişməsi prosesinə başlanılır

🗓️ 20 avqust saat 15:00-dan etibarən 2026–2027-ci tədris ili üzrə şagirdlərin elektron yerdəyişməsi prosesi aktivləşdiriləcək. Proses 2–9-cu və 11-ci sinif şagirdlərini əhatə edəcək.

💻 Şagirdlərin elektron yerdəyişməsi sy.edu.az portalı vasitəsilə həyata keçirilir.

📌 Nəzərinizə çatdırırıq ki, internetə çıxış imkanı olmayan vətəndaşlar yerdəyişmə prosesi ilə bağlı aidiyyəti üzrə Agentliyin və təhsili yerli idarəetmə bölmələrinin çağrı mərkəzlərinə, Agentliyin Vətəndaşlara Xidmət Mərkəzinə, eləcə də ASAN xidmət mərkəzlərinə müraciət edə bilərlər.

14/08/2026

Prezident İlham Əliyevin Naxçıvan səfərindən mühüm mesajlar

Azərbaycan Respublikasının Prezidenti İlham Əliyev avqustun 11-də Naxçıvana səfəri çərçivəsində Azərbaycan Televiziyasına müsahibə verib. Dövlət başçısı müsahibəsində Naxçıvanın sosial-iqtisadi inkişafı, müdafiə və enerji təhlükəsizliyi, sənaye, nəqliyyat, kənd təsərrüfatı, turizm və tarixi-mədəni irsin qorunması, eləcə də Zəngəzur dəhlizinin reallaşdırılması ilə bağlı mühüm məsələlərə toxunub.

Dövlət başçısı bildirib ki, bu, onun Prezident kimi Naxçıvana 17-ci səfəridir. O, son illərdə muxtar respublikada bir sıra mühüm layihələrin həyata keçirildiyini və bundan sonra da Naxçıvanın sürətli sosial-iqtisadi inkişafının təmin ediləcəyini qeyd edib.
Müdafiə məsələlərinə toxunan Prezident Naxçıvanın təhlükəsizliyinin xüsusi əhəmiyyət daşıdığını vurğulayıb. Bildirib ki, Əlahiddə Ordunun yaradılması, ən müasir hərbi texnika ilə təchizat və yeni komando qüvvələrinin formalaşdırılması istiqamətində mühüm işlər görülüb. Azərbaycan Silahlı Qüvvələrinin bölgədə söz sahibi olduğunu deyən dövlət başçısı Naxçıvanın hərbi potensialının bundan sonra da gücləndiriləcəyini bildirib.
Müsahibədə Naxçıvan Sənaye Parkının təməlinin qoyulması da xüsusi qeyd olunub. Prezident bildirib ki, parkın yaradılması yeni sənaye müəssisələrinin və iş yerlərinin açılmasına mühüm imkan yaradacaq. Sənaye Parkının tərkibində 300 meqavat gücündə istilik elektrik stansiyasının inşası da nəzərdə tutulur. Bu stansiyanın həm Naxçıvanın dayanıqlı enerji təminatına, həm də gələcəkdə elektrik enerjisinin ixracına xidmət edəcəyi bildirilib. Qeyd edib ki, muxtar respublikada qazlaşma 100 faizdir, Günəş və su elektrik stansiyaları fəaliyyət göstərir. Naxçıvanda Günəş enerjisinin istehsalı üçün 600 hektardan çox ərazi müəyyən edilib və burada yüzlərlə meqavat gücündə yeni stansiyaların yaradılması planlaşdırılır. Prezident yalnız Günəş enerjisi hesabına Naxçıvanda ən azı 500 meqavat, perspektivdə isə 1000 meqavatadək elektrik enerjisi istehsalının mümkün olduğunu bildirib.

Dövlət başçısı Naxçıvanın zəngin tarixi və mədəni irsinin qorunmasının da mühüm istiqamət olduğunu qeyd edib. Möminə xatun məqbərəsinin bərpası, digər tarixi abidələrin konservasiyası və qorunması ilə bağlı işlərin davam etdiriləcəyi bildirilib. Prezident Naxçıvanın Azərbaycan xalqına Ulu Öndər Heydər Əliyev kimi dahi şəxsiyyət bəxş etdiyini vurğulayaraq, milli kimliyin, tarix və mədəniyyətin qorunmasının xüsusi əhəmiyyət daşıdığını qeyd edib.
Müsahibənin əsas mövzularından biri də Zəngəzur dəhlizi olub. Prezident İlham Əliyev Azərbaycanın əsas hissəsi ilə Naxçıvanı birləşdirəcək bu nəqliyyat bağlantısının ölkə üçün strateji əhəmiyyət daşıdığını bildirib. Horadiz–Ağbənd avtomobil yolunun demək olar ki, hazır olduğunu, dəmir yolunun tikintisinin isə davam etdiyini qeyd edən dövlət başçısı Naxçıvan ərazisində dəmir yolunun bərpası istiqamətində işlərə başlanıldığını açıqlayıb.
Yeni texniki-iqtisadi əsaslandırmaya əsasən Naxçıvan dəmir yolunun uzunluğunun 194 kilometr olacağı və gələcəkdə onun yükdaşıma qabiliyyətinin ildə ən azı 15 milyon tona çatdırılmasının planlaşdırıldığı bildirilib. Prezident Naxçıvanın Şərq-Qərb və Şimal-Cənub nəqliyyat dəhlizlərinin mühüm qovşaqlarından birinə çevrilə biləcəyini vurğulayıb.

Dövlət başçısı Zəngəzur dəhlizinin yalnız avtomobil və dəmir yolundan ibarət olmayacağını da qeyd edib. Gələcəkdə bu istiqamətdə elektrik xətlərinin, fiber-optik kabellərin və zərurət yaranacağı təqdirdə digər enerji infrastrukturlarının yaradılmasının mümkün olduğu bildirilib.
Prezident şəhərlərarası və rayonlararası sərnişindaşmanın yaxşılaşdırılması üçün 217 müasir avtobusun alınacağını, həmçinin muxtar respublikada 420 kilometr uzunluğunda yolların tikintisi və əsaslı təmiri nəzərdə tutulduğunu açıqlayıb.
Naxçıvanın turizm potensialından da danışan İlham Əliyev muxtar respublikanın zəngin tarixi abidələrə, gözəl təbiətə və əlverişli iqlimə malik olduğunu bildirib. Turizmin inkişafı üçün müasir mehmanxana infrastrukturunun yaradılmasının vacibliyini qeyd edən Prezident Naxçıvan şəhərində yeni beşulduzlu mehmanxananın təməlinin qoyulduğunu və onun təxminən 2028-ci ildə istifadəyə veriləcəyini bildirib.
Prezident Naxçıvanın kənd təsərrüfatı, suvarma və yol infrastrukturunun inkişafının da diqqətdə saxlanıldığını qeyd edib. Yeni artezian quyularının qazılması, müasir suvarma sistemlərinin qurulması və kənd təsərrüfatı üçün istifadə olunan torpaqların genişləndirilməsi nəzərdə tutulur.
İlham Əliyev Naxçıvan şəhərinin Baş Planının hazırlanmasının vacib addım olduğunu bildirib. Eyni zamanda, Naxçıvanın Qarabağ və Şərqi Zəngəzurla birlikdə vahid inkişaf konsepsiyası əsasında inkişaf etdirilməsinin vacibliyini vurğulayıb.
Dövlət başçısı Naxçıvanda idarəetmə sisteminin də təkmilləşdiriləcəyini bildirib. Qarabağ və Şərqi Zəngəzurda tətbiq olunan yeni idarəetmə modelinin üstünlüklərinin nəzərə alınacağını qeyd edən Prezident Naxçıvan Muxtar Respublikasının muxtar statusunun qorunacağını xüsusi vurğulayıb və Naxçıvanın gələcək inkişafı ilə bağlı dövlət tərəfindən bütün zəruri tədbirlərin həyata keçiriləcəyini bildirib.

Firdovsi Calalov,
Masazır bələdiyyəsinin sədri

12/08/2026

12/08/2026

🏆🤸‍♀️ ŞAGİRDİMİZİN BEYNƏLXALQ UĞURU! 🇦🇿🇮🇹

Məktəbimizin 3 “E” sinif şagirdi Əhmədxanova Pəri Rauf qızı gimnastika üzrə növbəti böyük uğuruna imza atıb! 🌟

28 iyun 2026-cı il tarixində İtaliyanın Roma şəhərində keçirilən “ROMA CUP” beynəlxalq gimnastika yarışında Pəri I və II yerlərə layiq görülərək yüksək nəticə göstərib. 🥇🥈👏

Bu möhtəşəm nailiyyət münasibətilə istedadlı şagirdimizi, onun valideynlərini və məşqçilərini ürəkdən təbrik edir, Pəriyə gələcək yarışlarda daha böyük uğurlar arzulayırıq!
Abşeron - Xızı Regional Təhsil İdarəsi
Xırdalan 11 nömrəli tam orta məktəb