11/06/2026
Biləsuvar şəhər Orxan Əkbərov adına Uşaq İncəsənət Məktəbində "İnsan Hüquqları Aylığı" çərçivəsində "Hüquqlarımız və Vəzifələrimiz" mövzusunda maarifləndirici tədbir keçirilib.
Tədbirdə müəllimlər, şagirdlər və valideynlər iştirak ediblər.
Əvvəlcə iştirakçılara insan hüquq və azadlıqlarının mahiyyəti, vətəndaşların hüquq və vəzifələri, hüquq mədəniyyətinin formalaşdırılması və insan hüquqlarının qorunmasının əhəmiyyəti barədə ətraflı məlumat verilib.
Çıxış edənlər insan hüquqlarının cəmiyyətin inkişafındakı rolundan, hər bir şəxsin hüquqları ilə yanaşı vəzifələrinin də mövcud olmasından bəhs edərək, qarşılıqlı hörmət, məsuliyyət və qanunun aliliyinin vacibliyini vurğulayıblar. Daha sonra mövzu ilə bağlı maarifləndirici videoçarx nümayiş etdirilib. Videoçarx iştirakçılar tərəfindən maraqla qarşılanıb və insan hüquqlarının qorunmasının əhəmiyyəti barədə faydalı məlumatların əldə olunmasına şərait yaradıb.
Tədbirin növbəti hissəsində auditoriya ilə sual-cavab təşkil olunub, iştirakçıları maraqlandıran suallar cavablandırılıb, mövzu ətrafında fikir mübadiləsi aparılıb.
Sonda qeyd olunub ki, belə maarifləndirici tədbirlərin keçirilməsi gənc nəslin hüquqi biliklərinin artırılmasına, onların hüquq və vəzifələri barədə məlumatlılığının yüksəldilməsinə, hüquq mədəniyyətinin və vətəndaş məsuliyyətinin formalaşmasına mühüm töhfə verir.
