Qusar rayon İcra Hakimiyyəti

Qusarda minlərlə idmansevər “Zirvəyə Doğru Qaçış" yarışında güclərini sınayıblar

28 May – Müstəqillik Günü Qusar rayonunda 2026-cı ildə də idmanın və milli birliyin bayramına çevrildi. Şəhərdə keçirilən “Zirvəyə Doğru Qaçış" adlı kütləvi qaçış yarışı minlərlə insanın iştirakı ilə əsl bayram ab-havası yaratdı.
Azərbaycan Respublikasının Gənclər və İdman Nazirliyi, Qusar Rayon İcra Hakimiyyəti, Azərbaycan Atletika Federasiyası, “METAK” şirkəti və digər qurumların birgə təşkilatçılığı ilə keçirilən yarış həm sağlam həyat tərzinin təbliği, həm də milli birlik və xeyriyyəçilik ideyalarının təşviqinə xidmət edirdi.
Əvvəlcə Ulu Öndər Heydər Əliyevin Qusar şəhərində abidəsi ziyarət olunub, abidə önünə gül dəstələri düzülərək, dahi şəxsiyyətin xatirəsi ehtiramla yad edilib.
Azərbaycan Respublikasının Dövlət Himninin səsləndirilməsi ilə açıq elan olunan yarışın əvvəlində təşkilatçı-sponsor qurumlar barədə məlumat verilib. Qeyd edilib ki, bu tədbir təkcə idman yarışı deyil, həm də sağlam həyat tərzinin təbliği, sosial həmrəylik və xeyriyyəçilik dəyərlərinin birləşdiyi mühüm bir ictimai platformadır.
Qusar Rayon İcra Hakimiyyətinin başçısı Sahir Məmmədxanov rayon əhalisini, iştirakçıları və qonaqları salamlayaraq, belə genişmiqyaslı tədbirin Qusar rayonunda keçirilməsindən məmnunluğunu ifadə edib, Müstəqillik Gününün tarixi əhəmiyyəti haqqında məlumat verib. İcra başçısı qeyd edib ki, Qusar təkcə təbiəti və mədəniyyəti ilə deyil, digər sahələrdə olduğu kimi idman sahəsində də fəallığı ilə seçilir. Ölkəmizdə aparılan uğurlu gənclər və idman siyasətinin nəticəsidir ki, Qusarın yetirməsi olan idmançılarımız bu gün respublika və beynəlxalq səviyyəli yarışlarda ölkəmizi layiqincə təmsil edirlər. Rayon rəhbəri yarışın təşkilatçılarına təşəkkürünü bildirib, iştirakçılara uğurlar arzulayıb və “Zirvəyə Doğru Qaçış" yarışının ötən il də Qusarda böyük təntənə ilə keçirildiyini və artıq ənənə halını aldığını diqqətə çatdırıb.
Azərbaycan Respublikasının Gənclər və İdman Nazirliyinin sektor müdiri Aydın Məmmədov çıxışında ölkəmizdə idmanın inkişafında Ulu Öndər Heydər Əliyevin tarixi roluna toxunaraq qeyd edib ki, bu günkü idman siyasətinin təməli məhz həmin illərdə qoyulub və hazırda Prezident İlham Əliyevin rəhbərliyi ilə uğurla davam etdirilir. Belə kütləvi tədbirlərin bölgələrdə keçirilməsini təqdirəlayiq hesab edən natiq, rayon rəhbərliyinə və digər təşkilatçılara göstərilən dəstək və yüksək təşkilatçılıq üçün təşəkkür edərək qeyd edib ki, Gənclər və İdman Nazirliyi də belə təşəbbüsləri dəstəkləməyə davam edəcəkdir.
“METAK” şirkətinin təsisçisi Alik Kərimov yarışın təşkilinə dəstək göstərməkdən məmnunluq duyduqlarını bildirib və bu cür layihələrin davamlı olmasının önəmini vurğulayıb, gənclərə müraciətində onları zərərli vərdişlərdən uzaq durmağa, idmanla məşğul olmağa və ən əsası Vətənə layiqli övlad olmağa çağırıb.
İki məsafə üzrə – 11 km və 22 km – təşkil olunmuş yarışda təkcə Qusar rayonundan və ətraf bölgələrdən deyil, Bakı şəhərindən və xarici ölkələrdən gələn 1000-dən çox idmançı öz güclərini sınayıblar.
Gərgin mübarizədən sonra müxtəlif kateqoriyalar üzrə qaliblər müəyyənləşib. Mükafatlandırma mərasimində qaliblərə pul mükafatları və qiymətli hədiyyələr təqdim olunub.

28 May - Azərbaycanın Müstəqillik Günü

Qusarda məişət zorakılığının qarşısının alınması mövzusunda regional təlim keçirilib

Mayın 26-da Qusar rayonunda Ailə, Qadın və Uşaq Problemləri üzrə Dövlət Komitəsinin təşkilatçılığı, Qusar Rayon İcra Hakimiyyətinin dəstəyi ilə Qusar və qonşu rayonların icra hakimiyyətlərinin məişət zorakılığının qarşısının alınması üzrə monitorinq və əlaqələndirmə qruplarının üzvləri üçün təlim təşkil olunub.
Tədbirin açılışında Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova çıxış edərək Komitənin bu istiqamətdə həyata keçirdiyi işlər və qarşıda duran əsas vəzifələr barədə məlumat verib. “Dövlət Komitəsi olaraq əsas məqsədimiz təkcə hüquqi mexanizmlərin tətbiqi deyil, eyni zamanda cəmiyyətdə məişət zorakılığına qarşı mənfi münasibətin formalaşdırılması, maarifləndirmə və profilaktik tədbirlərin genişləndirilməsidir. Rayonlarda fəaliyyət göstərən monitorinq və əlaqələndirmə qrupları məhz bu məqsədə xidmət edir. Sizin yerlərdə gördüyünüz operativ iş, vətəndaşlarla apardığınız maarifləndirmə söhbətləri və qurumlararası əlaqələndirmə zorakılıq hallarının erkən mərhələdə aşkarlanmasına və qarşısının alınmasına imkan yaradır”, – deyə Sədaqət Qəhrəmanova bildirib.
Qusar Rayon İcra Hakimiyyəti başçısının müavini, Ərazi-təşkilat və ictimai-siyasi və humanitar məsələlər şöbəsinin müdiri Ceyhun Hacıyev qonaqları salamlayaraq rayonda bu sahədə mövcud vəziyyət barədə məlumat verib və statistik göstəriciləri diqqətə çatdırıb, məişət zorakılığının qarşısının alınması istiqamətində görülən profilaktik tədbirlərdən, monitorinq qrupunun fəaliyyətindən və həyata keçirilən maarifləndirmə işlərindən danışıb.
Təlim çərçivəsində iştirakçılara monitorinq və əlaqələndirmə qruplarının fəaliyyət mexanizmi, “Məişət zorakılığının qarşısının alınması haqqında” Azərbaycan Respublikasının Qanununa və Ailə Məcəlləsinə edilmiş son dəyişikliklər ətraflı izah edilib.
Daha sonra yerli icra hakimiyyətlərindən daxil olan məlumatlar əsasında rayonlarda mövcud statistika təhlil olunub. Xızı, Quba, Xaçmaz, Şabran və Siyəzən rayonlarının monitorinq və əlaqələndirmə qruplarının gördüyü işlər, həyata keçirilən maarifləndirmə və profilaktik tədbirlər müzakirə edilib. İştirakçılar qarşılaşdıqları çətinliklər və həll yolları barədə fikir mübadiləsi aparıblar.
Təlimin sonunda iştirakçıların sualları cavablandırılıb və əməkdaşlığın gücləndirilməsinin vacibliyi qeyd olunub.

Hörmətli həmvətənlər!

Sizi və Azərbaycanın hüdudlarından kənarda yaşayan bütün soydaşlarımızı müqəddəs Qurban bayramı münasibətilə ürəkdən təbrik edir, hər birinizə ən səmimi arzularımı yetirirəm.

İslamın sonuncu səmavi din və mənəvi-əxlaqi qurtuluş yolu olaraq bəşəriyyətə göndərilməsini təcəssüm etdirən Qurban bayramı günlərində milyonlarla müsəlman Həcc ziyarətində bir araya gəlir, birlik və bərabərliyin, nəcib amallar uğrunda hər cür fədakarlığa hazır olmanın qürur və sevincini yaşayır.

Hər il ölkəmizdə ümumxalq bayramı kimi qeyd olunan Qurban mərasimləri insanlar arasında həmrəylik, humanizm və mərhəmət duyğularını daha da gücləndirir, cəmiyyətimizdə milli-mənəvi dəyərlərə bağlılığın, xeyirxah əməllərin təntənəsinə çevrilir.

Əziz bacı və qardaşlarım!

Bu mübarək günlərdə şəhidlərimizin ölməz xatirəsini bir daha minnətdarlıqla yad edir, xalqımızın və dövlətimizin əmin-amanlığı naminə etdiyiniz duaların Tanrı dərgahında qəbul olunması diləyi ilə ailələrinizə xoşbəxtlik, süfrələrinizə bol ruzi və bərəkət arzulayıram.

Qurban bayramınız mübarək olsun!

“Azəristiliktəchizat” ASC-nin sədri İlham Mirzəliyev Qusar rayonunda vətəndaş qəbulu keçirib

Mayın 26-da “Azəristiliktəchizat” ASC-nin sədri İlham Mirzəliyev Qusar rayonunda Quba və Qusar sakinlərinin qəbulunu keçirib. Qəbuldan əvvəl “Azəristiliktəchizat” ASC-nin sədri İlham Mirzəliyev və Qusar Rayon İcra Hakimiyyətinin başçısı Sahir Məmmədxanov Ümummilli Lider Heydər Əliyevin abidəsini ziyarət edib, Ulu Öndərin abidəsi önünə gül dəstələri düzərək, əziz xatirəsinə ehtiramlarını bildiriblər.
Heydər Əliyev Mərkəzində keçirilən qəbulda vətəndaşların müraciət və təklifləri dinlənilib, qaldırılan məsələlərin hərtərəfli öyrənilməsi və qanunvericiliyin tələblərinə uyğun operativ şəkildə həll edilməsi üçün müvafiq tapşırıqlar verilib.

Qusar Rayon İcra Hakimiyyəti başçısının Qurban bayramı münasibətilə rayon sakinlərinə təbriki

Hörmətli qusarlılar, əziz bacılar və qardaşlar!
Sizi İslam dünyasının müqəddəs bayramlarından olan Qurban bayramı münasibətilə səmimi qəlbdən təbrik edirəm. Bu mübarək günün hər evə sevinc, hər süfrəyə bərəkət, hər qəlbə sülh və əmin-amanlıq gətirməsini arzulayıram.
Qurban bayramı insanı Allaha yaxınlaşdıran, qəlbləri təmizləyən, cəmiyyətdə mərhəmət, həmrəylik və qarşılıqlı kömək hissini gücləndirən ali bir fəzilət bayramıdır. İslamın mütərəqqi ənənələrini davam etdirən, onun yüksək dəyərlərinə sahib olan xalqımız dini bayramlara xüsusi önəm verməklə, Qurban mərasimlərini hər il böyük təntənə və yüksək əhval-ruhiyyə ilə keçirir. Bu bayram günlərində respublikamızın hər yerində olduğu kimi, Qusar rayonunda da qurbanlar kəsilir, xalqımızın firavanlığı, sülh və əmin-amanlığı üçün dualar edilir, xeyriyyəçilik işləri görülür. Bu bayram günlərində şəhidlərimizin əziz xatirəsini yad edir, ürəyi Vətən sevgisi ilə döyünən hər bir vətəndaşımıza dərin ehtiramımızı ifadə edirik.
Prezident cənab İlham Əliyevin rəhbərliyi ilə ölkəmizdə milli-mənəvi dəyərlərin qorunması, dinlərarası və millətlərarası dialoqun möhkəmləndirilməsi istiqamətində məqsədyönlü siyasət həyata keçirilir. Zəngin tarixi, çoxmillətli tərkibi və tolerantlıq mühiti ilə seçilən Qusar rayonunda da bu siyasət uğurla davam etdirilir.
Qusar rayonunda da bayram günlərində müxtəlif xeyriyyə və sosial dəstək tədbirləri həyata keçirilir. Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərə və şəhid ailələrinə bayram sovqatları təqdim edilir.
Əziz həmvətənlər!
Bir daha Qurban bayramınızı səmimi qəlbdən təbrik edirəm. Bu müqəddəs bayram günlərində etdiyiniz dualar, kəsdiyiniz qurbanlar Tanrı dərgahında qəbul olunsun.
Bayramınız mübarək!

Rayon icra hakimiyyətinin başçısı Qusar Peşə Liseyinin tələbələri ilə görüşüb

Dövlətin gənclər siyasətinin əsas istiqamətlərindən biri gənclərin əmək bazarının tələblərinə uyğun peşə və ixtisaslara yiyələnməsi, müasir bilik və bacarıqlara malik ixtisaslı kadr kimi formalaşmasıdır. Bu istiqamətdə peşə təhsili müəssisələrinin maddi-texniki bazasının möhkəmləndirilməsi, tədrisin keyfiyyətinin yüksəldilməsi daim diqqət mərkəzində saxlanılır.
Qusar Rayon İcra Hakimiyyətinin başçısı Sahir Məmmədxanov mayın 25-də Qusar Peşə Liseyində tələbələrlə görüşüb, təhsil müəssisəsinin fəaliyyəti ilə yerində tanış olub, tələbələrin əl işlərindən ibarət sərgiyə baxış keçirib, ardınca tədris otaqlarına, idman və akt zalına baxış keçirib. İcra başçısına təhsil müəssisəsində tədris prosesinin təşkili, mövcud ixtisaslar, tələbələrin nəzəri və praktiki hazırlığı barədə ətraflı məlumat verilib.
Liseyin akt zalında davam etdirilən görüşdə Ümummilli Lider Heydər Əliyevin və respublikamızın ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. Tədbirdə çıxış edən rayon icra hakimiyyətinin başçısı Sahir Məmmədxanov qeyd edib ki, ölkə Prezidenti cənab İlham Əliyevin rəhbərliyi ilə həyata keçirilən uğurlu gənclər siyasəti gənc nəslin hərtərəfli inkişafına geniş imkanlar açır. İcra başçısı çıxışında peşə təhsilinin əmək bazarının tələblərinə uyğunlaşdırılmasının vacibliyini vurğulayaraq bildirib ki, gənclərin müasir bilik və bacarıqlara yiyələnməsi onların gələcəkdə rəqabətqabiliyyətli mütəxəssis kimi formalaşmasına şərait yaradır. Rayon rəhbəri liseydə tədrisin təşkili səviyyəsini, tələbələrin praktiki hazırlığını yüksək qiymətləndirərək liseyin rayonda peşə ixtisaslı kadrların hazırlanması, əmək bazarının tələblərinə uyğun ixtisaslı işçi qüvvəsinin formalaşdırılması, gənclərin məşğulluğunun təmin edilməsində mühüm rola malik olduğunu diqqətə çatdırıb.
İcra başçısı tələbələrlə səmimi söhbət edərək onların təhsil aldıqları ixtisaslar, həmin ixtisaslarla bağlı gələcək planları ilə maraqlanıb, tələbələrin suallarını cavablandırıb.

Qusar Rayon İcra Hakimiyyətində vətəndaşların növbəti fərdi qəbulu keçirilib

Qusar rayonunda rayon rəhbəri tərəfindən əhalinin müxtəlif təbəqələri ilə mütəmadi ünsiyyətin qurulması, müraciətlərin yerində dinlənilməsi və qanunvericiliyə uyğun həlli istiqamətində işlər ardıcıl şəkildə davam etdirilir.
Mayın 25-də rayon icra hakimiyyətinin başçısı Sahir Məmmədxanov şəhid ailəsinin üzvü və bir qrup Vətən müharibəsi qazilərini fərdi şəkildə qəbul edib. Vətəndaşlar tərəfindən müxtəlif məzmunlu müraciətlər səsləndirilib. Torpaq sahəsi ilə təmin olunma, son günlər müşahidə olunan yağıntılı hava şəraiti nəticəsində dəymiş zərərin aradan qaldırılması üçün köməklik göstərilməsi, habelə əlillik dərəcəsinin bərpası məsələləri müraciətlər sırasında yer alıb.
İcra başçısı hər bir müraciəti diqqətlə dinləyib, müraciətlərin araşdırılması və qanunvericiliyin tələblərinə uyğun həlli məqsədilə müvafiq tapşırıqlarını verib. Qeyd edib ki, müraciətlərin icra vəziyyəti nəzarətdə saxlanılacaq və nəticəsi barədə vətəndaşlara məlumat veriləcək.
Qəbula gələn vətəndaşlar şəhid ailələri, qazilər və müharibə iştirakçılarına göstərilən diqqət və qayğıya görə ölkə başçısına, bu siyasətin Qusar rayonunda uğurla icrasına görə rayon rəhbərinə minnətdarlıqlarını ifadə ediblər.

Qusar rayonunda növbəti əmək yarmarkası keçirilib

Mayın 25-də Qusar Rayon İcra Hakimiyyətinin dəstəyi, Dövlət Məşğulluq Agentliyinin Quba-Xaçmaz Regional Məşğulluq filialının təşkilatçılığı ilə Qusarda əmək yarmarkası keçirilib.
Qusar Rayon Heydər Əliyev Mərkəzində təşkil olunan yarmarkada işaxtaranlara 59 vakant iş yeri təqdim olunub. İşəgötürənlərlə işsiz və işaxtaran vətəndaşların birbaşa görüşünü təmin etməklə onların əmək bazarına çıxışını asanlaşdırmaq məqsədilə keçirilən əmək yarmarkasında 8 müəssisə tərəfindən kredit mütəxəssisi, satış meneceri, kassir, mühasib, anbardar, qeydiyyatçı və digər peşələr üzrə 60-dan çox vakansiya təqdim edilib.
Vakansiyalara dair tələblər təhlil olunaraq, işsiz və işaxtaran şəxs kimi qeydiyyatda olan 400-dən çox vətəndaş dinlənilib, 116 vətəndaşın müraciəti qeydə alınıb.

28 May-Müstəqillik Günü

28 May tarixi Azərbaycan xalqı üçün təkcə siyasi əhəmiyyət daşıyan gün deyil, eyni zamanda milli qürurun və dövlətçilik irsinin təcəssümüdür. 1918-ci ilin bu günündə Azərbaycan Xalq Cümhuriyyətinin yaradılması ilə Şərqdə ilk dəfə parlamentli demokratik respublika quruldu. Bu hadisə xalqımızın uzun illər boyu qəlbində bəslədiyi istiqlal arzusunun reallaşması demək idi.
Cəmi 23 ay fəaliyyət göstərsə də, Azərbaycan Xalq Cümhuriyyəti milli dövlətçilik tariximizdə dərin iz buraxdı. Qısa müddət ərzində dövlət atributlarının qəbul edilməsi, parlamentin fəaliyyətə başlaması, milli ordunun yaradılması, təhsil və mədəniyyət sahəsində həyata keçirilən islahatlar gənc respublikanın güclü siyasi iradəyə sahib olduğunu göstərdi. Bu təcrübə bir daha sübut etdi ki, Azərbaycan xalqı müstəqil dövlət qurmaq və onu idarə etmək qüdrətinə malikdir.
Qeyd etmək lazımdır ki, Cümhuriyyət dövründə demokratik prinsiplərə xüsusi yer verilirdi. Qadınlara seçki hüququnun tanınması həmin dövr üçün inqilabi addım idi və bir çox Avropa ölkəsindən daha əvvəl reallaşmışdı. Bu qərar Azərbaycanın mütərəqqi və müasir dövlətçilik baxışına sahib olduğunu ortaya qoydu. Eyni zamanda, vətəndaşların milli, dini və etnik mənsubiyyətindən asılı olmayaraq hüquqlarının bərabər qorunması Cümhuriyyətin əsas prinsiplərindən biri idi.
Beynəlxalq vəziyyətin mürəkkəbliyi və daxili çətinliklər nəticəsində Azərbaycan Xalq Cümhuriyyəti 1920-ci ildə fəaliyyətini dayandırdı. Lakin müstəqilliyin itirilməsi xalqın azadlıq arzusunu söndürmədi. Azərbaycan xalqı istiqlal ideyasını yaddaşında qoruyub saxladı və onu gələcək nəsillərə çatdırdı. 1991-ci ildə Azərbaycan yenidən dövlət müstəqilliyini bərpa etdi. Bu gün müasir Azərbaycan Prezident İlham Əliyevin rəhbərliyi ilə böyük inkişaf yolu keçir.

Rayon ərazisində müşahidə olunmuş intensiv yağıntılardan sonra yerlərdə cari vəziyyət müzakirə edilib

Son günlər rayon ərazisində müşahidə olunan intensiv yağıntılar bəzi yaşayış məntəqələrində müəyyən fəsadlara səbəb olub. Hava şəraitinin qeyri-sabitliyi nəzərə alınaraq Rayon İcra Hakimiyyəti və digər aidiyyəti qurumlar tərəfindən qabaqlayıcı tədbirlər, baş vermiş fəsadların aradan qaldırılması üçün müvafiq işlər görülüb və davam etdirilir.
Mayın 25-də Qusar Rayon İcra Hakimiyyətində rayon icra hakimiyyətinin başçısının, RİH Başçısı Aparatının məsul əməkdaşlarının, rayonun yol infrastrukturu, qaz və elektrik təchizatı, su təsərrüfatı sahələri üzrə rəhbər şəxslərin, habelə inzibati ərazi dairələri üzrə icra nümayəndələrinin iştirakı ilə keçirilən iclasda intensiv yağışlardan sonra rayonun yaşayış məntəqələrində cari vəziyyət, fəsadların aradan qaldırılması istiqamətində görülmüş işlər, mövcud problemlər, kənd yollarının vəziyyəti, əhalinin ərzaq və kommunal xidmətlərlə təminatı məsələləri müzakirə olunub.
İnzibati ərazi dairələri üzrə icra nümayəndələri yerlərdə mövcud vəziyyət, görülən işlər və qalmaqda olan problemlərlə bağlı ətraflı məlumat veriblər.
İclasın yekununda rayon icra hakimiyyətinin başçısı əhalinin fasiləsiz olaraq qaz, su və elektrik enerjisi ilə təmin olunması, qarşıdan gələn bayram günlərində kommunal xidmətlərdə fasilələrin yaranmaması ilə bağlı aidiyyəti qurumlara konkret tapşırıqlar verib. Bildirilib ki, rayon ərazisində vəziyyət daim nəzarətdə saxlanılır və hər hansı təxirəsalınmaz hallarla bağlı operativ tədbirlər görülür.